Popular Bible Verses from SAN MATEO 8

Share

Li' nguxacui̱ Jesús cha' ji'i̱ ngu' bi': ―¿Ni cha' ntsi̱i̱ tsa ma̱? ―nacui̱ ji'i̱ ngu'―. ¡Xi tsa tyempo ndalo ma̱, cha' ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni cña! Lo'o li' ndyatu̱ Jesús, nchcui' lo'o cui'i̱ lo'o clyoo' cha' cua'a ji'i̱ cha' bi'; hora ti ngua ti̱ bi' li'.

Hora ti nguxacui̱ capitán cha' ji'i̱ Jesús li': ―Xu'na ―nacui̱ yu ji'i̱ Jesús―, ná tso'o tsaa nu'u̱ to' tyi na', cha' si'i ñati̱ tso'o laca na'. Tsa bi' ti cha' nti' na', cha' culo nu'u̱ cña cha' cati̱ quicha bi' tsiya' ti; jlo ti' na' cha' caca tso'o msu 'na li', masi tyijyu' ti tyu̱ nu'u̱ chcui'.

Ndube tsa ti' Jesús lo'o ndyuna cha' nu nchcui' capitán bi'. Li' nchcui' Jesús lo'o nu quiña'a̱ tsa ñati̱ nu lca'a̱ ji'i̱: ―Liñi tsa cha' nchcui' na' lo'o ma̱ juani ―nacui̱ Jesús ji'i̱ ngu'―. Bilya ña'a̱ na' tsiya' ti ji'i̱ sca ñati̱ nu tso'o tsa jlya ti' ji'i̱ ycui' Ndyosi, ñi'ya̱ jlya ti' nu capitán re; tyucui ña'a̱ nasiyu̱ Israel re ná ntsu'u ngu' nu jlya ti' jua'a̱.

Li' xa' nchcui' Jesús lo'o nu capitán bi': ―Yaa nu'u̱ to' tyi nu'u̱ lacua ―nacui̱ ji'i̱―. Jlya ti' nu'u̱, bi' cha' cua ndyaca tso'o nu quicha bi' jinu'u̱ juani ti ―nacui̱ Jesús ji'i̱. Lo'o la cui' hora ngua tso'o msu bi'.

Ndube tsa ti' ngu' bi' li', cha' ngua ti̱ tsiya' ti clyoo' lo'o cui'i̱ bi'. ―¿Ti ñati̱ ta laca nu cusu' re? ―nacui̱ ngu' ji'i̱ tya'a ngu'―. Ndaquiya' clyoo' ji'i̱, jua'a̱ nduna cui'i̱ cha' nu nchcui' nu cusu' re lo'o.