Popular Bible Verses from Matthew 23

Share

Naxıta gots'ǫ dǫ denahk'e wet'àaɂàa sìı naxıgha eghàlaedaa-dǫǫ̀ elı̨ ha.

Amìı edeghǫ xàhodìı sìı edeghǫ į̀į̀zhagı̨ı̨lı̨į̀ agedle ha, eyıts'ǫ amìı k'èeweèt'ı̨ k'ę̀ę̀ edaa sìı weghǫ xàdahodì ha.

“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı, sıì naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Įt'ǫ̀ hazǫǫ̀ xàɂaa nàahtsį̀ı̨ sìı wets'ǫ hoònǫ ı̨łè Nǫ̀htsı̨ ghàahɂà. Hanìkò nàowo wet'àaɂàa sìı ts'ǫnıahɂà-le. Dıı sìı nàowo wet'àaɂà hǫt'e: ehkw'ı ełesınìyats'ehtıı, etełets'eèɂı̨ı̨ eyıts'ǫ ełets'ǫ̀ ehkw'ı ts'eedaa. Eyı nàowo weghàlaahda ha hǫt'e ı̨lè eyıts'ǫ hòt'a ayìı nezı̨į̀ weghàlaahdaa sìı, wedę aahłe ha-le.

“Naxı̨ Nǫ̀htsı̨-yatıì-k'èahdìı-dǫǫ̀ eyıts'ǫ Pharısee yàahłı̨ı̨ sìı naxıgha hoìla nechà ha. Degaı daahtsı̨ kò wek'ę̀ę̀ aahda nıìle! Lıbò eyıts'ǫ kw'à weka zǫ nezı̨į̀ wek'enaahtse, hanìkò naxıdzeè yìı aahdı-le xè t'aahwhǫ k'ę̀ę̀ zǫ aahda.

“Jerusalem got'ı̨į̀, nakwenàoɂǫǫ naxıts'ǫ̀ adlàa sìı naxı̨ kwe t'à ełaàgìahde hǫt'e. K'àba edezaa edı̨ı̨ts'ǫǫ̀ tł'a gòhłaà lanaxehłe ha t'aats'ǫǫ̀ hahwhǫ kò naxı̨ haahwhǫ-le.

Eyı lanì ehkw'ı aahda k'ę̀ę̀ naxègaat'ı̨, hanìkò naxıdzeè yìı t'aats'ǫǫ̀ hoahts'ì k'ę̀ę̀ aahda eyıts'ǫ hołı̨ı̨-nàowoò k'ę̀ę̀ nànıahdè.