Popular Bible Verses from SAN MARCOS 13

Share

Ryete mèn co' nac mèn chol nación, mèna yecloo ñèe gu' por cón chenen no maste. Per chol gu' co' mbli nèeque' gu' loo cón chenen par yòo gu' loo cón chenen axta gath gu', gu'a lyá'que' loo con' ryes.

Por cona, ngue niin loo gu': Nalas gure gu'. Ne'gàcte gu' xal mèn co' nzi yàt loo cón che'n Diox. Gurez gu' Diox. Tac gu' inda'de cuent pól zin tiemp co'se' gàc con' co' ngue niin loo gu' ndxè'.

No co'se' hue' mèn gu' par ta' mèn gu' loo mèn nac zin' yòolau chol lugar, ne'tyóode gu', no ne'zyebte gu', no ne' ne' gab gu' loo lezo' gu' cón gab gu' loo mèna. Guuz gu' di's co' lu' Diox loo gu' loo mèna hora. Tac inacte ante gu' co' ñii loo mèna. Ndxe'leque', Xpii Natú' nac xa' co' ñii no co' tyoodi's por ro gu', co' nee di's, co' nac di's co' ryo' ro gu' hora.

Bé' no izlyo' co' nziri' nalle' lyux. Ya ne'tolode cue bé' no izlyo' yé' huize'. Per di's co' ndyoodizen no con' co' ndlu'en ne'ri'thte tua'te. Le'i gàcque', no tyaaque', no tyubque' di'sa xalque' ngue toodizen loo gu' nalle'.

Per huiz co'se' gàcpe' con'a no hor co'se' gàcpe' con'a, yende chó mèn nona no yende chó mèn naneei. Ne' yub angl co' nzo loo bé' inaneede pól gàc con'a. Ne' ne' daa co' nac xgan' Diox, inaneeden nalle' coyor gàc con'a. Angoluxte Diox xuden nanee pól gàc tiempa.

Lomisque' ne, co'se' gòn gu' nde'th mèn ndxàc xó', no anze'f ryes naca par tlo xó' le'n tiempa, ne'zyebte gu' co'se' gòn gu' te'th mèn tataa tac tataaque' naquin tlo gàca. Per mastale' tataa gàca le'n tiempa, ne'gàcte tiempa lult huiz co' lyux izlyo' no lith no izlyo'.

Cona, ngue niin loo gu': Nalas gure gu'. No gure naa gu' loo cón che'n Diox. Tac gu' ne'ta'de cuent pól zin Tad, co' nee di's nac daa, co' nac che'n liza. ¿Ché' zin daa hor co' nde làa yál' izlyo' o ché' zin daa gulal yál' o ché' zin daa hor co'se' lé' nguiidtee yál' o ché' zin daa hor co'se' nde yinìi izlyo'? Ne'neede na' coyor gàc con'a, ¿lé'? Tac thìb descuid, chàa, galen loo izlyo' ndxè' thìb hor co' ne'ñeede gu' no thìb hor co' indlide gu' xtùuz zin daa. Ale le'le' zin daa loo gu' hor co'se' le'pe' nziri' gu' loo cón che'n Diox xal mèn co' nzi yàt. Leque di's co' ngue niin loo gu' ndxè' nac di's co' tan'en loo mèn par ta' mèn cuent cón che'n di's ndaca loo alux mèn dib athu loo izlyo' co' naban chol tiemp. Di'sa nee di's: Nalas cue mèn loo cón che'n Diox thidtene.

Tac le'n tiemp co' tlo gàc co' guniin loo gu'a, mèn thìb nación tlo yecloo no tlo yòo xyàn lezo' mèn ñèe mèn tedib nación. No tlo mèn thìb nación, por derech, cua'n xó' mèna thìb xó' loo mèn tedib nación. Le'n tiempa huin xòo huax lugar. No lyàa huin huax lugar. No tlo yátbèe mèn. Tlo mèn, li mèn thìb revuelt. No con' co' tlo gàca nac thìb yalnaxi no thìb yalnè co' pente tlo par tlo tyactìi tín' mèn loo izlyo' ndxè'.

Cona, ngue niin loo gu': Ndoore' co'se' lyux izlyo' no lith no izlyo', naquinque' yath yèn cón che'n di's ndac che'n Diox co' ndlu' xá mod lyá' mèn loo con' ryes. No naquinque' co mèn yalbàn cón che'n di's ndac loo mèn, mèn co' nac mèn chol nación co' nziri' dib athu loo izlyo'.

Tac co'se' gàc tiempa, anze'f huax mèn ryo' tee no yi'th que tee mèna yèez por yèez mèn no liz por liz mèn. Mèna ñee le' daa mtel' mèna. No ñee mèna le' mèna nac Crist. Tataa mod anze'f huax mèn quedìi mèna.

Anderhuen gu'. Chó Diox chó nee gu'. Leque gu' quenap gu' co'se' tlo gàc con'a le'n tiempa. Le'n tiempa, ale ta'xù' mèn gu' loo mèn nac zin' yòolau chol lugar. No ta' mèn che'n gu' co'te' nac sinagog mèn. Gu' tyooxù' loo mèn co' nac gobernador no loo mèn co' nac rey por cón chenen no maste. Tataa mod más gác gu' no ta'i thìb lugar loo gu' par ta' gu' cuent loo mèn cón chenen.

Tac tiempa yi'th huax mèn gutyè' co' ñee loo gu' nac mèna Crist xal daa. No ñee mèna loo gu' nac mèna mèn co' nde'th di's co' ndxab Diox cón che'n Diox. No li mèna gàc huax yalguzye' co' gàc xal thìb señ co' hui' mèn loo mèna. No li mèna huax yalguzye' roo no yalguzye' xèn par quedìi mèna mèn. No axta li mèna preb, ¿ché' tli mèna gan quedìi mèna mèn co' yub Diox mcui par yila's mèn co' Diox mcui loo mèna, ne?

Tolo niin con' loo gu': Co'se' yilo riid tiemp co'se' ten' mèn yalnèa no yaltìia, syare' gàc tiemp co'se' cuau loo huiz no cuau loo mbe' par ne'tenìide huiz no ne'tenìide mbe' loo izlyo'. Huiza lyàateri' huax mbèelhui' no huax mbyáz loo izlyo'. No ryete con' co' nac con' roo no con' xèn loo bé' tlo huin no xi'th le'n tiempa.