Popular Bible Verses from Ahäkahäk 27

Share

Anututä guk näburum ba kome täŋo gakŋi gamiŋirän säguom ba wain ahäŋ bumbum täkot. Äma komeni komenitä oraŋ gamiŋpäŋ piä täŋ gamik täkot. Täŋirä notkayeta intäjukun täŋ yämisi. Ba meŋka täŋo äbotken naniktä oraŋ gamik täkot. Täŋkaŋ kubätä tagwän man gäweränä unita kowata tagwän man u terak äroton. Ba kubätä ganiŋ orerirän kowata udegän ahäŋ imiton.

Ude iweränä Isotä yäŋkuk; Wa! Wäpi Jekop yäŋ iwerani uku ubayäŋ! Kadäni yarä yäŋnäkŋarani täyak. Kubäwä intäjukun ahäk-ahäk täŋo tuŋum yäpmäkta biŋam wäp uwä nomägatkuk yäk. Täŋpäkaŋ apiŋowä nana täŋo kon man näka namikta yäwani nomägatak yäk. Ude yäŋpäŋ yäŋkuk; Näka biŋam kon man kubä itak ba nämo?

Konäm korirän Aisaktä iwetkuk; Guk näburumtä nämo api täŋkentäŋ gamek. Ba kome gakŋi nämoken api kuŋaren. Bureni, gäk ämik täŋpäŋ ketem api kaŋ-ahäwen. Täŋkaŋ gäk monäkata watä piä api täŋ imen. Upäŋkaŋ gäk piä täŋ imikta gaŋani nadäŋpäŋä ärowani täŋ imiŋpäŋ kaŋumuntaŋ api kwen.

Ude yäwänä Isotä iwetkuk; O nana, kon manka kubägän paorako uba? Näk imaka, kon man näwet yäk. Ude yäŋpäŋ konäm kähän yäŋpäŋ kotkuk.