Popular Bible Verses from Yoane 15

Share

Naŋa warakâŋgu nde kâi waini, aŋga miki nde kâi waini ne laka. Tamâta ea ipaipa kuku naŋa, aku naŋa kala apaipa kuku i, ande tamâta ŋinde ma ipula kanaŋo rârâ. Ambo miki kapaipa kuku naŋa tia, ande miki ma kakura tu kaveta vetâŋa ara toŋge tia.

Ambo miki kapaipa kuku naŋa, ande naŋa kala ma apaipa kuku miki mine nâ. Kâi waini ne laka toŋge simbo nâ ikura ŋana ipula kanaŋo kâ, ande tia. Taitu miki kaloŋo ŋga; ambo laka ipasipa kuku kâi waini, ande laka ŋinde ikura ŋana ipula kanaŋo kâ. Aku mine nâ, ambo miki kapaipa kuku naŋa tia, ande miki ma kakura tu kaveta vetâŋa ara pinde itogo kanaŋomi mine, ande tia.

Ambo miki kapaipa kuku naŋa, aku naneŋgu ŋgua nde ikeno kaika lâ ilomi, ande miki ma kano pa Maro Kindeni ikura warakami nemi ilo papa mine, ŋineŋga i ma iveta vetâŋa ndainani nâ, itogo miki muŋga kano papa mine.

Miki ŋandai kapatea naŋa ŋga. Naŋa apatea miki lâ, aku asupwami tu kalâ kaveta vetâŋa ara rârâ, itogo kanaŋomi mine. Aku kanaŋomi ŋinde ma ikeno mine ku imo nâ. Ambo miki ma kano pa Mama lâ naŋa ŋâŋgu tu ma iveta vetâŋa toŋge pami, ande i ma iveta vetâŋani ndaina.

Ambo tamâta toŋge ipayaula tamwata ne via ŋana ivilanzi ni-nambwe kâ, ande i ne vetâŋa ŋinde itula pwataki tu i tini mwasa ndo panzi. Aku tini-mwasa kie mine ipole tini-mwasa kie-kie rârâni.

Naneŋgu laka ndia uru sipula kanaŋonzi tia, ande Mama itotonzi ŋinde rârâni piti lâ kâi waini tini, aku itambiranzi lâ. Aŋga laka ndia uru sipula kanaŋonzi, ande Mama itotonzi ŋinde rârâni sipâŋga mbwana-mbwana. Ivetanzi sondo mine ŋana isukanzi tu sipula kanaŋonzi rârâ.

Naŋa aporo ŋgua tukuŋa imâ pami mine: Miki taitu-taitu ma tinimi mwasa ndo panzi tinimi pinde, itogo naŋa tiniŋgu mwasa ndo pa miki mine nâ.

Ambo miki ma kaveta vetâŋa ara rârâ, itogo kanaŋomi mine, ande nemi vetâŋa ŋinde ma itula pwataki tu miki kapono muli pa naŋa lâ; aku ŋinde ma igagatinzi tamâta ilonzi tu ma sipanea Mama ŋa.

Yesu iporo ŋgua kilo panzi ne pâri-tamâta tu, “Naŋa warakâŋgu nde kâi ‘waini’ mao, aŋga naŋa Mama nde tâno waini warika.

Ambo tamâta toŋge tini pwâka tu ipaipa kuku naŋa, ande tamâta ŋinde itogo kâi laka kinzi sikai piti ku sitambira lâ, kala ŋgâla-ŋgâla lâ. Kinzi uru sigona kâi laka ŋgâla-ŋgâla ŋinde ilâ taitu, ŋineŋga siliŋi lâ yââ ilo kana lâ.

Naŋa iloŋgu tu naneŋgu ndekâŋa ma imo ilomi kalomi, ŋana iveta nemi ndekâŋa ipâŋga ŋalae tina. Mine nde naŋa aporo ŋgua ŋine pami lâ.

Naŋa uru apaveta sondo kuku naŋa Mama kawa ŋgua rârâni. Mine kala i tini mwasa ndo pa naŋa, ma imo mine ku imo nâ. Aku mine nâ, ambo miki kala kapaveta sondo kuku kawâŋgu ŋgua rârâni, ande miki ma kasama tu naŋa tiniŋgu mwasa ndo pami, ma amo mine ku amo nâ.

Naŋa aporo ŋgua tukuŋa imâ pami mine: miki taitu-taitu ma tinimi mwasa ndo panzi tinimi pinde.”

Ambo miki kamo katogonzi tâno tamâta, ande kinzi ma tininzi mwasa nâ pami, itogo tininzi mwasa pa warakanzi seenzi mine. Andeta miki ŋandai kamo katogonzi tâno tamâta ŋga. Naŋa apateami tu ma kapile tâno ŋine ne vetâŋa wa ilo-kalo wa. Mine kala kinzi tâno tamâta uru sikai kazâŋa pami.