Luku 22

Jutasato Jisasa Ene Pitukale Leane Oko

Matiyu 26:1-5,14-16; Maki 14:1-2,10-11; Jone 11:45-53

1-2Betesanga yisa napalene nalaini oto gene Pasopa lene oko mandaka epeane-angi, loo tupana mana andene akali tupapi, pitisa akali kawane tupapi, utupane-mane Jisasa peyo ome lolane asia mindi ayia pua ateainipia. Wuane tekeko, Jisasa andi loto, peyo ome loloma-kola, wandakali kambua epo amunguli peyai tupamane nanima towa yataka olopeyai nembo toto, utupanena wenonga bala andi loyale yuku yainipia. 3Jisasa peyo ome lolane asia mindi ayia pua ateai-kola, Satane bala disaipolo alesa tupana akali Jutasa Isaka-tiyote lene oko balanga kolandaka leaipia. #Jo 13:1-3,27

4Kolandaka lea-kola, Jutasa bala poto, pitisa akali kawane tupapi, lotu anda andane okona sukutiti akali kawane tupapi, utupane towa pii lalawa puato, nambato wua puato, Jisasa ene pitukale leaipia. 5Wuane lea-kola, akali utupane-mane bala towa epele wato, Jutasa nimbato wuane peendo, nanimato muni minditupa nimba gulupeyama leainipia. 6Wuane leai-kola, Jutasato atu yalua leaipia. Matili wandakali kambua Jisasa towa atu ata napulai-angi, nambato bala ene pitukale lalu, Jutasato maliyo ateaipia.

Pasopa Tomo Nolane Tupa Mandeke Pulu Peapele Oko

Matiyu 26:17-20; Maki 14:12-16

7Betesanga yisa napalene nalaini oto oko epeya-kola, Juta yame-mane Pasopa tomo tupa namakale nembo toto, sipisipi andopane mindi peyo nalainipia. #Ek 12:1-27 8Oto okone epea-kola, Jisasato Jone, Pita-la, okonelapo lamawuato, Pasopa tomo tupa namakalenga, liyambato mandeke pulu pulupa leaipia. 9Wuane lea-kola, akali okonelapo-mane bala tipa puato, nalipato aninga poto, Pasopa tomo tupa mandeke pipiapi lakae lo nembo telepe leapelepia.

10Wuane leapi-kola, Jisasato akali okonelapo lamawuato, liyambato Jutusaleme tano okona polapi-kola, akali mindimane ipa pene andane mindina ipa ambu awua epoto, liyamba malanda olopeya leaipia. Liyambato akali okone watama poto, anda bala kolandaka lola okona teke liyambapi kolandaka lalapape. 11Kolandaka loto, liyambato anda anduane oko lamawuato, tisa okomane nimba tipa puato, nambana disaipolo tupa towa Pasopa tomo tupa nolane lumu oko aninga eyape lala lalapape.

12Wuane lolapi-kola, balato liyamba atu aiyu poto, dapolo anda kenga okona lumu andane mindi liyamba andawa lolopeya. Lumu andane okonena tepolo tokopi, pitulane tokopi, okonetaka tupa pitaka yolopeya. Lumu okonena, liyambato Pasopa tomo nolane tupa mandeke piyapape leaipia. 13Wuane lea-kola, Jone, Pita-la, liyamba poto andeapi-kola, Jisasato minditaka yolopeya leane tupa pitaka ya-kola, okonelapo-mane Pasopa tomo nolane tupa mandeke peapelepia.

Betesa, Waene-la Okonelapo Neakale Mayane Oko

Matiyu 26:26-30; Maki 14:22-26; 1 Kotini 11:23-25

14Pasopa tomo nolane gii oko epea-kola, Jisasapi, balana disaipolo tupapi, utupane-mane tomo noyale tokonga peteaini-pia. 15-16Peteai-kola, balato utupane lamawuato, andipa Pasopa tomo noloma oko nalu, nambato Pasopa tomo oko dee lapone nanene atama pulu, Goteto yuu oko moyo ando atolo epola oto okona giau lolo-peyawa lo nambato yakama langeyo leaipia. Tene okonena, andipa nambato Pasopa tomo oko yakama towa atu naima lakae lo nembo teyo. Nalu, matili namba tandaka andane nolo-peyawa leaipia.

17-18Wuane lalu, balato waene petene kapo mindi moto, Gote ando wayu pele loto, balana disaipolo tupa lamawuato, andipa namba towa waene neyama oko nalu, nambato waene oko dee lapone nanene atama pulu, Goteto yuu oko moyo ando atolo epola oto okona giau lolo-peyawa lo nambato yakama langeyo-ko. Yakamato waene oko tale pua nalapa leaipia. 19Wuane lalu, balato betesa mindi moto, Gote wayu pele lalu, betesa okone konde lea. Konde loto, balana disaipolo tupa mawuato, oko nambana umbaini oko. [Nambato yakama moyo geyo oko. Matilipi yakamato namba nembo tolo-peke loyale, betesa oko nalapape leaipia.

20Tomo no koyo peai-kola, wuane pua teke, Jisasato waene petene kapo mindi meaipia. Moto, balato utupane lamawuato, nambato pii wenene mindi yakama towa lo yata wato, yakama moyoyale, nambana tundupa ita malamanda okona gae lolowa okomane wandakali tupa pitakana koo tupa apia-maulupeyo leyo.]

21-22Enene, wamba Goteto Akalina Iwanane okonga asia mindi andawa lea-kola, Akalina Iwanane okomane asia okone wato minuto omolo-peya tekeko, bala ene pitula akali oko ondo wete ape-pene. Namba ene pitulane akali okone bala namba towa atu tomo noyale peteyama oko andalapa leaipia. #Sam 41:9; Jo 13:18-22 23Jisasato wuane lea-kola, balana disaipolo tupa yakama teke-teke pii lalawa puato, nanima peteyama tupana apito mana koo okone minuyale peteyape leainipia.

Akali Kawane Api Ateyape Lo Pii Yanda Peaini Oko

24Wuane lalu, Jisasana disaipolo tupa yakama teke-teke pii yanda puato, nanima ateyama tupana akali kawane api ateyape leainipia. #Lk 9:46

25-27Wuane leai-kola, Jisasato utupane tipa puato, tepolo tokonga tomo no pitiyane akali oko bala akali andane lipinga-yale atalaepe. Pee, tomo yanga-maiyane piape akali okomane tomo no pitiyane akali okone sia minuto, lipinga-yale atalaepe. Tomo no pitiyane akali oko bala lipinga-yale atalane tekeko, namba tomo yanga-maiyawane piape akali okonetaka gulo atoto, yakama towa atu ateyama. Enene, wandakali yame waka tupana kiŋi tupa yakama tane akali andane gene yene ateyama nembo toto, wandakali waka tupamane utupanena gene tupa laiyu loto, yakamato nanima moyalaini leakale lalaini. Utupane-mane wuane piyaini tekeko, nambana disaipolo tupa yakamato wuane na-piyapape. Jia. Yakamana akali kawane wetete oko bala wandakali waka tupa pitakana napinga wete gulo atoto, utupanena piape akali gulo atape-pene. #Mt 20:25-28; 23:11; Mk 9:35; 10:42-45; Jo 13:12-16

28-30Wamba nambana ayiane okomane namba kiŋi atape leane. Nambato kiŋi piape pua ateyo-angi, kenda-pene koo kambua tupa nambanga epeya-kola, yakamato namba tepa naene, namba towa atu atalaini. Tene okonena, matili yakama nambana yuu epene okona poto, tomo ipapi, no pitiyapale nembo toto, nambato yakama kiŋi tupa atalapale lokale. Wuane lolowa-kola, yakama kiŋi pitiyaini toko tupana pituto, Isatale tane wandakali yame alesa tupana pii lolai tupa lo tika pulupeyai. Jisasato wuane leaipia. #Mt 19:28

Saimone Pita Nimbato Namba Anda Na-peyawane Lolopele Leane Oko

Matiyu 26:31-35; Maki 14:27-31; Jone 13:36-38

31Okone angi, Jisasato Pita lamawuato, Saimone, Saimone, wandakali tupamane witi dinipi, imbunipi, utupane yapa lalaini pua, Sataneto disaipolo yakama pitaka yapa lo mandeke pukale nembo teya leaipia. 32Sataneto wuane nembo teya tekeko, nimbana bilipi oko wetete koyolane loto, nambato Gote lo pote lauwa-ko. Matili nimba yamapane peke lole-angi, nimbana amene tupa minu tai laya ape leaipia. #Jo 17:15 33Wuane lea-kola, Pitato Jisasa lamawuato, Akali Andane, namba nimba towa atu katapusa andaka pupe-pene guleandopi, omape-pene guleandopi, nambato katulo wuane pukale lo mandeke pitawa ateyo leaipia. 34Wuane lea-kola, Jisasato bala lamawuato, andipa eka pauli maipa mindimane pii nalola-kola, ole tepoainga nimbato wandakali minditupa lamawuato, nambato Jisasa anda na-peyawane lolopele lo nambato nimba langeyo leaipia.

Mandeke Pitawa Atalapape Leane Oko

35Wuane lalu, Jisasato balana disaipolo tupa tipa puato, wamba nambato yakama nuupi, munipi, sukepi, mindi mandi napene, mee pulupa lewa-angi, yakamanga minditaka mindi jia ya-kola ateaipe leaipia. Wuane lea-kola, utupane-mane minditaka mindi nanimanga jia naya-kola, atema leainipia. #Lk 9:3; 10:4

36-37Wuane leai-kola, balato utupane lamawuato, wamba nambato yakama mee pulupa lewa tekeko, andipa Gotena pii pepa pelene eya mindi nambanga enene guloyale peya. Pii okonemane loto, wandakali tupamane akali oko bala mana koo tupa minalane loto, koo pua atalaini akali tupa towa mina mindiki leaini layene eya. Akali minditupa-mane nambanga wuane pulai-kola, pii layene okone nambanga enene gulolo-peya. Tene okonena, andipa yakamato mindisa polai-angi, nuu, muni-la, yaindo, okonelapo mandiyu pupe-pene guleya. Akali mindi bala kandepa luu ai napene ateaindo, balana tona sakesa pulane oko akali waka mindimane kambo meakale salimi loto, muni molane okonemane kandepa luu mindi kambape-pene guleya leaipia. #Ais 53:12 38Jisasato wuane lea-kola, balana disaipolo tupamane bala lamawuato, Akali Andane, nanimato kandepa luu lapo yatawa ateyama leainipia. Wuane leai-kola, Jisasato atu yalua leaipia.

Jisasato Bala Gesemani Olipi Wangiane Okona Poto, Pote Leane Oko

Matiyu 26:36-46; Maki 14:32-42

39Wuane lalu, Jisasa bala Jutusaleme tepa alu, Olipi wangiane okona ole dindi palane pua teke pea-kola, balana disaipolo tupa atu peainipia. 40Wangiane okonena peakaiyu leai-kola, Jisasato balana disaipolo tupa lamawuato, Sataneto yakama minu mandeke pula-kola, yakama yuunga peakolaini. Pote lo atalapa leaipia.

41-42Wuane lalu, Jisasa bala ambinga-yale akali-mane yandate peyo lopape-pene mindi gulo poto, aiki lekawa pote loto, nambana Ayiane Gote, nambato tandaka nape-pene oko peya wanju olane asini mindi yando, nimbato asini okone lumbape. Nimbato wuane pula lo nambato nembo teyo tekeko, nambato nembo teyo pua napene, nimba tane nembo tele pua pipe leaipia. 43-44[Jisasato wuane lo pote lea-kola, enjole mindi ati kenga atala epoto, Jisasa minu tai laya ya-kola, Jisasato lapone teke pote leaipia. Okone angi bala yamapane kenda andane wato, pote taimane lea-kola, weno pundu balanga kili leane okomane tundupa gulo yuunga dopo lo tepa yaepia.]

45Jisasa bala pote lo koyo piyu, ika lalu poto, balana disaipolo tupa andea-kola, utupane-mane yamapane kendawa, limu palu ateaininga andeaipia. 46Andoto, Jisasato utupane lamawuato, anu peakale yakamato limu palu ateyaipe. Sataneto yakama minu mandeke pula-kola, yakama yuunga peakolaini. Ika loto, pote lo atalapa leaipia.

Jutasato Jisasa Ene Peteane Oko

Matiyu 26:47-56; Maki 14:43-50; Jone 18:3-11

47Jisasato wuane lo atea-kola teke, balana disaipolo alesa tupana akali Jutasa lene oko bala akali kambua towa atu epeaipia. Jutasa bala Jisasa nunu loyale, wamba ini ingane bala ateanga mandaka epeaipia. 48Epea-kola, Jisasato bala lamawuato, Jutasa, nimbato Akalina Iwanane oko nunu lele okomane ene petelepe leaipia. 49Wuane lea-kola, balana disaipolo tupamane andeai-kola, akali epeaini tupamane Jisasa andi lolo epalaiya lo andeaini-pia. Andoto, utupane-mane Jisasa tipa puato, Akali Andane, nanimato akali utupa kandepa-mane yoko amape leainipia. 50Wuane lalu, Jisasana disaipolo mindimane pitisa akali kawane okona piape akali mindina alene tikasa-tole kandepa-mane yoko taka lo tepa yaepia. 51Wuane pea-kola, Jisasato kondalapa lalu, akali okonena alenenga kii yata wato, mo atu yaepia.

52Juta yamena akali kawanepi, pitisa akali kawanepi, lotu anda andane okona sukutiti akali kawanepi, utupane-mane Jisasa andi lolo epeai-kola, balato utupane tipa puato, nambato gapomane oko yanda pimawuato, minditaka pake nalane nembo toto, yakamato kandepa luupi, mulipi, utupane awuato, namba andi lolo epeyaipe leaipia. 53Ole dindi namba yakama towa atu lotu anda andane okona ende anda-pangosa ataima. Okone angi, yakamato namba andi nalapia tekeko, undupi-lene okona tai-lene okomane piape taimane peya-kola, yakamato katulo namba andi lolopeyai. Jisasato wuane leaipia.

Pitato Jisasa Anda Na-peyawane Leane Oko

Matiyu 26:57-58,69-75; Maki 14:66-72; Jone 18:15-18,25-27

54Jisasato wuane lea-kola, akali utupane-mane bala andi lo auwa peai-angi, Pita bala amonga-yale ata iki lama watama peaipia. Utupane-mane Jisasa andi lo auwa poto, pitisa akali kawane okona andaka kolandaka leai-kola, Pita bala kamaka ateaipia. #Sam 31:11 55Okone angi, akali minditupa anda okonena ende anda-pangosa ita yango, upa endo yo peteai-kola, Pita bala poto, utupane towa atu peteaipia. 56Petea-kola, piape wanda mindimane bala andapeyo yoto, akali oo peteya oko balapi Jisasa towa atu atalapele leaipia. 57Balato wuane leane tekeko, Pitato wanda okona pii okone tanga loto, wanda, nambato Jisasa anda na-peyawane leaipia.

58Aŋa matili yale akali mindimane Pita andoto, nimbapi Jisasana disaipolo mindi atele lea-kola, Pitato akali okonena pii okone yano peyoto, akali, nambato bala anda na-peyawane leaipia. 59Wuane lea-kola, matili awa mindikipi mindi pea-kola, akali waka mindimane pii leyo nayu loto, akali oko bala Galili disitiki tane yako. Enene wetete, bala Jisasa towa atu atalapele ya leaipia.

60Wuane lea-kola, Pitato akali okone lamawuato, akali, nimbato aki nembo toto, wuane lelepe. Nambato akali okone nembo nateyo. Balato wuane lata ya wete, eka pauli maipa mindimane pii leaipia. 61Eka pauli okonemane pii lea-angi, Akali Andane oko bala anda peke loto, Pita andatawa ya-kola, wamba Akali Andane okomane namba languato, andipa eka pauli maipa mindimane pii wene loyale pula-kola, ole tepoainga nimbato wandakali minditupana wenonga atoto, nambato Jisasa anda na-peyawane lolopele lo namba langiya oko enene ya lo nembo teaipia. 62Wuane nembo toto, Pita bala ende kamaka poto, ai lo yamataka leaipia.

Akali Minditupa-mane Jisasa Ando Lamba Leaini Oko

Matiyu 26:67-68; Maki 14:65

63-64Okone angi, Jisasa kote leakale lo minatawa ateaini akali tupamane bala lamba leainipia. Lamba loto, utupane-mane Jisasana lene lapalapa-mane yake pua ombo wato, bala peyalu, nimba potopesa akali gulo, akali okomane namba peleya lo nanima langi leainipia. 65Wuane lalu, akali utupane-mane Jisasa lamba loto, pii koo waka-waka kambua kimbu pua leainipia.

Juta Yamena Kanjole Okomane Jisasa Kosimi Leaini Oko

Matiyu 26:59-66; Maki 14:55-64; Jone 18:19-24

66Loo tupana mana andene akalipi, pitisa akali kawanepi, akali utupanena minditupa Juta yamena kanjole okona ateainipia. Waa lea-kola, akali utupane-mane Jisasa kosimi lamakale lo epo amunguli peai-kola, akali minditupa-mane Jisasa utupanena wenonga andi lo awua epeainipia. 67Epeai-kola, Juta yamena kanjole akali kawane utupane-mane bala lamawuato, nimba Mesaya oko ateendo, nimbato nanima langi leainipia. Wuane leai-kola, Jisasato utupane lamawuato, nambato yakamana pii okone yano pelewando, yakamato nambana pii okone bilipi nalolo-peyai leaipia. #Jo 3:12-13 68Nambato pii mindi yakamanga tipa pewando, yakamato nambana pii okone yano peya napulu-peyai. 69Wuane tekeko, andipapi, matili-matilipi, Akalina Iwanane oko bala Gote tai wetete okona kii tikasa pitulu-peya leaipia. #Ap 7:56

70Wuane lea-kola, Juta yamena kanjole tupa pitaka-mane bala tipa puato, nimba tane Gotena Iwanane ateyo nembo toto, wuane lelepe leainipia. Wuane leai-kola, Jisasato utupane lamawuato, yakamato namba Gotena Iwanane ateya leyai okoni leaipia. 71Wuane lea-kola, utupane-mane loto, bala tane pii okone leya-kola, nanimato ale eyama-ko. Anu peakale akali waka mindimane wisanisa atoto, bala tane Mesaya oko ateyo lalane lo nanima langeakale maliyo atamakalepe leainipia.

Currently Selected:

Luku 22: ipi

Highlight

Copy