John 4

Iesu ma Samaria rema

1Pharisee vene neideyadi Iesu bi usi dina vene tau gade moisi babatiso reyo, idu John bi tau de. 2(Rama de iniye Iesu ina kaya bi babatiso de regamo, idu ini usi dina vene maka yaku reyadi.) 3Kamini Iesu Judea feresi dudusa Galilee ri deyo; 4idau bi Samaria gagani tobo toboma boyo.

5Ye ina bi Samaria di taoni yokoi okiyo, ini roka bi Sychar; mina atafuri Jacob yaku ini mida Joseph kono kefuka maro.#Gen 33.19; Josh 24.32 6Jacob di guri koru bi mironari, ma Iesu yava ika oto dina rofu kosika no iniye reyo, ye mina guri koru atafuri ameinu reyo meda tobo niyo kana.

7Kamini Samaria rema yokoi koru ugika baeyo ma Iesu yaku ina rofu niyo, “Koru be na ma.” 8(Adina ini usi dina vene bi iruku voi regika taoni rofu neyadi.)

9Ma nikabai reyo, “Ya bi Jew amiye ma na bi Samaria rema—ye gokai resi na rofu koru usa nisa?” (Adina Jew vene bi Samaria venesa auta de rededi.)#Ezra 4.1–5; Neh 4.1–2

10Iesu yaku nikabai reyo, “Sei yaku beika mado ma kaere yaku koru ya usa nido bi diba niyo vonisi, ya bi ina usa niyagadu ma ina yaku vegu koru ya maraidu.”

11Ma niyo, “Varika amiye e, ya bi koru una beika baika yokoi de nufa ma guri koru ka bi soku tora. Goinari mina vegu koru moigiya? 12Uni tutubena Jacob yaku mina guri koru una masi iniye mina koru iriyo ma ini mida mida ma ini boromakau ka iriyadi. Ye ya bi ini isivaga ebu reisa ba?”

13Ma nikabai reyo, “Amiye tau gade kaere yaku mina koru irigediri, bi dudusa koru vaigedi, 14idu kaere amiye na yaku magida ma irigo koru bi toga toga koru de vaigo. Na yaku ina rofu magida koru bi ini ideri koru buruka nisi furu furu regasa makai toga toga ameibobina vegu mago.”

15Ma rema yaku niyo, “Varika amiye e, mina koru na ma kumo koru de vaisi dudusa minari baesi koru de ubigida.”

16Ma ina rofu niyo, “Nesi yi maruka raka nisi dairisi bae.”

17Kamini nikabai reyo, “Na bi rumana koina.”

Ma niyo, “Ya bi rumana koina vo niyo bi rama niyo. 18Adina ya rumana 5 meyo, ma gua mina amiyesa ameisa bi diya yi maruka. Ya yaku beika ruika niyo bi rama.”

19Ma niyo, “Varika amiye e, na yaku ya veida ya bi Sei di ago nido amiye. 20Uni tutubena vene yaku mina omunari Sei nivakegamadi, idu ya Jew vene nidedi bi Jerusalem ri maka amiye Sei nivakeyagadu.”

21Kamini Iesu yaku niyo, “Rema, na rofu mokena vari gira ae, ari baego ya vene yaku mina omunari de ma Jerusalem ri ka de Baba nivakegedi. 22Ya vene bi beika nivakededi bi ya toto; idu una bi kaere nivakesifa bi una una diba, adina moi vegu rina bi Jew vene rofu baedo. 23Idu ari baedo ma gua okiyo mini, ye nivakei mona rededi vene bi ini Vima di vava ma ago rama dudu Baba nivakebigedi; adina Baba yaku mina kana vene ina rofu nivakegi maina redo. 24Sei bi vima, ma ini nivakededi vene bi Vima di vava ma ago rama dudu maka nivakebiyaganedi.”

25Mina rema yaku niyo, “Na na diba mina Auba reyo amiye (Keriso vo nidedi) baego. Baegasa bi beika tau vanu una ni mona rego.”

26Ma niyo, “Na kaere yasa ago nida bi mina amiye.”

27Minari maka ini usi dina vene dairi okisi ma remasa ago nigasa amedo mina vesi tururu reyadi. Idu yokoi yaku de nikaiteyadi, “Ya beika ura reisa?” o, “Beika resi ya mina remasa ago nisa?”

28Ye rema ini botoro feresi taoniri dairi nesi amiye rofu nioteimaro, 29“Baefa amiye yokoi kaere na beika tau vanu reyaka mina na nioteimaro veyagane. Rama mina bi Keriso ba?” 30Amiye taoni fere yakusi Iesu urana baeyadi.

31Mina fuofuori ini usi dina vene yaku ina egira regasa niyadi, “Oteimana amiye, beika be iri!”

32Idu ina vene rofu niyo, “Nai irina iruku bi ya vene ya toto.”

33Ye iniye iniye kamini niyadi, “Amiye yokoi yaku iruku moi bae maro baeko?”

34Ma niyo, “Nai iruku bi nai Baba, kaere na nifeideyo amiye, di ura resi ini moimai rei vau regida. 35Ya yaku yomakai nidedi, ‘Eyo 4 maka nigo kumo usi bi nonobo rina meda okigo.’ Idu na yaku nida, yi nemoko are resi ma muro ne resi vefa. Iruku bi kaka niyo, ye nonobo rina negau niyo! 36Amiye kaere butu butu redo bi sena ka ini moimai rena di davana moisi toga toga ameibobina vegu di iruku ka butu butu redo; ye varido amiye ma butu butu rena amiye vakoi ada regedi dada. 37Ye mina ago bi rama, ‘Amiye yokoi bi vari vari redo ma yokoi bi butu butu redo.’ 38Na yaku ya nifeideyaka bi moimai de reyadi sanari butu butu reyaganedi. Amiye bedakai mironari moimai reyadi ma gabi ya vene bi ina venesa vakoi moimai reyadi.”

39Samaria vene tau mina taoniri Iesu rofu mokena vari gira aeyadi, adina mina rema yaku ago niokuyo, “Na beika tau vanu reyaka mina na nioteimaro.” 40Ye Samaria vene yaku ina rofu desi usa niyadi ina venesa ameyainedi, ma meda remanu ameyo.

41Kamini besa amiye tau gade mokena vari gira aeyadi ini ago dada. 42Mina rema rofu yomakai niyadi, “Una bi mokena vari gira aeyafa, idu diya ya beika niyo dada; idu gua uniye neide mama resi diba niyafa rama iniye mina bi#4.42 Bura bedakai ka Keriso nufa. kono tora noibanu di moi vegu rina amiye.”

Iesu yaku ourefeidena amiye yokoi di mida moi buni riyo

43Meda remanu koina niyori, bi Galilee urana boyo. 44Adina Iesu iniye niokuyo, “Ini rautu vene yaku Sei di ago nido amiye kikifa de rededi.”#Mt 13.57; Mk 6.4; Lk 4.24 45Ye Galilee okiyori, Galilee vene yaku faiva niyadi, adina bi Jerusalem irakunari bosi ini beika tau vanu reyo veyadi.#Jn 2.23

46Ye dudusa Cana taoni Galilee gaganiri dairiyo; minari bi sena koru moi kero resi waini riyo. Ma mironari Capernaum ri bi ourefeidena amiye yokoi kaere ini mida gauka varegamo.#Jn 2.1–11 47Mina amiye neideyo Iesu bi Judea gutuna Galilee ri okiyo. Mina neidegasa bosi usa niyo ini mida, kaere bi muyena tumusa, desi moi buni riyainedi. 48Ma niyo, “Ya vene bi rebe ma mokena vegu vegedi vonisi mamo, bi mokena vari gira aegedi.”

49Ye ourefeidena amiye yaku niyo, “Varika amiye e, ya bi evade de baegiyari, bi nai mida muyego.”

50Ma Iesu nikabai reyo, “Di, yi mida bi vegu nigo!”

Mina amiye yaku ini ago nisi mokena vari gira aesi diyo. 51Ye idama bogamori, ini moimai rei tavoi rededi vene baku resi nioteimaradi ini mida bi vegu niyo.

52Ye ina yaku nikaiteyo beika meda nemoko ramari ini mida buni niyo, ma ina vene yaku niyadi, “Ini roaita vaki vaki rena bi agiya meda nemoko yokoi uriyenauri fereyo.” 53Ye baba yaku diba niyo bi Iesu yaku mina meda nemoko ramari ina rofu niyo, “Yi mida bi vegu nigo.” Ye ini yava vene tau noibanu ma iniyesa mokena vari gira aeyadi.

54Mina bi rebe uru remanu niyo mini Judea feresi Galilee ri baeyori.

Currently Selected:

John 4: kqc

Highlight

Copy