John 6

Iesu yaku amiye tau gade gade vana reyo

(Mt 14.13–21; Mk 6.30–44; Lk 9.10–17)

1Mina usi Iesu bi Galilee gagani Tiberias moka daidai tora berou eta rofu boyo. 2Ma amiye tau gade usi bogamadi, adina mokena vegu gauka rofu moi buni rigamo mina veyadi. 3Iesu omunari bosi ini usi dina venesa ameinu reyadi. 4Ye Jew vene di Ferei ebu rena irakuna di meda bi negau niyo. 5Iesu yaku ini ne moi odoro resi amiye tau gade gade ina rofu baegamadi vegasa Philip rofu nikaiteyo, “Una bi goidu beredi voi regifa mina amiye yaku iriyaganedi?” 6(Makai niyo bi ebene regika, adina iniye ina diba bi beika rego bi.)

7Philip yaku nikabai reyo, “Siriva fore 200 dudu beredi voi regifa vonisi, bi keika maka moigedi ka egere de nigo.”

8Ini usi dina amiye yokoi roka Andrew, kaere bi Simon Peter di dubuini, yaku niyo, 9“Mida keika yokoi minari bi barley beredi 5 ma oyena remanu nufa, idu mina bi una egere de nigo, amiye bi tau gade gade dada.”

10Iesu yaku niyo, “Amiye nifo kumo ameinu reyaganedi.” Mirona sanari bi oruma tora gade. Mina dada ameinu reyadi vene bi rumana 5,000 kana. 11Mina dada beredi moisi Sei rofu buni tora gade masi#6.11 Bura bedakai ka ini usi dina vene dudu nufa. konori ameinu regamadi vene yokoi yokoi rofu rau reyo. Oyena ka makai reyo, ina ura reyadi kana. 12Ye ini uka bere niyadiri, ini usi dina vene rofu niyo, “Fereyadi iruku tuta moi egogo refo kumo keika yokoi moi boiyo ga reyaine.” 13Mina dada barley beredi 5 gutuna irisi fereyadi tuta butu risi foroka 12 moi vata baeyadi.

14Amiye ini rebe reyo mina vesi niyadi, “Rama mina bi Sei di ago nido amiye#6.14 Sei di ago nido amiye: 1.21 baku re. kaere kono tora noibanuri okigo bi mini!” 15Ye Iesu ina diba niyo bi yeiva dudu ina rofu baesi moi kini rigedi, ye dudusa inaike omunari boyo.

Iesu koru fafau nana reyo

(Mt 14.22–33; Mk 6.45–52)

16Ma uriyenau niyori, ini usi dina vene moka daidai torari nesi 17bouti yokoi keu risi moka daidai tora berou eta rofu Capernaum urana ugai boi neyadi. Mukuna niyo, idu Iesu bi ina vene rofu okina de reyo. 18Ma aura tora okisi moka daidai tora moi tafo tafo reyo. 19Ye kilometre 5 o 6 kana#6.19 kilometre 5 o 6 kana: Greek agori mina bi 25-30 stadia. fayo reyadi ma Iesu moka daidai tora fafau nana regamo ma veyadi. Bouti adinari baegamori, bi ori reyadi. 20Idu ina vene rofu niyo, “Na mini; ori ga refa!” 21Mina dada boutiri ada dudu moi keu reyadi, ye bouti berou konori dina rofu bi evade maka mina sanari okiyo.

Amiye tau gade Iesu maina regamadi

22Ari uveyori amiye tau gade moka daidai tora di berou eta rofu amesi diba niyadi bi bouti yokoi maka ma Iesu bi ini usi dina venesa keu de reyo, idu ini usi dina vene iniye maka diyadi. 23Tiberias gutuna bouti be bi Varika amiye buni tora gade Sei rofu maro ma ini beredi iriyadi sana atafuri utae riyadi. 24Mina dada amiye tau gade veyadi Iesu ma ini usi dina vene minari de amegamadi, ye bouti keu resi maina regi Capernaum rofu diyadi.

Iesu bi vegu amena di beredi

25Koru moka tora di berou eta rofu baku resi nikaiteyadi, “Oteimana amiye, ya bi minari goivaka baeyo?”

26Iesu yaku ina vene rofu nikabai reyo, “Rama iniye ya nida: ya na maina rededi, diya nai rebe veyadi dada, idu beredi irisi uka bere niyadi dada. 27No nigo iruku rofu moimai ga rebifa, idu toga toga vegu ameibobigo iruku rofu moimai rebifa. Amiye di mida yaku mina ya vene rofu mago, adina Baba Sei yaku sena auba reyo.”

28Kamini nikaiteyadi, “Una yaku Sei di moimai regi bi beika regifa?”

29Ma nikabai reyo, “Mina bi Sei di moimai: ini nifeideyo amiye rofu mokena vari gira aebigedi dada.”

30Ye nikaiteyadi, “Ye ya bi beika rebe regiya ma vesi ya rofu mokena vari gira aegifa? Ya bi beika moimai regiya? 31Uni tutubena yaku gagani autu sanari manna irigamadi, bura reyo kana, ‘Ina yaku oma gutuna irigedi beredi maro.’ ”#Ex 16.4, 15; Ps 78.24

32Kamini Iesu ina vene rofu niyo, “Rama iniye ya nida, bi diya Moses kaere bi omari beredi ya maro, idu nai Baba yaku omari gutuna beredi rama ya mado. 33Adina Sei di beredi bi kaere omari gutuna desi kono tora noibanu vene vegu mado.”

34Ma niyadi, “Amiye tora e, mina beredi bi toga una mabi.”

35Ye niyo, “Na bi vegu di beredi; amiye kaere na rofu baego bi rauna de rego, ma kaere na rofu mokena vari gira aego bi toga koru de vaigo. 36Idu ya rofu niyaka ya bi sena na veyadi, idu mokena vari gira de aeyadi. 37Nai Baba yaku na maro vene tau vakoi bi na rofu baegedi, ma na rofu baegedi vene bi de meki regida de iniye. 38Adina omari gutuna soka rei deyaka bi diya na kaya nai ura regika, idu kaere na nifeideyo amiye ini ura regika. 39Ma kaere na nifeideyo amiye di ura bi yomini: na maro vene tau vakoi bi yokoi moi boiyo de regida, idu ari metonari mina vene tau vakoi bi moi edadigida dada. 40Adina nai Baba di ura bi yomini: ini Mida vegasa mokena vari gira aegedi vene tau vakoi bi toga toga ameibobina vegu moigedi, ma na yaku ka ari metonari moi edadigida.”

41Ye Jew vene yaku ina rofu mumugu nigamadi, di ini adina niyo, “Na bi omari gutuna deyo beredi.” 42Ka niyadi, “Mina bi Iesu, Joseph di mida de ba? Ini nono ma baba una una diba. Ma gokai resi gua nido, ‘Na bi omari gutuna deyaka’?”

43Iesu ina vene rofu niyo, “Ya kaya ya kaya makai mumugu ga nifa. 44Nai Baba na nifeideyo amiye bi amiye yokoi moi rutu resi na rofu mago vonisi, bi na rofu baego, ye ari metonari moi edadigida. 45Sei di ago niyadi vene bura reyadi, ‘Sei yaku ina tau vakoi oteimago.’ Nai Baba di ago neidesi diba niyadi#6.45 niyadi; bura bedakai nidedi nufa. vene tau gade bi na rofu baegedi.#Is 54.13 46Amiye yokoi yaku Baba vena kode, idu Sei gutuna deyo amiye yaku maka sena veyo. 47Rama iniye ya nida: amiye kaere mokena vari gira na rofu aego bi toga toga ameibobina vegu moigo. 48Na bi vegu di beredi. 49Yi tutubena vene yaku gagani autu sanari manna irisi muyeyadi. 50Idu omari gutuna deyo beredi bi makai: ye amiye yokoi irigo bi de muyego. 51Na bi mina omari gutuna deyo vegu amedo beredi. Amiye yokoi yaku mina beredi irigo vonisi, bi toga toga ameibobigo. Ma kono tora noibanu di vene di vegu rofu magida beredi bi nai roaita.”

52Kamini Jew vene bi iniye iniye rofu kayamo regasa niyadi, “Mina amiye di roaita bi gokai una rofu mago ma irigifa?”

53Ye Iesu yaku niyo, “Rama iniye ya nida: Amiye di mida di roaita ma ini dava de irigedi vonisi, vegu bi ya vene ideri de amebigo. 54Amiye kaere nai roaita ma nai dava irigo bi toga toga ameibobina vegu moigo, ma ari metonari moi edadigida. 55Adina nai roaita bi iruku rama ma nai dava ka bi irina koru rama. 56Kaere nai roaita ma nai dava irigo amiye bi nasa amebigo, ma na ka inasa amebigida. 57Vegu amedo Baba yaku na nifeideyo kana, ma ina dada vegu ameida, ye kaere na irigo amiye ka na dada vegu amego. 58Omari gutuna deyo beredi bi mini; yi tutubena vene yaku irigamadi kana de. Irisi muyeyadi. Idu kaere mina beredi irigo bi toga toga ameibobigo.”

59Iesu Capernaum ri oteimagasa usa usa yavari mina ago nigamo.

Vegu ameibobina di ago

60Ini usi dina vene tau mina ago neidesi niyadi, “Mina ago bi gira iniye; kaere yaku neidego?”

61Idu Iesu ini ukari diba niyo ini ago rofu mumugu nigamadi, dada niyo, “Mina yaku yi mokena moi toe rido ba? 62Idu Amiye di mida sena ameyo sanari dairi bogo mina vesi bi beika mokegedi? 63Sei di Vima bi vegu mado; roaita di vava bi de iniye iniye. Ago ya rofu niyaka bi Vima ma vegu di. 64Idu ya vene be bi mokena vari gira de aededi.” (Adina bi senagi diba niyo kaere bi mokena vari gira aena de, ma kaere yaku siri rego.) 65Resi niyo, “Mina resi ya rofu niyaka nai Baba yaku maka vava mago vonisi, amiye bi na rofu baegedi.”

66Mina usi ini usi dina vene tau ina gedu masi inasa gogo de digamadi. 67Mina dada amiye 12 rofu nikaiteyo, “Ya vene feresi digi ka ura rededi ba?”

68Simon Peter yaku nikabai reyo, “Varika amiye e, una bi kaere rofu digifa? Toga toga ameibobina vegu di ago bi yasa amedo.#Mt 16.16; Mk 8.29; Lk 9.20 69Una bi mokena vari gira aesi una una diba ya bi Sei di amiye kikifa.”#6.69 Sei di amiye kikifa; bura bedakai Keriso, vegu ameibobina Sei di Mida nufa.

70Ma nikabai reyo, “Na bi ya 12 auba reyaka, idu ya yokoi bi bodaka niyo!” 71Mina bi Simon Iscariot di mida, Judas kaere yaku siri rego fafau ago niyo. Ina ka bi ini amiye 12 yokoi.

Currently Selected:

John 6: kqc

Highlight

Copy