Dehet deng Apan-kloma ki in Dadi ka 35
35
Yakob lalis lakos Betel
1Hidi nam, Ama Lamtua Allah aa nol Yakob noan, “Auk niam, Lamtua Allah man tulu-balang apa ka bel ku son, se dedeng ku in lali deng ku kakam Esau la ka. Nol nia, ku lako daad seda se Betel tia. Lius se lua kam, ku bangun bel Auk maan in tunu-dadung. Hidim daad se la.”
2-3Hidim Yakob aa nol un uma isin nas totoang noan, “Maa le kit totoang bok lakong Betel lolen. Ta auk le bangun maan in todan se ua. Hmunan nu oras auk se susa daleng nga, Ama Lamtua Allah tulung auk se maan na. Tiata nol nia, mi kat soleng mi baut angin in hui-langus sas totoang tia. Tao niu' mi apan nas nol pake seda kai-batu, ta kit le todan-lahing se Ama Lamtua Allah.” 4Kon nam, oen sao oen baut angin in hui-langus sas, nol oen ante las#35:4: Hmunan nua, oen ante las muik hdulat deng oen bangat in hui-langus sas. totoang. Hidim Yakob puan sa-saa nas totoang se kai ina tene mes leon, dadani nol iung Sikem. 5Dedeng Yakob nol un hutun nas bokas deng iung Sikem ma, Ama Lamtua Allah tao atuli-atuil in se ingu-iung man pukiu one ngas le lii, didiin oen lii in daek dadaat saol Yakob nol un nenan nas.
6Yakob nol un hutun nas totoang lakos lius se Betel nol boa-blingin (maan na hmunan nu ngala, Lus) ne dale Kana'an. 7Se na, Yakob bangun-pii maan in todan-lahing deng batu. Hidim un ngali maan na, ngala El Betel (man nahin na noan ‘Betel Lamtua Allahn’), undeng hmunan nu Ama Lamtua Allah tulu-balang Un Apa ka bel Yakob se na, se dedeng un in lali deng un kaka ka ka.
8Dani nol iung Betel la, muik kai ina tene mesa, man atuli las ngali Alon Bakut, man nahin na noan ‘kai ina in kamusang’. Un ngali maan na ela, undeng dedeng Debora mate ka, oen puan un se kai ina na leon na. Debora na mo, Ribka ina in sole ka.
9Dedeng Yakob pait maa deng Padan Aram mam, Ama Lamtua Allah tulu-balang Apa ka pait, nol bel hangun se una. 10Ama Lamtua tekan noan, “Nol ni kon, ku ngalam ma Yakob lo ka. Mo Auk bel ku ngaal balu, noan Israel.#35:10: Israel nahin na noan, ‘un keng nol Ama Lamtua’. 11Auk niam Lamtua Allah in Kuasa Dudui. Tiata ku hua-koet, le haup upu kia-kaons mamo-mamo tia! Mam bangsa-bangsa lias puit maas deng ku in hua-koet tas, nol mam ku hua lahi-lahi las. 12Dale man Auk in bel ku upum Abraham nol ku amam Isak son na, halas ni Auk bel kun, nol ku in hua-koet tas.”
13-14Ama Lamtua Allah tek hidi ela kon, Yakob bangun-pii batu mes se na, le halin daid taad taung in nangan-nangan Ama Lamtua in hida ka. Hidim un doan ui anggor nol mina se baut na dapa, le todan-lahing se Ama Lamtua. 15Maan na, un ngali ngala Betel.
Yakob sapa Rahel mate se oras un hua ana ka
16Hidi na kon, Yakob lakos nang Betel. Oras oen katang buit deng Efrata (man halas ni ngala Betlehem), kon nam, Rahel oras in hua ka maa lisu. Mo un in hua ka susa. 17Oras un nasang mumuun nam im-blingin na tekan noan, “Mama Rahel! Tao ku dalem ma teteken, ta maam haup aan bikloeb pait!” 18Nikit Rahel hngasa ka mana le nutus kon, un ngali tana-ana na, Ben-Oni man nahin na noan, ‘aan deng auk in susa ka’. Hidi na kon un mate. Mo Yakob ngali tana-ana naBenyamin, (man nahin na noan ‘aan ima kanan’).
19Tukun nam oen puan Rahel se lalan suut man laok bus el Efrata ka, (na Betlehem). 20Kon Yakob babail un niut utu ka se na. Maa lius leol neot ni kon, Rahel niut utu ka muik nabale.
Yakob anan nas
21Hidi na kon Yakob#35:21: In dula dais Ibranin noan ‘Israel’. Israel nol Yakob pa ngala dua man taung atuli mes sii. daad seda-seda maan tutungus. Oe mesan na, un buba hleep se menara Eder halin na. 22Yakob tao ata Bilha la daid un sapa son, mo dedeng oen se las sa, Yakob taan haup noan, Ruben niin nol Bilha.
Yakob anan biklobe las at hngul dua.
23Lea anan nas ngalan nas elia: Ruben (Yakob ana hmunan na), Simeon, Lewi, Yahuda, Isaskar nol Sebulon.
24Rahel anan nas: Yusuf nol Benyamin.
25Rahel ata Bilha, anan nas: Dan nol Naftali.
26Hidim Lea ata Silpa anan nas: Gad nol Aser.
Hua tana-anang nas se Padan Aram.#35:26: Yakob anan at hngul esa kas huas se Padan Aram, mo Benyamin sii man huan se Efrata.
Yakob ama Isak in mate ka
27Hidi nam, Yakob lako meo un ama Isak se Mamre, dani nol iung Kiriat Arba (halas ni ngala Hebron). Hmunan nua, un upu Abraham kon daad se la. 28-29Isak nuli lako lius umur taun ngatus buk palu, halas-sam un mate. Kon nam, un ana Esau nol Yakob puan una.
Currently Selected:
Dehet deng Apan-kloma ki in Dadi ka 35: heg
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
