LUK 19

Jesu re Zakius

1Jesu ing Jeriko hungruwhka vasisa. 2Amana Zakius ichii aanchung ree ikhuum mee yngkheh inempak savang heong. 3Ama ing Jesu chu achuwva ichiichu muningka takhang nakho meechu anempak tahnache imu chehmahsa, akhaechuve atak tomsa. 4Chukhaenache ama ing maensok ting hetaenka Jesu chu imunii khaena haepong vaangkar ritingche hangkarsa, akhaechuve Jesu ing ama yntong tingche hungsisa. 5Jesu ing ama ruvaechu ahenpha tahnache hengenka aningna ariir, “Zakius ithupak ing nang jungchumla, ki atanii na-een sungna tungva kata.”

6Chukhaenache ama ing ithupak ing jungchumka vokhehkho Jesu chu arutha irohpak ing abariimsahpa. 7Amachu mee ae ing emutahna yngkheh yngkheh chong aeka, “Ama ing isii icher een sungting ruwhsa ta aeka enriirpa.” 8Amana Zakius ing hangiirka Jesu ningnache ariir, “Enla, oja, ki ing kadeensah vakhaechu achimbang sara naeriing ae ningting kapeehnah, changpang mahka ki ing achuw yngkheh peeh ichummah ing riningve, sarup manrii aningting kabaripeeh chaknah.” 9Jesu ing aningna ariir, “Atanii hava een sungne manlaenpeeh iringniichu thengsa, akhaechuve ama ikho Abraham sapa va. 10#Met 18.11Mee Sapa inche ymmoh vasah aechu ijongnii khaena vokhehkho ikarpeehnii khaenache thengsa.”

Talen na ynghuwnii

(Met 25.14-30)

11Hava chong vakhae i enrungae raenche, Jesu ing reentaang ynghuwnii thamin ing eningna ichong. Atii ama ing Jerusalem chu aveneengpa, amana enuw ing Thangnang iruwngpaamchu yndanglo achiinah ichii ing emandenpa. 12Chukhaenache Jesu ing ariir, “Ynchungseh mee yngkheh inche ataksah khaena iruwngpaam yngkheh phanaka ahunganrinii inche yndahpak paam yngkheh tingche sisa. 13Ama ing asiphana ameenae suum aechu eenka amanche eningna mina suum ter piaeka ariir, ‘Ki ing kahunganrimahri raentaang havi inge lerchii hetaar-niiruw.’ 14Changvakonchu ama aaruwngpaam mee ae inchembe har aeka, vokhehkho chong apeeh meechu aningting vechiir aeka enriir, ‘Hava mee inge kengaruwng viva chiichu idikmah ung.’ ”

15“Ama ing iruwng phamchu phaaka hunganrisa. Amana aajaeh entaarse ichiichu manghuw ningka achii khaena meenae aechu amanthangpa. 16Amaensa meenae inche vathengka ariir, ‘Aafhuw, nang ing ympeehchii mina yngkheh ingkhe mina suum kataarniisa.’ 17‘Isapak meenae, inempak sakna! Nang achiihtina thachafhuw vachii khaka, khuwruung suum taklina aafhuw ynsuwhra.’ 18Aanuwnache avomaniinii inche vathengka ariir, ‘Aafhuw, nang ing ympeehchii mina yngkheh ingkhe mina runga kataarniisa.’ 19Havi ningnenkho ama ing ariir, ‘Nangkho khuwruung runga aafhuw ynsuwhra.’ ”

20“Athar yngkheh inche vathengka ariir, ‘Aafhuw, nang ing ympeehchii mina kha havane omna; ki ing irompang ingka kasiihsah jaehva. 21Nang i ki ing inempak kachiisah vachii, akhaechuve barungriir ikha mee vachii, nang ing nasiihmah peeh chukho narinah amanche nang ing navormah chukho nakuumnah.’ 22Ama ing aningna ariir, ‘Isamah meenae, nang naner nakhe ki ing vajeer tuvakachii. Ki chuve barungriir ikha mee ping, ki ing kasiihmah peehchu karinah, amanche kavor mahchu kakuumnah ichiichu namanghuwsa. 23Changmaniicha nang ing kaseer kha ynchii khaena seerthi aomnii nache nasiihmahva chang? Amanache siitaniive, ki ing kathengraenne seerthi thohche kaangkaeraenche reenva kachiichu!’

24Aanuwnache abuumna ingiir ae ningnache ariir, ‘Aningtanii mina kha rinuwna mina suum adeen mee ningnakhe piruw.’ 25Changvakonchu enuw ing aningna enriir, ‘Aafhuw, amave mina suum adeensa!’ 26#Met 13.12; Mk 4.25; Luk 8.18‘Ki ing neningna kariirnah, adeen mee vakhae ningnache pivakata, vokhehkho adeenmah ningna khenkho adeensah topohchu ripeehva kata. 27#Met 25.14-30Atii entaklina iruwng ivi enrumah ae enuwkha havane henruw ae nuwna kamaane theh aeruw.’ ”

Aacheh Jesu ing Jerusalem Ivaruwh

(Met 21.1-11; Mk 11.1-11; Jhn 12.12-19)

28Hava chong i ariir inuwna, Jesu ing Jerusalem ting sivachii khaena maen henginsasa. 29Ama ing Oleep Bungna om Betphage re Bethani avephaphana Jesu ing asebok meeniimeh maen ing hemansika ariir, 30“Nemaana heom khuw tingse nenuw ing hesiruw; nenuw ing nenvaruwhnii nache achuw ingkho aongnii mahri lola ati yngkheh yngkhiih muvanenta; amachu bajoh nuwna henruwruw. 31Achuw yngkheh ing yngkhaena nenbajohva itanave, Aafhuw ing kaaniivachii yngkheh omna tanuwna basangruw.”

32Chukhaenache Jesu ing ariir inuwzii inche achiir mee aenche siaeka envatuwhpa. 33Enuw ing lola atichu embajoh raenche, aafhuw aenche eningna ariir ae, “Nenuw ing havana lola ati ichu ynchii khaena nenbajohva?”

34“Aafhuw ing kaaniivachii omna ta aeka embasang, 35Enuw ing bajoh aeka Jesu ningting enghenruwpa.” Amana enuw ing lola taklinache enpeen tha aeka Jesu chu amangongpae. 36Ama ing ongniika avasiraenche, mee ae ing lam nache enpeenchu enghenthapa.

37Jesu inche vasika Jerusalem avephaphana Oleep Bung tanii ajung-chum raenche, aanuw aajii asebok mee inempak aenche iruungpak nong aajaeh atuchu emu khaena Thangnang chu rotha rohroh ing ympah emba-senpa: 38“Aafhuw rumingna itheng iruwngchu Thangnang ing bor apeeh ynsuwhrasiing! Thangbaen nache idae om ynsuwhrasiing amanche yngkaangseh ing thangbaen nache ympahchu ynsuwhrasiing!”

39Mee changjaeh inem kaarnache Pharisi topoh aenche Jesu ningna hangchong aeka enriir, “Oja, nang nasebok ae i rukuh aera.”

40Jesu ing abasang ae, “Ki ing neningna atatak ing kariirnah, enuw vakhae inge enhuw mandaekhang ae nare, rung ae inge uung vaatae.”

Jesu ing Jerusalem enka Ichap

41Jesu ing Jerusalem aveneengtah nache, khuwruungchu vemuka akhae-nache chapka ariir, 42“Nang ing atanii iniine idae nong i manghuw taniive ni! Changvakonchu atiive namik ing muchehmah sachii! 43Nataklina apha thengvaata, nang eejeehnii aeng rupar tuae naka, amanche irakuwr ae naka arakiing manriina nalam thing vaatae; 44amanche natakkho, nasiti aekho laruw imanvarnii vaatae, changpang mahka naongnii sungna rung yngkheh ensiih taklina athar ynsiihmahnii, akhaechuve Thangnang ing ikarpeehnii khaena ithengchu natak ing manghuwmah sachii.”

Jesu ing Rumniieen ting Ivasi

(Met 21.12-17; Mk 11.15-19; Jhn 2.13-22)

45Havi aanuwna Jesu ing rumniieen tingche varuwhka peeh ajuwr ae vakhaechu ithur basenka eningna ariir, 46“Havi ynziihka om vasahva, ki ka-eenchu ithamnii een vachiiva, amachu nenuw ing lamruw ae kuw nemanguurpa.”

47 # Luk 21.37 Jesu ing anasiirna rumniieen nache amanchuw ae. Changlaenche aanchung jaethiim ae, thiimthang ae vokhehkho upa vakhae aenche ithehnii khaena ajong ae; 48changvakonchu enuw ing ynchiikho tuwhchehmah ae, akhaechuve mee vakhae ing Jesu athaminchu ynlehchak ing enrungaepa.

Currently Selected:

LUK 19: MOYO

Highlight

Copy