LUK 22

Jesu Enrumah

(Met 26.1-5; Mk 14.1-2; Jhn 11.45-53)

1Atii chor ynvaemah manlaennii kuurva thaemin isahnii aphachu hunganeengsa. 2Amana aanchung jaethiim aere thiimthang aenche Jesu chu ynsaangkhe thehchehva kenchiiva ta aeka ynruwhjaeh ing emanjongpa; akhaechuve enuw ing mee aechu enchiipa.

Judas ing Jesu Irensah Aru

(Met 26.14-16; Mk 14.10-11)

3Sebok suum ariinii sungna ynvae aruming Judas Iskariot ningnache umlae chuwngsa. 4Chutahnache ama ing sika aanchung jaethiim aere rumniieen aarung iruung ae thohche Jesu chu ynsaangkhe eningna pivachiiva ichii khaena chong eman-seerpa. 5Enuw ing enrotha rohka aningna seer ipeehnii khaenache enchong reepsa. 6Chukhaenache ama ingkho ruka mee ing amanghuwnii mahdeh ing Jesu chu eningna ipeehnii khaena apha ichachu amanjongpa.

Jesu ing Manlaennii Thaemin Isahnii Asir

(Met 26.17-25; Mk 14.12-21; Jhn 13.21-30)

7Atii chor ynvaemah thaemin isahnii aanii nache manlaennii kuurvana jaoti yntheh vachii aaniichu ahenphapa. 8Chukhaenache Jesu ing Pitar re Johon chiirka ariir, “Inuw ing manlaennii thaemin sanii vaanchii aphamchu thoraang vaturuw.”

9Amana enuw ing enriir, “Kenuw ing unakhe thoraang ituchu nang ing naadikva?”

10Jesu ing eningna ariir, “Enruw, nenuw ing khuwruung na nenju-ruwhrae mee yngkheh ing chiiphur idomnaka eentuwhfhuw vaata; atakchu jiinuwna aruwhnii eennache varuwhruw. 11Amana eensung aafhuw ningnache nenuw ing taruw, ‘Jesu ing naningna kasebok aethoh manlaennii ningsiih thaemin saniiva kenchii aphamchu unakhenva tanuwna siiruw?’ 12Amanache chungting iruungpak ongnii yngkhehna thoraang yntuvasah ama ing imansiivaata; amanache thoraangchu turuw.”

13Enuw ing siaeka Jesu ing ariir inuwzii ing vatuwh aeka, amanache manlaennii ningsiih thaemin isahnii-chu thoraang entupa.

Aafhuw Ningsiih Thaemin

(Met 26.26-30; Mk 14.22-26; 1 Kor 11.23-25)

14Aphachu ahenpha tahnache, Jesu ing achongthang ae thohche isahnii nache ongsa. 15Amana Jesu ing ariir, “Ki ing ijachaam kaphamah rirae manlaennii ningsiih thaemin havi nenuw thoh isahhak kadikva. 16Thangnang iruwngpaamchu ma-pung aphamahri raentaang, ki ing utaraenkho havi samahning ta ingka neningna kariirnah. 17Aanuwnache Jesu ing vomrip chiichu ithohka ariir, havi verinuwna ynsemruw. 18Ki ing neningna kariirnah, Thangnang iruwngpaam athengmahri raentaang, atanii basen naka ki ing vomrip chii havi inmahning.”

19Amana Jesu ing tarchu verika amanpah aanuwnache bakhiika eningnache jepika ariir, “Havi neng-khaena kapeehchuw kashava. Ki yndennii khaena havi turuw.” 20Enuw ing ensah aanuwnache aanghakjaeh ing vomrip chiichu verika ariir, “Hava vomrip chii i nengkhaena ynta kasii ing kahak ithar chongiirva.”

21“Changvakonchu enruw, kichu irensavachii meechu kithoh isahniina onghaknung. 22Amaenna ajeer vasah laepah inuwzii ing Mee Sapa inche ma ataarnah; changvakonchu ynrensah mee ichuve aningna ijaniisapa!” 23Amana enuw ing entaksah sungna achuw ing ama nongchu tuvachiiva ynta aeka ynsiisae.

Iruungsehchu Achuw vachiiva ichii khaena Ynnahnii ae

24 # Met 18.1; Mk 9.34; Luk 9.46 Enuw enareer sungna achuw ingkhe iruungsehva ynta aeka ynnahniisae. 25Amatah nache Jesu ing eningna ariir, “Reentaang mee iruwng aeng emee ae taklina aafhuw ynsuwhnii nong entunah; amanche aatuaricheh aechu mee ae khaena isa nong itu mee ae ta aeka engkhiingnah. 26#Met 23.11; Mk 9.35#Met 20.25-27; Mk 10.42-44Changvakonchu nenuw chuve amachu vaangche tamahchuw; nenuw nengkaarna ruungseh vachii inche naepang vaang ynjuursa vachiiva, vokhehkho aapuh inche meenae ynsuwh vachiiva. 27#Jhn 13.12-15Achuw inche iruungsehva, isahniina ong chuva? changmahka rukuum atu mee chuva? Isahniina ongchumah vakhang? Chukhaenache ki chuve nengkaarna rukuum itu mee thoh aanghak ing omning.”

28“Nenuw chuve kichu chaang yngen vakhaena kithoh onghakchu vachuw; 29Kapa ing kaningna iruwngpaam yngkheh ympeehvaang, nenuw chukho ki ing pivakachuw. 30#Met 19.28Nenuw ing karuwngpaam nache isahhak inhaknii khaena iruwngpham ongnii chaap nache ongtanuwka amanche Isrel sungkhur suum ariinii aechu vajeer tuvanenta.”

Pitar ing Jesu Rumahvachii Maen ing Ajeer

(Met 26.31-35; Mk 14.27-31; Jhn 13.36-38)

31“Simon, Simon, enla, gehu re akoh ynteerka yngkhaevaang nenuwchu umlae ing ynniihnah. 32Changvakonchu Simon, nang nathacha achenniimah khaena nakhaena ki ing kathamnah, amanche nang ing nabarungriir athar nahuung raenche nang ing nauw nanae aechu embarungriir manpirpeehva nachiipae.”

33Pitar ing abasang, “Aafhuw, ki chuve nangthoh kaeshum sungna onghaknii vokhehkho ithiihaknii khaenakho ynthong chirsing.”

34Jesu ing ariir, “Pitar, ki ing naningna kariirnah, nang ing ki i manghuwmah ing tataniika vathum-chak nariirmahri raentaang atanii jaen aarkhuung ing khuwngmahnii.”

Seerthuung, thuungfhuw, vokhehkho Laarchem

35 # Met 10.9,10; Mk 6.8,9; Luk 9.3; 10.4 Jesu ing eningna ariir, “Ki ing nenuwchu seerthuung, thuungfhuw vokhehkho kheerkhaang ichah ing kachiir raenchuw nenuw nenvaehnii omchuwkhang?” Enuw ing enriir, “Ynchiikho vaehmahdeh ung.” 36Jesu ing eningna ariir, “Changvakonchu atiive seerthuung adeen mee inche chirasiing, amanche thuungfhuw chukho chirasiing. Amana yntanga adeenmah mee inche apeen juwrsana laarchem iriirasiing. 37Ki ing neningna kariirnah, isii icher mee ae kaarnache ama ynvaesa taka ynziihchu kataklina suwhva chiiting buksa.”

38Enuw ing enriir, “Enla Aafhuw, laarchem ynniimeh omna.” Jesu ing ariir, “Ama ingkhe ynsuwh chaksa.”

Jesu ing Oleep Bungna Athamsah

(Met 26.36-46; Mk 14.32-42)

39Jesu ing hungsuwhka anunu ing atuchak vaang Oleep Bung tingche vaksa, amana asebok aeng aanuw ajii ae. 40Ama ing ama minnahce avatung tahnache eningna ariir, “Nenuw batheem ting nenbukniimah ing thamsaruw.”

41Amana rung ing kung ideengthoh ynchimvak yndahpakmah ing Jesu ing enuwthoh ynsaeka athamsahpa, 42“Apa, nang ing irupeeh taniive, havana ijachaam kam i kaningtanii iripeehsar; changvakonchu ki ing kamanden ynsuwh mahsana, nang ing namandenchu ynsuwhrasiing.” 43Amana thangbaen tanii vaarmee inche juwngka ajungmanpirpa. 44Jesu abarungriir ija lamher ing ipirsehseh ing athamsahpa, amana aruthen ifhuwr ing ruwruwna ibuwchu sii atang atang vaang ynta.

45Jesu ing athamsah aanuwna hangiirka asebok ae ongnii ipha ing ahuungtah nache, enuw embarungriir ija inche ijaar ing ahenphapae. 46Amana Jesu ing eningna ariir, “Yngkhaena nenuw ijaar vachuw? Batheem ting nenbukniimah ing hangsuw nuwna thamruw.”

Jesu Ensuwr

(Met 26.47-56; Mk 14.43-50; Jhn 18.3-11)

47Jesu ing achong raenche enruw, mee inempak aechu asebok kaarna ynvae Iskariot Judas atak ing maensaka Jesu aabeeng tumnii khaena abuum tingche avaneeng. 48Changlae Jesu ing aningna ariir, “Judas, nang ing Mee Sapa chu aabeeng tumchiika narensahva?”

49Jesu thoh ynruwhak ae asebok aenche hungsuwh vachiichu emutah nache enriir, “Aafhuw, kenuw ing laarchem inge tukva kenchiipae?” 50Changlaen siimche engkaarna yngkheh ing aanchung jaethiim ameenae yngkhehchu atachang aana asaehpa. 51Amana Jesu ing ariir, “Havi inge ynsuwhsa!” Jesu ing aana asuhchu veparka amandampa.

52Aanuwnache Jesu ing aanchung jaethiim aere rumniieen aarung iruung ae vokhehkho upa vakhae ae, atak ivasuwr ivatheng mee vakhae ningna ariir, “Vajeer chonghak abakhii ichamah ynruw ynrep suwrva nenchii vaangkhe laarchem re rumor thoh ivatheng vachuw? 53#Luk 19.47; 21.37Anasiirna ki ing nenuw thoh Rumniieenna kaonglaen khencha nenuw ing kichu isuwrnii khaena nengkik varaammahchuw. Changvakonchu havana apha ive nengkhaenava vokhehkho ynthim ruwreng apha chuva.”

Pitar ing Jesu Arumah

(Met 26.57-58,69-75; Mk 14.53-54,66-72; Jhn 18.12-18,25-27)

54Enuw ing Jesu chu suwr aeka aanchung jaethiim een tingche enghenruwpa. Changlae Pitar ing yndahseh ing avejiipa; 55enuw ing vajeernii een sukmae ariknache mi manseh aeka engu kaarnache pitar kho ongsa. 56Meenae rupanuw yngkheh inche irengna ongchu amutah nache enteehka averiir, “Hava pasar ikho ama thoh ynruwhak chakpae.”

57Changvakonchu Pitar ing rumahka ariir, “Rupanuw, ama i ki manghuwmah ing.”

58Apha topoh ompheh reehka mee yngkheh inche amureeh tahnache nangkho enuw kaartanii yngkheh vachii taka ariirpa.

Changvakonchu Pitar ing abasang, laaruw mee, ki mahping achii.

59Apha topoh iseeh aanuwting mee reentaang yngkheh ing ipirpak ing ariir, “Hava mee rem ikho amathoh ynruwhak chakpae; akhaechuve atak i Galili tanii meeva.”

60Changvakonchu Pitar ing abasang, “Laaruw mee, nang ing nariir chong i ki manghuwmah ing.” Ama chongchu abasang chakthoh aarkhuwng inche khuwngsa. 61Amana Jesu ing aningting vaanlehka Pitar chu ave enpa. Chutahnache atanii aarkhuung ing akhuwngmah rirae vathumchak irumah tanii taka Jesu ing aningna ariir chongkha Pitar ing aansiipa. 62Amana Pitar ing taang jungsuwhka abarungriir asuhpak ing chapsa.

Jesu Maniisa aeka vokhehkho Embin

(Met 26.67-68; Mk 14.65)

63Atii Jesu chu embachuw pasar aenche maniisa aeka abinpae; 64vokhehkho enuw ing Jesu chu amik mangkhum aeka aningna ensii, “Riirla nangchu achuw ing ymbinva?” 65Amana enuw ing reentaang ithipak chong ing ataklina ariirpae.

Jesu chu Aanchungpuh ting Enghenruw

(Met 26.59-63; Mk 14.55-64; Jhn 18.19-24)

66Khuwchu hungvaarka, upa chaap ae, aanchung jaethiim ae vokhehkho thiimthang ae yngkongsae; amana enuw ing Jesu chu aanchungpuh tingche enghenruwpa. 67Amana enuw ing ensii, “Nang Khrista chu vataniive, keningna riirla.” Changvakonchu Jesu ing eningna ariir, “Ki ing neningna riirkhang ningle nenuw thachamah tanuw. 68Ki ing neningna chong siikhang ningchuwkho nenuw ing ibasangmah tanuw. 69Changvakonchu atanii basen naka Mee Sapa inche Aacheh Thangnang atachang nache ongvaata.”

70Enuw vakhae ing enriir, “Chunuw-cha nang Thangnang sapa vachii?”

Ama ing eningna abasang, “Nenuw ing kiping ichiichu nenriirpa.” 71Ama-na enuw ing enriir, “Inuw vakhae ing havi chungna saarkhii athar ijongnii ynchii omkhang? Inuw yntaksah ing anertanii ynsiipa!”

Currently Selected:

LUK 22: MOYO

Highlight

Copy