SHURAI 21
21
Isaak ye Nalouyu
1Ramai vei chipao thaifü puhnou Sarah ye shiha peie, alia paohkhai touyu nasü Sarah hi vete peie. 2Sarah nou nahmai hrüloua nahpoutu ali Abraham nou chükhaivu louyu thainou puhye napeie. 3Sarah nou napeiyu nahpoutu zhih sü Abraham nou Isaak tea saloue. 4Ramai nou kharochi peiyu thaifüa teithe acha zhousü Abraham nou puh nahpoutu Isaakye heerode peie. 5Puh nahpoutu Isaakye nalouyu phaki puh hai po kaih pare. 6Sarah nou paoe, “Ramai nou Eye savayu ae nüyu hai peie, ako sülouyu mai hrülai nou Eye koa nülai.” 7Sarah nou paopue, “Thaonou Abraham hi Sarah nou nah salai hie tea paokhailai? Ana puh nou chipao louyu thainou nahpoutu ali puh hi napeie.”
8Nahtou nasü vikhe loua naophawure, Isaak nou naophayu teithe sü Abraham nou puhmai khemai sa-a nüdu nüe.
Hagar alia Ishmael ye Seitayu
9Teitheli Sarah nou Ejipt pfüpai Hagar nahpoutu Ishmael alia puh nahpoutu Isaak koa ko buyu ngaoloue. 10Südonou puhnou Abraham hi paoe, “Qila pfüpai alia puh nahpoutu Ishmael ye seitawo, daiolouzü qilapai nou nayu nahpoutu nanou anah poutu Isaakye koa kaalo pozho louhoe.” 11Haina vanou Abraham hai levea shore, daiolouzü Ishmael-a puh nah-e. 12Ana Ramai nou Abraham hisü paoe, “Qila pfüpai Hagar ae nahpoutu naye donou ne leveaso. Sarah nou ne hi paoyu na thaifüa soupeio, daiolouzü Isaak vanou Enou ne hi vo soukhai touyu nasü velai. 13Enou qila pfüpai nahpoutu Ishmael-a panou tyahrü ali soulai, daiolouzü puh-a ne nah-e.”
14Südonou Abraham nou thainesho shona sü kushuloua raokhao ae souhee dzübvüli poloua Hagar phao hisü nahtou noupu khaipeia vakou seitare. Chuo qila pfüpai nou tapaloua Beersheba vao hinou sühao-a ta-a laire. 15Souhee dzübvü hi dzü halou khaie puhnou puh nahtouye sü süübe phili hi khaiwure. 16Süthaisü puhnou mitar 100 pha talakou chobuloua puh lah haibüa tsüchoe, “Anahtou thaire sü E zhuthoulou hore.” Honapai nou sübüa tsüchoyu phaki nahtou sünou shusoua krapare.
17Ramai nou nahtou krayu paisü chouloure, alia Mapao vei rakivamai nou raki hinou Hagarye sü chare, “Ne daisou nou leveayu bue? Ngaopiso, daiolouzü Ramai nou ne nahtou paisü süloure. 18Tashulo alia nahtouye kou daopolo, daiolouzü Enou puhvei tyaonahye sü tyahrü aduli soupeilai.” 19Süthaisü Ramai nou honapai nghithou sü hapa peie, alia puhnou dzükhao ali bua zhingaoloue. Puhnou takou souheebvü nasü dzü louthou phouloua puh nahtouye panou dzü keloue. 20Ramai nou nahtouye koa salai peia puhsü dushu loure. Puhnou Paran rekounou hrüa louh posü shoyu mai ali soure. 21Puh pfünou puhye Ejipt maipfü ali phoupeie.
Abraham ae Abimelek koa Ae-ao Souyu
22Süteile phaki, Abimelek ae puhvei reihmai peicha Phikol koa Abraham hi ve haibüa paoe, “Nenou souyu vah teitei hi Ramai nou koa zhopeiwe. 23Südonou ahi, anah maitao hi, moa atyaosholea hi kaozü moyu vah soulai moe, ana Enou ne hi chechea souyu büa ne-a ahi alia nenou ve shetumai ali soua hrüyu teidei haina hi chechea hrülai touyu Ramai zhih hinou ahi chaachou soupeio.”
24Abraham nou chila peie, “Enou chou peilai.”
25Abimelek vei kilai mainou saolouyu dzükhao na vanou Abraham nou Abimelek hi paoyu phaki, 26Abimelek nou paoe, “Thaonou sünasü saolousa E sümoe. Ne-a süsü ahi raiki paokhai toumoe, E zhounou sürai baihie.” 27Süthaisü Abraham nou zhaotu ae chode taoli Abimelekye hupeie alia sükua puhai nou ae-ao soua chaachou souloue. 28Abraham nou zhaokhome hinou zhaotu anai daiku paloue, 29alia Abimelek nou puh hi paoe, “Ne zhaotu anai daikupa khaiyu hai daido noue?”
30Süthaisü Abraham nou chila peie, “Zhaotu haitao anai hai ne ahi nou polo, sübüa dzükhao nasü Enou he-e touyu neye panou shakhi soulai.” 31Südonou buh sünasü Beersheba tea saloue, daiolouzü puhai nou buh süna hinou ae-ao souloua chaachou souloue.
32Sübüa puhai nou Beersheba hinou chaachou soulouyu thai, Abimelek ae puhvei reihmai peikho Phikol sü shuloua Philistin mai deihi hotare. 33Süthaisü Abraham nou Beershaba hi tamarisk süübe ali shopeie, alia süna hinou puhnou teisa ahri Ramai Mapao ye tholoue. 34Sükua Abraham nou Philistin mai dei hinou shetumai ali soua phashoyu hrüe.
Currently Selected:
SHURAI 21: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
