MAIPEI PHOUYU 22
22
Moab Maivei Veo nou Balaamye Seiho Kuyu
1Süthaisü Israel mainou tapoa nou Moab maivei deikho, Jordan hinou teinghi palova ae Jeriko vei pahlova nou fühao soua nou bure.
2Israel mainou Amor mai hi soupeiyu ko khesü Moab hi veo, Zippor nahpoutu Balak nou choulou khai-e, 3puh alia puhvei mai hrülai nou ngaopi shore. 4Moab mainou Midian hi süthai-apeio maitao hisü paoe, “Lahvei touyu ki-lu lia ha-a nou teisa nou sühao poa laiyu mai haitao nou Eletao mai hrülaiye sü cho nou poudai toukhai louyu büa souhakhai toulaire.” Südonou Moab maivei Balak veo nou 5Beor nahpoutu Balaam ye kupoa vere donou kopomaiye Amaw maivei teidei, Euphratis reipe hinou buyu Pithor hisü seive haibüa paoe, “Ejipt hinou tyahrü ali hai tapaloua teidei veishi sü phoutao loure, ae puletao nou Etao vei teidei sü poloure donou soupi nou bure touyu hai neye panou sülou nüwe. 6Puletao hai Etao jünou pouloure, südonou zhuvea tave Eye donou puletaoye sü chaa peio, sükulouzü Etao nou puletao jünou veiloua puletaoye sü teidei hinou hulai lousüe. Enou süwe, süolouzü nenou shiha peikhaie, maikhe mai hai ha ngaoloua baiwe, ae nenou chaa peiyu mai hai chaa pfüa baiwe.”
7Südonou Moab mai ae Midian maivei süthai-apei maitao nou chaa peiyu vei muma sü poloua Balaam hisü tare, ae puletao nou Balak vei chipao hai puh hi paongao peie. 8Balaam nou puletao hisü paoe, “Zhoukhei hai hinou chaolo, dosho shona Mapao nou ahi paoyu chipao khesü Enou neletao hi paopeilai.” Südonou Moab maivei süthai-apei maitao hai Balaam hinou chaore.
9Ramai nou Balaam hisü ve haibüa nou chi noure, “Ne hi ve chao-a buyu maitao sü thao-e?”
10Puhnou chila peie, “Moab hi veo Balak nou mai haitao hai ahi seive haibüa paoe, 11süolouzü Ejipt teidei hinou tapayu maitao nou teidei veishi sü phoutao loure. Puhnou Eye panou puletaoye sü chaa peinüwe, sükulouzü puhnou puletaoye sü reih soua hulai loulai touwe.”
12Ramai nou Balaam hi paoe, “Mai haitaoye koa taso, ae Israel maitaoye sü chaa peiso, daiolouzü Enou puletaoye sü ha peiwure.”
13Shona sü Balaam nou Balak vei kopomaitao hisü paoe, “Ki hi dakhai ta-a baio; Mapao nou Eye panou neletaoye koa tabare.” 14Südonou puhtao hai Balak hisü dakhaive Balaam nou puletaoye koa tabare tea paopeie.
15Süthaisü Balak nou süthai-apei mai hai poupua nou ae raichoki maitao jünou matsü puyu maitao nou Balaam hisü seive pure. 16Puletao nou Balaam hisü ve Balak vei chipao hai paopeie, “Zhuvea nou ahi vepei bayu sü soupeiso! 17Nenou jüpayu teitei sü Enou ne hi peilai, zhuvea nou hai hi veloua Eye donou mai hotao sü chaa peio.”
18Ana Balaam nou chila peie, “Balak nou puhvei vedei hi buyu shahu ae sana veishi Eye peiyuma, avei Ramai Mapao nou kharochi peiyu jünou halia pua paolou shie. 19Ana zhoukhei zhuvea nou hai hinou chaolo, Mapao nou ahi halia paopu peilai homosa E zhulai hie.”
20Süzhou khei Ramai nou Balaam hisü ve haibüa paoe, “Hakinou mai haitao nou neye koa talai tea kulouzü, puletaoye koa sata-o, ana Enou ne hi paopeiyu likhei pao-a bailai!” 21Südonou thainesho shona sü Balaam nou puhvei rheisüh pfüloua Moab maivei süthai-apei maitao koa nou tare.
Balaam ae Puhvei Rheisüh
22Ana Balaam nou takhai-e Ramai hai rarou loure, ae Balaam nou rheisüh sü pfüa nou puhvei kilai mai ahai koa ta-e, Mapao vei rakivamai nou puhvei ludu sü kou nuloure. 23Rakivamai nanou puh bah hi khoche poa nou ludu hinou la-a buyu hai rheisüh nanou ngaolou khaie, rheisüh nasü ludu hi tamoa nou dou hisü loutare. Balaam nou rheisüh sü dapoa ludu hisü paloure. 24Süthaisü darkha kipei ahai kohinou holo ae hailo-a chuh bua nou ludu taiyu buh hinou rakivamai nanou daloure. 25Rheisüh nanou rakivamai naye ngaoulou khaie, chuh khokhai touyu hilova taraikou Balaam phi hai bipeie, südonou Balaam nou rheisüh nasü dapeipue. 26Süthaisü rakivamai nanou tareikhe zhoulo-a ae nalova-a reilou shiyu ludu atai buh ali hinou laloure. 27Rheisüh nanou rakivamai naye ngaolou khaie, rheisüh nasü deiphi hi kou dazü loure; ae Balaam hai rarou sholoua puhvei süpo sünou rheisühye sü poa dare. 28Süthaisü Mapao nou rheisüh hisü chi paolou süyu khouko hai thoupeiwure, ae rheisüh nou Balaam hi paoe, “Enou ne hi dai soupeiwure? Ne daisounou Eye avu asü hai dapeiwe?”
29Balaam nou chila peie, “Nenou Eye pfüa tabayu donou-e! Abah hi khoche buyu thaio Enou neye daothawu laire.”
30Rheisüh nou chila peie, “Nevei hrümai sasasü pfüa tayu rheisüh nasü E baimowu? Enou neye haibüa raichoki soupeidou?”
“Sübü moe,” tea puhnou chila peie.
31Süthaisü Mapao nou Balaamye panou rakivamai nanou khoche poa ludu hinou la-a buyu sü ngaoloure. Südonou puhnou pei pfüa nakou khurüe. 32Rakivamai nanou Balaam hi noure, “Ne daisounou nevei rheisühye sü bakha asü koute haibüa nou dapeiwe? Enou nevei ludu sü nuchao loure donou vewe; daiolouzü ne hai zhouvu vei veidu hai nasü tayu kaomoe.#22.32 Phoure haihi ne...kaomoe; Haina hai Hebrew hinou sheesha toumoe. 33Ana nevei rheisüh nanou Eye ngaoloua bakha asü hai tavai loure, hakinou puhnou tavai talou moyu thaio, Enou neye daothawua nevei rheisüh nasü panou hria ta-a bailai.”
34Balaam nou chila peie, “E mah souwure. Nenou Eye nuchaore donou ludu hinou la-a nou bue touyu sü Enou sülou more. Chua E hai tayu kaomoe touyu thaio, Enou ki hi dakhai ta-a bailai.”
35Ana rakivamai nanou chila peie, “Mai haitaoye sü koa nou ta-o, ana Enou paoyu likhei sü pao-a baio.” Südonou Balaam nou puletaoye koa tare.
Balak nou Balaamye Sülouyu
36Balak nou Balaam sü laire touyu hai choulou khaie, puhnou puhye süloulai tea Moab maivei deirai, Arnon Reipe hinou buyu Ar nuhdu hisü vere. 37Balak nou puh hi paoe, “Enou neye panou rai-a nou tave kuyu phaki, ne daisounou ahi vemoe. Nenou jüpayu nasü E neye peilou hoe tea ne tsüchovu?”
38Balaam nou chila peie, “E ne hi vere movu? Ana ahi dai soulou süyu khouko sü bue? Ramai nou paoyu likhei E sü pao-a bailai.” 39Südonou Balaam nou Balak ye koa Huzoth nuhdu hisü tare. 40Balak nou chode ae zhaotu dathaloua nou Balaam ae puhye koa laiyu süthai-apei maitao hi peie.
Balaam nou Rachipaola Araina
41Thainesho shona hai Balak nou Balaam ye saloua nou Israel mai daotu zhingaoyu Bamoth Baal hisü sapa loure.
Currently Selected:
MAIPEI PHOUYU 22: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
MAIPEI PHOUYU 22
22
Moab Maivei Veo nou Balaamye Seiho Kuyu
1Süthaisü Israel mainou tapoa nou Moab maivei deikho, Jordan hinou teinghi palova ae Jeriko vei pahlova nou fühao soua nou bure.
2Israel mainou Amor mai hi soupeiyu ko khesü Moab hi veo, Zippor nahpoutu Balak nou choulou khai-e, 3puh alia puhvei mai hrülai nou ngaopi shore. 4Moab mainou Midian hi süthai-apeio maitao hisü paoe, “Lahvei touyu ki-lu lia ha-a nou teisa nou sühao poa laiyu mai haitao nou Eletao mai hrülaiye sü cho nou poudai toukhai louyu büa souhakhai toulaire.” Südonou Moab maivei Balak veo nou 5Beor nahpoutu Balaam ye kupoa vere donou kopomaiye Amaw maivei teidei, Euphratis reipe hinou buyu Pithor hisü seive haibüa paoe, “Ejipt hinou tyahrü ali hai tapaloua teidei veishi sü phoutao loure, ae puletao nou Etao vei teidei sü poloure donou soupi nou bure touyu hai neye panou sülou nüwe. 6Puletao hai Etao jünou pouloure, südonou zhuvea tave Eye donou puletaoye sü chaa peio, sükulouzü Etao nou puletao jünou veiloua puletaoye sü teidei hinou hulai lousüe. Enou süwe, süolouzü nenou shiha peikhaie, maikhe mai hai ha ngaoloua baiwe, ae nenou chaa peiyu mai hai chaa pfüa baiwe.”
7Südonou Moab mai ae Midian maivei süthai-apei maitao nou chaa peiyu vei muma sü poloua Balaam hisü tare, ae puletao nou Balak vei chipao hai puh hi paongao peie. 8Balaam nou puletao hisü paoe, “Zhoukhei hai hinou chaolo, dosho shona Mapao nou ahi paoyu chipao khesü Enou neletao hi paopeilai.” Südonou Moab maivei süthai-apei maitao hai Balaam hinou chaore.
9Ramai nou Balaam hisü ve haibüa nou chi noure, “Ne hi ve chao-a buyu maitao sü thao-e?”
10Puhnou chila peie, “Moab hi veo Balak nou mai haitao hai ahi seive haibüa paoe, 11süolouzü Ejipt teidei hinou tapayu maitao nou teidei veishi sü phoutao loure. Puhnou Eye panou puletaoye sü chaa peinüwe, sükulouzü puhnou puletaoye sü reih soua hulai loulai touwe.”
12Ramai nou Balaam hi paoe, “Mai haitaoye koa taso, ae Israel maitaoye sü chaa peiso, daiolouzü Enou puletaoye sü ha peiwure.”
13Shona sü Balaam nou Balak vei kopomaitao hisü paoe, “Ki hi dakhai ta-a baio; Mapao nou Eye panou neletaoye koa tabare.” 14Südonou puhtao hai Balak hisü dakhaive Balaam nou puletaoye koa tabare tea paopeie.
15Süthaisü Balak nou süthai-apei mai hai poupua nou ae raichoki maitao jünou matsü puyu maitao nou Balaam hisü seive pure. 16Puletao nou Balaam hisü ve Balak vei chipao hai paopeie, “Zhuvea nou ahi vepei bayu sü soupeiso! 17Nenou jüpayu teitei sü Enou ne hi peilai, zhuvea nou hai hi veloua Eye donou mai hotao sü chaa peio.”
18Ana Balaam nou chila peie, “Balak nou puhvei vedei hi buyu shahu ae sana veishi Eye peiyuma, avei Ramai Mapao nou kharochi peiyu jünou halia pua paolou shie. 19Ana zhoukhei zhuvea nou hai hinou chaolo, Mapao nou ahi halia paopu peilai homosa E zhulai hie.”
20Süzhou khei Ramai nou Balaam hisü ve haibüa paoe, “Hakinou mai haitao nou neye koa talai tea kulouzü, puletaoye koa sata-o, ana Enou ne hi paopeiyu likhei pao-a bailai!” 21Südonou thainesho shona sü Balaam nou puhvei rheisüh pfüloua Moab maivei süthai-apei maitao koa nou tare.
Balaam ae Puhvei Rheisüh
22Ana Balaam nou takhai-e Ramai hai rarou loure, ae Balaam nou rheisüh sü pfüa nou puhvei kilai mai ahai koa ta-e, Mapao vei rakivamai nou puhvei ludu sü kou nuloure. 23Rakivamai nanou puh bah hi khoche poa nou ludu hinou la-a buyu hai rheisüh nanou ngaolou khaie, rheisüh nasü ludu hi tamoa nou dou hisü loutare. Balaam nou rheisüh sü dapoa ludu hisü paloure. 24Süthaisü darkha kipei ahai kohinou holo ae hailo-a chuh bua nou ludu taiyu buh hinou rakivamai nanou daloure. 25Rheisüh nanou rakivamai naye ngaoulou khaie, chuh khokhai touyu hilova taraikou Balaam phi hai bipeie, südonou Balaam nou rheisüh nasü dapeipue. 26Süthaisü rakivamai nanou tareikhe zhoulo-a ae nalova-a reilou shiyu ludu atai buh ali hinou laloure. 27Rheisüh nanou rakivamai naye ngaolou khaie, rheisüh nasü deiphi hi kou dazü loure; ae Balaam hai rarou sholoua puhvei süpo sünou rheisühye sü poa dare. 28Süthaisü Mapao nou rheisüh hisü chi paolou süyu khouko hai thoupeiwure, ae rheisüh nou Balaam hi paoe, “Enou ne hi dai soupeiwure? Ne daisounou Eye avu asü hai dapeiwe?”
29Balaam nou chila peie, “Nenou Eye pfüa tabayu donou-e! Abah hi khoche buyu thaio Enou neye daothawu laire.”
30Rheisüh nou chila peie, “Nevei hrümai sasasü pfüa tayu rheisüh nasü E baimowu? Enou neye haibüa raichoki soupeidou?”
“Sübü moe,” tea puhnou chila peie.
31Süthaisü Mapao nou Balaamye panou rakivamai nanou khoche poa ludu hinou la-a buyu sü ngaoloure. Südonou puhnou pei pfüa nakou khurüe. 32Rakivamai nanou Balaam hi noure, “Ne daisounou nevei rheisühye sü bakha asü koute haibüa nou dapeiwe? Enou nevei ludu sü nuchao loure donou vewe; daiolouzü ne hai zhouvu vei veidu hai nasü tayu kaomoe.#22.32 Phoure haihi ne...kaomoe; Haina hai Hebrew hinou sheesha toumoe. 33Ana nevei rheisüh nanou Eye ngaoloua bakha asü hai tavai loure, hakinou puhnou tavai talou moyu thaio, Enou neye daothawua nevei rheisüh nasü panou hria ta-a bailai.”
34Balaam nou chila peie, “E mah souwure. Nenou Eye nuchaore donou ludu hinou la-a nou bue touyu sü Enou sülou more. Chua E hai tayu kaomoe touyu thaio, Enou ki hi dakhai ta-a bailai.”
35Ana rakivamai nanou chila peie, “Mai haitaoye sü koa nou ta-o, ana Enou paoyu likhei sü pao-a baio.” Südonou Balaam nou puletaoye koa tare.
Balak nou Balaamye Sülouyu
36Balak nou Balaam sü laire touyu hai choulou khaie, puhnou puhye süloulai tea Moab maivei deirai, Arnon Reipe hinou buyu Ar nuhdu hisü vere. 37Balak nou puh hi paoe, “Enou neye panou rai-a nou tave kuyu phaki, ne daisounou ahi vemoe. Nenou jüpayu nasü E neye peilou hoe tea ne tsüchovu?”
38Balaam nou chila peie, “E ne hi vere movu? Ana ahi dai soulou süyu khouko sü bue? Ramai nou paoyu likhei E sü pao-a bailai.” 39Südonou Balaam nou Balak ye koa Huzoth nuhdu hisü tare. 40Balak nou chode ae zhaotu dathaloua nou Balaam ae puhye koa laiyu süthai-apei maitao hi peie.
Balaam nou Rachipaola Araina
41Thainesho shona hai Balak nou Balaam ye saloua nou Israel mai daotu zhingaoyu Bamoth Baal hisü sapa loure.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.