HONGTHONHOI CHHI 12
12
Loüh Ajeiat tekkü Eptsün
1Nungtao thatsonai Nokpao Herodüh donthehoi jeiat-iau thaiutha tsalou. 2Apaüh Yohan dei Yakob, salaim nou loat. 3Tilai apaüh Yihudahai nungüh monglingiji ta epsan, apaüh Peter lüko thaloau tsalo. (Nungsoh phoplao tsüthiokü nou Themtsai Sümai tao noiküla.) 4Peter thaloküta akhotsamai khothiokü wan, nungko apa ehühoi chekü luok nouso hau jimikü taiu. Herodüh apa Aasan Sümai yanküta nyong khako kankü shikü hau ayangtaiu noiküla. 5Nungtiphe Peter akhotsamai thiokü wanan, lüko donthehoi nousoüh apa thaiutha Goa tü thatü mongkü misao sao.
Peter, Akhotsam ainou Sokkan
6Herodüh Peter akhotsam ainou khaiuniahoi dongai nialokü shiau nou thaiu nou soh nai, Peter ehü khaiunia nime jetko saikü noiküla. Apa sonkhiang auo nime nou kekü taiu, naiuso nungko ehü nousoüh akhotsam kuokhan dongko hükü jim. 7Alekta Apaou aünhong tsak nungko tsaküta naiuso awon tsaküh tsampai nai thsalut. Nungai aünhong nou Peter sangdongkhaiu ai helokü apa tü saiukü jonchukü ngiom, “Liukü!, achu!” Nungai Peter pha ainou sonkhiang auo nouso thamkü goh ai siangkü saowan. 8Nungaih hong nou ngiom, “A-omthsa lüthsalo küta ahokkhut lükhutlo.” Peterüh angiotsünli chhin, naiuso hong nou ngiom, “Aphakhut akhutlo küta ngüko hakü ashi.” 9Peter akhotsam ainou shikü hong nou chhitsün nung atsüo süne tsüde ti tsüngekü apa tü hoilut, apaüh nung meamean tsak ta yang. 10Nungai ngüne nung ehüpou chongting küta nime nou yankü khu, naiuso athonting sonbekhan nung noknio tü sheilutkü sopkü noiküla. Ngüne yamkheng nai tsakeikü sao nai hong nou alekta Peter letaiukü khu.
11Nai Peterüh apatü ti thawaokü noiküla nung seichukü ngiom, “Apaou nou apa aünhong hongkü ngo Herod pha ainou naiuso Yihudahaiüh yangtsün ainou kipsaniu ta lo ngo atsüoting ngeji.”
12Apaüh nung thawaotsün aküo meikü ngekü Yohan sau tü Mark ta jonji, apa nyiu Mari tsamai khu. Nungai khaiunia piakü kamshikü misao saokü noiküla. 13Peterüh kou nou tü kengchiai tsakü haiunai, tsamki tsak nian nou Rodaüh thalaau shin. 14Nung nyiuhai nou Peter sang lulakü apa thatü monglingkü koukhan tsüsoppankü tsamai kopkü nap küta kengchiai koukhan dongko Peter tsakü noin ta vepeng. 15“Ni awai waiwaiji!” ta ngüsoüh apatü thala. Lüko apaüh nung atsüoting noin ta tsülaokü ngiom. Nungai ngüsoüh thalakü ngiom, “Nung apa ün hong noin.”
16Nung saokü Peterüh kou nou tü tsülaokü haiukei, aphiteng nai ngüsoüh kuokhan nou soppan, nai tilai ngüsoüh apa ep, ngüso ngawan. 17Apa phaüh ngüsotü nyankü athe ta lahkü lolao, naiuso apaüh ngüso hau Apaou nou apa titi akhotsam ainou niashi nung sasakü chite. Nungai apaüh ngiom, “Yakob naiuso amonglamhoi nouso hau nung lüchite,” küta apa nung ainou pungekü amao tsakai khu.
18Tilai ah nou ngekü shin, Peter tü ti thawaom? ta ehühoi ongko apülai thsüokü tsak noiküla. 19Herodüh apa yamau ngiokhem kiu, lüko ngüsoüh apa tsüepchu. Nungtiphe apaüh ehü nouso tü sangküta ngüso loatkü wanau ngiokhem kiu.
Nungphiai Herodüh Yihuda leankü khuküta Kaisaria nai atao intso shamankü noiküla.
Herod Eantsün
20Herod, Sidonhai si Tairhai tü thatü mongmat, nungtiphe ngüso mong tsak hau thekü apako eppeau khu. Chongting nai ngüsoüh nokpao tsam paotsangtsün ashe Blastako ngüso tü hachuau haimei shan. Nungphiai Herod dongai khuküta apatü nokmei thaiutha sao, tititenai ngüsoüh heshiutsün alum nung nokpao goumchi ainoulu epkü noiküla.
21Achosan ajekhaiu tsak nouko Herodüh nokpao sheitho thokü mikhem kiutsün noikham nai noikü khaiuniahoi nouso tü chitekü ngiom. 22“Nung khaiunia tsak sangh tsüde, lüko goa sangh tsak noin!” ta ngüsoüh vekü ngiom. 23Nungko alekta Apaou aünhong tsaküh Herod shiuthiowan, tiautenai apaüh Goa hau asuhat tsükiu. Nungko apa suong nou tsangkü hekü ean.
24Nungti Goa Ngio tsülaokü shing naiuso pungpeng.
25Barnaba naiuso Saul neüh athoilut chhi nou khemküta ngüsoko Yohan sautü Mark ta jonji, apa nialokü Yirusalem ai laokü shin.
Currently Selected:
HONGTHONHOI CHHI 12: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
