T. LŪKÖS 18
18
Inchōḵoṙô Ik Tafīösi Tök Kamhôka
1Ngaich hēngö ṙô Anga-aṅ nö in cha, tö inchōḵoṙô; nö ve-ekūötēv; sōtu nö uhā-en. 2Ngö ṙô Anga-aṅ, Hĕng taka ök kamhôṅka ik tö hĕng panam, ök tötpa-ekūö tö ngam Tēv, öt töchumkūöṙen tö tarik. 3Ngaich hĕng tak ök umuh tafīösi im panam. Ṙōlvan anga-aṅ nö yihtöre, nö in ò, nö ngö ṙô, Kahôklökui chu man i ngòh tökunyahaṅelmat tö chu. 4Ngaich sōḵ sin anga-aṅ; unôichngöre pöri anga-aṅ, nö ngö ṙô töre, Pòrô chin tötpa-ekūö tö ngam Tēv, öt töchumkūöṙen tö tarik; 5Ngaich pò ngòh tafīösi nö hakihten chu, hòṅ kahòklökui ò chin; hòṅ ò min nö öt mu-uhāngen chu, nöng iṙuhö yanihih.
6Ngaich ngö ṙô ngam Mā, Hangihtöre sitih ṙô ngam Mā tömichūṙen kamhôṅka. 7Röh ang min ngam Tēv nö kahòklökui vē katöllöre, vē vame-eṅkūö Ò nö peuheū harap ṙô. Pò ò nö tömarô-òtö manöiyö nö in cha. 8Ngö ṙô Chin tö yīö, ka-eūyen An min nö kahòklö kui cha. Hē ngòh Kūön Tarik pöri nö yih, kôtökūö Ang min tö mikah nö ing panam?
Inchōḵoṙô Ik Feresī Tök Mahamūlṙāi Kinëhöt Chehen
9Ngih ön inrē ṙô Ò inchōḵoṙô nö i yip tölöök tölōnre, ngaich nöng töng rö-öv yip tahëng. 10Nët tak nak tarik chamuh el ngam töhet chūök ngam Tēv, nö ve-ekūötēv; hĕng taka ök Feresī, mahamūl ṙāi kinëḵhöt chehen ök tahëng taka. 11Söklöre ngaich ngam Feresī nö ngö ṙô, nö kahngenre nö ve-ekūötēv, Ō Tēv, ha-öinyö Meh chin, pò chu öt sā yip tahëng tarik, kamil, tömichūṙen, ma-asĕhha; ötrēhĕn chin sā ngòh mahamūl ṙāi kinëhet chehen. 12Nët heuh chin ha-ik i tö sat sumkam; hĕnghata chin i tö söm, öich kē-ĕti, i nuptaneūngen chu. 13Ngaich ngam mahamūl ṙāi kinëhet chehen, nö marôvat nö sökhaka, ötrēhĕn nö hòṅ môklökūöre nö el halīöngö; kōk elngòhre pöri anga-aṅ nö ngö ṙô, Ō Tēv, aheukölōn Man tö chu, chu-ö tököölö fālen. 14Ngö ṙô Chin tö yīö, tö ngòh tarik nö chuh patīre nö holtö inṙē-ĕlre, ĕhten tö ngam tahëng. Pò ngòh mahapōilöre min nö hayāichiyö; ngòh mahayāichngöre pöri min nö hapōilöngö.
Hakôlô Yik Kun Nyiö Ang Yēsū
(Mt 17.13-15; Mk 10.13-16)
15Ngaich cha-a nö kētö yik kun nyīö nö in Ò; pò Ò nö hōtu nö lūölken cha. Ngaich hē mat yik mahaköp nö meūkö e, ngaich vëken cha. 16Havëtu pöri cha-a tö Yēsū nö in Ò, nö ngö ṙô, Hökngen më nyīö nö yihtöre nö in Chu; un sōtu; tön töngatī an ngam pūlngö ngam Tēv. 17Tökô-ò ṙô Chin tö yīö, Ngòh tötkamëḵ ngam pūlngö ngam Tēv min, nö sā kun nyīö, ötkô min anga-aṅ nö kuhēthötre nö in e.
Ök Tökòlò Tarik
(Mt 19.16-30; Mk 10.17-31)
18Ngaich hĕng tak ök mākūö yahūti mahatönan nö ngö ṙô, Tölöök Mahaköphöti; asuh ap min la-en chu, hòṅ chu amīnuvö tö ngam nômö tö-örheūheu-aṅ?
19Ngaich ngö ṙô Yēsū tö ò, Pò yòh öm tölöök ngö ṙô, öm havëken Chu? Öt tölöökuvö höng humeng ngam Tēv. 20Huveū-eu ṙô öm tö nup chöngö. Um asĕhha. Um fël tarik. Um ulāiyö. Um sūöchkö töng tarik. Milēḵṙen tö minā yöngre.
21Ngaich ngö ṙô anga-aṅ, Lök in u chin nö ṙòkhöre hēten chu ṙòngmö kūöṅnö.
22Höng hangtöre ang Yēsūtö e, ngö ṙô Anga-aṅ tö ò, Hĕng ap töhāṅten nö in meh; inyihngö nup taṙòkhöre man chehenre; öm katölhökūö yāich; ngaich me-eṅ min kanôluṙô el halīöngö. Ngaich ta-a tömrit Chu. 23Höng hangtöre anga-aṅ tö u, ngaich pōyen miṙivlōn; pò ò nö tökôlò takô.
24Höng meuktöre Yēsū tö ò, ngaich ngö ṙô, Sitih kahnihngen aich vē tökôlò nö kuhēthötre nö im pūlngö ngam Tēv. 25Lööṙen kunhēthöt ön ngòh ūṅt nö el manëngö rit charum, lööṙen tö kunhēthöt ngòh tökôlò tarik nö im pūlngö ngam Tēv. 26Ngaich ngö ṙô yik hamang, Achīö öp pökeh tökô-òren nö hayöökaṙen? 27Ngö ṙô pöri Anga-aṅ, Në tötkanô-òṅvö nö i tarik, tökô nö i ngam Tēv. 28Ngaich ngö ṙô Pītör, Yĕh meuk; ṙāngö inlānenre in īhö; ngaich tömrit Meh.
29Ngaich ngö ṙô Anga-aṅ tö cha, Tökô-ò ṙô Chin tö yīö, Öt tarīkuvö ṙamā-ang patīre, pihöre, hanöngkisānöre, yöngre, kūönre, töpòkūö ngam pūlngö ngam, Tēv. 30Öp tö-ötteūngen min tö töpōyen i ngih panam, im töyihivö panam inrē ngam nômö tö-örheūheu-aṅ.
Linūöi Heuhṙô Yēsū Nö Vë-nyö Ngam Kinpāha Re
(Mt 20.17-19; Mt 10.32-34)
31Ngô-òṅ yik tö nët sīön taka tö Ò, ngaich ngö ṙô Anga-aṅ tö cha, Yĕh meuk; chuh Yerūsalem in. Ngaich ṙòkhöre nup tökūichiyö tö yik pròfĕt min nö keuheūtiṙen nö i ngòh Kūön Tarik. 32Pò Ò min nö kē-ĕyö nö i yip tahëng mihëṅṙö, ngaich hayëḵe min, ane inrē sumrōngikūö, köösi elmat inrē. 33Fōho min Anga-aṅ tö cha; fëli inrē im linūöi sumkam pöri min Anga-aṅ nö havanlöre nö aṅ.
34Ngaich cha-a nö öt akaha elnang tö u; hayunngöre nun nö in cha; öt meuk minë ṙô cha-a.
Halanken Ök Tötmeuṅk Mi-i Cheū-a Ang Yēsū
(Mt 20.29-34; Mk 10.46-52)
35Ngaich röhta Anga-aṅ nö i Yerikō, hĕng taka ök tötmeuk tarik, amūichhaka nö i taseū talöökö, nöng havë-a. 36Ngaich hang ṙô röön yik tömaṙôngö, ngaich hatöntöre anga-aṅ tö e. 37Ngaich ngö ṙô cha-a tö ò, Yēsū An ngam aṅ Nāsaret kumröönngöre. 38Ngaich hūḵa anga-aṅ, nö ngö ṙô, Yēsū Me-eṅ Kūön Tāvit; aheūkölōn tö chu. 39Ngaich yik mu-urĕh nö vëken ò, pò ò nö hōtu nö ṙāngôre. Vaichtö ṙūönyöṙôre anga-aṅ nö pōitô nö ngö, Me-eṅ Kūön Tāvit; aheūkölōn tö chu. 40Sökngöre ngaich Ang Yēsū, ngaich hōten ò nö kētu nö in Ò. Ngaich hē ò nö röhta, ngaich hatönö tö Ò, nö ngö ṙô, 41Asuh ap lōn meh, la-en chu in meh? Ngaich ngö ṙô anga-aṅ, Mā; hòṅ meuk chin. 42Ngaich ngö ṙô Yēsū tö ò, Meuk man yēḵ ngaich. Ngam mikah meh an tölöökentī tö meh.
43Ilööṙen ngaich anga-aṅ nö meuk; tömrit Ò ngaich, nöng ha-öiny ngam Tēv. Ha-öiny ngam Tēv inrē yik tömaṙôngö tarik, hē mat cha nö meūkö e.
Currently Selected:
T. LŪKÖS 18: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
T. LŪKÖS 18
18
Inchōḵoṙô Ik Tafīösi Tök Kamhôka
1Ngaich hēngö ṙô Anga-aṅ nö in cha, tö inchōḵoṙô; nö ve-ekūötēv; sōtu nö uhā-en. 2Ngö ṙô Anga-aṅ, Hĕng taka ök kamhôṅka ik tö hĕng panam, ök tötpa-ekūö tö ngam Tēv, öt töchumkūöṙen tö tarik. 3Ngaich hĕng tak ök umuh tafīösi im panam. Ṙōlvan anga-aṅ nö yihtöre, nö in ò, nö ngö ṙô, Kahôklökui chu man i ngòh tökunyahaṅelmat tö chu. 4Ngaich sōḵ sin anga-aṅ; unôichngöre pöri anga-aṅ, nö ngö ṙô töre, Pòrô chin tötpa-ekūö tö ngam Tēv, öt töchumkūöṙen tö tarik; 5Ngaich pò ngòh tafīösi nö hakihten chu, hòṅ kahòklökui ò chin; hòṅ ò min nö öt mu-uhāngen chu, nöng iṙuhö yanihih.
6Ngaich ngö ṙô ngam Mā, Hangihtöre sitih ṙô ngam Mā tömichūṙen kamhôṅka. 7Röh ang min ngam Tēv nö kahòklökui vē katöllöre, vē vame-eṅkūö Ò nö peuheū harap ṙô. Pò ò nö tömarô-òtö manöiyö nö in cha. 8Ngö ṙô Chin tö yīö, ka-eūyen An min nö kahòklö kui cha. Hē ngòh Kūön Tarik pöri nö yih, kôtökūö Ang min tö mikah nö ing panam?
Inchōḵoṙô Ik Feresī Tök Mahamūlṙāi Kinëhöt Chehen
9Ngih ön inrē ṙô Ò inchōḵoṙô nö i yip tölöök tölōnre, ngaich nöng töng rö-öv yip tahëng. 10Nët tak nak tarik chamuh el ngam töhet chūök ngam Tēv, nö ve-ekūötēv; hĕng taka ök Feresī, mahamūl ṙāi kinëḵhöt chehen ök tahëng taka. 11Söklöre ngaich ngam Feresī nö ngö ṙô, nö kahngenre nö ve-ekūötēv, Ō Tēv, ha-öinyö Meh chin, pò chu öt sā yip tahëng tarik, kamil, tömichūṙen, ma-asĕhha; ötrēhĕn chin sā ngòh mahamūl ṙāi kinëhet chehen. 12Nët heuh chin ha-ik i tö sat sumkam; hĕnghata chin i tö söm, öich kē-ĕti, i nuptaneūngen chu. 13Ngaich ngam mahamūl ṙāi kinëhet chehen, nö marôvat nö sökhaka, ötrēhĕn nö hòṅ môklökūöre nö el halīöngö; kōk elngòhre pöri anga-aṅ nö ngö ṙô, Ō Tēv, aheukölōn Man tö chu, chu-ö tököölö fālen. 14Ngö ṙô Chin tö yīö, tö ngòh tarik nö chuh patīre nö holtö inṙē-ĕlre, ĕhten tö ngam tahëng. Pò ngòh mahapōilöre min nö hayāichiyö; ngòh mahayāichngöre pöri min nö hapōilöngö.
Hakôlô Yik Kun Nyiö Ang Yēsū
(Mt 17.13-15; Mk 10.13-16)
15Ngaich cha-a nö kētö yik kun nyīö nö in Ò; pò Ò nö hōtu nö lūölken cha. Ngaich hē mat yik mahaköp nö meūkö e, ngaich vëken cha. 16Havëtu pöri cha-a tö Yēsū nö in Ò, nö ngö ṙô, Hökngen më nyīö nö yihtöre nö in Chu; un sōtu; tön töngatī an ngam pūlngö ngam Tēv. 17Tökô-ò ṙô Chin tö yīö, Ngòh tötkamëḵ ngam pūlngö ngam Tēv min, nö sā kun nyīö, ötkô min anga-aṅ nö kuhēthötre nö in e.
Ök Tökòlò Tarik
(Mt 19.16-30; Mk 10.17-31)
18Ngaich hĕng tak ök mākūö yahūti mahatönan nö ngö ṙô, Tölöök Mahaköphöti; asuh ap min la-en chu, hòṅ chu amīnuvö tö ngam nômö tö-örheūheu-aṅ?
19Ngaich ngö ṙô Yēsū tö ò, Pò yòh öm tölöök ngö ṙô, öm havëken Chu? Öt tölöökuvö höng humeng ngam Tēv. 20Huveū-eu ṙô öm tö nup chöngö. Um asĕhha. Um fël tarik. Um ulāiyö. Um sūöchkö töng tarik. Milēḵṙen tö minā yöngre.
21Ngaich ngö ṙô anga-aṅ, Lök in u chin nö ṙòkhöre hēten chu ṙòngmö kūöṅnö.
22Höng hangtöre ang Yēsūtö e, ngö ṙô Anga-aṅ tö ò, Hĕng ap töhāṅten nö in meh; inyihngö nup taṙòkhöre man chehenre; öm katölhökūö yāich; ngaich me-eṅ min kanôluṙô el halīöngö. Ngaich ta-a tömrit Chu. 23Höng hangtöre anga-aṅ tö u, ngaich pōyen miṙivlōn; pò ò nö tökôlò takô.
24Höng meuktöre Yēsū tö ò, ngaich ngö ṙô, Sitih kahnihngen aich vē tökôlò nö kuhēthötre nö im pūlngö ngam Tēv. 25Lööṙen kunhēthöt ön ngòh ūṅt nö el manëngö rit charum, lööṙen tö kunhēthöt ngòh tökôlò tarik nö im pūlngö ngam Tēv. 26Ngaich ngö ṙô yik hamang, Achīö öp pökeh tökô-òren nö hayöökaṙen? 27Ngö ṙô pöri Anga-aṅ, Në tötkanô-òṅvö nö i tarik, tökô nö i ngam Tēv. 28Ngaich ngö ṙô Pītör, Yĕh meuk; ṙāngö inlānenre in īhö; ngaich tömrit Meh.
29Ngaich ngö ṙô Anga-aṅ tö cha, Tökô-ò ṙô Chin tö yīö, Öt tarīkuvö ṙamā-ang patīre, pihöre, hanöngkisānöre, yöngre, kūönre, töpòkūö ngam pūlngö ngam, Tēv. 30Öp tö-ötteūngen min tö töpōyen i ngih panam, im töyihivö panam inrē ngam nômö tö-örheūheu-aṅ.
Linūöi Heuhṙô Yēsū Nö Vë-nyö Ngam Kinpāha Re
(Mt 20.17-19; Mt 10.32-34)
31Ngô-òṅ yik tö nët sīön taka tö Ò, ngaich ngö ṙô Anga-aṅ tö cha, Yĕh meuk; chuh Yerūsalem in. Ngaich ṙòkhöre nup tökūichiyö tö yik pròfĕt min nö keuheūtiṙen nö i ngòh Kūön Tarik. 32Pò Ò min nö kē-ĕyö nö i yip tahëng mihëṅṙö, ngaich hayëḵe min, ane inrē sumrōngikūö, köösi elmat inrē. 33Fōho min Anga-aṅ tö cha; fëli inrē im linūöi sumkam pöri min Anga-aṅ nö havanlöre nö aṅ.
34Ngaich cha-a nö öt akaha elnang tö u; hayunngöre nun nö in cha; öt meuk minë ṙô cha-a.
Halanken Ök Tötmeuṅk Mi-i Cheū-a Ang Yēsū
(Mt 20.29-34; Mk 10.46-52)
35Ngaich röhta Anga-aṅ nö i Yerikō, hĕng taka ök tötmeuk tarik, amūichhaka nö i taseū talöökö, nöng havë-a. 36Ngaich hang ṙô röön yik tömaṙôngö, ngaich hatöntöre anga-aṅ tö e. 37Ngaich ngö ṙô cha-a tö ò, Yēsū An ngam aṅ Nāsaret kumröönngöre. 38Ngaich hūḵa anga-aṅ, nö ngö ṙô, Yēsū Me-eṅ Kūön Tāvit; aheūkölōn tö chu. 39Ngaich yik mu-urĕh nö vëken ò, pò ò nö hōtu nö ṙāngôre. Vaichtö ṙūönyöṙôre anga-aṅ nö pōitô nö ngö, Me-eṅ Kūön Tāvit; aheūkölōn tö chu. 40Sökngöre ngaich Ang Yēsū, ngaich hōten ò nö kētu nö in Ò. Ngaich hē ò nö röhta, ngaich hatönö tö Ò, nö ngö ṙô, 41Asuh ap lōn meh, la-en chu in meh? Ngaich ngö ṙô anga-aṅ, Mā; hòṅ meuk chin. 42Ngaich ngö ṙô Yēsū tö ò, Meuk man yēḵ ngaich. Ngam mikah meh an tölöökentī tö meh.
43Ilööṙen ngaich anga-aṅ nö meuk; tömrit Ò ngaich, nöng ha-öiny ngam Tēv. Ha-öiny ngam Tēv inrē yik tömaṙôngö tarik, hē mat cha nö meūkö e.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.