THRÜNTAN 25
25
Abraham Tsühsoniuso Püpübo
(1 Kiuthsü 1.32-33)
1Abraham kheaküshe aniube lu, tüsho alibe mung Ketura lakheah. 2Alibenü api kilim Zimran, Jokshan, Medan, Midian, Ishbak, tüsho Shua zübejih. 3Jokshan ju Sheba tüsho Dedan abuh lakheah. Tüsho Dedan tsührübo ju Asshurim, Letushim, tüsho Leummim. 4Tüsho Midian tsührübo ju Epha, Epher, Hanok, Abida, tüsho Eldaa. Harü alala Ketura tsührübo lakheah. 5Abrahamnü api lakhi alala Isak kilim jih. 6Tüshe Abrahamnü api hanniubebo tsührübo kilim thsambahbo jih; tüsho api lade alachoki apinü arübo ju atsührü Isak kheaknü aniakhiuklim lomi lim thiyia yüabahshih.
Abraham Shekhi tüsho Mi Bahkhi
7Abraham kam alalanü 175 lakheah. 8Abraham kutsüpde shinde labah sheabah, tüsho api mihtsürü kilim yü. 9Tüsho api tsührübo Isak tüsho Ishmael bünenü Hitrü Zohar tsührü Ephron lu ching Mamre müngüh Makpela lungkhün ching api kiuyukabah. 10Thulu ju Abrahamnü Hitrü ki thulokheah; ju ching Abraham tüsho aniube Sara kiuyukabah. 11Abraham she dunglim, Thrünpuhnü atsührü Isak müngühjih. Tüsho Isak ju Beer-lahai-roi ching lakheah.
Ishmael Tsühsoniusobo
(1 Kiuthsü 1.28-31)
12Kheakü ha Sara yamlabe Ijiprü Hagarnü Abraham kilim zübejihkhi Ishmael lünkhe ah. 13Arü zübekhi ayannü atsührü mungbo: Nebaioth, Kedar, Adbeel, Mibsam, 14Mishma, Duma, Massa, 15Hadad, Tema, Jetur, Naphish, tüsho Kedema. 16Harü ha Ishmael tsührü mungbo, arü kiutobo tüsho lapungbo, arü trükshih ayannü yakzanshuhrü 12 lakheah. 17Ishmael kam 137 lakheah; api sheabah tüsho api mihtsürü kilim yü. 18Ishmael tsühsoniusobo Ijip aniakhiuklim, Asiria limro kheak Havila tüsho Shur dükeak ching lakheah. Arübo Abraham tsühsoniusobo püpürü kheaknü chamkhibah alakheah.
Esau tüsho Jakob Zübekhi
19Ha Abraham tsührü Isak lünkhe ah. 20Paddan-aram chingnü Aramrü Bethuel tsührübe tüsho Aramrü Laban niurü Rebeka luchoki Isak kam 40 azorü lakheah. 21Kheakü Isaknü aniube thsungkheak Atungpuh ki mushu, tümütüsho alibe bünkeangberü lakheah; apinü amushukhi Atungpuhnü alojih, tüsho aniube Rebeka mübünkeangde kam. 22Khungarübo anihbe nuyam ching khangachih, tüsho alibenü tha, “Tümü thsükhi I kheak ha dünjicho?” Jumonü alibenü Atungpuh ki keokhipü yü.
23 Atungpuhnü alibe ki tha,
“Nü nuyam ching trükshih mahne lah,
tüsho nünü azübekhi mihtsürü mahne müzütbah;
khülang ju püpü kheaknü amürangbe labah,
azopünü akheambuh tankihbah.”
24Küyimki alibe zübepü kim khiungkheanü, anihbe nuyam ching athrürü mahne lakheah. 25Akhuh zübekhi ju mürümdo alakheah. Apang abümnü shihnam khim nangde alakheah; jumonü arünü api mung Esau de ji. 26Ju dunglim aniurü zübe, tüsho api khahnü Esau lahzhi kheak tholo; jumonü api mung Jakob de ji. Alibenü ane zübejihchoki Isak kam 60 azorü lakheah.
Esaunü Adüjirü Alim Yinkhi
27Azüne ju zode arü, tüsho Esau ju shihyanrü, rimshih mihtsürü lakheah, tüshe Jakob a azhihayih mihtsürü, khimyam ching larü lakheah. 28Tüsho Isaknü Esau muzho tümütüsho apinü alaksahkhi anihbuhnü asühde tsüh, tüshe Rebekanü Jakob muzho.
29Nimung khülang Jakob hühkeang wo khiungde alakheah; tüsho Esau ju thulu chingnü khümkeaka alung. 30Esaunü Jakob ki tha, “Muzhobah awo amürüm ju I kipang, tümüde I khümkeaka lah.” Jumonü api mung Edom#Amürüm de ajikheah. 31Tüshe Jakobnü tha, “Akhuhde nünü I kilim adüjibuh alim yinang.” 32Tüsho Esaunü tha, “Kheahang, I ashepü thsüchoh; jumonü zübekhialimnü I tümü alü thsüpü?” 33Judüki Jakobnü tha, “Khihni nünü I ki thiyuchihchimang.” Jumonü apinü anihbuh ki thiyuchihchim, tüsho api zübekhi-alim Jakob kilim yinabah. 34Tüsho Jakobnü Esau kilim yikhap le hühkeang wo jih; tüsho apinü tsühyungbah nihbuh limro yü. Hanangde Esaunü anihbuh zübekhi-alim mükhemükim thsü.
Currently Selected:
THRÜNTAN 25: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
