JOHAN 16

1“Nüsa jing mümükhepü thsüde inü nüsa ki harü asukdo. 2Arünü nüsa sinagogbo chingnü ayankhitbah; am, shepünü nüsa laksahbanü, apinü ju rhimokhinü Thrünpuh tankihchoh de alümpü kim arüchoh. 3Tüsho arünü harü nüsa ki rhimobah, tümütüsho arünü I Buh yungsho l mümükheah. 4Tüshe inü harü nüsa ki thado, junangde küyimki kim arübanü, jurübo inü nüsa ki thakheah de nüsanü alümkhitbah. Tüsho inü harü nüsa ki atankih ching mütha, tümütüsho I nüsa lung lakheah.

Amüsüh Me Rhimo

5“Tüshe kheakü I thiyibuh kilim I yüchoh, tüsho nüsa shenü she, ‘Nü külim yücho?’ de mükeo. 6Tüshe inü nüsa ki harü thakhi hode, mulong rozhakkhinü nüsa mulong mia lah. 7Tütüshe inü nüsa ki thiyuro thachoh. I yükhi ju nüsa yihnüpü lah; tümüde I müyüsho, arungrü nüsa kilim marü; tüsho I chamachihsho, inü nüsa kilim api arüshihbah. 8Tüsho küyimki api arübanü, apinü alomi neak, thiyuro-lungki, tüsho mahkhap mütsanmükhibah: 9neak dünkheak, tümütüsho arünü I kheak mükin; 10thiyuro-lungki dünkheak, tümütüsho I Buh kilim I ayübah tüsho nüsanü I müngülo; 11mahkhap dünkheak, tümütüsho ha lomi yakzanshuhrü mahkhapdo.

12“Kheaküshe inü nüsa ki thapü ahihdo lah, tüshe nüsanü kheakü jurü marümkhuk. 13Judüalalashe, küyimki thiyuro Me arübanü apinü nüsa thiyuro alala ching bebah; tümüde apinü nihbuh thiyukhümsühmühnü mütha, tüshe tümüpürü apinü asobanü athabah; tüsho adünjipü lakhi apinü nüsa ki thabah. 14Apinü I müretahbah, tümüde küpü inü athakhi lanü apinü alubah tüsho ju nüsa ki khipkhitbah. 15I Buh lakhi alala I yo ah. Jumonü inü athakhi apinü alubah tüsho nüsa ki ju khipkhitbah de inü nüsa ki thakheah.

Mulong Rozhak tüsho Asühpü

16“Sühkhüh labah nüsanü I müngüde alabah; tüsho kheaküshe sühkhüh labah nüsanü I ngübah, tümütüsho I Abuh kilim yüchoh.” 17Judüki api jingyanrü khürünü arü bolung thaachih, “Apinü isa ki, ‘Sühkhüh labah nüsanü I müngüde alabah; tüsho kheaküshe sühkhüh labah nüsanü I ngülobah’; tüsho ‘Tümütüsho I Buh kilim yüchoh,’ de athakhi ha tümü a?” 18Jumonü arünü tha, “Sühkhüh labah de apinü athakhi ha tümü a? Apinü tümü thachonü isanü mümükheah.” 19Kheakü arünü api ki keonelah de Jisunü mükheahbah apinü arü ki tha, “Nüsa bolung inü, ‘Sühkhüh labah nüsanü I müngü; tüsho kheaküshe sühkhüh labah nüsanü I ngülobah,’ de athakhi keokhiachihcho de? 20Atsütsü inü nüsa ki thachoh, nüsa atripbah tüsho atüzhobah, tüshe alomi a asühachihbah; nüsa mulong rozhakbah, tüshe nüsa mulong rozhak ju asühachihpü ching müthribah. 21Aliberü küyimki thsünü ching labanü mulong rozhak lachoh tümütüsho anihbe kim arüdo; tüshe alibenü khungarü zübe müleangnü thsünü mülümkhitde kamchoh, tümüde mihtsürü asühkhi alomi ching zübedo. 22Jumonü nüsa kheakü mulong rozhak lah; tüshe inü nüsa ngülobah tüsho nüsa mulong asühbah, tüsho nüsa asühkhi shenü she nüsa kheaknü lude mutso. 23Tüsho ju nimung nüsanü I ki tümü mükheang. Atsütsü inü nüsa ki thachoh, nüsanü tümüpürü I mung chingnü I Buh ki kheangbanü apinü nüsa kilim jihbah. 24Kheakü khiungde nüsanü I mung chingnü tümü mükheang. Kheangang tüsho nüsanü angübah, junangde nüsa asühkhi suhdahde alabah.

Alomi kurungkheak Akuk Ngükhi

25“Harü inü rüklimnü nüsa ki asukdo; tüshe inü nüsa ki rüklimnü müthapü kim arüchoh, tüshe inü nüsa ki Abuh dünkheak khipkhitde athabah. 26Ju nimung nüsanü I mung chingnü akheangbah, tüsho inü nüsa thsungkheak Abuh ki tamkhüntamnübah de mütha; 27tümüde Abuh küdahnü nüsa muzhochoh, tümütüsho nüsanü I muzhodo tüsho I ju Thrünpuh kilimnü arükheah de kindo. 28Abuh kilimnü I alomi ching arükheah. Kheaküshe, inü alomi zojihbah Abuh kilim yülobah.”

29Ajingyanrübonü api ki tha, “Kheahang, kheakü nünü khipkhitde thachoh, tüsho rüklimnü mütha! 30Kheakü nünü alala mükheahlah de isanü mükheahlah, tüsho shenü she nü ki keokhipü yihnüpü müla. Ha hode nü ju Thrünpuh kilimnü arükheah de isanü kinlah.” 31Jisunü arü ki alode tha, “Nüsanü kheakü kincho shi? 32Atsütsü kim arüchoh, am nüsanü I langzü zojihbah mihbüm aban nihbuh yam lim yüpü kheakü arüchoh. Tütüshe I langzü yung, tümütüsho Abuh I lung lah. 33I kheak nüsa mungtsü lapü thsüde inü harü nüsa ki asukdo. Alomi ching nüsa thsümütsü-ato labah; tüshe mulong ato thsang, inü alomi kukdo!”

Currently Selected:

JOHAN 16: YIMCBSI

Highlight

Copy