JUHAN 14
14
Jisu a Hopa hato Ngui angkya Lomtang
1Jisu-e thüi: “Hünzom ang mong taxma; hünzome Zang to onglax ilaxle ku tochu onglax mi. 2Apa hom to ngwotnui tüihu le; ku hünzom hanpakma ngwotnui achwon ang pao angkya changle. Ibu ile chichang thüikoxba kue hünzom hama ija chiakax ngose.#14.2: Apa…ngose; chichangba Ku Apa hom ma ngwotnui huanuma tüile; ile chichang thüikoxle, hünzom hanpakma nui achwon ang paofang le kue akaxsecha? 3Tamchu ku paolaxle ngwotnui achwon füima, ku tamchatle nguiüi, ilaxle ma hato hünzom laxlax tox angkya changle; ija khoma ku ojongto ngo angkya hex, hünzomchu ikhato ngo angkya changle. 4Ku pao angkya lomtang hünzome awan ngopu ilaxle ojong to pao angkya hex lechu awan ngopu.”
5Thoma-e chix ang thüi: “Jowanpa, nang ochito pao angkya hex kwome münawan; jangchangba ikhato ngui angkya lomtang chemle awan manüi?”
6Jisu-e chix ang thüi: “Lomtang; Otsingtsing tamchu Khüzün a ku changpu; ku makhange chichang thüikoxle Apa hato owachu ngui ang müntho. 7Athax hünzome ku awanpu, ilaxle Apa chuwüi awanpu; athax makhange hünzome chix awandaoa tamchu chix ngündaoa.”
8Filip-e chix ang thüi: “Kwom hama Hopa ahohüi; ijae wüi kwom mongzom müiüi.”
9Jisu-e chix ang thüi: “Filip, ku hünzom füi ibibile ngokox ngaxchu, nange ku matsing lehi? Owae ku ngündao puix, chixe Apachu ngündaoa; jangchangba hünzom hato Hopa ahohüi le nange büthüikya to thüipu? 10Ku a Apa ma ngopu ilaxle Apa ku ma ngopu; kue chempang kax hünzom füi akax daopuix, ijabu ku mongmong to akaxkya münchang; ikoxle ku ma ngokya Apae chix mwot mokpu, le nange ongchami, Filip? 11Ku Apa ma ngopu ilaxle Apa kuma ngopule hünzome ija ku kax to onglax; chichangkoxchu kue mokkya mwot khoma thüichu ku to onglax. 12Otsingtsingma kue hünzom ang thüipu: Owae ku to ongpuix, kue chempang mwot mokpuix, chixechu ija mwot moküi; ilaxle ijabu mwot to lyemle ngaxchu chix ang mok ang tomüi; chemthüikoxle ku a Apa hato pao angkya changle. 13Ilaxle hünzome ku mün ma chempang juüi hex, ija kue moküi; ile Hosa ma Hopa fuazangle naxchang ang. 14Hünzome ku ma, ku mün ma tüta li jukoxchu, ija kue mokle koxüi.
Otsao Chasa Kox angkya Tsao
15“Hünzome ku to mong jangkünba, hünzome ku kaxtombu kax ma laxlax. 16Kue Apa ma juüi ilaxle hünzom füi jento ngo angkya hanpakma, chixe hünzom ang fongmix mama tuita kox angkya changle. 17Chix a Zang otsingtsing bama ngaile aho angkya Chasa changle. Chix a chaxwannue pongle kop ang tho angkya oli münchang; chemthüikoxle chaxwannue chix münngün tamchu ojao münawan. Ikoxle hünzome chix awanpu, chemthüikoxle chix a hünzom füi ngole tamchu hünzom ma ngole.
18“Otue ku paoüi hex, kue hünzom tata danle müntox; ku hünzom hato tamchatle nguiüi. 19Noxta ngokya füima, chaxwannue ku münngünüi, ikoxlechu hünzome a ku ngün ang kopüi; tamchu ku ozün ma tüikoxle hünzom chuwüi ozün ma ngo angkya changle. 20Otue ija nyix nguile hüiüi hex, hünzome ku Apa ma tüile, tamchu ku chemle Apa ma ngopuix ija ningle hünzomchu ku ma ngole le awan ang kopüi.
21“Owae ku kaxtombu pongle koppuix, üntoxle ija kax ma laxle tüipuix; changle chixe ku to mongkünkya a. Owae ku to mongkün puix, Apae chix to künüi; kuechu wüi chix to mongkünüi ilaxle ku lailai to chix hato ngaile ahoüi.”
22Juda-e (Iskariot münchang) chix ang thüi: “Jowanpa, chaxwannu hato chingai homtoxle kwom tata hato nang ngaile aho angkya chemle changmanüi?”
23Jisu-e lanle chix ang thüi: “Owawae ku to mongkünkya jangtüi thüiningle, chixe ku kax ma laxle tüiüi. Apae chix to mongkünüi; Apa kukhi chix hato nguiüi ilaxle chix füi ngoüi. 24Owae ku to chikün puix, chixe ku hwon-nwot kax ma münlax. Hünzome hwon-nwot chem atat puix ija a ku hwon-nwot münchang ikoxle ku tsanle ajokya Apa tokhange hüikya changpu.
25“Ku hünzom füi ngo tanto wüi ibu zangwün kue hünzom füi akaxdaoa. 26Ikoxle fongmix ija Otsao Chasa, Apae owa ku mün ma ahüi angkya hex, chixe hünzom hama pangnusa apuale fa angkya changle, ile kue hünzom füi akax daokyabu pangnu texle atak ang tomüi.
27“Kue hünzom füi mongsom toxpu; ku mongsom tuita kue hünzom ang koxpu; kue ija hünzom ang chaxwannue koxkya ningle koxkya chichang. Hünzom ang mong male tamchu abanle taxngo, tamchu taxza. 28‘Ku paoüi ilaxle hünzom hato tamchatle nguiüi’ le akaxkya ku kax hünzome atatle laxdaoa. Hünzome ku to mongkün koxle hünzom ang mongmüi tüise, chemthüikoxle ku a Apa hato pao angkya changle; chemthüikoxle Apa a ku füi ngaxchu akhokya changle. 29Ilaxle ija ile changkya zuma hünzome ong angkya kuxma, ile machangba wüi kue hünzom hama akaxle thompu. 30Hünzom füi ku aluile akax ngo ang müntho; chemthüikoxle chaxwannu wanghom hüile ngole. 31Ku tu to chix a chemchu münchang, ikoxlechu kue Apa to mongkünkya khoma, kue, Apae ku ang fakya kaxtom ma mokpu le chaxwannu hato awan ang tom angkya kuxmale chix nguiüi.
“Ajonghüi, kem a ikha angkya paohax.”
Currently Selected:
JUHAN 14: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
