JOHAN 19

Jesu killup ding thukhenna

1Tuachi’n Pilat in Jesu apui a azepsahta hi. 2Tualeh galkapten linglukhu aphan ua, Jesu akhusah ua, tualeh puonsandup asilsah uhi. 3Tuachi’n amaun, “Judate kumpipa salam” chiin akhut un abeng uhi.

4Tuachi’n Pilat ahing pawtkhe kia a, akung uah, “En un, Ama ah dihlouna ka mu sih chi na theina dingun na kung ua ka hing puidoh ahi,” achi hi. 5Tuachi’n Jesu linglukhu khuh leh puonsandup silin ahing pawtdoh a, Pilat in “En un, tam mihingpa! “achi hi. 6Tuaziehin siempuliente leh biehinn veng lamkaiten ama amu tah un, “Kross ah khailia in, Kross ah khailia in” chiin akikou uhi. Pilat in akung uah “Nouma’n zawpi unlen khailia un, ken Ama dihlouna ka mu sih hi,” achi hi. 7Judaten Ama adawng ua, “Dan khat ka nei ua, Pasian Tapa a akibawl ziehin, ka dan dungzui un shitah ahi,” achi uhi. 8Pilat in tam thu a zah tahin azau semsemta hi. 9Tualeh thukhenna innpi sungah ava lut kia a, Jesu kungah, “Hei a hing kipan na hiei?” achi a, hinanleh Jesu’n adawng sih hi. 10Tuachi’n Pilat in akungah, “Ka kunga thu genlou ding na hiei mah? Kross a khailia theina leh hakhiet theina thuneina nei ka hi chi theilou na hiei mah?” achi hi.

11Jesu’n adawnga, “Tunglam a kipat a pieh hisih lachin ka tungah bangma bawlthei na nei sih ding hi; tuaziehin na kunga hing pekhepa’n khelna alien nei zaw hi,” achi hi. 12Khumbansie Pilat in hadoh atum a, hinanleh Judaten “Tam mipa na hadoh leh Kaisar lawm na hi sih ding. Koipou ama leh ama kumpipa a kibawl khu, Kaisar dou ahi,” chi’n akikou uhi. 13Tuaziehin Pilat in tua thu kigen azahtah in Jesu ahing puidoh a, suongleptuoh kichi thukhenna toupha Hebru ham a Gabbatha tungah atou hi. 14Tua ni khu peikan pawi kiginni ahi a, nai guhna hun vel ahi. Tualeh Pilat in Judate kungah, “En un, na kumpipa uh!” achi hi. 15Hinanleh amaute akikou ua, “Puimangin, puimangin, Kross ah khailia in,” achi uhi. Pilat in akung uah, “Na kumpipa uh maw kross tunga ka khailup ding,” achi hi. Siempulienten “Kaisar loungal kumpipa dang ka nei sih uh,” chi’n adawng uhi.

Jesu kross a killupna

(Mat. 27.32-38,48-50; Mak. 15.21-26,36,37; Luk. 23.26-33,38,46)

16Tuachi’n Pilat in Jesu kross tunga killup dingin akung uah apekheta hi. Tuachi’n amaun Jesu ala ua, apuita uhi. 17Tualeh Aman akross kipuohin Hebru ham a Golgotha kichi lugu mun lam ah apeita hi. 18Tuanah Jesu khu kross tungah akilbeh ua midang ni zong agei tuoh ah akilbeh ua, alai ah Jesu akilbeh uhi. 19Pilat in ahina lai khat agiel a kross tungah atah hi. Tua alaigel khu, “NAZARETH JESU JUDATE KUMPIPA”, chi ahi. 20Tuachi’n tam Ahina kigiel Judate tampi in asim uhi, Jesu akilbehna khopi kung nai ahi zieh in. Tualeh tami khu Hebru ham leh Greek ham leh Latin ham a kigiel ahi. 21Tuachi’n Judate siempulienten Pilat kungah “Judate kumpipa chi’n giel sinlen, Judate kumpipa ka hi achi, chiin giel zawin,” achi uhi.

22Pilat in adawnga, “Ka gelsa khu ka gelsa ahita” achi hi. 23Tuachi’n Jesu akilbeh zou un, galkapten apuonsilte ala ua, khat chiet a atan dingun phal li asuo uhi, tualeh apuonah zong ala uhi. Apuonah pen akhuina umlou, angawnga pat apum a kigan zom suoh ahi. 24#Late. 22.18Tuaziehin amaun “Tampen botkeh sih vaiin koipen tan ding ahiei, aisan vai akichi uhi.” Laisiengthouin ka puonsilte akihawm ua, “Ka puontuol a dingin ai asan uh, achi atangtun theina dingin. Tuaziehin galkapten tam silte abawl uhi.”

25Jesu kros kungah anu leh anu sanggamnu, Kleopa zi Mari leh Mari Magdalene ading uhi. 26Tuaziehin Jesu’n anu leh anuazui a itpa akunga ding amu tahin, anu kungah “Numei en in na tapa!” achi a; 27Tuachi’n nuazuipa kungah, “En in na nu!” achi hi. Tua huna kipat in nuazuipa’n amanu a inn ah apuita hi.

Jesu shina

28 # Late. 69.21; 22.15 Tua zouin Jesu’n sil zousie tuin bawl zousieng ahita chi thei in Laisiengthou thugen a tangtunna dingin, “Ka dang atah” achi hi! 29Tua mun ah greptui thua a dim bel khat akitung hi, amaun tua greptui-thua ah tuihupna#Tuihupna = tulai a danlop kichi ahi khat adie ua hissop chiengkang dawn ah ata ua, Akam toh asutuo uhi. 30Tuachi’n Jesu’n greptui thua adawn zouin, “Zaw ahita,” achi a, alu akunsuh a, ahagau ahata hi.

Jesu shi zou a sil umte

31Tuachi’n tua ni khu kiginni ahi ziehin, Judaten aluongte uh khawlni a kros dawn a aumden ding uh adei sih ua, aziehpen tua khawlni khu ni thupitah hi ding ahita hi, tuaziehin Judaten Pilat kungah akengte uh sat tawng pieh a, aluong uh ladoh dingin, angen uhi. 32Tuachi’n galkapte ahing pei ua, Jesu toh kikilbeh atuoh masahpen uh kengte leh khatpen kengte asat tawng pieh uhi. 33Hinanleh Jesu kung ahing tun un, Ama ana shi zoute chi amu ua, akengte asat tawng sih uhi. 34Hinanleh galkapte lah a khat in, teipiin anah asun a, sisan leh tui ahing luongkhe pai hi. 35Tualeh tami mupa’n atheipita a, atheipina khu adih ahi. Tualeh nouten na gintat theina ding un agen dih ahi, chi athei hi. 36#Pawt. 12.46; Kisim. 9.12; Late. 34.20Aziehpen Laisiengthou in, “Agu khat zong sattawng ahi sih ding achi tangtun na dingin tam silte ahing umta hi.” 37#Zek. 12.10; Kihil. 1.7Tualeh Laisiengthou sung mun dang ah, “Amaun asutpa uh a en ding uh, chiin akigiel kia hi.”

Jesu kivuina

(Mat. 27.57-60; Mak. 15.42-46; Luk. 23.50-54)

38Tamte nua in Arimathai khomi, Judate agiin zieh a aguh a Jesu nuazui Joseph in Jesu luong alah theina dingin Pilat kungah ava ngen hi. Pilat in phalna apie a, tuachi’n ama ahing pei a Jesu luong ala ta hi. 39#Jn. 3.1,2Tualeh tumasanga zanlai a Jesu kunga hing hawpa Nikodem zong ahing pei a murrah leh aloe kihal gimnamtui agihdan pound zakhat#Pound zakhat-Greek a litrai 100, tua khu kg 34 vel ahi. vel ahing tawi hi. 40Tualeh amaun Jesu luong ala ua, Judate kivui ngaina dan bangin gimnamtui toh puonnem in atuom uhi. 41Tualeh kross a akilbehna mun uah huon khat a um a, tua huon ah, koima kivui ngai louna han tha khat a um hi. 42Tuachi’n Judate kiginni ahiziehin, tua han ah Jesu asielta uhi, han khu nainoukhat ahi ziehin.

Currently Selected:

JOHAN 19: ZOUBSI

Highlight

Copy