Gênesis 16
16
Sarai ha'e Agar rekokue oĩa
1Abrão ra'yxy Sarai ma imemby va'e'ỹ. Ha'e rami avi oguereko peteĩ guembiguai Egito guigua Agar hery va'e.
2Ha'e gui Sarai aipoe'i Abrão pe:
— Xee ma Nhanderuete xeapo kyrĩ va'e areko e'ỹ aguã rami. Emenda ke xerembiguai re, ha'e va'e rupi xepi'arã rami ndera'y aguã — he'i. Ha'e ramo Abrão onhe'ẽ rendu Sarai.
3Ha'e rami vy ome Abrão-a py Sarai ogueraa guembiguai Egito guigua Agar, ome'ẽ ta'yxy jevyrã. Ha'e va'e jave ma dez ma'etỹ re ma ikuai Canaã yvy re.
4Ha'e gui Agar reve Abrão jogueroke ramo oguereko kyrĩ va'e. Kyrĩ va'e oguereko maa oexa vy nda'ija'evei ma opatõ ra'yxy re.
5Ha'e ramo Sarai aipoe'i Abrão pe:
— Ndere ae toopa xemoxĩmba reiague. Xee ma xerembiguai rereko aguã ame'ẽ rire kyrĩ va'e oguereko maa oexa vy nda'ija'evei xere. Tove Senhor toikuaa pota xere rejapo va'ekue re.
6Gua'yxy pe Abrão ombovai:
— Nerembiguai ma ndepo py oiko. Ereko ndee ae rerekoxea rami — he'i. Ha'e ramo Sarai guembiguai oguereko axy ramo ojava ixugui.
7Ha'e gui Senhor-a guigua anjo ojou tekoa e'ỹa py peteĩ yvu rexei, Sur yvy katy tape oo va'e py.
8Ha'e vy aipoe'i ixupe:
— Ndee Sarai rembiguai Agar, magui tu reju? Marã katy tu reo?
Ombovai:
— Xererekoa Sarai gui rima ajava — he'i.
9Ha'e ramo anjo Senhor-a guigua aipoe'i ixupe:
— Ejevy ju ndererekoaa py, ha'e enhemo'yvyĩ'i ipo py.
10Anjo aipoe'ive ju:
— Xee amboeta ete 'rã neremiarirõ kuery, avave rei oipapa kuaa aguã rami e'ỹ.
11Anjo aipoe'ive ju:
— Rereko 'rã kyrĩ va'e, ava'i 'rã reikuavã. Remboery 'rã Ismael, rejexavaia gui Senhor ndereraa jepe rire.#16.11 Tery Ismael ma “Nhanderuete oendu va'e” 'ea.
12Ha'e va'e ma avakue oikuaa rã mburika ka'aguy regua rami 'rã oiko, mba'eta opu'ã 'rã pavẽ re, ha'e rã hexe ma pavẽ 'rã opu'ã avi. Oiko 'rã guyvy kuery rovaigua — he'i.
13Ha'e ramo Agar ma Senhor hexeve ijayvu rire ojapukai hery rupi. Ha'e vy aipoe'i:
— Ndee ma Xeruete rexa va'e — he'i. Mba'eta aipoe'i: “Xee ri ty'y apy ha'eve xerexaa aexa aguã?” he'i vy.
14Ha'e nunga rupi ha'e va'e ygua hery Beer-Laai-Roi. Cades ha'e Berede mbyte re opyta.#16.14 Tery Beer-Laai-Roi ma “Hekove va'e xerexaaty ygua” 'ea.
Ismael itui'iague
15Ha'e gui Agar oguereko'i Abrão ra'y. Ha'e rã Abrão Agar re ta'yague omboery Ismael.
16Oitenta e seis ma'etỹ re ma Abrão oiko jave Agar ta'y Ismael re.
Currently Selected:
Gênesis 16: gunBible
Highlight
Share
Copy
Want to have your highlights saved across all your devices? Sign up or sign in
© 2004, Sociedade Bíblica do Brasil; © 2014, Wycliffe Bible Translators, Inc.
