Jenesis 25

1Ena Abraham a gemmeras gwreg arall, Ketura hy hanow, 2ha hi a dhineythis dhodho Zimran ha Yokshan ha Medan ha Midyan hag Yshbak ha Shuah. 3Ha Yoksham a dhineythis Sheba ha Dedan. Mebyon Dedan a veu Asshurim, ha Letushim, ha Leummim. 4Mebyon Midyan a veu Efa, hag Efer ha Hanok hag Abida hag Eldaa. Oll an re ma a veu mebyon Ketura. 5Hag Abraham a ros pup-tra esa ganso dhe Ysak. 6Ha dhe vebyon y iswragedh, Abraham a ros rohow ha'ga dannvon dhe-ves dhiworth y vab Ysak, hag ev hwath yn few, dhe'n est, troha pow an est.

Mernans Abraham

7An re ma yw blydhynyow bewnans Abraham, a vewas ev: pymthek bloedh hag eth-ugens. 8Ena Abraham a dremenas hag a verwis yn kothni dha, den koth, leun a vlydhynyow, hag y feu kuntellys dh'y bobel. 9Y vebyon Ysak hag Yshmael a'n ynkleudhyas y'n kav Makpela orth park Efron mab Soar an Hittyas, usi a-dal Mamre, 10an park a brenas Abraham dhiworth mebyon Heth. Abraham a veu ynkleudhys ena gans y wreg Sara. 11Wosa mernans Abraham, Duw a vennigas Ysak y vab hag Ysak esa trigys orth Beer-lahay-roi.

12An re ma yw henedhow Yshmael mab Abraham, a dhineythis Hagar an Ejyptyanes, maghteth Sara, dhe Abraham. 13An re ma yw henwyn mebyon Yshmael, war-lergh aga henwyn, war-lergh aga henedhow: kynsa-genys Yshmael, Nebayoth; ha Kedar, Adbeel, Mibsam, 14Mishma, Duma, Massa, 15Hadad, Tema, Yetur, Nafish ha Kadema. 16An re ma yw mebyon Yshmael, ha'n re ma yw aga henwyn orth aga godrevow ha'ga hampow, dewdhek pryns orth aga loethow. 17Ha'n re ma yw blydhynyow bewnans Yshmael: seytek bloedh ha hwegh-ugens. Ev a dremenas hag a verwis hag a veu kuntellys dh'y bobel, 18Trigys esens dhiworth Havila dhe Shur, usi a-dal Ejyp war an fordh dhe Assyria. Ev a goedhas dherag y vreder oll.

Dineythyans Esaw ha Yakob

19An re ma yw henedhow Ysak mab Abraham. Abraham a dhineythis Ysak. 20Hag Ysak o dew-ugens bloedh pan gemmeras Rebeka avel gwreg, myrgh Bethuel a Aram, dhiworth Padan-aram, hwoer Laban a Aram. 21Hag Ysak a bysis war an Arloedh rag y wreg, rag anvap o hi, ha'n Arloedh a glewas y bysadow ha Rebeka y wreg a gonsevyas, 22ha'n fleghes a strivyas war-barth ynni hi hag yn-medh hi, ‘Mars yw an kas yndella, prag yth ov vy bew?’#25:22 prag yth ov vy bew: Amendys war-lergh an Syriek. Hag yth eth hi dhe wovynn orth an Arloedh. 23Hag yn-medh an Arloedh dhedhi,

‘Yma diw genedhel y'th torr

ha diw bobel a vydh rynnys a'th kolodhyon;

unn bobel a vydh kreffa es an bobel arall,

ha'n kottha a wra servya an yowynka.’

24Pan veu hy dydhyow kollenwys rag dineythi, awotta, yth esa gevellyon yn hy thorr. 25An kynsa a dheuth yn-mes, rudhik o, oll anodho kepar ha mantell vlewek; ytho i a elwis y hanow Esaw, 26Wosa henna y vroder a dheuth yn-mes ha'y dhorn a synsis gwewenn Esaw; ytho y hanow a veu gelwys Yakob. Ysak o tri-ugens bloedh pan wrug hi aga dineythi.

27An vebyon a devis, hag Esaw a dheuth ha bos gour ha dhodho godhvos a helghya, gour a'n gwel; mes gour hebask o Yakob, trigys yn tyldow. 28Ysak a gara Esaw drefenn y helgik a dhybri; mes Rebeka a gara Yakob.

29Yth esa Yakob ow pryjyon kowl,#25:29, 30, 34 kowl: Po gwygbys; po lentilyow. hag Esaw a dheuth a-bervedh a'n gwel, pur skwith, 30Yn-medh Esaw dhe Yakob, ‘Gas vy dhe eva lemmik a'n kowl rudh ma, my a'th pys, rag skwith ov vy.’ Rag henna y hanow a veu gelwys Edom. 31Hag yn-medh Yakob, ‘Gwerth dhymm hedhyw dha wir genesik.’ 32Yn-medh Esaw, ‘Otta, yth esov yn eneworres; ytho pandr'a amont an gwir genesik dhymm?’ 33Yn-medh Yakob, ‘To dhymmo hedhyw’, hag ev a dos dhodho, ha gwertha y wir genesik dhe Yakob. 34Ena Yakob a ros bara ha kowl lentilow dhe Esaw hag ev a dhybris hag eva ha sevel ha mos yn-kerdh, hag Esaw a skornyas y wir genesik.

Currently Selected:

Jenesis 25: ABK

Highlight

Copy

Want to have your highlights saved across all your devices? Sign up or sign in

Learn More About An Bibel Kernewek 20234 (Kernewek Kemmyn)