ܡܪܩܘܣ 1

ܟܵܪܘܿܙܘܼܬܵܐ ܕܝܘܿܚܲܢܵܢ ܡܲܥܡܕܵܢܵܐ

ܡܬܝ 3‏:1‏‐12؛ ܠܘܩܐ 3‏:1‏‐9، 3‏:15‏‐17؛ ܝܘܚܢܢ 1‏:19‏‐28

1ܐܵܗܵܐ ܝܠܹܗ ܫܘܼܪܵܝܵܐ ܕܐܹܘܲܢܓܲܠܝܼܘܿܢ ܕܝܼܫܘܿܥ ܡܫܝܼܚܵܐ ܒܪܘܿܢܵܐ ܕܐܲܠܵܗܵܐ. 2ܕܵܐܟ݂ܝܼ ܕܝܼܠܹܗ ܟܬܝܼܒ݂ܵܐ ܒܐܹܫܲܥܝܵܐ ܢܒ݂ܝܼܵܐ: ܗܵܐ ܫܲܕܘܼܪܹܐ ܝܘܸܢ ܐܝܼܙܓܲܕܝܼ ܩܵܕ݇ܡܘܼܟ݂ ܕܗܲܕܸܪ ܐܘܼܪܚܘܼܟ݂.#ܡܠܐܟ݂ܝ 3‏:1

3ܩܵܠܵܐ ܕܚܲܕ ܒܸܩܪܵܝܵܐ ܓܵܘ ܒܲܪܝܼܵܐ، ”ܗܲܕܪܘܼܢ ܐܘܼܪܚܵܐ ܕܡܵܪܝܵܐ، ܘܡܲܫܘܹܝܡܘܼܢ ܫܒ݂ܝܼܠܘܼ̈ܗܝ.“#ܐܫܥܝܐ 40‏:3

4ܘܗ̇ܘ ܝܘܿܚܲܢܵܢ ܡܲܥܡܘܼܕܹܐ ܝܗ݇ܘܵܐ ܓܵܘ ܒܲܪܝܼܵܐ ܘܡܲܟܪܘܼܙܹܐ ܡܲܥܡܘܿܕܝܼܬܵܐ ܕܬܝܵܒ݂ܘܼܬܵܐ ܠܦܘܼܚܵܠܵܐ ܕܚܛܝܼܵܬܹ̈ܐ. 5ܘܦܠܝܼܛ ܠܗܘܿܢ ܠܟܸܣ ܠܹܗ ܟܠܲܝܗܝ ܐ݇ܢܵܫܹ̈ܐ ܕܝܼܗܘܼܕ ܘܐܘܼܦ ܕܐܘܿܪܸܫܠܸܡ، ܘܦܵܝܫܝܼ ܗ݇ܘܵܘ ܥܡܝܼܕܹܐ ܡܸܢܹܗ ܒܢܲܗܪܵܐ ܕܝܘܿܪܕܢܵܢ ܟܲܕ ܡܵܘܕܘܼܝܹܐ ܒܚܛܝܼܵܬܲܝ̈ܗܝ. 6ܠܒ݂ܝܼܫܬܵܐ ܕܝܘܿܚܲܢܵܢ ܡ̣ܢ ܣܲܥܪܵܐ ܕܓܘܼܡܠܹ̈ܐ ܝܗ݇ܘܵܐ، ܘܐܝܼܬ ܗ݇ܘܵܐ ܙܘܼܢܵܪܵܐ ܕܓܸܠܕܵܐ ܒܚܲܨܹܗ#ܒ. ܡܠܟ̈ܐ 1‏:8، ܘܡܹܐܟ݂ܘܼܠܬܹܗ ܩܲܡܨܹ̈ܐ ܘܕܸܒ݂ܫܵܐ ܕܒܲܪܝܼܵܐ ܝܗ݇ܘܵܐ. 7ܘܡܲܟܪܸܙ ܗ݇ܘܵܐ، ܒܹܐܡܵܪܵܐ، ”ܗܵܐ ܒܹܐܬܵܝܵܐ ܝܠܹܗ ܡ̣ܢ ܒܵܬ݇ܪ ܡܸܢܝܼ ܚܲܕ ܒܘܼܫ ܚܲܝܠܵܢܵܐ ܡܸܢܝܼ، ܗ̇ܘ ܕܐܵܢܵܐ ܠܹܐ ܚܵܫܚܹܢ ܠܸܟܝܵܦܵܐ ܘܠܸܫܪܵܝܵܐ ܬܲܣܡܵܬܹ̈ܐ ܕܨܵܘܠܘܼ̈ܗܝ. 8”ܐܵܢܵܐ ܡܲܥܡܘܼܕܹܐ ܝܘܸܢ ܐܸܠܵܘܟ݂ܘܿܢ ܒܡ̈ܝܼܵܐ، ܐܝܼܢܵܐ ܗ̇ܘ ܒܸܬ ܡܲܥܡܸܕ ܠܵܘܟ݂ܘܿܢ ܒܪܘܼܚܵܐ ܕܩܘܼܕܫܵܐ.“

ܡܲܥܡܘܿܕܝܼܬܵܐ ܕܝܼܫܘܿܥ

ܡܬܝ 3‏:13‏‐17؛ ܠܘܩܐ 3‏:21‏‐22

9ܒܐܵܢܝܼ ܝܵܘܡܵܢܹ̈ܐ ܐ݇ܬܹܐ ܠܹܗ ܝܼܫܘܿܥ ܡ̣ܢ ܢܵܨܪܲܬ ܕܓܠܝܼܠܵܐ، ܘܦܝܼܫ ܠܹܗ ܡܘܼܥܡܸܕܵܐ ܡ̣ܢ ܝܘܿܚܲܢܵܢ ܓܵܘ ܢܲܗܪܵܐ ܕܝܘܿܪܕܢܵܢ. 10ܘܗܲܪ ܒܗ̇ܝ ܥܕܵܢܵܐ ܐ݇ܣܝܼܩ ܠܹܗ ܡ̣ܢ ܡ̈ܝܼܵܐ، ܚܙܹܐ ܠܹܗ ܫܡܲܝܵܐ ܦܬܝܼܚܬܵܐ ܘܪܘܼܚܵܐ ܐܲܝܟ݂ ܝܵܘܢܵܐ ܒܸܨܠܵܝܵܐ ܥܲܠܘܼܗܝ. 11ܘܩܵܠܵܐ ܐ݇ܬܹܐ ܠܹܗ ܡ̣ܢ ܫܡܲܝܵܐ، ܒܹܐܡܵܪܵܐ، ”ܐܲܢ݇ܬ ܝܼܘܸܬ ܒܪܘܿܢܝܼ ܡܘܼܚܸܒܵܐ ܕܒܝܼܘܼܟ݂ ܒܣܝܼܡ ܠܵܗ̇ ܠܝܼ.“#ܐܫܥܝܐ 42‏:1

ܝܼܫܘܿܥ ܦܝܵܫܵܐ ܓ̰ܘܼܪܒܵܐ

ܡܬܝ 4‏:1‏‐11؛ ܠܘܩܐ 4‏:1‏‐13

12ܘܗܲܪ ܒܗ̇ܝ ܥܕܵܢܵܐ ܦܘܼܠܸܛ ܠܹܗ ܐܸܠܹܗ ܪܘܼܚܵܐ ܠܒܲܪܝܼܵܐ. 13ܘܗܘܹܐ ܠܹܗ ܬܵܡܵܐ ܓܵܘ ܒܲܪܝܼܵܐ ܐܲܪܒܥܝܼ ܝܵܘܡܵܢܹ̈ܐ، ܟܲܕ ܦܝܵܫܵܐ ܓ̰ܘܼܪܒܵܐ ܡ̣ܢ ܣܵܛܵܢܵܐ. ܘܥܲܡ ܗܲܝܘܵܢܹ̈ܐ ܕܒܲܪܝܼܵܐ ܝܗ݇ܘܵܐ، ܘܡܲܠܲܐܟܹ̈ܐ ܒܸܥܒ݂ܵܕܵܐ ܝܗ݇ܘܵܘ ܚܸܠܡܲܬ ܐܸܠܹܗ.

ܡܫܝܼܚܵܐ ܫܲܪܘܼܝܹܐ ܠܡܲܟܪܘܼܙܹܐ

ܡܬܝ 4‏:12‏‐17؛ ܠܘܩܐ 4‏:14‏‐15

14ܡ̣ܢ ܒܵܬ݇ܪ ܕܦܝܼܫ ܠܹܗ ܕܸܪܝܵܐ ܝܘܿܚܲܢܵܢ ܓܵܘ ܒܹܝܬ ܐܲܣܝܼܪܹ̈ܐ، ܐ݇ܬܹܐ ܠܹܗ ܝܼܫܘܿܥ ܠܓܠܝܼܠܵܐ، ܡܲܟܪܘܼܙܹܐ ܐܹܘܲܢܓܲܠܝܼܘܿܢ ܕܡܲܠܟܘܼܬܵܐ ܕܐܲܠܵܗܵܐ، 15ܘܒܹܐܡܵܪܵܐ، ”ܬܘܼܡܸܡ ܠܹܗ ܙܲܒ݂ܢܵܐ، ܘܩܘܼܪܒܸܢܵܗ̇ ܡܲܠܟܘܼܬܵܐ ܕܐܲܠܵܗܵܐ. ܬܲܘܸܒܘܼܢ، ܘܗܲܡܸܢܘܼܢ ܒܐܹܘܲܢܓܲܠܝܼܘܿܢ.“

ܐܲܪܒܥܵܐ ܬܲܠܡܝܼ̈ܕܹܐ ܩܲܕ݇ܡܵܝܹ̈ܐ ܦܝܵܫܵܐ ܩܸܪܝܹܐ

ܡܬܝ 4‏:18‏‐22؛ ܠܘܩܐ 5‏:1‏‐11

16ܘܟܲܕ ܒܸܚܕܵܪܵܐ ܝܗ݇ܘܵܐ ܝܼܫܘܿܥ ܒܡܲܪܙܵܐ ܕܝܵܡܵܐ ܕܓܠܝܼܠܵܐ، ܚܙܹܐ ܠܹܗ ܠܫܸܡܥܘܿܢ ܘܠܐܲܢܕܪܹܐܘܿܣ ܐܲܚܘܿܢܘܼܗܝ ܒܸܕܪܵܝܵܐ ܓܲܪ̈ܕܲܝܗܝ ܒܝܵܡܵܐ، ܣܵܒܵܒ ܨܲܝܵܕܹ̈ܐ ܝܗ݇ܘܵܘ. 17ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܬܹܝܡܘܼܢ ܒܵܬ݇ܪܝܼ ܘܒܸܬ ܥܵܒ݂ܕܹܢܵܘܟ݂ܘܿܢ ܨܲܝܵܕܹ̈ܐ ܕܒܢܲܝ̈ܢܵܫܵܐ.“ 18ܘܗܲܪ ܒܗ̇ܝ ܥܕܵܢܵܐ ܫܒ݂ܝܼܩ ܠܗܘܿܢ ܠܓܲܪ̈ܕܲܝܗܝ ܘܐ݇ܙܝܼܠ ܠܗܘܿܢ ܒܵܬ݇ܪܹܗ. 19ܘܟܲܕ ܐ݇ܙܝܼܠ ܠܹܗ ܚܲܕ ܡܸܬܚܵܐ ܟܸܪܝܵܐ، ܚܙܹܐ ܠܹܗ ܠܝܲܥܩܘܿܒ݂ ܒܪܘܿܢܵܐ ܕܙܲܒ݂ܕܲܝ، ܘܝܘܿܚܲܢܵܢ ܐܲܚܘܿܢܘܼܗܝ، ܘܐܘܼܦ ܐܵܢܝܼ ܓܵܘ ܓܵܡܝܼ ܬܲܪܘܼܨܹܐ ܓܲܪ̈ܕܲܝܗܝ. 20ܘܗܲܪ ܒܗ̇ܝ ܥܕܵܢܵܐ ܩܸܪܝܲܝ ܠܹܗ، ܘܫܒ݂ܝܼܩ ܠܗܘܿܢ ܠܙܲܒ݂ܕܲܝ ܒܵܒܲܝܗܝ ܓܵܘ ܓܵܡܝܼ ܥܲܡ ܪܹ̈ܓܵܘܵܬܹܐ ܕܒ݂ܝܼܩܹ̈ܐ ܒܗܵܩܵܐ، ܘܐ݇ܙܝܼܠ ܠܗܘܿܢ ܒܵܬ݇ܪܹܗ.

ܝܼܫܘܿܥ ܦܲܠܘܼܛܹܐ ܫܹܐܕܵܐܓܵܘ ܟܦܲܪܢܵܚܘܿܡ

ܠܘܩܐ 4‏:31‏‐37

21ܟܲܕ ܐ݇ܬܹܐ ܠܗܘܿܢ ܠܟܦܲܪܢܵܚܘܿܡ، ܥܒ݂ܝܼܪܹܗ ܝܼܫܘܿܥ ܠܟܢܘܼܫܬܵܐ ܒܝܵܘܡܵܐ ܕܫܲܒܬܵܐ ܘܫܘܼܪܹܐ ܠܹܗ ܠܡܲܠܘܼܦܹܐ. 22ܘܥܲܓ̰ܒܝܼ ܗ݇ܘܵܘ ܒܝܘܼܠܦܵܢܹܗ ܣܵܒܵܒ ܡܲܠܸܦ ܗ݇ܘܵܐ ܠܗܘܿܢ ܐܲܝܟ݂ ܚܲܕ ܕܐܝܼܬ ܠܹܗ ܫܘܼܠܛܵܢܵܐ، ܘܠܵܐ ܐܲܝܟ݂ ܣܵܦܪܹ̈ܐ. 23ܘܐܝܼܬ ܗ݇ܘܵܐ ܓܵܘ ܟܢܘܼܫܬܲܝܗܝ ܚܲܕ ܐ݇ܢܵܫܵܐ ܕܐܝܼܬ ܗ݇ܘܵܐ ܒܝܼܹܗ ܪܘܼܚܵܐ ܛܲܡܐܹܐ، ܘܡܘܼܩܘܸܚ ܠܹܗ، ܒܹܐܡܵܪܵܐ، 24”ܡܵܐ ܠܘܼܟ݂ ܡܸܢܲܢ، ܝܵܐ ܝܼܫܘܿܥ ܢܵܨܪܵܝܵܐ؟ ܐ݇ܬܹܐ ܠܘܼܟ݂ ܕܛܲܠܩܸܬ ܠܲܢ؟ ܒܝܼܕܵܥܵܐ ܝܘܸܢ ܡܵܢܝܼ ܝܘܸܬ، ܐܲܢ݇ܬ ܝܼܘܸܬ ܩܲܕܝܼܫܵܐ ܕܐܲܠܵܗܵܐ.“ 25ܢܓ̰ܝܼܘ ܠܹܗ ܒܝܼܹܗ ܝܼܫܘܿܥ، ܒܹܐܡܵܪܵܐ، ”ܫܬܘܿܩ، ܘܦܠܘܿܛ ܡܸܢܹܗ!“ 26ܪܘܼܦܹܐ ܠܵܗ̇ ܐܸܠܹܗ ܪܘܼܚܵܐ ܛܲܡܐܹܐ، ܘܡܘܼܩܘܸܚ ܠܵܗ̇ ܒܩܵܠܵܐ ܪܵܡܵܐ ܘܦܠܝܼܛ ܠܵܗ̇ ܡܸܢܹܗ.

27ܘܟܠܲܝܗܝ ܥܲܓ̰ܒܝܼ ܗ݇ܘܵܘ، ܗܲܕܟ݂ܵܐ ܕܒܲܩܪܝܼ ܗ݇ܘܵܘ ܚܲܕ ܥܲܡ ܗ̇ܘ ܐ݇ܚܹܪ݇ܢܵܐ، ܒܹܐܡܵܪܵܐ، ”ܡܘܿܕܝܼ ܝܠܹܗ ܐܵܗܵܐ؟ ܝܘܼܠܦܵܢܵܐ ܚܵܕ݇ܬܵܐ ܒܫܘܼܠܛܵܢܵܐ! ܐܘܼܦ ܒܸܦܩܵܕܵܐ ܝܠܹܗ ܠܪ̈ܘܼܚܹܐ ܛܲܡ̈ܐܹܐ ܘܡܲܨܝܘܼܬܹܐ ܝܢܵܐ ܐܸܠܹܗ.“ 28ܘܒܓ̰ܲܠܕܘܼܬܵܐ ܦܪܝܼܣ ܠܹܗ ܚܲܒܪܵܐ ܒܘܼܬ ܕܝܼܹܗ ܒܟܠܹܗ ܐܲܬܪܵܐ ܕܓܠܝܼܠܵܐ.

ܝܼܫܘܿܥ ܒܲܣܘܼܡܹܐ ܪܵܒܵܐ ܡܪ̈ܝܼܥܹܐ

ܡܬܝ 8‏:14‏‐17؛ ܠܘܩܐ 4‏:38‏‐41

29ܘܗܲܪ ܒܗ̇ܝ ܥܕܵܢܵܐ، ܟܲܕ ܦܠܝܼܛ ܠܗܘܿܢ ܡ̣ܢ ܟܢܘܼܫܬܵܐ، ܥܒ݂ܝܼܪܗܘܿܢ ܠܒܲܝܬܵܐ ܕܫܸܡܥܘܿܢ ܘܐܲܢܕܪܹܐܘܿܣ، ܥܲܡ ܝܲܥܩܘܿܒ݂ ܘܝܘܿܚܲܢܵܢ. 30ܘܚܡܵܬܵܐ ܕܫܸܡܥܘܿܢ ܕܒ݂ܝܼܩܬܘܼܗ̇ ܝܗ݇ܘܵܐ ܚܲܡܚܲܡܬܵܐ، ܘܗܲܪ ܒܗ̇ܝ ܥܕܵܢܵܐ ܐ݇ܡܝܼܪܗܘܿܢ ܠܝܼܫܘܿܥ ܒܘܼܬ ܕܝܼܘܼܗ̇. 31ܐ݇ܬܹܐ ܠܹܗ ܘܕܒ݂ܝܼܩܵܐ ܠܹܗ ܒܐܝܼܕܘܼܗ̇ ܘܡܘܼܩܸܡܵܐ ܠܹܗ، ܘܗܲܪ ܒܗ̇ܝ ܥܕܵܢܵܐ ܫܒ݂ܝܼܩܵܐ ܠܵܗ̇ ܚܲܡܚܲܡܬܵܐ، ܘܫܘܼܪܹܐ ܠܵܗ̇ ܒܸܥܒ݂ܵܕܵܐ ܐܸܠܲܝܗܝ ܚܸܠܡܲܬ.

32ܘܒܪܲܡܫܵܐ، ܒܓܢܵܝܬܵܐ ܕܫܸܡܫܵܐ، ܡܘܼܐܬܹܐ ܠܗܘܿܢ ܠܟܸܣ ܠܹܗ ܟܠܲܝܗܝ ܐܵܢܝܼ ܕܝܼܗ݇ܘܵܘ ܡܪ̈ܝܼܥܹܐ، ܘܐܵܢܝܼ ܕܐܝܼܬ ܗ݇ܘܵܘ ܒܝܼܲܝܗܝ ܫܹܐܕܹ̈ܐ. 33ܘܟܠܲܝܗܝ ܐ݇ܢܵܫܹ̈ܐ ܕܡܕܝܼܢ݇ܬܵܐ ܓ̰ܡܝܼܥ ܠܗܘܿܢ ܩܵܕ݇ܡ ܬܲܪܥܵܐ. 34ܘܒܘܼܣܸܡ ܠܹܗ ܪܵܒܵܐ ܡ̣ܢ ܐܵܢܝܼ ܕܝܼܗ݇ܘܵܘ ܡܪܝܼܥܹܐ ܒܡܲܪ̈ܥܹܐ ܦܪ̈ܝܼܫܹܐ، ܘܦܘܼܠܸܛ ܠܹܗ ܪܵܒܵܐ ܫܹܐܕܹ̈ܐ ܘܠܵܐ ܫܒ݂ܝܼܩ ܠܹܗ ܫܹܐܕܹ̈ܐ ܕܗܲܡܙܸܡܝܼ ܗ݇ܘܵܘ، ܣܵܒܵܒ ܟܹܐ ܝܵܕܥܝܼ ܗ݇ܘܵܘ ܠܹܗ. 35ܘܒܨܲܦܪܵܐ، ܩܵܕ݇ܡ ܙܪܵܩܵܐ ܕܝܵܘܡܵܐ، ܩܝܼܡ ܠܹܗ ܘܦܠܝܼܛ ܠܹܗ ܠܒܲܪܝܼܵܐ، ܘܬܵܡܵܐ ܨܲܠܹܐ ܗ݇ܘܵܐ.

ܝܼܫܘܿܥ ܡܲܟܪܘܼܙܹܐ ܓܵܘ ܡܵܬܘܵܬܹ̈ܐ ܘܡܕܝܼܢܵܬܹ̈ܐ

ܠܘܩܐ 4‏:42‏‐44

36ܘܛܥܹܐ ܠܗܘܿܢ ܒܵܬ݇ܪܹܗ ܫܸܡܥܘܿܢ ܘܐܵܢܝܼ ܕܥܲܡܹܗ. 37ܘܐܝܼܡܲܢ ܕܡܘܼܫ݇ܟ̰ܸܚ ܠܗܘܿܢ ܐܸܠܹܗ ܐ݇ܡܝܼܪܗܘܿܢ، ”ܟܠܲܝܗܝ ܐ݇ܢܵܫܹ̈ܐ ܒܸܛܥܵܝܵܐ ܝܢܵܐ ܒܵܬ݇ܪܘܼܟ݂.“ 38ܐܝܼܢܵܐ ܗ̇ܘ ܐ݇ܡܝܼܪܹܗ ܐܸܠܲܝܗܝ، ”ܐܵܙܲܠ݇ܚ ܠܡܵܬܘܵܬܹ̈ܐ ܕܚܵܕܸܪ̈ܘܵܢܲܢ ܕܡܲܟܪܸܙܸܢ ܐܘܼܦ ܬܵܡܵܐ، ܣܵܒܵܒ ܒܘܼܬ ܐܵܗܵܐ ܐ݇ܬܹܐ ܠܝܼ.“ 39ܘܐ݇ܙܝܼܠ ܠܹܗ ܡܲܟܪܘܼܙܹܐ ܓܵܘ ܟܢܘܼܫܝܵܬܲܝ̈ܗܝ ܒܟܠܵܗ̇ ܓܠܝܼܠܵܐ، ܘܦܲܠܘܼܛܹܐ ܫܹܐܕܹ̈ܐ.

ܕܲܟ݂ܵܝܬܵܐ ܕܚܲܕ ܓܸܪܒ݂ܵܢܵܐ

ܡܬܝ 8‏:1‏‐4؛ ܠܘܩܐ 5‏:12‏‐16

40ܘܐ݇ܬܹܐ ܠܹܗ ܠܟܸܣ ܠܹܗ ܚܲܕ ܓܸܪܒ݂ܵܢܵܐ، ܒܪܝܼܟ ܠܹܗ ܩܵܕ݇ܡܘܼܗܝ، ܦܲܪܦܘܼܠܹܐ ܒܝܼܹܗ، ܒܹܐܡܵܪܵܐ، ”ܐܸܢ ܒܵܥܹܝܬ، ܡܵܨܹܝܬ ܕܲܟܹܝܬ ܠܝܼ.“ 41ܪܘܼܚܸܡ ܠܹܗ ܥܲܠܘܼܗܝ ܝܼܫܘܿܥ، ܦܘܼܫܸܛ ܠܹܗ ܐܝܼܕܹܗ ܘܕܩܝܼܪܹܗ ܒܝܼܹܗ ܘܐ݇ܡܝܼܪܹܗ ܐܸܠܹܗ، ”ܒܸܒܥܵܝܵܐ ܝܘܸܢ، ܗܘܝܼ ܕܸܟ݂ܝܵܐ.“ 42ܘܗܲܪ ܒܗ̇ܝ ܥܕܵܢܵܐ، ܐ݇ܙܝܼܠ ܠܹܗ ܓܸܪܒܹܗ ܡܸܢܹܗ، ܘܦܝܼܫ ܠܹܗ ܕܘܼܟ݂ܝܵܐ. 43ܘܩܲܫܝܵܐܝܼܬ ܦܩܝܼܕ ܠܹܗ ܐܸܠܹܗ ܝܼܫܘܿܥ، ܘܗܲܪ ܒܗ̇ܝ ܥܕܵܢܵܐ ܩܲܡ ܫܲܕܸܪܹܗ، 44ܒܹܐܡܵܪܵܐ ܐܸܠܹܗ، ”ܠܵܐ ܐܵܡܪܹܬ ܠܐ݇ܢܵܫܵܐ ܡܸܢܕܝܼ، ܐܝܼܢܵܐ ܙܹܠ݇ ܘܡܲܚܙܝܼ ܓܵܢܘܼܟ݂ ܠܟܵܗܢܵܐ ܘܡܲܩܪܸܒ݂ ܩܘܼܪܒܵܢܵܐ ܒܘܼܬ ܕܲܟ݂ܵܝܬܘܼܟ݂ ܕܵܐܟ݂ܝܼ ܕܦܩܝܼܕ ܠܹܗ ܡܘܼܫܹܐ، ܠܣܵܗܕܘܼܬܲܝܗܝ.“#ܟܗܢ̈ܐ 14‏:1‏‐32 45ܐܝܼܢܵܐ ܗ̇ܘ ܦܠܝܼܛ ܠܹܗ ܘܫܘܼܪܹܐ ܠܹܗ ܠܗܲܡܙܘܼܡܹܐ ܪܵܒܵܐ، ܘܦܪܝܼܣ ܠܹܗ ܠܐܵܗܵܐ ܚܲܒܪܵܐ، ܗܵܕܵܐ ܕܝܼܫܘܿܥ ܠܵܐ ܡܨܹܐ ܠܹܗ ܓܲܠܝܵܐܝܼܬ ܥܵܒܹܪ ܠܡܕܝܼܢ݇ܬܵܐ، ܐܸܠܵܐ ܠܒܲܕܲܪ ܝܼܗ݇ܘܵܐ ܓܵܘ ܒܲܪܝܼܵܐ، ܘܐ݇ܢܵܫܹ̈ܐ ܟܹܐ ܐܵܬܝܼ ܗ݇ܘܵܘ ܠܟܸܣ ܠܹܗ ܡ̣ܢ ܟܠ ܕܘܼܟܵܐ.

Currently Selected:

ܡܪܩܘܣ 1: ABTAB

Highlight

Copy

Want to have your highlights saved across all your devices? Sign up or sign in

Learn More About ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ