Hechos 10
10
Pedro Cornelio dʉi
1Phobor Cesarea anʉm ee woun ãb sĩejim aajem, Cornelio a thʉ̃r sim. Mag Corneliota soldaaun Italiapien eem chi capitán ajim aajem. 2Mag capitán judío khabajieb mamʉ, ich chaain dʉimua ich ʉʉipa amach thumaam khʉʉnau Ẽwandamag jeeunaa i dau najã agpierraa wenʉrraajeejim aajem. Mag judío khaba simta, judionaan juag oom khõchgau phatkhon pom deejeejim aajem, aphʉʉm khʉʉnag.
3Biek ãb edau phʉʉibaajer kheeuragam las tresjo nʉm ee í Ẽwandamag jeeu chirʉmta, khãi athamjo abarm ee oowai, Ẽwandam chog ʉ̃gtharmua beewi, dau daau i chirʉm aar dubwi irig, —Cornelio aichejim anʉm.
4Mag ich thʉ̃rbaichee Cornelioou inanaa i khĩir eerpanaa jãphierr thʉnʉmuata chi Ẽwandam chogag, —Señor, ¿khan agá? ajim anʉm.
Magbaa chi Ẽwandam chogau jũrr irig, —Pua Ẽwandamag jeeu chirʉʉ aajeewai ʉu irua pʉ iek ũrbarmgui ajim anʉm. Ĩchab irua oowai pua aphʉʉm khʉʉnag nemdam deejemjã ʉu simgui ajim anʉm. 5Õor jʉr auwi Jopeeg pʉibapʉi ajim anʉm, woun Simón a thʉ̃ʉrjem awaan mamkhĩir. Ich arpai am den ibʉʉr wauwia Pedro a thʉ̃ʉrjemgui ajim aajem. 6Mag woun deeum agjo Simón a thʉ̃ʉrjem aig simgui ajim anʉm, Simón chi nemheu dʉi phidkhamie deg. I di phũas igawaa simgui ajim aajem. Mag Simón Pedroouta pʉrʉg jaauju, khanta pua wauju aai sĩ ajim anʉm chi Ẽwandam chogau capitán Cornelioog.
7Chi Ẽwandam chog mag ich aig iekha dʉnaawi petaawai Cornelioou chadcha ich deg phidkhaajerr khʉʉn numí thʉ̃rkha auwia, ĩchab soldaaun ãb ichjo Ẽwandam iek ʉkhanaa ich juag oojerr thʉ̃r aujim aajem, arag thãrjup. 8Mag thʉ̃rkha auwia Ẽwandam chogau ichig jaautarrjo jũrr amag ajapha jaau deewi pʉijim aajem, Jopeeg, Simón Pedro awaan wetamkhĩir.
9Maimua ag noram mag Cornelioou pʉitarr khʉʉn ya chi phobor dakha paaukhamam ee, edau sĩejonaa, Pedro ich diheu ʉ̃r sĩejim aajem Ẽwandamag jeeuwai. 10Mag nʉm ee jãsooga aadee thach khom khõchkhabaadejim aajem. Mamʉ phiejãb wau nʉmich, sĩi khãibaadeeu waa khãai khõrkha thʉnʉmua oowai, 11sĩi edaujãata weeudʉ thʉnʉm oo athajim anʉm. Pedroou oowai mag edjã weeudʉ wejom eemua dĩesjo nem pheeugnaa khẽu jʉ̃kha sĩsidʉmta eeg jẽbjã gaai burr uraa ajim anʉm. 12Mag dĩes nem pheeug sim ee nemchaain khĩir pogkhe thʉnaajim anaabá: mʉg jẽb gaaim nemchaain bʉ jayapam, nemchaain sĩi jãau jẽedʉ nʉrrjee aajem khʉʉn, nem ichpan, nem thumaa thʉnaajim aajem. 13I akharau mag eerpa oo chirʉm eeta, wounjã chukhu sim eemua irig, —Pedro, jãg eem nemchaai thõonaa khobá ajim anʉm.
14Magbaawai Pedroou irig, —Señor, mua chan mʉg chitʉm aig mʉch erraawe bʉ̃ʉrjã nem parhooba khoba chitʉmgui ajim anʉm. Magʉm jãg maach inaam chará mua khobamgui ajim anʉm, pʉ dau na ãrmaaugau warrgarwe maach jooinau khopiba jaaujerr aawai.
15Irua magbarm ee, deeu ũmaai õor chukhu sim eemuata irig, —Ẽwandamau nem ajapha wauwi khopi jaau sim chan oob pua maach inaa sim amgui ajim anʉm.
16Chi dĩes gaai mag nemchaain pos jojopkham oopinaa, khomkhĩir biek thãrjup phʉʉrba jajaaujii awi, deeu ʉ̃gthaag eudʉ athamjo abaawai chukkhu aadejim aajem. 17Mag oobaawai Pedroou ich odegpai, “¿Khan jaauwaita jãg sĩi put gaaipai nemchaain khapan jãjãg khajĩma?” a khĩirju oo chirʉm eeta, Cornelioou pʉitarr khʉʉnau Simón di jejewag wedurumua i sim di aig daaugajãr puertdi aig bardʉtkhabaichejim aajem. 18Mag bardʉtkhachewi aiguim khʉʉnag jeeujierram aajem, mag woun Simón anʉm ibʉʉr wauwia Pedro a thʉ̃ʉrjem maig sim khap aag. 19Mamʉ mag nʉm ee ĩchab Pedroou mag ichdeu nem ootarr agtha khĩirju oo chirʉm ee, Ẽwandam Akharau irig, —Õor thãrjup pʉ jʉr wenʉrrʉm khʉʉn ya bardʉtkhabaichemgui ajim anʉm. 20Ʉʉrbawia am dʉi petá ajim anʉm. Oob khĩirjum, jãkhʉʉn wounaanan mʉchdeuta pʉ jʉraan pʉi chirʉmʉugui ajim aajem Ẽwandam Akharau irig.
21Ichig magbaa chadcha Pedroou ʉʉrbawi mag Cornelio ich jʉrmkhĩir pʉitarr khʉʉnag, —Pãran mʉʉta jʉr wenʉrrʉm, mʉʉn mʉigta chirʉmgui ajim anʉm. ¿Khandam athee beejierrá? a jeeujim aajem amag.
22Magbaa amachdeu, —Maar beejimgui ajim anʉm, capitán Cornelioou chogbapäaiwai. I iek mag Ẽwandam chog beewi irig pʉ jʉraan õor pʉipi jaaujim aajemgui ajim anʉm, mag pʉ i di aar petaawai pua nem jaaumam ichdeu ũraag. Jãg capitanan chadcha õor ajaphamʉu. Ẽwandam dau najã agpierraa aajeewai Judionaanaujã thumaam khʉʉnau i kha khõsi aajemgui ajim aajem Pedroog.
23Magbaa Pedroou amag ierrag dubpi jaaubaa, dubwi warag ich mag aig khãi eejierram aajem. Maimua ag noram chadcha am dʉi majim aajem. Mag i mam dʉi ĩchab ich ag phobor eem ãaur agjo Ẽwandam igar narr khʉʉnjã i dʉi wetjierram aajem, i daumaai.
24Mag wetumua, ag noram deeu Cesarea barjierram aajem. Mam barimawia ooimaawai, chadcha Cornelioou ich khodnaan dʉi ich khapkhʉʉn ich dʉi ajapcharam khʉʉnpa ãbam aig biirdʉnaa am nʉ sĩejim anaabá. 25Mag Pedro barbaimaawai Cornelioou i khĩirphee dawag oberwi i bʉkhʉrr jĩeporou phõbkhabaimajim aajem, Ẽwandamagamjo jewaag. 26Cornelioou mag ich khĩirphee phõbkhabaimaa Pedroou irig, —Phiidʉbaadke ajim anʉm. ¿Khantheeta pʉ mʉ dʉi jãgbaadem? Maach wounaan agdaujopai thʉnʉmʉg khabahab anaa, deeu i dʉnʉʉupi athajim anaabá.
27Maimua warag iyʉʉ naawi dubjierram aajem. Mag dubwi ierr ooimaawai õor khapan pos thʉnaajim aajem. 28Mag oobaimaawai Pedroou amag, —Keena, pãrau khaphʉ nʉmgui ajim anʉm, maar judionaanag chan pod pãar judionaan khabam khʉʉn deg dubpiba jaaunaa pod pãar dʉi khapeerkhajujã khaba nʉm aajem, Ẽwandam na maach ãarjeewai. Mamʉ ĩs Ẽwandamau mʉrʉg jaauwai ya maadeu tag mag khĩirjuju khaba nʉmgui ajim anʉm, dich meeun khabam khʉʉn dʉi awiajã. 29Maguata, mʉch aar jaaubaimaawai mua bʉ̃ʉrjã magʉm aba, chadcha beewi mʉig pãar dʉi chirʉm keena. ¿Khan athee pãrau mʉ thʉ̃rpʉijierrá? ajim aajem Pedroou.
30Magbaawaita Cornelioou irig nem ĩgkhabaademua magjim aajem:
—Ya khãai jayap simgui ajim anʉm, ĩsim khurau, mʉch di aig chirʉmta ãspatarr aigmua thachjã khoba chirarr. Mag chirʉmua edau phʉʉibaajer kheeuragam las tresjo nʉm ee, ich mʉg ora, Ẽwandamag jeeu chirajimgui ajim anʉm. Mag nʉm eeta degolp woun ãb khajũa bäpphä ich bäpgau phuumjo sim beewi mʉ khĩirphee dʉnʉʉubaichejimgui ajim anʉm. 31Mag dʉnʉʉuchewia mʉ thʉ̃rcha thʉ̃rnaa mʉrʉg, “Pua Ẽwandamag jeeu chirʉʉ aajeewai irua pʉ iek ũrbarmgui” aichejim mʉrʉg. Ĩchab mua aphʉʉm khʉʉnag nemdam deejemjã ʉu simgui ajim chi Ẽwandam chogau. 32Maimua mʉrʉg õor jʉr auwi Jopeeg pʉipi jaaujim, woun ãb Simón anʉm ibʉʉr wauwia am den Pedro a thʉ̃ʉrjem awaan mamkhĩir. Mag wounau jaauwai pʉ deeum agjo Simón anʉm nemheu dʉi phidkhaajem aig sim a jaaujim, phũas igaau di dʉnʉm ee. Pʉ igwia, mag wounauta mua nem wauju mʉrʉg khap jaaujugui ajim, chi Ẽwandam chogau. 33Mag mʉchig jaaubaicheewaita mua õor pʉijimgui ajim anʉm, pʉ awaan mamkhĩir. Mag, ĩs ʉu pʉ barbaichemgui ajim aajem Cornelioou Pedroog. Ẽwandam dakhĩir maar mʉig ãba biirdʉwia pʉʉta nʉ nʉmgui ajim anʉm, pʉrʉg Ẽwandamau ich iek marag jaaupi sim ũraag. Ĩsin chadau marag jaaubá ajim aajem Cornelioou.
Pedroou Cornelio deg maach peerdʉajem iek jaautarr
34Mag ichig iekhapibaawai Pedroou magjim aajem:
—Ĩsin ya mua khaphʉ chirʉmgui ajim anʉm, chadcha Ẽwandamau mag iwiir ãbam khʉʉnpaita ʉ̃rcha igba aajem. 35I dau naan deeum durram khʉʉnau awiajã i ipierraanaa ĩchab agcha wenʉrrakhiin, makhʉʉnjã irua igab khaba igjugui ajim anʉm Pedroou chi aig biirdʉ thʉnarr khʉʉnag. Mag jaaumamua ich Pedrooupai, 36Ẽwandamau Jesucristo israelnaan ee pʉijimgui ajim anʉm, ich iek jaaumkhĩir. Mag, maadeu khaphʉ nʉmgui ajim aajem, warr Ẽwandam dʉijã iekkhõr paar narrta Jesucristo ʉu maach kõit thõtarr gaaimua khõinaa wenʉrrʉm. Ich ag Jesuugui ajim anʉm, ante maach thumaam khʉʉn Por. 37Pãrau khaphʉ nʉmgui ajim aajem, Juanau Ẽwandam i jaaunaa õor por choo nʉrrarr khurjã jãga nacha Jesuu Galilea ee ich iek jaaubaaderr khĩeb Judea ee thum aaidʉjĩ. 38Pãrau khaphʉ nʉmgui ajim anʉm ĩchab, jãga Ẽwandamau Jesús Nazaretpierr gaai ich Akhaar phẽs deewi ich juapajã deejĩ, maimua jãga mag juapaau õor mepeer jua ee sĩsid arrjã peerdʉ aunaa ich nʉrrʉmpierr nem ajapha wau nʉrrajĩ, Ẽwandam i nʉrrʉm dʉi sĩerr aawai. 39Judea durr maimua Jerusalén phobor eejã mag nem thum waumatarr marau maach daúa oojimgui ajim anʉm, maar dakhĩirta mag wau nʉrraajerr aawai. Mag khitarr Jesús ajimgui ajim anʉm, ar pakuls gaai meerphe thõopʉitarr. 40Amau mag i thõojieb mamʉ, khãai thãrjupam ee Ẽwandamau deeu i phiriu auwia ich oopijim. 41Mag ich oopitarr thumaam khʉʉnagjã khaba, ãba maragpaita ich oopijimgui ajim aajem, ag nawejã ich Ẽwandamau maragta ichdeu nem wau nʉrrʉm oopiju awi maachta i dʉi wenʉrramkhĩir jʉr autarr aawai. Maguata mag i meewi deeu iiu phiidʉtarr khurjã maachta i dʉi thach khojimgui a jaaumajim aajem. 42Maimua ichdeucha maar pʉijimgui ajim anʉm, judionaan thumaam khʉʉnag jaaumamua ich igwia, “Iita Ẽwandamau jʉr aujim, warrgar meetarr khʉʉnpa maach ãba phiidʉtkhabarm ed chijã khʉʉnta ʉ̃gthar wetju wa chijã khʉʉnta isegju a khap jaaumkhĩir.” 43Mag, warrgar Ẽwandam i jaaujerr khʉʉnaujã ĩchab Jesús igwia, “Thum i iek ʉkhawia ãba irigpaita amach peerdʉ aumkhĩir jeeu nʉm khʉʉn khaibagan Jesús gaaimua Ẽwandamau chadcha chugpaapʉiju” a jaaumajim aajem Pedroou, warr Ẽwandam i jaaumienau jaaujerr igwia.
Judionaan khabam khʉʉnag Ẽwandamau ich Akhaar deetarr
44Pedro iekha oba agtha mag ijẽjẽbkham ee, thum aig i iek ũr narr khʉʉn gaai Ẽwandam Akhaar phẽs aichejim aajem. 45Magbaawai judionaan Jesús iek ʉkha narr Pedro dʉi beetarr khʉʉnau amach daúa oowai, Ẽwandamau ĩchab ich Akhaar judionaan khabam khʉʉn gaaipa phẽs deebarm oobaa, dauderraa nʉisijim aajem, 46amau ũurwai sĩi amach meu khabampata sereu thʉnʉm ee Ẽwandam tho iekha nʉrrjeem ũrbaawai. 47Mag thumaam khʉʉnau amachdeu iekhaba aajerr meupa iekhaphoo thʉnʉm oobaa Pedroou, —Ĩs mʉkhʉʉn wounaanau Ẽwandam Akhaar maachdeu autarrjo athapí, amjã warre ĩchab por choopʉiju aai nʉmgui ajim aajem.
48Maimua chadcha makhʉʉn thum Jesucristo thʉ̃r gaai warre por choopi jaaujim aajem. Mag ya por choo nʉisiewai amach aig khãaidam khapanaa sĩemkhĩir Pedro thʉajierram aajem.
Currently Selected:
Hechos 10: noaA
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
