San Lucas 20

Jesús jua theeg

(Mt. 21:23-27; Mr. 11:27-33)

1Khãai ãb Jesús Aai i jeeujem deg dubwia õrag jaau sĩejim aajem, jãga Ẽwandamau am peerdʉ auju. Irua mag jaau sim aig, phadnaan chi porkha nʉm khʉʉn beejierram aajem, chi machnaan dʉi judionaan am Asamblea eem chi pornaanpa. 2Mag beewia irig, —¿Khai thowiata jãg mʉig nem per narr khʉʉn pua dawag jʉr werppʉijĩ? ¿Khaíuta jãg pʉrʉg pʉchta nem iek theeg apijĩ? Marag jaaubá ajierram anʉm.

3Magbaa Jesuu amag magjim anʉm:

—Magan nacha mʉrʉg jaaubat. Muajã ĩchab pãrag jeeu ookhimgui ajim anʉm: 4Pãrau khĩirjuawai, ¿chadcha Ẽwandamauta Juan pʉijĩ ajim anʉm, jãg amach khaibag Ẽwandamag chugpaapi jaaunaa õor por choo nʉrramkhĩir, wa sĩi mʉg jẽb gayam khʉʉnau chogpʉiwiata jãg nʉrrajĩwa?

5Mamʉ mag irua jeeubarmjã pod ʉkhaju khaugba aawai amach appai iyʉʉ nʉmua amach wir aigpai, —Keena, maadeu irig Ẽwandamauta pʉijim akhiin, magan jũrr irua maachig, “Jãg magʉmta pãrau irua jaau nʉrrarr ʉkhabajierráma” ajugui ajim anʉm. 6Wa magba maadeu jũrr, “Ichjom khʉʉnaupai pʉiwiata jãg nʉrrajim” akhiin, magan õor pom mʉg thʉnʉm jũrr maach dʉita meeukhawia, mokou bar wai nʉmuapai maach khechpʉijugui ajim anʉm, mʉg phobor ee thumaam khʉʉnau i igwia, “Chadcha Ẽwandam i jaaumie chaar” aajeewai.

7Mag jaauju khaugba naawia warag, —Marau khaugbam jammuata beejĩ, ni khaíu pʉiwiata jãg nʉrrajim khai ajierram anʉm.

8Magbaawai Jesuu amag magjim:

—Mua pãrag jeeutarr mʉrʉg jaauba aawai muajã pãrag jaaubamgui ajim anʉm, khai thowiata mua mʉg nem wau chitʉ́.

Khaibag sĩsidʉmta nemjĩir thʉa narr

(Mt. 21:33-44; Mr. 12:1-11)

9Maimua mag õor pom thʉnʉmʉg mʉg nem ĩgkhaadam jaaumamua magjim aajem Jesuu:

—Woun ãbmua uvado jĩirjim aajem. Maimua ich chawag mam khõchkhabaadeewai deeum khʉʉnag alquilaapʉiwi, warp deeum durr petawia, mam sĩi aimajim aajem. 10Mam mag simua ya chee jaar aadem ee, ich chog pʉijim aajem, mag dʉi ichig ich paatem deepʉimkhĩir. Mamʉ mag chi nemjĩir khʉ jooirau chogtarrdam amach aar barbaimaawai, pʉrnaa, wʉ wai nʉʉ awia, sĩi deeu ich jua kharraa jʉrbapäaiwai, ich juadam parii barjim aajem. 11Magbaawai jooirau deeum pʉijim aajem, ich chog. Mamʉ majã amach aar oo barpinaa, parhooba i wau iekha wai nʉʉ awia, warm khãyaujã ʉ̃rʉʉpai wʉnaa, agjo ich jua kharraa jʉr werbajierram aajem. 12Mag majã ich jua parii barbaimaawai deeum pʉijim aajem jooirau. Mamʉ machará mag wʉ wai nʉmua, sĩi maach eu pom pepethor aademua, bag kha ʉ̃ʉipabaadeewaita ogdʉpʉiwia, jʉrpʉijierram aajem, ni bʉchkhunpai deejojoojã khaba. 13Magbaawai ich jooi chi uvado ag papau khĩirju sĩi awia, “¿Mua jãga abarkhiina?” ajim anʉm. Mag khĩirju sĩi awia, “Ãa, jãgan mua mʉch iewaa mʉchdeujã chig aba aajemta pʉijugui” ajim anʉm, “Tale amau mʉ chaai oophobaadeewai i ogkhawia i chig abaju” awia. Mag chadcha ich chaai pʉijim aajem. 14Maimua mag jooirau ich iewaa ichdeu jãsenecha aajemta pʉiwia urum oobaawai amach appai magjierram anʉm: “Achamʉ́ i iewaa aawai mʉguata mʉg atag mʉg nemjĩirjã jʉ̃aju khabahaba. Keena, jãgan maadeu warre i thõopʉijugui ajierram anʉm, mʉg nemjĩirdo maach denkha sĩsimkhĩir.” 15Mag chadcha ʉʉr barchepinaa, pʉrphobaadewi, warp nemjĩirdo igaau arrnaa, mam thõopʉijierram aajem, ich jooi iewaa ãba.

Mag nem ĩgkhaadam ĩgkha opʉiwia õrag magjim aajem, ich Jesuupai:

—Pãrau khĩirjuawai, ĩsjã agtha mag uvado sim anaa chi thʉa narr khʉʉnjã ich akhʉʉnpai akhiin ¿jãgaju khai jooirau magʉm wounaan dʉi? 16Par irua ich chaai ãbpai khitʉm pʉitarrpata mag thõobapʉim oobaawai, mawia, warre amach thum khechpʉinaa, ich uvado jũrr deeum khʉʉnagta jaau pʉabjejugui ajim anʉm, ichdeupai.

Amach jʉ̃g daar Jesuu mag iekhabapʉim ũrbaawai chi aig narr khʉʉnau, —Aay, Ẽwandam, ¿khanthee pua magbaadeju? ajierram aajem, mag uvado jaau sim gaaimua Ẽwandamau amachta jaau sim khaphʉ narr aawai.

17Magbaawai Jesuu am khĩir eerpa eerpanaa amag, —¿Khan aawaíuma ajim anʉm, Ẽwandam iek phã sim gaai ar “Di eu narr khʉʉnau isegtarr dibigta jũrr chi dihãd jãrramkha sĩsim” a sim? 18Magnaa ichdeupai, Mag dihãd a simʉn mʉ igwiata mag simgui ajim anʉm. Chi mʉ iek ʉkhaba sim wounan juau ogthom mag dibig ʉ̃r burrwi ichdeupai ich gaai mas wau simjota sim; maimua mag ʉkhaba nʉrrʉmta meemʉn jũrr mʉ mag dibig pomaamjo chirʉmta i ʉ̃r buudimamjo ajugui ajim anʉm.

Jesuu mag sĩerran mag i iek ʉkhaba meebaadeewai warre khĩmie durr barpʉijuuta jaau sĩejim.

19Irua mag uvado thʉa narr khʉʉn khaibag sĩsid arr jaau sim gaaimua, phadnaan chi porkha nʉm khʉʉnau chi machnaan dʉimua khaug athajierram aajem, Jesuu amachta jaau sim. Magbaawai ag bʉrre i pʉr aum igphobaadejim aajem. Mamʉ mag i pʉr athaawai phobor eem khʉʉnau jũrr amachta khaigbaju khĩirjuwia i dichbajierram aajem.

Reígjã deenaa Ẽwandamagjã ich paat deepi jaautarr

(Mt. 22:15-22; Mr. 12:13-17)

20Mag amach dʉita õor meeukhapiju khãai sĩi õor jʉr auwia chi Jesús sim aar pʉijierram aajem, makhʉʉnau chadcha khaugba aawaita irig jeeu nʉm awia jeeubaimaawai, jaauju khaugba ipeerdʉ khãijã jaaubapäaiwai, magʉm gaaimua gobernador aar i pʉr arraag. 21Mag ereuwi chadcha irig maguimajierram aajem:

—Maestro, marau khaphʉ nʉmgui ajim anʉm, pua chadcha nem agchata jaaujem. Pua mag õor iwiir ãbpaita ʉ̃rcha kha khõsijã khaba, ante pua chadchata thumaam khʉʉnag jaaujem, jãgata aju aai nʉ Ẽwandamau nem jaau sim eyaa wenʉrraag. 22Magua marau pʉrʉg jeeum ig nʉmgui ajim anʉm: Pua oowai ¿chadchata maach meeun judionaanaujã durrpierram khʉʉn rey Roma sĩejemʉgta impuesto phagju aai nʉ, wa phagju khaba nʉwa?

23Mamʉ Jesuu mag sĩi ich imeraa pʉr awaagpaita ichig jeeuche nʉm khĩirjugjã khaphʉ sĩerr aawai amag magjim anʉm:

—¿Khantheeta pãrau sĩi imeraa mʉ pʉr auju ẽkha nʉma? 24Daai mʉrʉg phatkhon chi dau daí jʉr deebat, mua pãrag jaaukhimgui ajim anʉm.

Maimua au deebaawai amag, —¿Khai khĩirta khai thʉ̃r dʉi ag gaai sĩ ajim anʉm, pãrau oowai?

Magbaawai amachdeu, —Romaam rey César khĩir khabahab ajierram aajem, ich thʉ̃r dʉi.

25Magbaawai deeu ichdeu amag, —Pãrau mag khaphʉ nʉm khai, magan reíg ich paat deenaa Ẽwandamagjã agjo ich paat deebat ajim anʉm.

26Mag amachdeu jeeubaawai i ipeerdʉ iekhabarm gaaimuapai phithurg chukhu i pʉr awaan a beetarrta, warag ich garmua amachig mag jaaubarm ũrwia sĩi jʉ̃gderraa nʉm iekhau warag amachta khĩu nʉisijim aajem. Mag, pod i pʉr aubajierram aajem.

Ẽwandam chan chi khecham khʉʉn Ẽwandam khabam

(Mt. 22:23-33; Mr. 12:18-27)

27Mag khur Jesús aig beejierram aajem Saduceonaan. Makhʉʉnau jaauwai, maachta meebaadem chan tag bʉ̃ʉrjã maach akhaar iiuba aajem aajem. Amach mag nem jaau sĩerrjeem gaaimua iyʉʉmamua juau ogthom irig magjierram aajem:

28—Maestro, jooi Moisés khararrau Ẽwandam iek phã pʉarr gaai jaauwai, woun ãb ʉʉi paraa simta mag ʉʉi dʉi chaai chukhu meemʉn jũrr chi khod ãbam wai sim khai magua ich ag ʉʉipai auju aai sim a simgui ajierram anʉm, ag dʉi ich naamʉu chaain ooba arr aawai jũrr i athee oo deeg; mag oo deebarm i chaainkha nʉisimkhĩir.

29Maimua amachdeupai warag irig nem ĩgkhamamua magjierram aajem: —Biek ãb ãbam khod appai emkhooin siete naajim aajem. Am naam chi nacharamua ʉʉi auwia, ich mag chaai chukhu wenʉrrʉm ee meejim aajem, chi emkhooi. 30Magbaawai jũrr chi eeumua aujim anʉm ich ag ʉʉipai. Mamʉ mag dʉijã pod chaai ooba, ich mag chaai chukhu meejim aajem. 31Magbaawai ag eeumuajã jũrr ich ag ʉʉipai aujim anʉm. Mamʉ maguajã pod ag dʉi chaai ooba meejim aajem. Ich mag ewagam khʉʉnjã ãbam ʉʉiraupai warm meemam ẽudee theg ahaugmamua mag ãbam khod appai siete narr thum thegdʉpʉijim aajem; mamʉ ni ãbmuajã pod mag ʉʉi dʉi chaai oobajim anaabá. 32Maimua ãbmiecha paawai ĩchab chi ʉʉijã meejim aajem. 33Maagwai marau pʉrʉg jeeum ig nʉmʉn mʉgaugui ajierram anʉm: Mag ãbam ʉʉiraupai emkhooin khod ãbampai siete phetarr aawai mʉg atag thumaam khʉʉn iiu phiidʉtkha nʉm edjã, ¿mag ʉʉi chijãg denkha sĩsijuma ajierram anʉm: chi nacha autarr den, wa ẽudeegam khʉʉn denwa?

34Magbaawai Jesuu amag magjim aajem:

—Mʉg jẽb gayan, õor jua pʉrnaa amach chaainjã jua pʉrpipi aajerram. 35Mamʉ iiu phiidʉwia ʉ̃gtharcha ober nʉm khʉʉn chan tag jua pʉrpʉr abam, ʉ̃gtharm Ẽwandam chognaanjo tag meeba ich mag nʉisiju aawai. 36Ya am Ẽwandam chognaanjo thʉnʉm dʉi ĩchab Ẽwandam chaainkha thʉnʉmgui ajim anʉm, ich Ẽwandamauchata am phiriutkha autarr gaaimua. 37Maach meewia deeu iiu phiidʉajem iekhan Moiseeujã jaaujimgui ajim anʉm, pabʉdam neneree khitʉm uurdʉ thʉnʉm ichdeu ootarr jaau sim ag ẽsap ichdeu phã pʉatarr gaai. Mag jaauwai, i iek maach Por Ẽwandaman jooingar jooi Abrán khararr ag Ẽwandam aajem. 38Ẽwandam chan oob mag chi khecham khʉʉn Ẽwandam khabam. Ẽwandaman chi iwam khʉʉn deneu. Irigan nawe meetarr khʉʉn awia khãijã thum chi iwam khʉʉnau a jaaumajim aajem.

39Irua mag iekhabapʉim ũrwia ãaur khʉʉn chi machnaanjã aig narr aawai makhʉʉnau irig, —Maestro, ʉuchata pua mag iekhabapʉimgui ajierram anʉm.

40Mag, Saduceonaanaujã amachdeu pod i pʉr auba meerkhabapʉim oobaawai tag irig jeeuba ich mag nʉisijim aajem.

¿Mesías khai Iewaa ajĩ?

(Mt. 22:41-46; Mr. 12:35-37)

41Mag khĩu thʉnʉisim ee jũrr Jesuu ich garmuata amag jeeujim anʉm:

—¿Jãga pãar iek mag Mesías jooingar David khararr ag chaain ewagam khʉʉn den aajẽ, 42ich Daviiuchajã ichdeu ẽsap phãtarr Salmos anʉm gaai i igwi “maach Por” a iekhatarrta? ¿Pãrau khĩir ee paba nʉ, Ẽwandamau ich iekhatarr Davidag phãpitarr? Mag irua phãtarr gaai mag sim:

“Maach Por Ẽwandamau magjim maach Porog:

‘Mʉch iek theeg chirʉmjo aag mʉ dʉi ãba mʉ juachaar gar jupbá ajim, 43pʉch oomapha aajem khʉʉn thum mua pʉch jua ee pʉrkha dee nʉm ora.’ ” (Sal. 110:1)

44Mag ich David khararrauchajã Ẽwandamau pʉiju aajerr igwia “maach Por” a iekhatarrta, ¿jãgwia pãrau sĩi i David chaain ewagam khʉʉn denpai aajẽ? Mag sĩi ich chaaipai aju akhiin Davidau ich paarmua mag “maach Por” abakhamgui ajim anʉm.

Chi machnaan khai amach tho iekhapim khõsita sĩerrjeem

(Mt. 23:1-36; Mr. 12:38-40; Lc. 11:37-54)

45Maimua õor thumaam khʉʉn jʉ̃g daar Jesuu ich khapeen ich dʉi ogdʉba wenʉrraajerr khʉʉnagta magjim aajem:

46—Moiseeu Ẽwandam iek phã pʉatarr jawaag chi machnaan dʉi khai khĩir khaphʉ aajeet. Jãkhʉʉnan sĩi khajũa bʉ duurg jũanaa kaaijã ee õrau amachig saludaawaijã amach tho iekhapim khõsita sĩerrjeemgui ajim anʉm. Jãkhʉʉnan amach Ẽwandam i jaaujem deg weetwaijã amachta porgarcha thumaam khʉʉnag khĩir jʉrkha juupjemgui ajim anʉm, amachta warm khʉʉn khãaijã ajapcha nʉm awia. Maimua di chaaur thach khomkhĩir thʉ̃ʉrwaijã parhooba jupba, khãidu ajapcharamta jʉ̃a au sĩerrjeemgui ajim anʉm. 47Jãkhʉʉnaun sĩita khoopaa ʉʉin juagam nemdamjã khechthʉg aumaajerram. Magnaata seukha warag am kõit Ẽwandamag jeeu nʉʉ aajemgui ajim anʉm, juau ogthom amach magba nʉm amkhĩir. Mamʉ amach jãg wenʉrrʉm paar, jũrr Ẽwandamau ĩchab am gaai jua khʉabajugui ajim anʉm.

Currently Selected:

San Lucas 20: noaA

Highlight

Copy