پیدایش ۴۰
۴۰
ساقی و نانوا
۱ چندی بوگوذشته کی مصرٚ پادشاه رئیسٚ ساقیأن و رئیسٚ نانوایأن، خوشأنٚ سرور، پادشاه جَا ایطاعت نوکودیدی. ۲ فرعون جٚه خو خادمأن، یَنی رئیسٚ ساقیأن و رئیسٚ نانوایأن، غیظَ گیفته، ۳ اوشأنَ قصرٚ زندانٚ دورون هویه کی یوسفم دربند بو، زندانی بوکوده. ۴ نگهبانأنٚ رئیس، اوشأنَ بیسپرده یوسفٚ دس، یوسفم اوشأنَ خدمت کودی.
ایتأ مدت جٚه اوشأنٚ زندانی بوستن بوگوذشته، ۵ پادشاه ساقی و نانوا ایشب هر کی خوره خوابی بیده. هر کسٚ خواب خوره تعبیرٚ خاصی دأشتی. ۶ فردایی صبح کی یوسف بوشو اوشأنٚ ورجه، بیده کی اوشأن خیلی پریشانیدی. ۷ یوسف وَورسه: «چیسه کی ایمروز خیلی غورصه دأریدی؟»
۸ جواب بدَییدی: «اَمأن هر دو نفر دیشب خواب بیده‌ییم، ولی هیکس اَیه نِیسه کی بتأنه اَمی خوابَ اَمِره تعبیر بوکونه.»
یوسف اوشأنَ بوگفته: «مگر علمٚ تعبیرٚ خواب خودا شین نی‌یه؟ مرَ بیگید کی چی خواب بیده‌ییدی.»
۹ پس رئیسٚ ساقیأن خو خوابَ یوسفٚ‌ره واگویا بوکوده و بوگفته: «خواب بیدم ایتأ انگور رزَ می جُلُو نهَه‌بو، ۱۰ کی سه‌تأ شاخه دأشتی. زپّه بزه و گول بوکوده#۴۰:۱۰ به فارسی: جوانه زد. و اونٚ خوشه‌یأن برسه، انگور بأوردید. ۱۱ فرعونٚ جامَ به دس دأشتیم، انگورأنَ بیچم اوشأنَ فرعونٚ جامٚ دورون فیچالستم فدَم فرعونٚ دس.»
۱۲ یوسف اونَ بوگفته: «تی خوابٚ تعبیر اَنه: سه‌تأ شاخه، نیشأنه‌یٚ سه روزه. ۱۳ سه روزٚ دیگر فرعون ترَ سربولندَ کونه وأگردأنه بره تی قدیمٚ کارٚ سر. فرعونٚ دربارٚ ساقی بی، شراب دوکونی فدی فرعونٚ دس. ۱۴ وختی کی همه چی تِره بر وفقٚ مراده، مرَ به یاد بأور، مرَ مهربانی بوکون، می سرگذشتَ فرعونٚ‌ره بوگو و اونٚ جَا خوأهش بوکون مرَ اَ زندانٚ جَا آزادَ کونه. ۱۵ چونکی مرَ عبرانیأنٚ سرزیمینٚ جَا به زور بأوردیدی اَیه، مصرٚ سرزیمینٚ دورونم گوناهی نوکودم کی مرَ تأوده‌یید سیاچاله دورون.»
۱۶ وختی کی رئیسٚ نانوایأن ایشنَوه رئیسٚ ساقیأنٚ خوابٚ تعبیر خیر بو، یوسفَ بوگفته: «منم خواب بیدم کی سه‌تأ سبد نان سیفید سر به سر می سرٚ جور نهَه. ۱۷ سبدٚ بوجوری دورون نانٚ شیرینی‌یٚ جورواجوری دوبو فرعونٚ ره، ولی پرنده‌یأن سبدٚ دورون کی می سرٚ جور نهَه‌بو، اوشأنَ خوردن دیبید.»
۱۸ یوسف بوگفته: «تی خوابٚ تعبیر اَنه: سه‌تأ سبد، نیشأنه‌یٚ سه روزه. ۱۹ سه روزٚ دیگر، فرعون تی سرَ وأوینه، ترَ دارٚ جور آویزأنَ کونه، پرنده‌یأنم تی جانٚ گوشتَ خوریدی.»
۲۰ سه روزٚ بعد کی فرعونٚ تولد بو، ایتأ جشن خو تومامٚ خادمأنٚ ره بر پا بوکوده. اون، رئیسٚ ساقیأن و رئیسٚ نانوایأنَ بأورده خو خادمأنٚ جُلُو. ۲۱ رئیسٚ ساقیأنَ اوسه کوده اونٚ قدیمٚ کارٚ سر، کی جامٚ شرابَ فدَه فرعونٚ دس. ۲۲ ولی رئیسٚ نانوایأنَ بوکوشتیدی و دار بزه‌ییدی، هوطو کی یوسف اوشأنٚ‌ره پیشگویی بوکوده‌بو. ۲۳ ولی رئیسٚ ساقیأن یوسفَ به یاد نأورده و اونَ خاطرَ دَه.
Currently Selected:
پیدایش ۴۰: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
