پیدایش ۴۳
۴۳
یوسفٚ برأرأن وأگردیدی مصر
۱ قحطی او سرزیمینٚ دورون بیداد کودی. ۲ پس هرچی گندم کی مصرٚ جَا بأورده‌بید بوخوردیدی. اوشأنٚ پئر، اوشأنَ بوگفته: «وأگردید، بیشید ایپچه آذوقه بیهینید بأورید.»
۳ یهودا خو پئرَ بوگفته: «او مردای اَمرَ گوشزد بوکوده: ‹اگه شیمی کوجه برأر شیمی اَمرأ نبه، نتأنیدی مرَ بیدینید.› ۴ اگه اَمی برأرَ اَمی اَمرأ اوسه کونی، شیمی اویه آذوقه هینیمی. ۵ ولی اگه اونَ اوسه نوکونی، اویه نیشیمی، چونکی او مردای اَمرَ بوگفته: ‹اگه شیمی کوجه برأر شیمی اَمرأ نبه نتأنیدی مرَ بیدینید.›»
۶ ایسرائیل وَورسه: «چره او مردأکَ بوگفتیدی کی ‹ایتأ کوجه برأرم دأریم›، و مرَ اَطو گیرفتارَ کودیدی؟»
۷ اوشأن جواب بدَییدی: «او مردای هَطو تونداتوند اَمأن و اَمی خانواده جَا وأورس وأورس کودی. بوگفته: ‹شیمی پئر، هنوز زنده‌یه؟ برأرٚ دیگری‌یم دأریدی؟› اَمأنم اونٚ سؤالَ جواب بدَییم. اَمأن کی نأنستیم اَمرَ گه: ‹بیشید شیمی کوجه برأرم بأورید اَیه.›»
۸ یهودا بوگفته: «او جوانَ می اَمرأ اوسه کون، اَمأنم فوری رأ دکفیم تا همه‌تأن، من، تو، اَمی زأکأن جٚه گرسنگی نیمیریم و زنده بمأنیم. ۹ من خودم اونٚ سلامتی‌یَ ضمانت کونم. مرَ بیسپر. اگه اونَ نأوردم و ترَ تحویل ندم، اونٚ گوناه تا زنده‌یم دکفه می گردن. ۱۰ اگه زودتر اَمرَ اوسه کوده‌بی، دو دفعه بوشو بیم، وأگردسته بیم.»
۱۱ اوشأنٚ پئر، ایسرائیل اوشأنَ بوگفته: «هسه کی وأ اَطویی ببه، ایپچه اَمی زیمینٚ بهترین محصولاتَ شیمی خورجینأنٚ دورون دوکونید و او مردأکٚ ره پیش‌کش ببرید یَنی ایپچه کندُر و اسفند، ایپچه عسل، ادویه و پسته و بادام. ۱۲ دو برابرم پول شیمی اَمرأ ببرید، اَ پولی‌یم کی شیمی کیسه دورون نهَه‌بو، وأگردأنید. نوکونه کی اوشأن اشتباه بوکوده‌بید. ۱۳ شیمی برأرم شیمی اَمرأ ببرید، ویریزید، بیشید او مردأکٚ ورجه. ۱۴ خودایٚ قادرٚ مطلقم شمرَ او مردأکٚ ورجه لطف و عنایت بوکونه کی بنیامین و شیمی برأرٚ دیگرم آزادَ به. منم اگه قراره می زأکأنَ نیدینم، بده نیدینم.» ۱۵ پس اوشأنم هرچی پیش‌کش بو، دو برابر پولٚ اَمرأ اوسَدیدی، بنیامینٚ اَمرأ بوشوییدی مصر، یوسفٚ ورجه. ۱۶ هَطو کی یوسف بنیامینَ اوشأنٚ اَمرأ بیده، خو خانه پیشکارَ بوگفته: «اَ مردأکأنَ ببر به خانه، ایتأ حیوانٚ سر وَوین و غذا چأکون کی اوشأن می اَمرأ ناهار بوخورید.» ۱۷ پیشکارم هرچی کی یوسف بوگفته‌بو، انجام بدَه، اوشأنَ ببرده یوسفٚ خانه.
۱۸ وختی کی اوشأنَ ببردیدی یوسفٚ خانه دورون، بترسه‌ییدی، کس‌کسَ بوگفتیدی: «اَمرَ بأوردیدی اَیه او پولٚ وسی کی اوّلی دفعه اَمی خورجینأنَ دورون نهَه‌بو، کی وخت بدأرید اَمرَ حمله بوکونید، اَمرَ خوشأنٚ برده چأکونید و اَمی اولاغأنَ صاحاب بیبید.»
جشن یوسفٚ خانه دورون
۱۹ پس یوسفٚ خانه دروازه جُلُو اونٚ پیشکارَ بیده‌ییدی و بوگفتیدی: ۲۰ «آقا، اوّلی دفعه راس راسی بَمو بیم خوراک بیهینیم. ۲۱ وختی فأرسه‌ییم ایستراحتگاه، اَمی خورجینأنَ وأکودیم و هر کسٚ پول اونٚ خورجینٚ دَهنه سر نهَه‌بو. پس اَمی اَمرأ اونَ وأگردأنه‌ییم. ۲۲ پولٚ ویشتری‌یم بأوردیم کی آذوقه بیهینیم؛ نأنیم اَمی پولَ، کی اَمی کیسه دورون بنَه‌بو.»
۲۳ یوسفٚ پیشکارم اوشأنَ بوگفته: «پریشان نیبید، نَوأ ترسئنید. شیمی خودا و شیمی اجدادٚ خودا بو کی ایتأ گنج شیمی خورجینأنٚ دورون بنَه‌بو. گندمأنٚ پولَ کی من فیگیفته‌بوم.» پس بوشو اوشأنٚ برأر شمعونَ بأورده اوشأنٚ ورجه.
۲۴ بعدٚ اونم اوشأنَ ببرده یوسفٚ خانه دورون، آب بأورده و اوشأن خوشأنٚ دس و پایَ بوشوستیدی و علوفَ بأورده اوشأنٚ اولاغأنٚ‌ره. ۲۵ چونکی بیشنَوسته‌بید یوسفٚ اَمرأ ناهار خوریدی، هرچی پیش‌کشی بأورده‌بید دیچه‌ییدی کی وختی یوسف ظهر بخانه اَیه، اونَ تقدیم بوکونید.
۲۶ وختی کی یوسف بَمو بخانه، او پیش‌کشی‌یأنی کی خوشأنٚ اَمرأ دأشتیدی، بأوردیدی اونٚ ورجه خانه دورون، و اونٚ جُلُو سوجده بوکودیدی. ۲۷ یوسف اوشأنٚ اَمرأ احوالپرسی بوکوده، وَورسه: «شیمی پئر چوطو ایسه، او پیرٚ مردأکی کی شومأن درباره‌یٚ اون مرَ بوگفتید؟ هنوز زنده‌یه؟»
۲۸ اوشأن جواب بدَییدی: «شیمی بنده، اَمی پئر زنده‌یه، اونٚ حالم خُبه» و تعظیم و سوجده بوکودیدی.
۲۹ یوسف کی خو برأرٚ تنی بنیامینَ بیده، وَورسه: «هَنه شیمی کوجه برأر کی مرَ بوگفته‌بید؟» و بنیامینَ بوگفته: «پسرم، خودا ترَ برکت بده.» ۳۰ یوسف کی خو برأرٚ دِئنٚ وسی پریشانَ بوسته‌بو، ایتأ خلوتٚ جیگا دونبال گردستی کی بشه اویه گریه بوکونه. بوشو خو اوطاقٚ دورون و گریه بوکوده. ۳۱ وختی یوسف کی خو دیمَ بوشوسته، بَمو بیرون، خورَه جمع‌وجورَ کوده و فرمان بدَه: «ناهار بأورید.»
۳۲ یوسفٚ ره ایتأ سفره‌یٚ جدا دیچه‌بید، اونٚ برأرأنٚ ره ایتأ سفره‌یٚ دیگر و مصریأنٚ ره کی اویه غذا خوردن دیبید، ایتأ سفره‌یٚ دیگر، چونکی مصریأن عبرانیأنٚ اَمرأ غذا خوردنَ مکروه دأنستیدی. ۳۳ یوسفٚ برأرأن سفره سر جٚه پیله برأر تا کوجه برأر تَتَرَج همدیگرٚ ورجه بینیشأنه‌بید و اوشأن هاج و واج همدیگرَ نیگاه کودیدی. ۳۴ وختی کی اوشأنٚ ره یوسفٚ سفره جَا غذا دوکودن دیبید، بنیامینٚ غذایَ پنج برابر ویشتر جٚه اوشأنٚ دیگر دوکودیدی. اوشأنم شاد و خوشحال اونٚ اَمرأ غذا بوخوردیدی.
Currently Selected:
پیدایش ۴۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
