یوحنا ۱۰
۱۰
چوپانٚ خُب
۱ «آمین، آمین، شمرَ گم، کسی کی از در، واردٚ طویله‌یٚ گوسفندأن نبه، بلکی از رایٚ دیگر وارد ببه، دوزد و راهزنه. ۲ امّا اونی کی از در واردَ به، چوپانٚ گوسفندأنه. ۳ دربان، درَ اونٚ‌ره وازَ کونه و گوسفندأن اونٚ آوازَ ایشنَویدی. اون خو گوسفندأنَ به نام دوخوأنه و اوشأنَ بیرون بره. ۴ وختی تومامٚ خو گوسفندأنَ بیرون بره، جولُوتر از اوشأن قدم اوسَنه و گوسفندأن اونَ دونبألسر شیدی، چونکی اونٚ صدایَ شنأسیدی. ۵ امّا هرگز بیگانه دونبألسر نیشیدی، بلکی از اون فرار کونیدی، چونکی اونٚ صدایَ نشنأسیدی.»
۶ عیسی اَ مٚثٚلَ اوشأنٚ‌ره بوگفته، امّا نفهمستیدی کی اوشأنَ چی گفتن دره.
۷ پس ایدفعه دیگر اوشأنَ بوگفته: «آمین، آمین، شمرَ گم، من گوسفندأنٚ‌ره ‹در› ایسم! ۸ اوشأنی کی از من پیشتر بموییدی همگی دوزد و راهزنید، امّا گوسفندأن اوشأنٚ حرفَ گوش نوکودیدی. ۹ من ‹در› ایسم! هر کی از می رأ وارد ببه، نجات پیدا کونه و آزادأنه بودورون اَیه و بیرون شه و چراگاه پیدا کونه. ۱۰ دوزد نأیه، مگر اَنکی دوزدی بوکونه و بوکوشه و نابودَ کونه. من بموم تا اَشأن زندگی‌یٚ اَبدی پیدا بوکونید و از او زندگی‌یٚ اَبدی به فراوانی بهره ببرید!
۱۱ «چوپانٚ خُب من ایسم! چوپانٚ خُب خو جانَ گوسفندأنٚ ره نِهه. ۱۲ کارگر چوپانٚ مأنستن نی‌یه و گوسفندأن اونٚ‌شین نی‌ییدی. هر وخت بیدینه گرگ اَمون دره، گوسفندأنَ ولَ کونه و فرار کونه و گرگ گوسفندأنَ حمله کونه و اوشأنَ پراکنده کونه. ۱۳ کارگر فرار کونه، چره کی کارگره و به فیکرٚ گوسفندأن نی‌یه. ۱۴ چوپانٚ خُب من ایسم! من می گوسفندأنَ شنأسم و می گوسفندأن مرَ شنأسیدی. ۱۵ هوطو کی پئر مرَ شنأسه، منم پئرَ شنأسم. من می جانَ گوسفندأنٚ‌ره نَهم. ۱۶ گوسفندأنٚ دیگری‌یم دأرم کی از اَ طویله نی‌ییدی. اوشأنَ بأید بأورم و اوشأن می صدایَ گوش کونیدی. او وخت ایتأ گله بیدی با ایتأ چوپان. ۱۷ پئر، هَنٚ وسی مرَ دوست دأره کی من می جانَ نَهم تا اونَ پس فیگیرم. ۱۸ هیکس اونَ از من فینگیره، بلکی من به میلٚ خودم اونَ فدم. اختیارشَ دأرم کی فدم و اختیارشَ دأرم کی اونَ پس فیگیرم. اَ حکمَ از می پئر فیگیفتم.»
۱۹ به دلیلٚ اَ حرفأن ایدفعه دیگر یهودیأنٚ میأن اختلاف دکفته. ۲۰ خیلی‌یأن از اوشأن بوگفتیدی: «اون دیوبزه و دیوأنه‌یه. چره اونٚ حرفأنَ گوش کونیدی؟» ۲۱ امّا دیگرأن بوگفتیدی: «اَشأن ایتأ دیوبزه حرفأن نی‌یه. آیا دیو تأنه کورأنٚ چشمأنَ وازَ کونه؟»
یهودیأن عیسایَ به عنوانٚ مسیح قوبیل نوکونیدی
۲۲ زمانٚ برگزاری عیدٚ وقف اورشلیمٚ میأن فأرسه‌بو. زمستان بو ۲۳ و عیسی معبدٚ میأن، اِیوانٚ سلیمانٚ میأن رأ شویی. ۲۴ یهودیأن اونٚ دور جمَ بوستیدی و بوگفتیدی: «تا کی خوأیی اَمرَ شکّه میأن بدأری؟ اگه مسیح ایسی، اَمرَ آشکارا بوگو.»
۲۵ عیسی جواب بده: «شمرَ بوگفتم، امّا باور نوکونیدی. کارأیی کی من به نامٚ می پئر کونم، مرَ شهادت دیهیدی. ۲۶ امّا شومأن ایمأن نأوریدی، چونکی از می گوسفندأن نی‌ییدی. ۲۷ می گوسفندأن، می صدایَ گوش کونیدی. من اوشأنَ شنأسم و اوشأن می دونبأل اَییدی. ۲۸ من اوشأنَ زندگی‌یٚ اَبدی بخشم و یقیناً هرگز هلاکَ نیبیدی و کسی اوشأنَ از می دس نتأنه بدوزده. ۲۹ می پئر کی اوشأنَ مرَ ببخشه، از همه پیله‌تره و هیکس نتأنه اوشأنَ از می پئرٚ دس بدوزأنه. ۳۰ من و پئر ایتأییم.»
۳۱ او وخت ایدفعه دیگر یهودیأن سنگ اوسَدیدی تا اونَ سنگسارَ کونید. ۳۲ عیسی اوشأنَ بوگفته: «کارأیٚ خُبٚ زیادی از می پئر شمرَ نیشأن بدم، بخاطرٚ کویتأ خوأییدی مرَ سنگسارَ کونید؟»
۳۳ جواب بدَه‌ییدی: «بخاطرٚ کارٚ خُب نی‌یه کی ترَ سنگسار کونیم، بلکی بخاطرٚ اَنکی کفر گی. چونکی اینسانی و خودتَ خودا خوأنی!»
۳۴ عیسی اوشأنَ بوگفته: «مگر در شیمی تورات نمو کی خودا بوگفته، شومأن خودایأنید؟ #۱۰:۳۴ تورات، کیتابٚ مزمور، بابٚ ۸۲، آیه ۶. ۳۵ هیچ قسمتی از کیتابٚ موقدّس از اعتبار ساقطَ نیبه. اگه اوشأنی کی کلامٚ خودا اوشأنَ فأرسه، خودایأن خوأنده بیبید، ۳۶ چوطو تأنیدی کسی‌یَ کی پئر اونَ وقف بوکوده و به دونیا اوسه کوده، بیگید کی: ‹کفر گه،› تنها به اَ خاطر کی بوگفتم خودا پسرم؟ ۳۷ اگه می پئرٚ کارأنَ بجا نأورم، می کلامَ باور نوکونید. ۳۸ امّا اگه بجا اَورم، حتی اگه می کلامَ باور نأریدی، دسته کم به اونٚ کارأن ایمأن بأورید تا بدأنید و باور بدأرید کی پئر در منه و من در پئر.» ۳۹ او وخت ایدفعه دیگر خوأستیدی کی اونَ گیرفتارَ کونید، ولی از اوشأنٚ دس در بوشو.
۴۰ بعد از اون، عیسی به او طرفٚ رودٚ اردن، اویه کی یحیی قبلاً تعمید دَیی، بوشو و اویه بِیسه. ۴۱ خیلی‌یأن عیسی ورجه بموییدی. اوشأن گفتیدی: «هرچند کی یحیی هیچ معجزه‌یی نوکوده، ولی هر اونچی کی درباره‌یٚ اَ شخص بوگفته، حقیقت دأشتی.» ۴۲ پس خیلی‌یأن اویه به عیسی ایمأن بأوردیدی.
Currently Selected:
یوحنا ۱۰: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
