یوحنا ۱۱
۱۱
ایلعازرٚ مردن
۱ مردی ایلعازر نام مریض بو. اون از مردومأنٚ بیت‌عَنْیا بو، دِهی کی مریم و اونٚ خأخور مارتا اویه‌شین بید. ۲ مریم او زنی بو کی عیسی پایأنَ معطر بوکوده و خو گیسٚ اَمرأ اونَ خوشکَ کوده. اونٚ برأر ایلعازر مریضَ بوسته‌بو. ۳ پس ایلعازرٚ خأخورأن، عیسی‌ره پیغام بدَه‌ییدی و بوگفتیدی: «اَی سرور، تی دوستٚ عزیز مریضه.»
۴ عیسی وختی اَ خبرَ بیشنَوسته بوگفته: «اَ مریضی مرگٚ اَمرأ به آخر نرسه، بلکی خودا جلالٚ وستی‌یه، تا خودا پسر، توسطٚ اونٚ مریضی جلال پیدا بوکونه.» ۵ عیسی مارتا و اونٚ خأخور و ایلعازَرَ دوست دأشتی. ۶ پس وختی بیشنَوسته کی ایلعازر مریضه، دو روزٚ دیگرم در جایی کی ایسَه‌بو، بِیسه.
۷ بعد از اون، خو شاگردأنَ بوگفته: «بأیید بازم به یهودیه بیشیم.»
۸ اونٚ شاگردأن بوگفتیدی: «اوستاد، چند روزٚ پیش بو کی یهودیأن خوأستیدی ترَ سنگسارَ کونید، تو بازم خوأیی اویه بیشی؟»
۹ عیسی جواب بدَه: «مگر هر روز دوازده ساعت نی‌یه؟ اونی کی در روز رأ شه لغزش نوخوره، چونکی نورٚ اَ دنیایَ دینه. ۱۰ امّا اونی کی در شب رأ شه لغزش خوره، چونکی نوری نأره.» ۱۱ بعد از اَ حرفأن، اوشأنَ بوگفته: «اَمی رِفَق ایلعازر خوفته، امّا شوئون درم تا اونَ بیدارَ کونم.»
۱۲ پس شاگردأن اونَ بوگفتیدی: «اَی سرور، اگه خوفته، خوره خوره خُب به.» ۱۳ امّا عیسی از اونٚ مرگ حرف زه‌یی، در حالی کی اونٚ شاگردأن فیکر کودیدی کی گه اون خوفته.
۱۴ او وخت عیسی آشکارا اوشأنَ بوگفته: «ایلعازر بمرده. ۱۵ شیمی وستی خوشحالم کی اویه نِیسه‌بوم، تا ایمأن بأورید. امّا الأن اونٚ ورجه بیشیم.»
۱۶ پس توما کی به دوقولو معروف بو، شاگردأنَ بوگفته: «بأیید اَمأنم بیشیم و اونٚ اَمرأ بیمیریم.»
عیسی، قیامت و حیاته
۱۷ وختی عیسی اویه فأرسه، بفهمسته کی چار روزه ایلعازَرَ قبرٚ میأن بنَه‌ییدی. ۱۸ بیت‌عَنْیا حدوداً سه کیلومتر اورشلیمٚ اَمرأ فاصله دأشتی. ۱۹ یهودیأنٚ زیادی مریم و مارتا ورجه بمو بید تا اوشأنَ بخاطرٚ مرگٚ ایلعازر تسلی بدید. ۲۰ پس وختی مارتا بیشنَوسته کی عیسی اویه اَمون دره، اونٚ استقبال بوشو. امّا مریم خانه میأن بِیسه. ۲۱ مارتا عیسایَ بوگفته: «اَی سرور، اگه اَیه بِیسه بی، می برأر نَمردی! ۲۲ امّا دأنم کی الأن اگه هر چی از خودا بخوأیی، ترَ فده.»
۲۳ عیسی اونَ بوگفته: «تی برأر زندَه به.»
۲۴ مارتا اونَ بوگفته: «دأنم کی در روزٚ قیامت زندَه به.»
۲۵ عیسی بوگفته: «قیامت و حیات من ایسم. اونی کی مرَ ایمأن بأوره، حتی اگه بیمیره بازم زندَه به. ۲۶ و هر کی زنده‌یه و مرَ ایمأن دأره، یقیناً تا اَبد نیمیره. تو می گبأنَ باور کونی؟»
۲۷ مارتا بوگفته: «بله، اَی سرور، من ایمأن دأرم کی تو ایسی مسیح، خودا پسر، اونی کی بأید به جهان بمو بی.»
۲۸ اَنَ بوگفته و بوشو خو خأخور مریمَ دوخوأده و خلوتی اونَ بوگفته: «اوستاد اَیه ایسه و ترَ دوخوأنه.» ۲۹ مریم وختی اَنَ بیشنَوسته، بدونٚ معطلی ویریشته و اونٚ ورجه بوشو. ۳۰ عیسی هنوز واردٚ دهکده نوبوسته‌بو، بلکی جایی ایسَه‌بو کی مارتا اونَ مولاقات بوکوده‌بو. ۳۱ یهودیأنی کی مریمٚ اَمرأ خانه میأن ایسَه‌بید و اونَ تسلی دَییدی، وختی بیده‌ییدی کی مریم عجله اَمرأ ویریشته و بیرون بوشو، اونَ دونبألسر بوشوییدی، فیکر کودیدی کی قبرٚ سر شوئون دره تا اویه گریه و زاری بوکونه. ۳۲ وختی مریم اویه فأرسه کی عیسی ایسَه‌بو، اونَ بیده و اونٚ پا جیر بکفته و بوگفته: «اَی سرور، اگه اَیه بِیسه بی، می برأر نَمردی!» ۳۳ وختی عیسی، گریه و زاریٚ مریم و یهودیأنی کی اونٚ اَمرأ همرأه بید، بیده، اونٚ روح آشفته و سخت منقلبَ بوسته. ۳۴ وَورسه: «اونَ کویه بنَه‌ییدی؟»
بوگفتید: «اَی سرور، بیأ و بیدین.» ۳۵ عیسی گریه بوکوده. ۳۶ پس یهودیأن بوگفتیدی: «بیدینید چقدر اونَ دوست دأشتی.» ۳۷ امّا بعضی‌یأن بوگفتیدی: «آیا کسی کی او مردٚ کورٚ چشمأنَ بینا بوکوده، نتأنستی ایلعازرٚ مرگَ جولوی بیگیره؟»
ایلعازرٚ زندَه بوستن
۳۸ بعد از اون، عیسی، در حالی کی باز آشفته بو، قبرٚ سر بمو. قبر، غاری بو کی اونٚ دهأنٚ رو سنگی بنَه بید. ۳۹ بفرمأسته: «سنگَ اوسَنید.»
مارتا، ايلعازرٚ خأخور بوگفته: «اَی سرور، الأن دِه بویٚ بد دهه، چونکی چار روز بوگوذشته.»
۴۰ عیسی اونَ بوگفته: «مگر ترَ نوگفتم کی اگه ایمأن بأوری، خودا جلالَ دینی؟» ۴۱ پس سنگَ اوسَدیدی. او وخت عیسی آسمانَ نیگاه بوکوده و بوگفته: «پئر، ترَ شکر کونم کی مرَ بیشنَوستی. ۴۲ من دأنستیم کی همیشه مرَ ایشنَوی. امّا اَنَ کسأنی وستی بوگفتم کی در اَیه ایسَه‌ییدی، تا ایمأن بأورید کی تو مرَ اوسه کودی.» ۴۳ اَنَ بوگفته و بعد از اَن، صدایٚ بلندٚ اَمرأ دوخوأده: «ایلعازر، بیرون بیأ!» ۴۴ پس او میّت کی اونٚ دس و پایَ کفنٚ اَمرأ دوٚسته بید و اونٚ صورتَ ایتأ دستمالٚ اَمرأ بپوشأنه بید، بیرون بمو. عیسی اوشأنَ بوگفته: «اونَ وازَ کونید و وئلید بشه.»
عیسی قتلٚ توطئه
۴۵ پس خیلی از یهودیأنی کی به دِئنٚ مریم بمو بید و عیسی کارَ بیده بید، اونَ ایمأن بأوردیدی. ۴۶ امّا بعضی‌یأن بوشوییدی فریسیأنٚ ورجه و اوشأنَ از اونچی کی عیسی بوکوده‌بو، خبر بدَه‌ییدی. ۴۷ پس پیله کاهنأن و فریسیأن بینیشتیدی و مشورت بوکودیدی. بوگفتیدی: «چی بوکونیم؟ اَ مرد معجزاتٚ زیادی ظاهرَ کونه. ۴۸ اگه وئلیم اون، هوطو پیش بشه، همه به اون ایمأن اَوریدی و رومیأن اَییدی و اَ مکانَ و اَ قومَ از اَمی دس بیرون اَوریدی.»
۴۹ امّا ایتأ از اوشأن کی اونٚ نام قیافا و در او سال کاهنٚ اعظم بو، دیگرأنَ بوگفته: «شومأن هیچی نأنیدی. ۵۰ فیکر نوکونید صلاح اَنَ کی اینفر قومٚ وستی بیمیره، تا اَنکی تومامٚ مردوم نابودَ بید.» ۵۱ امّا اَ حرف از خودش نوبو، بلکی چون در او سال اون کاهنٚ اعظم بو اَطو نبوّت بوکوده کی عیسی قومٚ وستی میره، ۵۲ نه تنها قومٚ وستی، بلکی برای جمَ کودن و ایتأ بوستنٚ خودا زأکأن کی پراکنده‌ییدی. ۵۳ بعد از او روز، اونٚ قتلٚ توطئه‌یَ دیچه‌ییدی.
۵۴ از اون به بعد، عیسی آشکارا دِه یهودیأنٚ میأن رفت و آمد نوکودی، بلکی به شهری کی اونٚ نام اِفرایم بو در ناحیه‌یی نزدیکٚ بیابان بوشو و خو شاگردأنٚ اَمرأ اویه بِیسه.
۵۵ وختی یهودیأنٚ عیدٚ پِسَخ نزدیکَ بوسته، عده زیادی از جاهایٚ مختلف به اورشلیم بوشوییدی تا رسمٚ تطهیر کودنٚ قبل از پِسَخَ بجا بأورید. ۵۶ اوشأن به دونبأل عیسی بید، وختی معبدٚ صحنٚ میأن ایسَه‌بید، همدیگرَ گفتیدی: «چی فیکر کونیدی؟ آیا اصلاً عیدٚ‌ره نأیه؟» ۵۷ امّا پیله کاهنأن و فریسیأن دستور بدَه بید کی هر وخت کسی بدأنه عیسی کویه ایسه، خبر بده تا اونَ دسگیر بوکونید.
Currently Selected:
یوحنا ۱۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
