یوحنا ۱۶

۱۶

۱ «اَ چیزأنَ شمرَ بوگفتم تا از رأ بدرَ نیبید! ۲ شمرَ از کنیسه‌یأن بیرونَ کونیدی. حتی زمانی فأرسه کی هر کی شمرَ بوکوشه، فیکر کونه کی خودایَ خدمت بوکوده. ۳ اَ کارأنَ کونیدی، چونکی نه پئرَ شنأسیدی نه مرَ! ۴ اَ حرفأنَ شمرَ بوگفتم تا وختی اونٚ انجام فأرسه، به یاد بأورید کی شمرَ آگاه بوکوده‌بوم. اوشأنَ از اوّل شمرَ نوگفتم، چونکی خودم شیمی اَمرأ بوم.

تعلیم درباره‌یٚ روحٚ خودا

۵ «الأن کسی کی مرَ اوسه کوده اونٚ ورجه شوئون درم و هیچ‌کدام ونَورسیدی ‹کویه شوئون دری؟› ۶ امّا می حرفأنٚ وستی شیمی دیل پور از غم بوبوسته. ۷ با اَ حال من شمرَ حقیقتَ گم کی می شوئون به نفعٚ شومأنه، چونکی اگه نشم، او پشتیبان شیمی ورجه نأیه، امّا اگه بشم، اونَ شیمی ورجه اوسه کونم. ۸ و وختی اَیه، جهانَ از اونٚ گوناه، و از عیدالتٚ خوداوند، و از روزٚ داوری آگاه کونه. ۹ گناهٚ جهان، بی‌ایمانی به منه. ۱۰ عیدالت فراهمه، چونکی من پئرٚ ورجه شوئون درم و دِه مرَ نیدینیدی. ۱۱ داوری اَیه چونکی رئیسٚ اَ جهان داوری بوبوسته.

۱۲ «خیلی چیزأنٚ دیگر دأرم کی شمرَ بگم، امّا الأن طاقتٚ اونٚ ایشنَوستنَ نأریدی. ۱۳ امّا وختی روحٚ راستی#۱۶‏:۱۳ روجوع ببه به بابٚ ۱۴، آیه ۱۶ بأیه، شمرَ به طرفٚ حقیقت هیدایت کونه. چونکی اون از طرفٚ خودش حرفی نزنه، بلکی اونچی‌یَ کی ایشنَوه، گه، و اونچی‌یَ کی پیش اَیه، شمرَ خبر دهه. ۱۴ اون مرَ جلال دهه، چونکی اونچی‌یَ کی از من فیگیره، شمرَ خبر دهه. ۱۵ هر چیزی کی پئرٚشینه، می‌شینم ایسه. هَنٚ وسی بوگفتم کی اونچی‌یَ کی از من فیگیره، شمرَ خبر دهه.

عیسی خو شاگردأنَ تسلی دهه

۱۶ «پس از مدتٚ کمی، دِه مرَ نیدینیدی، بعد از مدتٚ کمٚ دیگری بازم مرَ دینیدی.»

۱۷ او وخت بعضی از اونٚ شاگردأن همدیگرَ بوگفتیدی: «اونٚ منظور از اَ حرفأن چی‌یه کی: ‹پس از مدتٚ کمی، دِه مرَ نیدینیدی و پس از مدتٚ کمٚ دیگری بازم مرَ دینیدی›؟ یا اَنکی گه ‹چونکی پئرٚ ورجه شوئون درم›؟» ۱۸ پس همدیگرَ گفتیدی: «اَ ‹مدتٚ کمی› کی گه، چی‌یه؟ اونٚ منظورَ نفهمیم؟»

۱۹ امّا عیسی قبلاً دأنستی کی خوأییدی از اون سؤال بوکونید؛ پس اوشأنَ بوگفته: «آیا اَنٚ وستی همدیگرٚ اَمرأ بحث کونیدی کی بوگفتم ‹پس از مدتٚ کمی، دِه مرَ نیدینیدی، و پس از مدتٚ کمٚ دیگری بازم مرَ دینیدی؟› ۲۰ آمین، آمین، شمرَ گم، شومأن گریه و زاری کونیدی امّا دونیا خوشحالَ به. شومأن غمگینَ بیدی، امّا شیمی غم به شادی تبدیلَ به. ۲۱ زن تا وختٚ زأیمأن درد کشه، چونکی اونٚ وخت فأرسه. امّا وختی کی اونٚ زأی به دونیا بمو، دِه خو دردَ به یاد نأوره، چونکی خوشحاله از اَنکی اینسانی به دونیا بمو. ۲۲ هَطو کی شومأنم الأن غمگینیدی، امّا بازم شمرَ دینم کی شیمی دیل شادَ به و هیکس او شادی‌یَ از شومأن فینگیره. ۲۳ او روز دِه چیزی از من نخوأییدی. آمین، آمین، شمرَ گم، هر چی از پئر به نامٚ من بخوأیید، اونَ شمرَ فده. ۲۴ تا الأن به نامٚ من چیزی نخوأستیدی. بخوأیید تا پیدا بوکونید و شیمی شادی کاملَ به.

۲۵ «اَ چیزأنَ مَثَلٚ اَمرأ شمرَ بوگفتم، امّا زمانی فأرسه کی، دِه شیمی اَمرأ اَجور حرف نزنم، بلکی آشکارا در موردٚ پئر شمرَ گم. ۲۶ او روز به نامٚ من تقاضا کونیدی و شمرَ نگم کی من از طرفٚ شومأن از پئر تقاضا کونم. ۲۷ چره کی پئر خودش شمرَ دوست دأره، چونکی شومأن مرَ دوست دأشتیدی و ایمأن بأوردیدی کی از خودا ورجه بموم. ۲۸ من از پئرٚ ورجه بموم و به اَ دونیا واردَ بوستم، و الأن اَ دونیایَ ترکَ کونم و پئرٚ ورجه شم.»

۲۹ او وخت اونٚ شاگردأن بوگفتیدی: «الأن آشکارا حرف زنی، نه مَثَلٚ اَمرأ. ۳۰ الأن دِه دأنیم کی از همه چیز آگاهی و حتی احتیاج نأری کسی خو سؤالَ تی اَمرأ در میأن بنه. هَنٚ وسی ایمأن دأریم کی از خودا ورجه بمویی.»

۳۱ عیسی اوشأنَ بوگفته: «آیا الأن واقعاً ایمأن دأریدی؟ ۳۲ ولی زمانی فأرسه کی، و حقیقتاً الأن فأرسه کی پخشَ بیدی و هر کی خو خانه و زندگی سر شه و مرَ تنها نَهه. ولی من تنها نی‌یم، چونکی پئر می اَمرأ‌یه. ۳۳ اَ چیزأنَ شمرَ بوگفتم تا در من آرامش بدأرید، دونیا میأن شومأن به زحمت دکفیدی؛ ولی شیمی دیل قوی ببه، چونکی من بر دونیا غلبه بوکودم.»

Currently Selected:

یوحنا ۱۶: گیلکی (رشتی)

Highlight

Copy