Icitendekelo 22

Lesa aesha icisumino cakwa Abrahamu

1 # Bahi 11:17-19 Nomba panuma ya ifi fintu, Lesa aeseshe Abrahamu. Lesa amwitile ati, “Abrahamu!” Abrahamu nao ayasuka ati, “Epo ndi!” 2#2 Imila 3:1Elyo Lesa amweba ati, “Buula mwano, umwana obe umo mpo, Isaki, uo watemwa, uye ku citungu ca Moriya. Uli nokuya muleka nge lambo lyakoca kulya kwine pa lupili lumo ulo nkakulanga.”

3Ilyo bwaishileca, lucelocelofye, Abrahamu ateyenye punda wakwe. Elyo abuula ababomfi bakwe babili na mwane Isaki. Ilyo aputaula inkuni ishingalinga ukocela ilambo, elyo aima alaya na ku ncende Lesa amulangilile. 4Pa bushiku bwalenga shitatu, Abrahamu alinwine amenso amona ilya ncende bamulangilile apatali. 5Elyo Abrahamu aebele ababomfi bakwe ati, “Imwe shaleni pano na punda. Ine no mwaice twaya kulya, tuye pepa elyo tulebwelela kuno kwine.”

6Abrahamu abuula inkuni shakocela ilambo, atwika na mwane Isaki. Umwine ena asenda umulilo no mwele. Kabili bonse babili baima balaya. 7Isaki elyo aipusha wishi Abrahamu ati, “Tata!” Abrahamu ayasuka ati, “Ni shani mwana wandi?” Isaki amweba ati, “Umulilo ne nkuni fyena epo fili, nga nomba umwana wa mpaanga uwakuleka ilambo lyakoca ali kwi?” 8Abrahamu amwasuka ati, “Mwana wandi, Lesa umwine aletupeela umwana wa mpaanga uwakuleka ilambo lyakoca.” Bonse babili bakonkanyapo ukulaya.

9 # Yako 2:21 Cilya bafika ku ncende Lesa amulangilile, Abrahamu akuulapo ubulambo, abikapo ne nkuni bwino bwino. Elyo akaka mwane Isaki, amulalika na pa mulu wa nkuni pa bulambo. 10Elyo afungulula ukuboko, abuula umwele pakuti epaye mwane. 11Lelo malaika wakwa Yawe amwita ukufuma ku mulu ati, “Abrahamu, Abrahamu!” Abrahamu ayasuka ati, “Epo ndi!” 12Malaika amweba ati, “Wiyipaya mwaice, wimucita nelyo cimo. Nomba naishiba ukuti walikwatila Lesa akatiina, pantu taukene ukundekela mwano, nao uwabafye umo mpo.” 13Abrahamu ati acebukile kunuma, amona sukusuku naikatwa ku nsengo mwiteshi, eko alungama aya mubuula, eo alekela Lesa ilambo lyakoca pa malo yakwa mwane. 14Kanshi Abrahamu epakwinika ilya ncende ishina ilyakuti, “Yawe alapeela.” Eico ukufika na lelo bapetila abati, “Pa lupili lwakwa Yawe alapeela.”

15Kabili malaika wakwa Yawe aita Abrahamu ukufuma ku mulu umuku wabubili, 16#Bahi 6:13-14amweba ati, “Yawe asosa ati, nalapa napo ndi, apo wacita ici cintu, taukene kundekela mwano, uwabafye umo mpo, 17cine cinefye nkakupaala. Nkasandulula aba mu lupwa lobe, bakafula kwati ni ntanda sha mu mulu, kabili kwati musensenga wa pa lulamba lwa bemba. Aba mu lupwa lobe bakacimfya no kupoka imisumba ya balwani babo. 18#Imili 3:25Pantu iwe naubeela amashiwi yandi, imishobo yonse pano calo ikapaalilwa mu bufyashi bobe.” 19Elyo Abrahamu abwelela ku babomfi bakwe, bonse pamo babwelelamo ku Beresheba no kwikala eko aisa ikala.

Abana baume bakwa Naho

20Panuma ya ifi fintu, Abrahamu aumfwile amashiwi yakuti, “Milika alikwata abana abaume kuli munonko Naho. 21Usi e beli, uwakonkapo ni Busi, elyo ni Kemueli wishi wakwa Aramu, 22elyo ni Kesedi, Haso, Pilidashi, Yidilafu na Betueli.” 23Uyu Betueli e wishi wakwa Rebeka. Aba bana abaume cine konse konse, e bana Milika afyele kuli Naho munyina kwa Abrahamu. 24Elyo muli Reuma umukashi wakwe uo ashaupile mu bwinga, Naho afyelemo abana abaume, Teba, Gahamu, Tahashi na Maaka.

Currently Selected:

Icitendekelo 22: ILL15

Highlight

Copy