JOHN 8
8
Asdzání adiléego hadeel'į́į́'
1Jesus t'éiyá Dził Álivz bighą́ą́'góó dashdiiyá. 2Áádóó t'áá íiyisí t'ah abínígo kin bii' sohodizin bił haz'ą́ą́ góne' yah anáádzoodzáago, diné t'áá ałtso haa áłah silį́į́', áko dzineezdáago nazneeztą́ą́'. 3Nít'éé' bee haz'áanii yínda'niłtinii índa Férisii danilíinii asdzání ła' adiléé lágo yik'ídaaskaigo Jesus yaa deizlóóz, áko diné biníi'gi dah hoosį'go, 4Jesus ádeidííniid, Na'nitiní, díí asdzání adiléé lágo habi'deel'į́į́'. 5Ákódaat'ínígíí bił nidadziilne' doo biniyé bee haz'áanii biyi' Mózes yee haadzíi' ni'.#Lev. 20:10; Deut. 22:22-24. Nidi nishą' ha'át'éego bá hadíídzih? 6Díí hákada'iiłhilgo binahjį' hak'i dahodidoo'ááł biniyé ádahodííniid. Nidi Jesus yaa ádziidzaago doo baa ná'áhozhdílt'į́į́góó hála' bee łeeshtahgi ni'dzizoh. 7Áko t'ah nidahódíłkidgo, de ádziidzaago ábizhdííniid, T'áá háiida nihitahgi ts'ídá t'ah doo ádił iisiihii éí háni'dii átsé tsé bee díí asdzání nízhdidoołniił. 8Áko yaa ánáádziidzaago hála' bee łeeshtahgi nináá'dzízoh. 9Nidi asdzání yik'i dahodii'ánígíí éidíígíí deidiizts'ą́ą'go, ádił nida'iisíi'ii yee ádaa ákodaniidzį́į'go t'ááłá'í nítínígo t'áá ałkéé' ch'éheeskai, aląąjį' nidaakaígíí átsé, akéédę́ę́' nidaakaígíí bee nihoolzhiizh, áko Jesus t'áá sáhí dzizlį́į'go, asdzání t'éí hadááhdę́ę́' sizį́. 10Áádóó Jesus de ádzaago éí asdzání yik'i nághalgo áyidííniid, Asdzání, nik'i dahodii'ah yę́ęshą' háájí? Da' dinéésh doo ła' atínidi'doolníiłgo yee ná haadzíi' da? 11Áko ábijiní, Doo ła' da, Bóhólníihii. Nít'éé' Jesus ánááhodoo'niid, Shí ałdó' nidi'yoolyéełgo doo bee ná hadeesdzih da; nílááh náádááł, t'áadoo bąąhági ánáánít'íní.]
Jesus éí nihokáá' dine'é bá adizhníłdíín
12Nít'éé' Jesus éí diné yich'į' hanáánáádzíi'go áyidííniid, Nihokáá' dine'é bá adinídíín nishłį́;#Mt. 5:14; Jn. 9:5. t'áá háiida shikéé' joogáłígíí éí doo chahałheełgóó nináájídáa da doo, nidi iiná bee adinídíinii hwee hólǫ́ǫ dooleeł. 13Éí bąą Férisii danilíinii ádahodííniid, T'áá ni ádaa hólne', áko hólne'ígíí doo t'áá aaníi da.#Jn. 5:31. 14Jesus ánááhodoo'niid, Azhą́ shį́į́ t'áá shí ádaa hashne' nidi, hashne'ígíí éí t'áá aaníí, háálá níyáádę́ę́' índa déyáágóó shił bééhózin, nidi nihí éí níyáádę́ę́' índa déyáágóó doo nihił béédahózin da. 15Nihí ats'íís k'ehgo t'éiyá ándahoyoh'aah, shí éí diné doo ła' bá nihwiish'aah da. 16Ákondi ánihwiish'aah ládą́ą́', bee ánihwiish'aahii éí t'áá aaníí, háálá doo t'áá sáhí ánihwiish'aah da, nidi shí áádóó aTaa' shiníł'a'ii biłgo t'éiyá. 17Bee nihá nahaz'áanii biyi'dóó bee ak'e'ashchį́, diné nidilt'éego oo'íinii nilį́įgo aheełt'éego halne'go éí t'áá aaníí;#Deut. 19:15. 18shí t'áá shí ádaa hashne', áádóó aTaa' shiníł'a'ii ałdó' shaa halne'. 19Áko ádahodííniid, Háadishą' niTaa'? Jesus ánáádoo'niid, Shí nidi doo shéédahonohsin da, shiTaa' ałdó' doo béédahonohsin da; shéédahonohsingo t'éiyá shiTaa' ałdó' béédahonohsin doo nít'éé'. 20Kin bii' sohodizin bił haz'ą́ą́ góne' béeso ahi'níiłgi na'nitingo díí saadígíí Jesus yee haadzíí', nidi ła'da doo hoołtsoodí da, háálá t'ah doo áajį' há ahalzhíish da.
Déyáágóó doo dadohkááh át'ée da
21Jesus ánááhodoo'niid, Shí k'ad dah diishááh, áko nihí hadashinohtáa dooleeł, ákondi t'áá ádił da'íínółzíihgo dadínóohnééł; déyáágóó doo dadohkááh át'ée da. 22Áko Jew dine'é ádadííniid, Da' ázhdiyoolyééłísh, háálá, Déyáágóó doo dadohkááh át'ée da, jiní? 23Áádóó ábizhdííniid, Nihí nihokáá'dóó nidaahkai, shí t'éiyá wót'ááhdę́ę́' naashá; nihí nahasdzáán bits'ą́ą́dóó dahosoolį́į́', shí doo nahasdzáán bits'ą́ą́dóó hosélį́į' da. 24Éí bąą ánihidííniid ni', T'áá ádił da'íínółzíihgo dadínóohnééł, háálá shí Christ ásht'į́įgo#Ex. 3:14. doo deinohdlą́ą́góogo t'áá ádił da'íínółzíihgo dadínóohnééł. 25Áko ádahodííniid, Háishą' ánít'į́? Jesus ánááhodoo'niid, Ts'ídá átséédą́ą́' nihił hweeshne'ígíí t'áá éí ásht'į́. 26Lą'ígóó bee nihich'į' hahideesdzihii áádóó bee nihaa nídéesht'įįłii hólǫ́, nidi shiníł'a'ígíí éí t'áá aaníinii nilį́, áko bits'ą́ą́dóó diséts'ą́ą'ii nihokáá' dine'é bee bił hashne'. 27ATaa' baa yájíłti'go t'áadoo yik'ida'diitą́ą da. 28Áko Jesus áhodííniid, Diné Silį́į'ii dah dahidoołt'e'go índa, shí t'áá éí ásht'į́įgo nihił béédahodoozįįł, áádóó doo t'áá shí shóhólníihgo ha'át'íhída baa naasháa da, nidi shiTaa' yee nashineeztą́'ígi át'éego díí bee yáshti'. 29Shiníł'a'ígíí éí shił hólǫ́; aTaa' doo t'áá shízhání shi'níłnii' da, háálá bił hóshónígíí t'éí t'áá áłahjį' baa naashá. 30Díí saad bee hadzoodzíi'go lą'í dahoosdląąd.
T'áá aaníinii nihéédeididoochił
31Áko Jesus éí Jew dine'é dahoosdląądígíí ábizhdííniid, Shizaad bik'eh wohkahgo t'éiyá t'áá aaníí shídahooł'aahii dadoohłeeł, 32áko t'áá aaníinii nihił béédahodoozįįł, índa t'áá aaníinii nihéédeididoochił. 33Áádóó ánáádahodoo'niid, Nihí Éíbraham bits'ą́ą́dóó da'ahílchíihii daniidlį́,#Mt. 3:9; Lk. 3:8. áko ts'ídá t'áadoo diné ła' binaalte' dasiidlį́į' da. Ákoshą' ha'át'éego, Nihéédadidoochił, diní?
34Nít'éé' Jesus ánááhodoo'niid, T'áá aaníí, t'áá aaníígóó ánihidishní, T'áá háiida bąąhági ááníiłii t'áá éí bąąhági át'éii binaalte' jílį́. 35Jó, naalte' doo hool'áágóó a'ałk'ee sidáa da, nidi aYe' t'éiyá hool'áágóó hólǫ́. 36Éí bąą aYe' nihéédeideezhchidgo, t'áá aaníí nihéédadeeshchid doo. 37Éíbraham bits'ą́ą́dóó da'ahílchíihii danohłį́įgo shił bééhózin, ákondi dahodiyiilyééł dashíínóh'ní, háálá shizaad nihiyi'di doo bá nahosooł'ą́ą da. 38ShiTaa' bił honishłǫ́ǫ́dą́ą́' yiiłtsánígíí t'áá éí bee yáshti', nihí ałdó' danihizhé'é bits'ą́ą́dóó dasidoots'ą́'ígíí t'éí baohkah.
Níłch'i bida'iiníziinii binanit'a'í danihizhé'é át'é
39Áko hanáádaasdzíi'go ádahodííniid, Éíbraham éí danihizhé'é nít'éé'. Jesus ánááhodoo'niid, Éíbraham ba'áłchíní danohłį́įgo la', Éíbraham yaa naayáhígíí baa naahkai doo nít'éé'. 40Diyin God bits'ą́ą́dę́ę́' t'áá aaníinii diséts'ą́'ígíí t'éiyá bee nihił hweeshne', nidi k'ad dahodiyiilyééł dashíínóh'ní. Éíbraham éí doo ákódzaa da. 41Nihí nihizhé'é yaa naagháhígíí baa nidaahkai. Áko ádahodííniid, Nihí doo adilyé bee danihi'dizhchį́į da,#8:41 Nihí doo wotashki' daniidlį́į da, jiníigo óolyé. áko nihiTaa' t'ááłá'í, éí Diyin God. 42Nít'éé' Jesus áhodííniid, Diyin God nihiTaa'go la', ayóó'ádashíínóh'níi doo nít'éé', háálá Diyin God bits'ą́ą́dę́ę́' níyá; doo t'áá shíniik'eh níyáa da, nidi bí shiníł'a'. 43Hait'éegoshą' yáshti'ígíí doo bik'ida'doohtįįh da? Jó, t'áá íiyisí doo t'áá k'ad shizaad dasidoots'ą́ą' daígíí bee át'é. 44Níłch'i bida'iiníziinii binanit'a'í danihizhé'é át'é, éí bits'ą́ą́dę́ę́' dahosoolį́į́', éí nihizhé'é nilíinii laanaa nízinígíí t'éí bida'oł'į́. Éíyee' hodeeyáádę́ę́' diné neiłtseedii nilį́, áko t'áá aaníinii doo ádíidéélt'i' da, háálá t'áá aaníinii bii' ádin. Biyooch'íidgo t'áá bí át'éii yee ádaa yálti', háálá biyooch'íidii nilį́, áádóó wooch'ííd yizhé'é nilį́. 45Nidi t'áá aaníinii bee nihił hashne'go bąą, doo dashoohdlą́ą da. 46Nihitahdóoshą' háí bąąhági át'éii yee shik'íhodoo'ah? T'áá aaníinii bee nihił nahashne'go, hait'éegoshą' doo dashiinohdlą́ą da? 47T'áá háiida Diyin God bits'ą́ą́dę́ę́' ájít'ínígíí éí Diyin God bizaad jidiits'a', nidi nihí doo dayíísółts'ą́ą' da, háálá doo Diyin God bits'ą́ą́dę́ę́' ádaaht'į́į da.
Éíbraham t'áá bítséedi honishłǫ́
48Áko Jew dine'é ánáádahodoo'niid, Samériya dine'é ła' nílį́įgo, níłch'i bi'iiníziinii niyi'di hólǫ́, dandii'nínígíí da' éísh doo t'áá aaníígóó ádandii'níi da? 49Jesus ánáádoo'niid, Shí doo níłch'i bi'iiníziinii shiyi'di hólǫ́ǫ da, nidi shí shiTaa' shił nilį́įgo íínísin, áko nihí doo nihił danishłį́į da. 50Ákondi t'áá shí bee ayóó ánísht'ée dooleełii doo hásht'į́į da; t'áá łashdilt'éhí t'éí bee ayóó ánísht'éii hoł nilį́įgo hájít'į́, áko éí á nihojii'aah doo. 51T'áá aaníí, t'áá aaníígóó ánihidishní, T'áá háiida shizaad bik'eh hojíł'į́įgo, éí doo dazdootsaał da. 52Áko Jew dine'é ánáádahodoo'niid, K'ad lą́ą, níłch'i bi'iiníziinii niyi'di hólǫ́ǫgo nihił béédahoozin. Éíbraham daaztsą́, Diyin God yá dahalne'ii nít'é'ígíí ałdó' daneezná, nidi ádíní, T'áá háiida shizaad bik'eh hojíł'į́įgo, éí doo dazdootsaał da. 53Da' niísh nihizhé'é Éíbraham yę́ę biláahgo ayóó ánít'é? Éí daaztsą́, Diyin God yá dahalne'ii nít'é'ígíí ałdó' daneezná! Ákoshą' háí í'díl'į́? 54Nít'éé' Jesus ánáádoo'niid, T'áá shí ts'ídá ayóó ánísht'é í'díshnéehgo ts'ídá ayóó ánísht'é í'díshnéhígíí éí t'áadoo shá nídoodleełí da, nidi shiTaa' ayóó ánísht'éego áshósinígíí, Éí nihí nihiDiyin God, dadohní. 55Nidi nihí doo hwéédahonohsin da; shí hwééhasin. Doo hwééhasin da, dishníigo, t'áá nihígi ánísht'éego shiyooch'íid doo nít'éé', nidi hwééhasingo hazaad bik'eh honish'į́. 56Éíbraham nihizhé'é yę́ę sheidoołkáłígíí yiidoołtséełgo yąą bił hózhǫ́ǫ́ nít'éé', áko yiyiiłtsą́ągo bił hóózhǫǫd. 57Jew dine'é ánáádahodoo'niid, T'ah doo ashdladiin nináháah da, da' ákoósh Éíbraham yiniłtsą́? 58Jesus ánááhodoo'niid, T'áá aaníí, t'áá aaníígóó ánihidishní, Éíbraham t'áá bítséedi honishłǫ́. 59Ákohgo dahwíídínóołniił biniyé tsé nídayiizláá', nidi Jesus éí [diné bitahgóó ch'ízhníyáago] bits'ąą nízhdeest'į́į́', áko kin bii' sohodizin bił haz'ánígíí biyi'dóó ch'ízhníyá.
Currently Selected:
JOHN 8: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
