LUKE 10
10
Tsosts'idiin jilt'éego daho'dool'aad
1Áádóó bik'ijį' Bóhólníihii éí diné náánáła' tsosts'idiin yilt'éego néidiinil. Áko kin hadaas'áágóó índa kin naazhjaa'góó k'adę́ę dashdiigháahgo naaki níláago álą́ąjį' ajiis'a'. 2Íídą́ą́' ábizhdííniid, T'áá íiyisí da'neest'ą́, nidi da'dooyishígíí t'áá díkwíí; éí bąą agizh bee Bóhólníihii bá da'dooyishígíí dá'ák'ehgóó iidiyooł'aałgo bíká sodadołzin.#Mt. 9:37,38. 3Nihílááh wohkah; jó'akon, mą'iitsohtahgóó dibé yázhí dadeeskaiígi át'éego danihidish'á.#Mt. 10:16. 4Dah na'ayizii áádóó azis bee na'aljidí índa ké t'áadoo dayínóhjáhí, áádóó k'é ha'ní biniyé atiingóó t'áadoo nida'áhodołziidí. 5T'áá haa'ída hooghangi yah adahohkáahgi átsé, Díí hooghanígi hózhǫ́ǫ le'! dadohní. 6Áádóó diné k'é nídzinii ákwii ła' sidáago, k'é bee yínóh'níinii bił hólǫ́ǫ dooleeł, doodaii' éí k'éhígíí t'óó nihich'į' t'ą́ą́' nídoodleeł. 7Áádóó t'áá éí hooghanígi t'áá ákwii nahísóotą́ą doo, t'áá nihiyaa nidayiikaahígíí daahsą́ áádóó daahdlą́ą doo, háálá naalnishí éí bich'į' nahalyéii yą́ą́h nilį́;#1Cor. 9:14; 1Tim. 5:18. t'áadoo t'óó hootaadaahkaaí. 8T'áá haa'ída kin hadaas'áagi nidahohkáahgo, k'é danihiłníigo, t'áá nihiyaa nidayiikaahígíí daahsą́; 9ákwe'é bitah doo dahats'ídígíí hadaałt'é áńdaahdle'go, Diyin God bee bóhólníihgo bił haz'áanii bee nihaa honíyá, dabidohní. 10Nidi t'áá haa'ída kin hadaas'áagi nidahohkáahgo doo k'é danihiłníígóó, ákwe'é kintah da'nítiinjį' ch'ídahohkáahgo ádadidoohniił, 11Nihikintahdóó łeezh nihikee' bee łibá daazlį́'ígíí nihik'ijį' ádąąh deiildééh,#Acts 13:51. ákondi díí nihił béédahózin le', Diyin God bee bóhólníihgo bił haz'áanii bee nihaa honíyá.#Mt. 10:7-14; Mk. 6:8-11; Lk. 9:3-5. 12Nihił hashne', aa hwiinít'įįh beiníłką́ądi éí kin haal'áhígíí Sádam biláahgo atíbidi'doolnííł.#Gen. 19:24-28; Mt. 10:15; 11:24.
Kin hadaas'áagi bąąhági ádaat'éii yaa deíkáahii
(Mt. 11:20-24)
13Koréízingi kéédahoht'íinii, doo hojooba' ájíníi da! Bethséyidagi kéédahoht'íinii, doo hojooba' ájíníi da! Háálá aají nihitahgi ádahooníiłii ayóó ádaat'éii baa nida'asdee'ígíí éí Táir índa Sáídan kin haal'áagi#Is. 23:1-18; Ezek. 26:1—28:26; Joel 3:4-8; Amos 1:9,10; Zech. 9:2-4. baa nida'asdee' nít'ée'go, ákwii kéédahat'íinii ałk'idą́ą́' aghaashzhiin yistł'óonii yee hadadiidzaago łeeshch'iihtahgi dineezbingo#10:13 Tł'oh yishbizh yee hadadít'éego łeeshch'iih ák'éshjaa'go éí bibąąhági át'éii yąąh dabíni'go yee ádaa dahalne' nít'éé'. łahgo át'éego Diyin God yich'į' tsíńdadeezkéezgo yaa dadzoozlíi' doo nít'éé'. 14Nidi ánihwiit'aah beiníłką́ądi Táir índa Sáídan kin haal'áagi kéédahat'į́į́ nít'éé' yę́ę biláahdi át'éego atídanihidi'doolnííł. 15Áádóó nihí, Kapérniyam dine'é nohłíinii, da' yá'ąąsh ánízahgoósh nihaa dahodoo'nih? Nihíyee' hool'áágóó ti'hoo'nííh góyaa dadoohłeeł.#Is. 14:13-15.
16Jó, t'áá háiida danihidiits'a'ígíí éí dashidiits'a',#Mt. 10:40; Mk. 9:37; Lk. 9:48; Jn. 13:20. áádóó t'áá háiida doo danihinízinígíí éí doo dashinízin da, áádóó t'áá háiida doo dashinízinígíí éí shiníł'a'ígíí ałdó' doo deinízin da.
Tsosts'idiinígíí nákai
17Áko tsosts'idiinígíí hoł dahózhǫ́ǫgo níjíkaigo ádajiní, Bóhólníihii, níłch'i bida'iiníziinii nidi nízhi' yee nihik'eh dahół'į́! 18Áádóó ábizhdííniid, Atsiniltł'ish ahootahígi át'éego yá'ąąshdę́ę́' Séítan adadzííłhaalgo yiiłtsą́. 19Jó'akon, tł'iish índa séígo' bik'i naałdeeh doo biniyé bee óhólnííh nihaa diní'ą́,#Ps. 91:13. áádóó ana'í bibee adziilii t'áá át'é bee nihídahólníih doo biniyé nihaa diní'ą́, áko ts'ídá t'áadoo atídanihidoolíłí da. 20Ákondi níłch'i nihik'eh dahół'ínígíí éí t'áadoo baa nihił dahózhóní, nidi yá'ąąshdi nihízhi' bee ak'eda'ashchínígíí éí baa nihił dahózhǫ́ǫ le'.
Jesus bił hózhǫ́
(Mt. 11:25-27; 13:16,17)
21T'áá éí hoolzhishígíí biyi' Níłch'i Diyinii bee hoł hózhǫ́ǫgo ázhdííniid, ShiTaa', yá'ąąsh índa nahasdzáán bee Nóhólníihii, nich'į' ahééh nisin, háálá díidí dahóyáanii áádóó ídahooł'ą́ą'ii bits'ąą nídíníł'į́į́', nidi áłchínígi ádaat'éii t'éí bił ííshją́ą́ ádeinilaa; t'áá aaníí, shiTaa', háálá éí nił yá'át'éehgo bee íinínízinígíí át'é. 22ShiTaa' t'áá ałtsoní sheidiní'ą́,#Jn. 3:35. áko t'áadoo ła' aYe' nilíinii yééhósiní da, t'áá hazhó'ó aTaa' t'éiyá, índa t'áadoo ła' aTaa' yééhósiní da, t'áá hazhó'ó aYe' t'éiyá#Jn. 10:15. áádóó aYe' éí t'áá háiida aTaa' bééhodzísingo áhodoolíłígíí t'éiyá.
23Áádóó hódahooł'aahii bich'į' nídzízyizgo t'áá bí t'éí ábizhdííniid, Daah'ínígíí deiníł'íinii dabináá' bik'idahojidlí! 24Háálá ánihidishní, Diyin God yá dahalne'ii índa aláahgo nidant'áii lą'í yilt'éego daah'ínígíí k'adę́ę dayiiłtsééh, nidi t'áadoo dayiiłtsą́ą da, áádóó dadoohts'a'ígíí k'adę́ę deidiits'į́į́h, nidi t'áadoo deidiizts'ą́ą' da.
Samériya dine'é jooba'ii
25Áádóó jó'akon, bee haz'áanii yína'niłtinii léi' yiizį'go háka'iiłhilgo ání, Na'nitiní, haash deeshníiłgo éiyá iiná doo ninít'i'ii shee hodooleeł? 26Áko ábizhdííniid, Bee haz'áaniishą' ha'át'íí níigo bee ak'e'ashchį́? Yíníłta'goshą' ha'át'íí niłní? 27Áko ábijiní,
Nijéí t'áá át'é bee, áádóó nii' sizíinii t'áá át'é bee,
áádóó nidziil t'áá át'é bee, índa níni' t'áá át'é bee
Bóhólníihii niDiyin God ayóó'ííní'ní,#Deut. 6:5.
áádóó t'áá ni ádíí'ní'nínígi át'éego bił kééhót'íinii ayóó'ííní'ní.#Lev. 19:18.
28Áádóó Jesus ánááhodoo'niid, Ts'ídá t'áá ákóne' át'éé góne' bee háínídzíí'; t'áá éí baa naniná, áko hinínáa doo.#Lev. 18:5; Mt. 22:35-40; Mk. 12:28-34.
29Nidi doo shohodiit'i'góó ídi'deeshnííł jinízingo, Jesus ábizhdííniid, Ákoshą' háí bił kééhasht'íinii nilį́? 30Jesus ánáádoo'niidgo ání, Diné léi' Jerúsalemdóó Jériko góyaa dashdiiyá, nít'éé' aghada'ii'níiłii bizajííyá, áádóó haghada'iis'nil índa tídahodiilaago k'asdą́ą́' dahwiisxį́įgo hats'ą́ąjį' dah diijéé'. 31Nít'éé' ts'ídá ákohgo náá'iiłniihii léi' ákóyaa yigááł lá; éí hoołtsą́ągo hak'ee'ąą dah diiyá. 32T'áá ákót'éego Líívai dine'é ła' ákwe'é náánáádáałgo nááhoołtsą́ągo ałdó' hak'ee'ąą dah náádiidzá.#Num. 3:1-13. 33Nidi Samériya dine'é léi' ałdó' náánáádáałgo ákwe'é náánádzá, áko hoołtsą́ągo haa a'ááh niizį́į́', 34áádóó hach'į' niníyáago atího'diilyaa yę́ęgóó ak'ah índa wáin#10:34 Áliv wolyéhígíí bik'ah éí aneezgaigo yidínóołk'eh biniyé choo'į́į́ nít'éé' áádóó wáin éí łóód doo yéego ádooníił da bąą éí choo'į́į́ nít'éé'. yąąh áyiilaago yik'í'deezdiz, áko bitélii yik'i dahastį́, áádóó da'njahgi hoł yah íí'áazhgo haa áhályą́.#2Chr. 28:15. 35Nít'éé' biiskání denériyas naaki#10:35 Denériyas naaki éí naaki jį́įjį' nidaalnishgo nídayííłbįįh nít'éé'. hayíínilgo da'njah bee bóhólníihii yeinínilgo kóní, Baa áhólyą́, áádóó t'áá ha'át'íhída há ninááhíníłnii'ígíí éí náánísdzáago bik'é nich'į' niná'deeshdlééł. 36Diné aghada'ii'níiłii bizajííyáhígíishą' diné tált'éhígíí háí hoł kééhat'íinii nilį́įgo baa nitsíníkees? 37Áko ázhdííniid, Haa joozba'ígíí lą́ą. Jesus áhodííniid, Nílááh, ni ałdó' t'áá ákónít'į́į le'.
Jesus éí Martha áádóó Mary yaa hootah níyá
38Áádóó náázdeeskaigo, kin sinil léi'gi Jesus jiníyá, áko asdzání Martha yolyéé léi' bighan góne' yah ajííyáago haa bił hóózhǫǫd. 39Áko bideezhí hólǫ́ǫgo Mary yolyé,#Jn. 11:1. éí Bóhólníihii yíighahgi sidáago bina'nitin yiyíists'ą́ą́'. 40Nidi Martha lą'ígóó naal'a'go bi'diił'á, áko hach'į' niníyáago áháłní, Bóhólníihii, da' shideezhí t'óó shi'níłnii'goósh t'áá sáhí naash'a'go nił yá'át'ééh? Bíká anilyeed shá bidiní. 41Nidi Bóhólníihii haadzíi'go áhodííniid, Martha, Martha, ni'diił'áii índa níni' łą́ągo áyósinii t'óó ahayóí, 42nidi t'ááłá'í t'éiyá aláahdi ílį́. Mary éí ílínígíí ádeideet'ą́, éí doo bighadidoot'áał da.
Currently Selected:
LUKE 10: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
LUKE 10
10
Tsosts'idiin jilt'éego daho'dool'aad
1Áádóó bik'ijį' Bóhólníihii éí diné náánáła' tsosts'idiin yilt'éego néidiinil. Áko kin hadaas'áágóó índa kin naazhjaa'góó k'adę́ę dashdiigháahgo naaki níláago álą́ąjį' ajiis'a'. 2Íídą́ą́' ábizhdííniid, T'áá íiyisí da'neest'ą́, nidi da'dooyishígíí t'áá díkwíí; éí bąą agizh bee Bóhólníihii bá da'dooyishígíí dá'ák'ehgóó iidiyooł'aałgo bíká sodadołzin.#Mt. 9:37,38. 3Nihílááh wohkah; jó'akon, mą'iitsohtahgóó dibé yázhí dadeeskaiígi át'éego danihidish'á.#Mt. 10:16. 4Dah na'ayizii áádóó azis bee na'aljidí índa ké t'áadoo dayínóhjáhí, áádóó k'é ha'ní biniyé atiingóó t'áadoo nida'áhodołziidí. 5T'áá haa'ída hooghangi yah adahohkáahgi átsé, Díí hooghanígi hózhǫ́ǫ le'! dadohní. 6Áádóó diné k'é nídzinii ákwii ła' sidáago, k'é bee yínóh'níinii bił hólǫ́ǫ dooleeł, doodaii' éí k'éhígíí t'óó nihich'į' t'ą́ą́' nídoodleeł. 7Áádóó t'áá éí hooghanígi t'áá ákwii nahísóotą́ą doo, t'áá nihiyaa nidayiikaahígíí daahsą́ áádóó daahdlą́ą doo, háálá naalnishí éí bich'į' nahalyéii yą́ą́h nilį́;#1Cor. 9:14; 1Tim. 5:18. t'áadoo t'óó hootaadaahkaaí. 8T'áá haa'ída kin hadaas'áagi nidahohkáahgo, k'é danihiłníigo, t'áá nihiyaa nidayiikaahígíí daahsą́; 9ákwe'é bitah doo dahats'ídígíí hadaałt'é áńdaahdle'go, Diyin God bee bóhólníihgo bił haz'áanii bee nihaa honíyá, dabidohní. 10Nidi t'áá haa'ída kin hadaas'áagi nidahohkáahgo doo k'é danihiłníígóó, ákwe'é kintah da'nítiinjį' ch'ídahohkáahgo ádadidoohniił, 11Nihikintahdóó łeezh nihikee' bee łibá daazlį́'ígíí nihik'ijį' ádąąh deiildééh,#Acts 13:51. ákondi díí nihił béédahózin le', Diyin God bee bóhólníihgo bił haz'áanii bee nihaa honíyá.#Mt. 10:7-14; Mk. 6:8-11; Lk. 9:3-5. 12Nihił hashne', aa hwiinít'įįh beiníłką́ądi éí kin haal'áhígíí Sádam biláahgo atíbidi'doolnííł.#Gen. 19:24-28; Mt. 10:15; 11:24.
Kin hadaas'áagi bąąhági ádaat'éii yaa deíkáahii
(Mt. 11:20-24)
13Koréízingi kéédahoht'íinii, doo hojooba' ájíníi da! Bethséyidagi kéédahoht'íinii, doo hojooba' ájíníi da! Háálá aají nihitahgi ádahooníiłii ayóó ádaat'éii baa nida'asdee'ígíí éí Táir índa Sáídan kin haal'áagi#Is. 23:1-18; Ezek. 26:1—28:26; Joel 3:4-8; Amos 1:9,10; Zech. 9:2-4. baa nida'asdee' nít'ée'go, ákwii kéédahat'íinii ałk'idą́ą́' aghaashzhiin yistł'óonii yee hadadiidzaago łeeshch'iihtahgi dineezbingo#10:13 Tł'oh yishbizh yee hadadít'éego łeeshch'iih ák'éshjaa'go éí bibąąhági át'éii yąąh dabíni'go yee ádaa dahalne' nít'éé'. łahgo át'éego Diyin God yich'į' tsíńdadeezkéezgo yaa dadzoozlíi' doo nít'éé'. 14Nidi ánihwiit'aah beiníłką́ądi Táir índa Sáídan kin haal'áagi kéédahat'į́į́ nít'éé' yę́ę biláahdi át'éego atídanihidi'doolnííł. 15Áádóó nihí, Kapérniyam dine'é nohłíinii, da' yá'ąąsh ánízahgoósh nihaa dahodoo'nih? Nihíyee' hool'áágóó ti'hoo'nííh góyaa dadoohłeeł.#Is. 14:13-15.
16Jó, t'áá háiida danihidiits'a'ígíí éí dashidiits'a',#Mt. 10:40; Mk. 9:37; Lk. 9:48; Jn. 13:20. áádóó t'áá háiida doo danihinízinígíí éí doo dashinízin da, áádóó t'áá háiida doo dashinízinígíí éí shiníł'a'ígíí ałdó' doo deinízin da.
Tsosts'idiinígíí nákai
17Áko tsosts'idiinígíí hoł dahózhǫ́ǫgo níjíkaigo ádajiní, Bóhólníihii, níłch'i bida'iiníziinii nidi nízhi' yee nihik'eh dahół'į́! 18Áádóó ábizhdííniid, Atsiniltł'ish ahootahígi át'éego yá'ąąshdę́ę́' Séítan adadzííłhaalgo yiiłtsą́. 19Jó'akon, tł'iish índa séígo' bik'i naałdeeh doo biniyé bee óhólnííh nihaa diní'ą́,#Ps. 91:13. áádóó ana'í bibee adziilii t'áá át'é bee nihídahólníih doo biniyé nihaa diní'ą́, áko ts'ídá t'áadoo atídanihidoolíłí da. 20Ákondi níłch'i nihik'eh dahół'ínígíí éí t'áadoo baa nihił dahózhóní, nidi yá'ąąshdi nihízhi' bee ak'eda'ashchínígíí éí baa nihił dahózhǫ́ǫ le'.
Jesus bił hózhǫ́
(Mt. 11:25-27; 13:16,17)
21T'áá éí hoolzhishígíí biyi' Níłch'i Diyinii bee hoł hózhǫ́ǫgo ázhdííniid, ShiTaa', yá'ąąsh índa nahasdzáán bee Nóhólníihii, nich'į' ahééh nisin, háálá díidí dahóyáanii áádóó ídahooł'ą́ą'ii bits'ąą nídíníł'į́į́', nidi áłchínígi ádaat'éii t'éí bił ííshją́ą́ ádeinilaa; t'áá aaníí, shiTaa', háálá éí nił yá'át'éehgo bee íinínízinígíí át'é. 22ShiTaa' t'áá ałtsoní sheidiní'ą́,#Jn. 3:35. áko t'áadoo ła' aYe' nilíinii yééhósiní da, t'áá hazhó'ó aTaa' t'éiyá, índa t'áadoo ła' aTaa' yééhósiní da, t'áá hazhó'ó aYe' t'éiyá#Jn. 10:15. áádóó aYe' éí t'áá háiida aTaa' bééhodzísingo áhodoolíłígíí t'éiyá.
23Áádóó hódahooł'aahii bich'į' nídzízyizgo t'áá bí t'éí ábizhdííniid, Daah'ínígíí deiníł'íinii dabináá' bik'idahojidlí! 24Háálá ánihidishní, Diyin God yá dahalne'ii índa aláahgo nidant'áii lą'í yilt'éego daah'ínígíí k'adę́ę dayiiłtsééh, nidi t'áadoo dayiiłtsą́ą da, áádóó dadoohts'a'ígíí k'adę́ę deidiits'į́į́h, nidi t'áadoo deidiizts'ą́ą' da.
Samériya dine'é jooba'ii
25Áádóó jó'akon, bee haz'áanii yína'niłtinii léi' yiizį'go háka'iiłhilgo ání, Na'nitiní, haash deeshníiłgo éiyá iiná doo ninít'i'ii shee hodooleeł? 26Áko ábizhdííniid, Bee haz'áaniishą' ha'át'íí níigo bee ak'e'ashchį́? Yíníłta'goshą' ha'át'íí niłní? 27Áko ábijiní,
Nijéí t'áá át'é bee, áádóó nii' sizíinii t'áá át'é bee,
áádóó nidziil t'áá át'é bee, índa níni' t'áá át'é bee
Bóhólníihii niDiyin God ayóó'ííní'ní,#Deut. 6:5.
áádóó t'áá ni ádíí'ní'nínígi át'éego bił kééhót'íinii ayóó'ííní'ní.#Lev. 19:18.
28Áádóó Jesus ánááhodoo'niid, Ts'ídá t'áá ákóne' át'éé góne' bee háínídzíí'; t'áá éí baa naniná, áko hinínáa doo.#Lev. 18:5; Mt. 22:35-40; Mk. 12:28-34.
29Nidi doo shohodiit'i'góó ídi'deeshnííł jinízingo, Jesus ábizhdííniid, Ákoshą' háí bił kééhasht'íinii nilį́? 30Jesus ánáádoo'niidgo ání, Diné léi' Jerúsalemdóó Jériko góyaa dashdiiyá, nít'éé' aghada'ii'níiłii bizajííyá, áádóó haghada'iis'nil índa tídahodiilaago k'asdą́ą́' dahwiisxį́įgo hats'ą́ąjį' dah diijéé'. 31Nít'éé' ts'ídá ákohgo náá'iiłniihii léi' ákóyaa yigááł lá; éí hoołtsą́ągo hak'ee'ąą dah diiyá. 32T'áá ákót'éego Líívai dine'é ła' ákwe'é náánáádáałgo nááhoołtsą́ągo ałdó' hak'ee'ąą dah náádiidzá.#Num. 3:1-13. 33Nidi Samériya dine'é léi' ałdó' náánáádáałgo ákwe'é náánádzá, áko hoołtsą́ągo haa a'ááh niizį́į́', 34áádóó hach'į' niníyáago atího'diilyaa yę́ęgóó ak'ah índa wáin#10:34 Áliv wolyéhígíí bik'ah éí aneezgaigo yidínóołk'eh biniyé choo'į́į́ nít'éé' áádóó wáin éí łóód doo yéego ádooníił da bąą éí choo'į́į́ nít'éé'. yąąh áyiilaago yik'í'deezdiz, áko bitélii yik'i dahastį́, áádóó da'njahgi hoł yah íí'áazhgo haa áhályą́.#2Chr. 28:15. 35Nít'éé' biiskání denériyas naaki#10:35 Denériyas naaki éí naaki jį́įjį' nidaalnishgo nídayííłbįįh nít'éé'. hayíínilgo da'njah bee bóhólníihii yeinínilgo kóní, Baa áhólyą́, áádóó t'áá ha'át'íhída há ninááhíníłnii'ígíí éí náánísdzáago bik'é nich'į' niná'deeshdlééł. 36Diné aghada'ii'níiłii bizajííyáhígíishą' diné tált'éhígíí háí hoł kééhat'íinii nilį́įgo baa nitsíníkees? 37Áko ázhdííniid, Haa joozba'ígíí lą́ą. Jesus áhodííniid, Nílááh, ni ałdó' t'áá ákónít'į́į le'.
Jesus éí Martha áádóó Mary yaa hootah níyá
38Áádóó náázdeeskaigo, kin sinil léi'gi Jesus jiníyá, áko asdzání Martha yolyéé léi' bighan góne' yah ajííyáago haa bił hóózhǫǫd. 39Áko bideezhí hólǫ́ǫgo Mary yolyé,#Jn. 11:1. éí Bóhólníihii yíighahgi sidáago bina'nitin yiyíists'ą́ą́'. 40Nidi Martha lą'ígóó naal'a'go bi'diił'á, áko hach'į' niníyáago áháłní, Bóhólníihii, da' shideezhí t'óó shi'níłnii'goósh t'áá sáhí naash'a'go nił yá'át'ééh? Bíká anilyeed shá bidiní. 41Nidi Bóhólníihii haadzíi'go áhodííniid, Martha, Martha, ni'diił'áii índa níni' łą́ągo áyósinii t'óó ahayóí, 42nidi t'ááłá'í t'éiyá aláahdi ílį́. Mary éí ílínígíí ádeideet'ą́, éí doo bighadidoot'áał da.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).