LUKE 20
20
Jesus háí bee óhólnííh beidiní'ánígíí bínabídéékid
(Mt. 21:23-27; Mk. 11:27-33)
1Łah kin bii' sohodizin bił haz'ą́ą́ góne' diné nazhnitingo, hane' yá'át'éehii baa hojilne', nít'éé' aláahgo nááda'iiłniihii áádóó bee haz'áanii yínda'niłtinii índa diné yá aląąjį' naazíinii haa yíkai, 2áko ádahałní, Nihił hólne', ha'át'íí bee óhólnííh shį́įshą' bik'ehgo díidí baa naniná, éí doodaii' háishą' díí bee óhólnííh neidiní'ą́? 3Áko hach'į' t'ą́ą́' hanáádzíi'go áhodííniid, Shí ałdó' łahgo nanihídídéeshkił; k'ad shił dahołne', 4John lá háádę́ę́' bee óhólníihii bik'ehgo tó yee asį́į́h nít'éé'? Yá'ąąshdę́ę́' daats'í, éí doodaléi' diné bits'ą́ą́dóó daats'í? 5Áko yaa nídaat'į́įgo ádaaní, Yá'ąąshdę́ę́', dadii'niidgo la', ádidooniił, Ákoshą' haa yit'éego doo dahwiisoohdląąd da? 6Doodaléi', Diné bits'ą́ą́dóó, dadii'niidgo la', diné t'áá yíl'áá nít'éé' nihił nidazdiyoołniił, háálá John éí t'áá aaníí Diyin God yá halne'ii nilį́į́ nít'éé' dayó'ní. 7Áádóó ánáádadoo'niid, Bits'ą́ą́dóóígíí doo nihił béédahózin da. 8Áko Jesus áhodííniid, Shí ałdó' bee óhólnííh bik'ehgo díidí baa naasháhígíí doo bee nihił hodeeshnih da.
Ch'il na'atł'o'ii áádóó yaa ádahalyáanii binahjį' hane' bee ak'idi'dootį́įłii
(Mt. 21:33-46; Mk. 12:1-12)
9Nít'éé' díí hane' bee ak'idi'dootį́įłii diné bee bił ahozh'niilne'go ájíní: Diné ła' ch'il na'atł'o'ii k'iidíílá,#Is. 5:1. áko yaa ádahalyą́ą dooleełii yeisįįd, áádóó doo hah nídoodááłgóó náánáła' kéyahgóó ííyá. 10Baa hoolzhiizhgo há naalte' ła' dá'ák'eh yaa ádahalyánígíí bich'į' ajííł'a', ch'il na'atł'o'ii bineest'ą' ła' baa dazhdooyééł biniyé, nít'éé' aa ádahalyáanii éí naalte' t'óó nídeineesxaalgo ch'il na'atł'o'ii t'áágééd anídeis'a'. 11Áko náánáła' naalte' anáájííł'a', nít'éé' éí ałdó' nínáádeineesxaal áádóó t'óó baa yáhásinígi ádayííł'įįdgo, ch'il na'atł'o'ii t'áágééd anínáádeis'a'. 12T'áá áko táá' góne'ígíí anáájííł'a'; éí ałdó' atídayííł'įįdgo ch'ídayiisxan. 13Áko ch'il na'atł'o'ii bee bóhólníihii ání, Haa lá deeshnííł lá? Shiye' ayóó'óósh'níinii lá hach'į' deesh'aał ni; éí índa hoł danilį́į doo sha'shin. 14Nidi ch'il na'atł'o'ii yaa ádahalyánígíí éí dayiiłtsą́ągo áda'ahidoo'niid, Díí ch'il na'atł'o'ii bíí' dooleełígíí át'į́į́ lá; haa'íshą' dadiyiilyéełgo bíí' dooleełii nihíí' dadooleeł. 15Áko ch'il na'atł'o'ii bitahdóó ch'ídahwiisxango dahwiisxį́. Áko lá ch'il na'atł'o'ii bee bóhólníihii haa hodoolííł lá? 16Éí lá doogááł ni, áádóó ch'il na'atł'o'ii yaa ádahalyánígíí neidoołtsił, áko éí ch'il na'atł'o'ii éí náánáła' yaa ádahalyą́ą dooleełii yaa néidoosįįł. Áko éidíígíí deidiizts'ą́ą'go ádaaní, T'ah nít'éé' lá t'áadoo ákót'įįh da łeh! 17Nidi hak'i níghalgo áháłní, Áko díí kót'éego bee ak'e'ashchínígíishą' ha'át'íí ááhyiłní?
Kin ádeił'íní tsé doo deiniizį́'ígíí
t'áá éí tsé bee naaná'ástł'inii silį́į́'.#Ps. 118:22.
18T'áá háiida éí tséhígíí bik'ijį' ajíígo'ígíí nihizhdooltǫǫł, nidi t'áá háiida hak'ijį' naalts'idígíí ch'íhodoołk'ááł.
Síízar bich'į' tax nahalyéhígíí bína'ídíkid
(Mt. 22:15-22; Mk. 12:13-17)
19T'áá ákwii oolkiłígíí biyi' bee haz'áanii yínda'niłtinii índa aláahgo nááda'iiłniihii hodi'dooltsoł ch'ééh daniizį́į́', nidi diné yéédaaldzid, háálá éí hane' bee ak'idi'dootį́įłii binahjį' bí baa níjít'į́įgo bee hadzoodzíi'go yaa ákodaniizį́į́'. 20Áko t'áá hadahasíidgo naalchi'í adeis'a', áko éí diné t'áadoo át'éhígóó nidaakaii ádahodil'į́įgo hazaad yee hak'i dahodidoo'ááł biniyé haa nahaakai, éí binahjį' naat'áanii yaa dahodidoo'áałgo éí hwee ádíhólníih dooleeł danízingo ádaat'į. 21Áko naalchi'í kódaaníigo Jesus nideídééłkid, Na'nitiní, nihił béédahózingo t'áá ákogi át'éego yáníłti' áádóó na'nítin, índa diné doo ła' a'ohgo baa nitsíníkees da, nidi t'áá aaníígóó Diyin God k'ehgo honít'i' bína'níłtin. 22Síízar bich'į' tax nahalyéegoósh bee haz'ą́, dooda daats'í? 23Nidi bíkada'jiiłhilígíí bił bééhózingo áháłní, [Ha'át'íísh biniyé nashídanohtaah?] 24Béeso denériyas yolyéhígíí ła' nihá nísh'į́. Háísh bitsiits'iin bik'i si'ą́ índa háísh bízhi' bikáá'? Áko ádadííniid, Síízar lą́ą. 25Áko áhodííniid, Jó, éí bąą Síízar bíhígíí Síízar baa nídahoh'nííł, áádóó Diyin God bíhígíí Diyin God baa nídahoh'nííł. 26Áko bee hadzoodzí'ígíí binahjį' diné binááł yee hákada'iiłhilígíí doo yídanéés'ąąd da, nidi bich'į' hadzoodzí'ígíí bąą t'óó bił adahayóigo t'áadoo ha'át'íhída náádadoo'niid da.
Aninéédę́ę́' náádi'doojahgi na'ídíkid
(Mt. 22:23-33; Mk. 12:18-27)
27Sádjusii danilíinii ła' haa yíkai, éí aninéédę́ę́' doo náá'di'yiijeeh da daaní,#Acts 23:18. 28áádóó kódaaníigo nidahódééłkid, Na'nitiní, Mózes yę́ę kót'éego nihá ak'e'ashchį́, diné ła'da bił hajíí'áázh be'asdzą́ą́ hólǫ́ǫgo ba'áłchíní t'áadoo haleehí daaztsą́ągo, hak'is be'asdzą́ą́ nít'é'ígíí hwe'asdzą́ą dooleeł, áko hak'is yę́ę bá áłchíní hwee hodooleeł, níí nít'éé'.#Deut. 25:5. 29Áko nít'éé' ashiiké t'áá ła' háájé'ígíí tsosts'id yilt'éé lá; alą́ąjį'ígíí be'asdzą́ą́ hazlį́į́', nít'éé' t'áadoo ba'áłchíní haleehí daaztsą́; 30hakéédę́'ígíí éí hwe'asdzą́ą́ nít'é'ígíí néidiiłtį́įgo t'áadoo ba'áłchíní haleehí danáánáztsą́. 31Áádóó náá'ákéédę́'ígíí t'áá ákónáánádzaa, t'áá ákót'éego tsosts'id jilt'éé nít'éé' yę́ę t'áá ádzíłtso t'áadoo ha'áłchíní dahazlį́'í ádajídin. 32Áádóó bik'ijį' asdzání ałdó' daaztsą́. 33Áko aninéédę́ę́' náádi'yiijeeh bijį́įdishą', éí háí be'asdzą́ą́ jílį́į doo? Háálá t'áá tsosts'id yilt'éego be'asdzą́ą́ dzizlį́į́'.
34Áko Jesus áhodííniid, Díí k'ad da'ahílchíhígíí ba'áłchíní nida'ayeh índa ahaa daha'nííł, 35nidi aninéédę́ę́' náádi'yiijée'go atah dadooleełgo yą́ą́h da'nilíinii éí doo nááda'doogeh da, doo nidi ahaa dabi'dii'níił da doo, 36háálá doo náádínóo'néeł da, jó, diyingo nidaal'a'í bił ahidajíłt'é, índa náádi'yiijeeh ba'áłchíní dajílį́įgo Diyin God ba'áłchíní dajílį́. 37Jó, Mózes nidi dówózhii biyi'dę́ę́' bich'į' ha'oodzí'ígíí baa hane' binahjį' da'neeznáádę́ę́' náádi'yiijeehígíí ííshją́ą́ áyiilaa, háálá ádííniid, Bóhólníihii éí Éíbraham biDiyin God áádóó Áízak biDiyin God índa Jéíkab biDiyin God nilį́.#Ex. 3:6. 38Áko daneeznáanii éí doo biDiyin God jílį́į da, nidi dahináanii biDiyin God jílį́, háálá hanáałgo t'áá ałtso dahiná. 39Áko bee haz'áanii yínda'niłtinii ła' hadaasdzíi'go ádaaní, Na'nitiní, yá'át'éehgo bee hahínídzíí'. 40Háálá t'ááłáhígo nináádahódídóołkiłgi nidi hach'į' dáátiid.
David biye' bína'ídíkid
(Mt. 22:41-46; Mk. 12:35-37)
41Nidi áhodííniid, Ha'át'éegoshą', Christ éí David biye' nilį́, daaní? 42Jó, David t'áá hó Sin binaaltsoosígíí biyi' ájíní,
Bóhólníihii éí shiBóhólníihii áyidííniid,
Shinish'náájí dah sínídá.
43Nida'ana'í bik'i dííníl'eezgo ániishłaajį'.#20:42,43 Bik'i dííníl'eezgo ániishłaajį', nínígíí éí, Ná bik'eh díshdlį́į'jį', níigo ání. Ps. 110:1.
44Áko David éí shiBóhólníihii hałní, ákoshą' haa yit'éego biye' jílį́?
Jesus éí bee haz'áanii yínda'niłtinii yideezteh
(Mt. 23:1-36; Mk. 12:38-40)
45Áko diné t'áá ałtso da'íists'ą́ą'go bídahooł'aahii áyidííniid, 46Bee haz'áanii yínda'niłtinii bits'ąą ádaa ádahołyą́, éí bi'éé' danineezgo nidaakaigo bił yá'ádaat'ééh, áádóó nida'iiniihgóó k'é dabidi'níigo bił ayóó ádaat'é, áádóó kin bii' áłah nída'adleehí dabiyi'góó índa áda'azįįdgóó aląąjį' naazíinii bá nidahaz'ą́ą́góó bił ayóó ádahoot'é, 47índa asdzání bąąh ádahasdįįdii dabighan yaa nidahodikai índa t'óó ádaat'į́įgo nízaadgóó sodadilzin. Éí t'ah aláhídi át'éego bik'e'ashch'íi'go bá nidahodoot'ááł.
Currently Selected:
LUKE 20: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
