LUKE 21
21
Asdzání bąąh áhásdįįdii béeso ayíínil
(Mk. 12:41-44)
1Nít'éé' hajííghalgo diné da'at'íinii béeso adaha'níiłgi bibéeso adayiiníiłgo jiiłtsą́, 2áko asdzání bąąh áhásdįįdii bahojoobá'í léi' béeso ts'ídá a'ohgo ílínígíí naaki ayíínilgo jiiłtsą́. 3Áádóó ázhdííniid, T'áá aaníígóó ánihidishní, Díí asdzání bąąh áhásdįįdii bahojoobá'í nidi t'áá ádzíłtso haláahgo i'íínilgo át'é, 4háálá t'áá ádzíłtso t'áá ałtsoní bee bilááh dazhneel'ánígíí éí lą'í adadziiznil, nidi díí asdzání t'áá íiyisí bahojoobá'í nidi, t'áá yee hinánígi ałtso ayíínil.
Kin bii' sohodizin ádooldįįłígíí t'áá bítséedi baa hojoolne'
(Mt. 24:1,2; Mk. 15:1,2)
5Nít'éé' kin bii' sohodizin tsé da'ílíinii índa aa yílyáii bee naashch'ąą'ígíí ła' baa yádajiłti'go hodiizts'ą́ą'go áháłní, 6Díí k'ad danół'ínígíí tsé doo ła' t'áá ałk'i dah si'ą́ą da dooleełígíí beidoołkááł, nidi t'áá ałtso naa'ahidoolkał.
Bee éédahózinii áádóó atí'él'į́
(Mt. 24:3-14; Mk. 13:3-13)
7Áko nidahódééłkidgo ádaaní, Na'nitiní, hahgoshą' díí ákódahodoonííł, áádóó k'adę́ę ákóhánéehgo ha'át'íísh bee ééhózin dooleeł? 8Áko ázhdííniid, Ádaa ádahołyą́, áko doo yóó'adanihidi'nóot'ah da, háálá lą'í, Shí Christ ásht'į́, daaníigo shízhi' yee ádadójíigo nidahidookah áádóó, K'ad áajį' ahoolzhiizh! daaníigo. T'ááká bikéé' dah dahidoohkááh yíila'. 9Anaa' dahólǫ́ǫgo índa hahóó'áago dadoohts'a'go, éí t'áadoo bik'ee nihił daayé'í, háálá díí áłtsé ts'ídá ádadoonííł, nidi nihodoogáłígíí éí doo t'áá hooshch'į' ádooníił da.
10Ákohgo ábizhdííniid, Ał'ąą dine'é ałch'į' nídahidiibáah dooleeł, áádóó łahgo nihokáá' bee bóhólníihgo bił haz'áanii índa náánáła' nihokáá' bee bínááhólníihgo bił nááhást'áanii yił ałch'į' nídahidiibáah dooleeł, 11áko łahgóó ayóó át'éego ni' nídahidi'náah doo, áádóó nídahodichįįh áádóó nidahałniih doo, índa yá'ąąshdę́ę́' bik'eda'íyée'ii índa bee éédahózinii ayóó ádaat'éii nídeiltséeh dooleeł. 12Nidi díí t'áá át'é t'ah doo ánééhgóó danihiidoołtsołgo atídanihił'į́į doo, kin bii' áłah nída'adleehígíí índa awáalyaajį' adanihii'éeshgo, áádóó shízhi' biniinaa aláahgo naat'áanii índa naat'áanii naazdáágóó bidááhdę́ę́' nidanihii'éesh doo. 13Áko éí baa hoolzhiizhgo nihí shá dahołne'go nihá ashja doolííł. 14Éí bąą nihijéí bii' hazhó'ó hasht'e'nitsídanohkees, bee ák'ihadadidoohdzihii t'áá bítséedi t'áadoo nabik'ítsídaałkeesí, 15háálá saad índa bee hódzáanii nihaa dadideesh'ááł, éí nihits'ą́ą́jí danilíinii t'áá ałtso doo yídaneel'ą́ą da doo, índa yich'į' doo hadaodziih ádaat'ée da doo.#Lk. 12:11,12. 16Nihishchíinii áádóó bił hadashoojée'ii áádóó danihik'éí índa danihik'isóó nidi ninádanihididoo'ááł, áko nihí ła' nidanihidoołtsił; 17shízhi' biniinaa diné t'áá ałtso nihik'ee dadiniih dooleeł. 18Ákondi nihitsiits'iin bąąhdóó nihitsii' t'ááłá'í nidi doo yóó'adoodił da. 19Hada'íínółnínígíí binahjį' dadoohdzih.
Jerúsalem ádooldįįłígíí t'áá bítséedi baa hane'
(Mt. 24:15-21; Mk. 13:14-19)
20Nidi Jerúsalem éí siláo bináshzhiizhgo daołtsą́ągo, ádooldįįłígíí t'áá áyídídę́ę́' hadziihgo nihił béédahodoozįįł. 21Áyąądą́ą́' Judíyagi kéédahojit'ínígíí dziłjį' choda'iizhdooł'įįł, áádóó kin hadaas'áagi kéédahojit'ínígíí ch'íhizhdookah, índa binaagóó kéédahojit'ínígíí éí doo ákóne' adahizhdookah da, 22háálá bee ak'e'ashchínígíí ałtso bohodoolnííł biniyé díí k'ééhodi'nééh yoołkááł át'ée dooleeł.#Hos. 9:7. 23Éí beiníłką́ągo dadzooltsánígíí índa awéé' dahałt'o'ígíí doo hasht'é'égóó yínííł biishdínóodah! Háálá nahasdzáán bikáá'góó t'áá íiyisí yínííł łą́ą doo, índa díí dine'é t'óó báhádzidgo atídabidi'doolnííł. 24Diltłish deeníinii bee bidi'doogą́ą́ł, áádóó ał'ąą dine'é t'áá ałtso bitahgóó yisnááh danilį́įgo adabidi'yoot'ish, áádóó doo Jew dine'é danilíinii bił hoolzhishígíí bíighah azlį́į'jį' doo Jew dine'é danilíinii Jerúsalem yik'i nidookah.
Diné Silį́į'ii nídoodáłígíí
(Mt. 24:29-31; Mk. 13:24-27)
25Jį́honaa'éí áádóó tł'éhonaa'éí índa sǫ' bee éédahózingo deidooltsééł,#Is. 13:10; Ezek. 32:7; Joel 2:31; Rev. 6:12,13. índa nihokáá' dine'é t'áá íiyisí bich'į' nidahwii'náa dooleeł, tónteel índa tó bíígháán náádadiidáhígíí dadiits'a'go biniinaa t'óó hoł dahalą́ą doo. 26Yéé' bik'ee índa nahasdzáán bikáa'gi báhádzidii nawólníinii bik'ee háni' áńdaadįįh doo, háálá yá'ąąshdi bee dahółdzilii dadoogał. 27Ákohgo índa Diné Silį́į'ii k'os bił yildohgo#Dan. 7:13; Rev. 1:7. áádóó bee adziil índa ayóó át'é ats'ádi'nílííd yił yigáałgo deizdoołtsééł. 28Nidi díigi áhooníiłgo hodeeshzhiizhgo de ádaahnéehgo dego dasídóo'į́į' doo, háálá nihéédahididoochiłígíí k'adę́ę baa hoolzhíish doo.
Fig sikaadii néitsóhígíí binahjį' na'nitin
(Mt. 24:32-35; Mk. 13:28-31)
29Hane' bee ak'idi'dootį́įłii ałdó' yee hoł hoolne': Fig sikaadii índa tsin naazkaadii t'áá ałtso danół'į́; 30jó, éí nídeitsóohgo danół'į́įgo k'adę́ę ch'ínáshį́įgo nihił béédahózin łeh. 31Nihí ałdó' díidíígíí bidahoolníiłgo danół'į́įgo Diyin God bee bóhólníihgo bił haz'áanii t'áá áyídídę́ę́' bił nihoolzhiizhgo nihił béédahodoozįįł. 32T'áá aaníígóó ánihidishní, Díí oochíłígíí doo bił yóó'ahodoogáał da, díidí t'áá ałtso ádaadzaago índa. 33Yádiłhił índa nahasdzáán bił yóó'ahodoogááł, nidi shizaad t'éiyá doo bił yóó'ahodoogáał da.
Ha'ídées'į́į́' bee i'ílnii'
34Nidi nihí ádaa ádahołyą́, áko ádił ná'ahanaad áádóó na'adlą' índa díí k'ad iiná bida'diił'áhígíí doo nihijéí bii' daahéeł da doo, áko éí bijį́ doo t'áadoo hooyání bił nihaa hodoolzhish da. 35Háálá nahasdzáán bikáá' t'áá át'éé nít'éé' kéédahojit'ínígíí t'áá ádzíłtso łoh á si'ą́ nahalingo haa hodoolzhish. 36Éí bąą t'áá áłahjį' hada'ísídół'į́į́' índa sodadołzin, éí danihidziilgo ádanihi'di'doolníiłgo díí ádahodooníłígíí t'áá ałtso bits'ąą dadoohdzih índa Diné Silį́į'ii bidááhdę́ę́' deidoohsįįł biniyé.
37Áko t'áá ákwíí jį́ kin bii' sohodizin bił haz'ą́ą́ góne' nazh'nitin,#Lk. 19:47. nidi tł'ée'go t'éí ch'ééjídáahgo Dził Álivz hoolyéedi náhwiilkááh. 38Áko t'áá ákwíí abíní kin bii' sohodizin bił haz'ą́ą́ góne' diné t'áá ałtso dahwíists'ą́ą́' biniyé haa áłah nádleeh.
Currently Selected:
LUKE 21: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
