Mak 16
16
1Kamaina bi Waiyawasi Laḡanina i kovi mulinemo Meli Magdalin, Diyemesi tinana Meli bi Salome bona panepanedi a kunedi te maso a nawa Yesu tunina a kailolo.#Diu edi vaivaimo lava bi i pekina, ba dolinemo masimo tunina sa kailolo kaka sa dobo. Bi niga waivinidi a ḡoye te niga vaivaina maso a voiye wata. 2Kamaina bi Sande olaolalemo suwala i lovolovotava tedi a nawa tauyewamo. 3Bi etaḡa taudiḡa a wai giugiuna gado, “Aiyai aubaida ḡakima ya ḡima kamaḡe tauyewa mataetinemo?”
4Laḡannemo matedi a tautaulagetidi te ḡakimina dididiga ḡimaḡimana a kita. 5Tedi tauyewamo a sola nawa te oloto lauewalina a kita, ena gala potipotina kataiyedimo i miyamiya. Ḡome tedi a tatava bi a naila gulata.
6Kamaina bi i giuwedina gado, “Koma nainaila! Temi ba Nasalet Yesuna tupatupalatuna ko tavutavuḡe. Tana mote niga ḡome, kaikana pekimo i kenamoito. Ko kita, niga taubeu gabukavanaḡa. 7Bi ko nawa ena tauwaikaiwatana ḡesaudi lisidimo bi kota Pita, bi niga mainana ko giuwedi: ‘Tana ya dolidoli Galilimo, mai wala i giugiuna, ḡome kaka ko kita.’
8Kamaina bi waivinidi ma nuwagusugusudi tauyewa a potiyovo kamaḡe bi a velau a nawa. Tedi a naila gulata aubaina te mote bamo aiyai a giuwe.
MAK 16:9-20
[Mak ena buka damodamona i kulikulina ba i ainawanawa bi mote a banavi. Bi lova 9 te 20 noponemo bai a noḡonoḡotina luvanemo mainana a kuli.]
Yesu Meli Magdalin lisinemo i laumaḡata
9Kamaina bi Sande olaolalemo Yesu pekimo i kenamoito bi Meli Magdalin lisinemo i gei laumaḡata. Niga waivinina wala lisinemo aluwa gebogebodi wapedi 7 i kwavivaidi. 10Tana i nawa te Yesu ena tauwaikaiwatana bai i tubutubuḡana i giuwedi. Banina Yesu i peki aubaina tedi ma nuwapoyedi a miya bi a ḡabaḡaba. 11Bi laḡannnemo Meli i giuwedina gado, “Tagu lisigumo Yesu i laumaḡata te e kita.” Tedi waivinina ena giu mote ai sumaḡe.
Yesu ena tauwaikaiwatana labu lisidimo i laumaḡata.
12Bi mulinemo tauwaikaiwatana labu malagai a potiyovo kamaḡe bi a nawanawa etaḡa bi Yesu lisidimo i laumaḡata bi kitana i nuwa vitala te mote a kitaḡone. 13Tedi a tau nawanawa kaka a kitaḡone, kamaina bi a munaḡa edi lava a giuwedi, bi edi giu mote ai sumaḡedi.
Yesu ena tauwaikaiwatana 11 lisidimo i laumaḡata
14Mulinemo te Yesu ena tauwaikaiwatana 11 a kanikani bi lisidimo i laumaḡata. Ena tauwaikaiwatana nopodi gudugududi aubaina mote ai sumaḡe, taunana aubaina i ḡasiyedi. Bi i giuwedina gado, “Tagu pekimo e kenamoito te lava a kitagu bi a giuwemi, bi bai aubaina mote koi sumaḡedi?” 15Kamaina bi i giuwedina gado, “Ko nawa dobu matabuna bi lava matabudi lisidimo Giu Visuvisuna ko lauguguyae. 16Bi lava aiyai yai sumaḡegu bi gaubemo sa kabuluna, ba tana ya yawasana. Bi aiyai mote i waisumaḡegu ba kamaina te kovoḡa ya vai. 17Bi mabai sa wai sumaḡeguna ba anisove kauwidi sa voiyedi. Bi tedi kaka tagu isagumo aluwa gebogebodi lava lisidimo sa kwavivaidi. Bi kota kalina ḡesaudi mote a sibesibedinemo sa gagali. 18Tedi mwata wai lauonedi sa legaudina ba mote sima peki. Bi kota gauba waionedi sa tegodina ba mote ima laukubutidi. Bi nimedi lava sidesidedi dabedimo sa sivudina ba sa yawasana.”
Maimaituwa Yesu i lageti saḡe galewemo
19Bada Yesu giu i waiwai kovi mulinemo, ba Maimaituwa Yesu i lageti saḡe galewemo. Tana kataiyanemo waibada gabunemo i waimiyeni. 20Kamaina bi ena tauwaikaiwatana a potiyovo a nawa dobu matabuna bi a lauguguya. Bi Bada i sagudi bi i ka maḡati kauwe te edi lauguguya ba giu kauwa. Banina Bada ena ḡailisimo anisove kauwidi a voivoiyedi bi lava a kitekitedi.
Currently Selected:
Mak 16: kqf
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
