Aepa Gemae 21
21
Selaʼa Aisakiʼmo alino ateʼniya gemae
1 #
1 Sam 2:21
Ala kava neʼmoʼa Selaʼmo ve mafaʼnemo alino ategaiye, huno polomasi gemo huno ha paiʼniya geleʼmo akame huno emineno ha maeʼniye. 2#Aep 17:21Ha maeʼnigeno Selaʼa aipaguʼeʼmo maiteno Emalehamuʼmo ago kosunamo leʼniya afinaʼmo Gotiʼa akeyaʼvilagamo lekana paino ateʼniya afinaʼmo ve mafaʼneʼamo alino ateʼniye. 3#Aep 17:19Emalehamuʼa Selaʼmo ani alino ateʼniya mafaʼnemo agiʼamo Aisakiʼae huno ateʼniye. 4#Ap 7:8Alino atetegenoʼaeʼmo eitiʼa afinaʼmo utegeno Gotiʼa huvo, huno ha paiʼniya gemo akame huno Emalehamuʼa mafaʼneʼamo agufamo lagauno ateʼniye. 5Emalehamuʼa vani hataletiʼa kafugamo maiʼnigenoʼaeʼmo Selaʼa Aisakiʼmo alino ateʼniye. 6#Aiy 54:1Selaʼa hunoʼaeʼmo, Gotiʼa kigi hisuvafeʼmo alino he tino nateʼnigeʼapaeʼmo muki vayaʼmogi ani gemo afiteʼapaeʼmo nagaeʼeʼmo magokepi kigi hugae. 7Hogoteno ina laʼmo Emalehamufeʼmo ha painoʼaeʼmo, Akamo Selaʼmo mafaʼnemo alino ateteno nuʼmo amigiye, huno ha paigiye. Agaemo ago kosuna leʼniyana nagaemo ve mafaʼneʼamo aliʼna atove, huno huʼniye.
8Ani mafaʼnemo ago kosino alopa hetenoʼaeʼmo nuʼmo mo nesigenoʼaeʼmo ani afinaʼmo Emalehamuʼa alopa neʼyaʼmo yagita huno ateʼniye.
Emalehamuʼmo Hegaʼe Isameliʼeʼmo alino hana faino anataleʼniya gemae
9Selaʼmo ageyana Isipi a kanomo Hega mafaʼnemoʼmo Aisakiʼmo huno ami maleteno kigi huno ateʼnigeno ageʼniye. 10#Ga 3:18; 4:30Ageʼniyaʼmofeʼmo Selaʼmo Emalehamufeʼmo ha painoʼaeʼmo, Kagaemo kalavusi aliʼyakamo neʼaliya a kanoʼe mafaʼneʼaʼeʼmo alika hana faika anatalegeʼana viʼao. Kalavusi aliʼyakamo neʼaliya aʼmo mafaʼneʼe nagae mafaʼnemo Aisakiʼeʼmo kagemi yakamo magokepati oʼaligaʼanageno Aisakikeʼmo aligiye, huno ha paiʼniye. 11Inagi Isameliʼmo agaiʼa mafaʼnegeʼmo maiʼniyaʼmofeʼmo Emalehamuʼa ani kavaʼmo ageʼnigeno aipamoʼmo kanale osuʼniye. 12#Lo 9:7-8Osuʼnigenoʼaeʼmo Gotiʼa Emalehamufeʼmo ha painoʼaeʼmo, Kagaemo kalavusi aliʼyakamo neʼaliya aʼmo Hegaʼe mafaʼneʼaleʼeʼmo agesanagenoʼaeʼmo kaipamoʼmo kana osino. Aisakipatiʼmo afole aisaya kaginago vayaʼaifekeʼmo ge hisugeʼapa kagaika lama ge kaginago vayaʼmo maigayanagi Selaʼmo nehiya gemo afiteka afaʼa akame huvo. 13Ani kavake huʼna kalavusi aliʼyakamo neʼaliya aʼmo mafaʼnekafatiʼeʼmo magoke apaki vayaʼmo asole vayaʼmo aliʼna afole aiʼna apategauve. 14#Yo 8:35Inagi egaʼamo gotilamiyapiʼmo Emalehamuʼa neʼyaʼmo aliteno meme agufa kepiʼmo aniʼmo he fiteno alino Hega agiʼnaleʼmo kofino ateʼniye. Emalehamuʼa mafaʼneʼamo Isameliʼmo avaleno Hegana amiteno alino hanafaitalegeʼana uʼnaʼae. Inagi Hegaʼe mafaʼneʼaʼeʼmo kaʼme koʼmo Miyasima kotegamo fikumo uʼnaʼae.
15Inagi ani ke anifi aniʼmo ago neʼana hano huteʼanaeʼmo Hegaʼa mafaʼneʼamo mago aise yosa aepafiʼmo ateʼnigeno maiʼniye. 16Agaemo ataleno uno mago aise afagiʼaleʼmo maiʼnenoʼaeʼmo aipafiʼmo agesamo afinoʼaeʼmo, ageʼnisugeno mafaʼneʼnimo falisiya yafeʼmo oʼnahaiye, huno huteno Hegaʼa agaiʼageʼmo fai maiʼneno aviʼyaʼmo huno maiʼniye. 17#Hat 3:7Inagi Gotiʼa mafaʼne kanomoʼmo aviʼyaʼmo nehigeno afiʼniye. Goti enisole vekaʼamoʼmo kokuʼnapatiʼmo Hegafeʼmo keya aeno ge hunoʼaeʼmo, Na kava higekaeʼmo nehane. Koli osuvo. Gotiʼa mafaʼnekamo maiʼniyategatiʼmo avi neʼateya gemo ago afiʼniye. 18He tikuka mafaʼnekamo kayate avaleka alika asagauvo. Nagaemo agaepatiʼmo magoke apaki vayaʼmo asole vayaʼmo aliʼna afole aiʼna apategauve, huno ha paitenoʼaeʼmo 19#Nap 22:31Hega aulagamo alino ayakeno ateʼnigeno mago ani kotuʼmo ageteno uno meme agufa kepiʼmo he fino alinineno mafaʼneʼamo amiʼnigeno neʼniye. 20Gotiʼa ani mafaʼneʼeʼmo lokaeno maiʼnigeno kosino alopa heteno ani kaʼme kotegageʼmo maiʼnenoʼaekeʼmo ati hesiya kavaʼmo ageno alagepa huno ageʼniye. 21Agaemo kaʼme koʼmo Palani kotegamo hau huʼniya mumusopa koteʼmo maiʼnigenoʼaekeʼmo itaʼamoʼmo Isipi kotegatiʼmo mago a mafaʼnemo aʼamo avalelino eʼniye.
Emalehamuʼe Amimelekiʼeʼmo kotalakemo huʼnaʼa gemae
22Ani afinaʼmo Amimelekiʼe Faikoʼmo ami vayaʼaleʼmo yagaino neʼapateya vekaʼeʼmo eʼana Amimelekiʼa Emalehamufeʼmo hunoʼaeʼmo, Gotiʼa kagaeʼeʼmo maiʼnigeka muki kavaʼamo nehane. 23Inagi hemenimo kagaemo Goti agiʼaletiʼmo kagoʼyamo ataleteka aigofe kavaʼmo nagaetegamo osuge mafaʼneʼnilegamo osuge naginago vayaʼaitegamo osuge huguve huka huvo. Nagaemo kalaga vekamo kagaetegamo alagepa kavaʼmo huʼnova kava huka nagaetegaʼe mani eka maiʼnana koteʼeʼmo alagepa kavaʼmo huguve, huka naha paiyo, huno huʼniye. 24Inagi Emalehamuʼa agoʼya ataleteno, ani kavaʼmo afaʼa huguve, huno ha paiʼniye.
25Ani afinaʼmo Emalehamuʼa Amimelekifeʼmo, Aliʼyakamo neʼaliya vayaʼmogimo nagae ani keli kotuʼmo aliʼnana kavaʼmo hosu kavaʼmo huʼnane, huno ha paiʼniye. 26Amimelekiʼa hunoʼaeʼmo, Nagaemo haiya vekamoʼmo ani kavaʼmo huʼnifi huʼna oʼafiʼnove. Hogoteka naha opaiʼnane. Hemenigeʼmo mani gemo neʼafuve, huno ha paiʼniye. 27Inagi Emalehamuʼa sipisipiʼe pulumakaʼeʼmo apavalelineno Amimelekiʼmo amitegeʼanaeʼmo anakaemo kotalakemo huʼnaʼae. 28Emalehamuʼa agaiʼa sipisipifatiʼmo seveniʼa aikeli sipisipiʼageʼmo apavaleno alino apaote apateʼniye. 29Amimelekiʼa Emalehamufeʼmo, aikeli sipisipiʼage huka alika apaote apateʼnana kavaʼmo aepaʼamo na kavaʼmo hisanafeʼmo alika apaote apateʼnane, huno afi geʼnigeno 30Emalehamuʼa hunoʼaeʼmo, Kagaemo mani seveniʼa aikeli sipisipi anagaʼmo nayapatiʼmo afaʼa apavalegane. Mani kavaʼniletiʼmo kagaemo hukaeʼmo, kagaikamo kafiʼnana ani keli kotune, huka hisanafeʼmae, huno ha paiʼniye. 31Kotalakemo huʼnaʼaʼmofeʼmo ani koʼmo agiʼamo Miyasima kone huno ateʼniye. 32Anakaemo kotalakemo hu maleta ageʼanaeʼmo Amimelekiʼe Faikoʼmo ami vayaʼaleʼmo yagaino neʼapateya vekaʼeʼmo ataleʼana halate Filisatini kotegamo uʼnaʼae. 33#Loa 32:40; 33:27Inagi Emalehamuʼa mago tamalisiki yosamo Miyasima kotegamo fai maleʼneno Ala kava neʼmo muki afinaʼae afinaʼaeʼmo neʼmaiya Gotitefeʼmo mono huʼniye. 34Inagi Emalehamuʼa kalaga hageno uno kalaga vekamoʼmo yatala afinaʼmo Filisatini vayaʼai mopaleʼmo maiʼniye.
Currently Selected:
Aepa Gemae 21: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
