Aepa Gemae 33
33
Yekopuʼa uʼnigeʼana Isoʼeʼmo fotu huʼnaʼa gemae
1Yekopuʼa neʼunoʼaeʼmo alino aulu heno ageyana Isoʼmo fo hataletiʼa vayaʼaʼeʼmo eʼnageno apakeʼniye. Apaketenoʼaeʼmo mafaʼnetapimo alitapa lokaete lokaete hiyo, huno hapa paigeʼa Liyaʼmo ani kavaʼmo huʼnigeno Lesoʼmo ani kavaʼmo huʼnigeno aliʼyaʼamo neʼaliʼa atalaʼmoganimo ani kavaʼmo huʼnaʼageʼa huʼnae. 2Yekopuʼa aliʼyaʼamo neʼaliʼa atalanagi mafaʼne anagaʼanigi huno alino hogoteno apateteno apakae apakamelegamo Liyaʼe mafaʼne anagaʼaʼeʼmo apateteno anileʼmo Lesoʼe mafaʼneʼamo Yosefeʼmo henagamo alino anateteno viyo, huʼniye. 3Yekopuʼa uno hogoteteno seveniʼa kanaleʼmo ape hute hute hulino uno nepuʼamo haopaleʼmo avaʼyi huʼniye.
4 #
Aep 45:14-15; Sam 127:3 Huʼniyaʼmonanafa Isoʼa nagu nagu huno eno anu kiteno haeno neʼnigeʼana aviʼyaʼmo huʼnaʼae. 5Isoʼa alino aulu heno ageyana aʼne mafaʼneʼamo eʼnageno apaketenoʼaeʼmo Yekopufeʼmo, Apakaemo ina lagimo kagaeʼeʼmo maiʼnae, huno ge huno afi geʼnigenoʼaeʼmo, kagae aliʼyakamo neʼaliya vekamo Gotiʼa fikumo naha maeno namiʼniya mafaʼne anagaʼmae, huno ha paiʼniye. 6Inagi aliʼyaʼmo neʼaliʼa atalaʼe mafaʼne anagaʼaniʼeʼmo eʼa ape huʼnae. 7Liyaʼe mafaʼne anagaʼaʼeʼmo eʼa ape hutageʼanaeʼmo Lesoʼe Yosefeʼeʼmo eʼana ape huʼnaʼae. 8Isoʼa Yekopufeʼmo, Na kavatefeʼmo muki vayaʼe yuna afuʼeʼmo alika apateʼnanageʼa nagaetegamo eʼnae, huno ge huno afi geʼnigenoʼaeʼmo, Ala vekaʼniye, huno, Alagepa kaipamo kalika natesanafeʼmae, huno ha paiʼniye. 9Isoʼa, Naganaʼnimogae, huno, nagaemo ago alagi haiʼmo aliʼnove, huno huʼniye. Kagaetegamo haneʼniya yaʼmo kagaikageʼmo aliyo, huno ha paiʼniye. 10Yekopuʼa hunoʼaeʼmo, Haʼao, kahaoke hovanagi, alagepa huka kaipamo namisanaʼmoʼmo inagi fikumo nekamuva yaʼmo afaʼa aliyo. Nagaemo Goti augosafiʼmo agegekana huʼna kagae kaugosafiʼmo kageʼnove. Kagaemo nagaefeʼmo amuse huʼnisanaʼmoʼmo afaʼa aliyo. 11Gotiʼa fikumo naha maeno namiʼnigeʼna muki yaʼaʼnimo alagi haiʼmo haneʼniyaʼmofeʼmo kahaoke hovanagi, fikumo nekamuva yaʼmo afa aliyo, huno lokiya gefatiʼmo huʼnigeno Isoʼmo aliʼniye. 12Henagaʼamo Isoʼa hunoʼaeʼmo, Inagi lagaemo ugune. Nagaemo uʼna hogotegauve, huno huʼnigeno 13Yekopuʼa hunoʼaeʼmo, Ala vekaʼniye, huno, ago afiʼnane, mafaʼne anagaʼmo lokiyaʼapimo ohaneʼniye. Nagaemo sipisipi anagaʼaifenagi alu afu alu afu anagaʼaifenagi nu neʼnaya apanaʼau anagaʼaifenagi huʼna nagesamo afuve. Magoke felugamo apavalelita visunana ago faligae. 14Kahaoke hovanagi, kagaemo uka hogotetegeʼna nagaemo kakame huʼna vino. Muki yuna afu anagaʼmo uʼa hogotetesageʼna nagaemo vase vase huʼna visugeʼa apanaʼau anagaʼmo ani kava huʼa visayaʼmoʼmo afaʼa alagepa huʼa ugae. Ani kavaʼmo huliʼna uʼna Siya kotegamo ala vekaʼnilegamo avaʼyi huguve, huno ha paiʼniye.
15Isoʼa hunoʼaeʼmo, lapakaeʼeʼmo magokepi visayafeʼmo mago nagaeʼeʼmo eʼnaya vayapatiʼmo apategauve, huno huʼnigeno Yekopuʼa hunoʼaeʼmo, Ala vekaʼniye, huno, na agufa aliʼyaʼapimo haneʼniye. Kagaemo amuse hisanana kanalene, huno ha paiʼniye. 16Inagi Isoʼa ani afinaʼmo Siya kotegamo aino atagineno uʼniye. 17Yekopuʼa Sukoti kotegamo uno noʼamo kige pulumaka anagaʼamogi yege noʼapimo kige muki afuʼamogi yege noʼapimo kige huʼniye. Ina kavaʼmo huʼniyaʼmofeʼmo ani koʼmo agiʼamo Sukoti kone, huʼa ateʼnae. Ani agimo aepaʼamo yege noʼmae.
18Yekopuʼa Sukoti kotegatiʼmo ataleno Kenani kotega Sekemi taonifiʼmo hanageke yaʼmo oʼalino alagepa huno eno avaʼyi huʼniye. Agaemo ani afinaʼmo Patani Alami kotegatiʼmo ataleno Sekemi taonifiʼmo eno ani taonimo haopaleʼmo seli noʼamo alino ataleno alino he tino ateʼniye. 19Ani mopamo Sekemi afoʼamo Hamo mafaʼne anagaʼmogi mopamo vani hataleti siluva agufa moniletiʼmo miya faiʼniye. 20Miya faiteno Gotiʼmo ofalini amisiya yafa hiʼyalamuʼmo huteno agiʼamo E Eyohe Isaleliʼae huno ateʼniye.
Currently Selected:
Aepa Gemae 33: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
