Aepa Gemae 43
43
Yosefe nepuʼamogimo Menisemenimo avaleliʼa halate Isipi kotegamo uʼnaya gemae
1 #
Ap 7:11-13
Inagi ani kafu kavaʼmoʼa Kenani koteʼmo magoʼe huno lusi kafu kavaʼmo afole aiʼniye. 2Inagi Isipi kotegatiʼmo aliniʼeʼnaya vitimo apakaeʼe afamo anagaʼapiʼeʼmo ago maiʼa neme neme uʼa ago neʼa hano huteʼapaeʼmo afoʼapimoʼmo hunoʼaeʼmo, Halate Isipi kotegatiʼmo utapa aise neʼyaʼmo miya failita eyo, huno huʼniye. 3#Aep 42:20Yuta hunoʼaeʼmo, Neyagaiya vekamoʼmo lokiya gemo hunoʼaeʼmo, lapakanatapimoʼmo avalelitapa oʼmesayana inagi lapakesuvafeʼmo alagi oʼnahaiye, huno laha paiʼniye. 4Kagaemo laganatimofeʼmo he, huka hisanageno lagaegiʼeʼmo visiyaʼmoʼmo lagaemo afaʼa lamita neʼyaʼmo miya faigune. 5Alika atesanageno oʼvisiyana inagi lagaemo uta olamigune. Ani neʼyagaiya vekamoʼmo laha painoʼaeʼmo, lapakanatapimoʼmo lapakaegiʼeʼmo oʼmesiyaʼmoʼmo lapakesuvafeʼmo alagi oʼnahaiye, huno huʼniye. 6Isaleliʼa hunoʼaeʼmo, lapakaemo na kava higetapaeʼmo ani neʼyagaiya vekaeʼmo mago laganatimo maiʼniye, hutapa ha paiʼnae. Lapakaemo lusi kana yaʼmo alitapa namiʼnae, huno huʼniye. 7Apakaemo ha paiʼapaeʼmo, Ani vekamoʼmo lagaitiʼe afamo anagatiʼefeʼmo lusi kava huno loka huno lafi geʼniye. Agaemo hunoʼaeʼmo, Afotapimoʼmo ago faliʼnifi afaʼa maiʼniye. Mago konagatapimoʼmo maiʼnifi oʼmaiʼniye, huno lafi geʼnigetaekeʼmo geʼaleʼmo aeta atagaina huta ha paiʼnone. Haiya kava huta, lapakanatapimoʼmo avalelitapa eyo, huno hugiye, huta oʼafiʼnone, huʼa ha paiʼnae.
8Inagi Yutaʼa afoʼamoʼmo Isalelifeʼmo ha painoʼaeʼmo, Lagaemo ofalita afaʼa maisunafeʼmo ani neya mafaʼnemo afaʼa alika ategetao lagaegiʼeʼmo ugune. Lagaegi kagaegi aise mafaʼne anagatigi huta ofalita afaʼa maigune. 9#Yop 17:3; Fm 18-19; Hi 7:22Anonale nagaemo agae aimuʼyaleʼmo kana yaʼmo aliguve. Inagi nagaemo avaleliʼna kagaetegamo oʼmesuvaʼmoʼmo muki afinaʼmo ani kana yaʼmo nagaeteʼmo alagi hanege hanege huno hanegaiye. 10Lagaemo manileʼmo yatala afinaʼmo oʼmaiʼnonesinana napa tu afinaʼmo ago uteta eta maiʼnonesine, huno huʼniye. 11#Ap 21:14Afoʼapimoʼmo Isaleliʼa hapa painoʼaeʼmo, Mago alu kaʼmo ohaneʼnisiyaʼmoʼmo ani kavaʼmo hiyo. Lapakaemo mani kotetiʼmo hogote neʼyaʼmo fikumo amisayafeʼmo kutapifiʼmo aita alinitapa visaya neʼyaʼmo yosa anufati malasinigi lume anugi alagepa atumo neʼaiya uveligi alu alagepa yosa alaga alu alagepa yosa alagagi hutapa alinitutapa amiyo. 12Hogotetapa alinita uʼnaya monimo halate mago monimo alinitapa viyo. Kutapifiʼmo aiteʼa lapamiʼnaya moniʼeʼmo alinitapa viyo. Fiku yanageʼa apake kanisigeʼapaeʼmo oʼaliʼa ataleʼnegae. 13Lapakanatapimoʼmo ani vekalegamo avalelitapa viyo. 14Nunumu nehuva geʼnimo haneʼniyana muki lokiyaʼamo haneʼniya Gotiʼa ani vekamo aipa agesamo alino he tino atesigeno hau huno lapatetenoʼaeʼmo Simiyoniʼe Menisemaniʼeʼmo afaʼa anatesigeʼana nagaetegamo egaʼae. Mafaʼneʼnimo afela hesayaʼmoʼmo kanalene afaʼa afela hegaiye, huno huʼniye.
15Inagi apakaemo fiku amisaya yaʼmo alige Menisemaniʼmo avalege huteʼa lole agufa monimo aliteʼa Isipi kotegamo uʼa lamiʼa Yosefe aulagaleʼmo avaʼyi huʼnae. 16Yosefeʼa apakeʼniyana Menisemaniʼeʼmo eʼnageno apaketenoʼaeʼmo noʼaleʼmo aliʼya neʼaliya vayaʼaiteʼmo neʼyagaiya vekaeʼmo ha painoʼaeʼmo, Ani vayaʼmo apavalelika noʼnifiʼmo uvo. Kagaemo mago pulumakamo amagika kaesanageta mani vayaʼe nagaeʼeʼmo hiʼyalamuteʼmo fai maiʼneta feluga neʼyaʼmo negaune, huno huʼnigeno 17-18ani vekamoʼa Yosefe ha paiʼniya kavaʼmo huʼniye. Agaemo Yosefe notegamo apavalelino uʼnigeʼapaeʼmo koli huʼnae. Apakaemo huʼapaeʼmo, Hogoteta eʼnona afinaʼmo monitimo halate aliʼa kutifiʼmo ku aiʼa maleʼnageta alinita uʼnona moniletifeʼmo latafauʼa kalavusi huʼa latesaya kavaʼmo aepaʼaeʼmo kahauya hisayafeʼmo lavaleliʼa uʼa kalavusi huʼa lateteʼa noki afu anagatimo apavalegae, huʼa huʼnae. 19Huʼa apakesamo afiʼnayaʼmofeʼmo Yosefe noʼmo kipateʼmo neʼuʼapaeʼmo neʼyaʼaleʼmo neʼyagaiya vekalegamo uʼa agaeʼeʼmo gege huʼnae. 20O Ala nene, huʼa, Kahaoke honanagi, lagaemo hogote afinaʼmo maniletiʼmo emiteta neʼyaʼmo miya faiʼnone. 21Miya faiʼnonaʼmonanafa ani agufa kavaʼmo afole aiʼniye. Lapataleta uta kategamo havaesuna koteʼmo avaʼyi huʼnonateʼmo kutifiʼmo alita avayaka huta ageʼnonana mukiʼamogita kuʼmo avayaleʼmo monitimo mukiʼamo afaʼa haneʼnigeta ageʼnone. Lagaemo ani monimo alinita halate eʼnone. 22Lagaemo mago alu monimo neʼyatimo miya faisuna moniʼeʼmo alinita eʼnone. Ina laʼmo mani monimo alino kutifiʼmo ku ai maleʼnifi huta oʼageʼnone, huʼa ha paiʼnageno 23agaemo hunoʼaeʼmo, Koli osutapa lapaipamoʼmo falu huʼninagetapa maiyo. Afotapimo Gotiʼamo lapakae Gotitapimoʼmo kutapifiʼmo ani monimo ku aino lapateʼniye. Neʼyaʼmo miya faiʼnaya monimo nagaekeʼmo aliʼnove, huno huteno uno Simiyoniʼmo avalelino apakaetegamo eʼniye. 24Huʼnigeno apakaemo Yosefe nopiʼmo apavalelino uno haiʼniye. Agaemo apaiyamo sese hisayafeʼmo ani he fino apamiteno noki anagaʼapimo neʼyaʼmo apamiʼniye. 25Yosefeʼa, Felugakukuʼmo eʼna ani konaga anagaʼeʼmo magokepi neʼyaʼmo negaune, huno huʼniya gemo hapa paiʼniyaʼmofeʼmo amuse yaʼmo fiku amisayafeʼmo aliʼa alo huʼa maiʼnae. 26#Aep 37:7Inagi Yosefeʼa nopiʼmo ago eʼnigeʼapaeʼmo apakaemo ani amuse yaʼmo aliniʼuʼa agaemo amiteʼa apaleʼyamo faiʼneʼa Yosefe aulagaleʼmo ape huʼa ateʼnae. 27Yosefeʼa apakaefeʼmo, alagepa hutapa maiʼnafiye, huno apafi geʼniye. Afotapimo kosunaeʼmo naha paiʼnaya vekamo haiya kava huno maiʼnye. Ago faliʼnifi afaʼa maiʼniye, huno apafi geʼnigeʼapaeʼmo 28geʼaleʼmo ina ge huʼa aeʼa atagaina huʼa ha paiʼnae. Ala vekae, huʼa, kagae aliʼyaʼmo neʼaliya vekamo afotimoʼmo ofalino afaʼa maiʼniye, huʼa ha paiteʼa agaeteʼmo ape huʼa ateʼnae. 29Yosefeʼa ageʼniyana aganaʼamoʼmo itaʼamo mafaʼnemo Menisemeniʼmo maiʼnigeno agetenoʼaeʼmo, ani vekaeʼmo naha paiʼnaya neya mafaʼnemo lapakanatapimoʼmofiye, huno huteno Menisemenifeʼmo hunoʼaeʼmo, Mafaʼneʼniyo, huno, Gotiʼa fikumo kaha maeno kamino, huno huʼniye. 30Yosefeʼa aganaʼamofeʼmo aipafatiʼmo hau ayamopafiʼmo lusi kava huno hauʼnigeno aviʼyaʼmo hisiyafeʼmo apataleno aeno anagi maleʼniya yapilagamo uno haino aviʼyaʼmo huʼniye. 31Aviʼyaʼmo hutaleno augosamo sese huno ataleteno halate atagineno apakaetegamo emineno ainagamo faiʼniya kavaʼmo atafauno ateteno maiʼniye. Inagi aliʼyaʼamo neʼaliya vayaʼaifeʼmo, neʼyaʼmo hatitapa hiʼyalamuteʼmo maleyo, huno hapa paiʼniye. 32Apakaemo Yosefeʼmo aote hiʼyalamuteʼmo neʼyaʼamo hatiʼa atege nepuʼamogimo apaote hiʼyalamuteʼmo hatiʼa apatege Isipi vayaʼmo apakaeʼeʼmo neʼyaʼmo neʼnaya vayaʼmo apaote apatege huteʼa hiʼyalamutetiʼmo neʼnae. Isipi vayaʼmogimo Himulu vayaʼeʼmo magokepi lokaeʼa maiʼneʼa neʼyaʼmo noʼnayaʼmofeʼmo Yosefeʼmo aote hiʼyalamutetiʼmo neʼnigeʼa konagaʼamogimo apaote hiʼyalamuteʼmo neʼnageʼa Isipi vayaʼmo apaote hiʼyalamuteʼmo maiʼneʼa neʼyaʼmo neʼnageʼa huʼnae. Himulu vayaʼeʼmo magokepi lokaeʼa maiʼneʼa neʼyaʼmo nesaya kavaʼmo Isipi vayaʼai apaulagaleʼmo alagi kanale kavaʼmo ohaneʼniyaʼmofeʼmae. 33Nepuʼamogimo neʼyaʼmo nesayafe huʼapaeʼmo fai maiʼneʼa nesaya siyamo apaote apaote huʼa lekana paiʼa maleʼnae. Apakaemo ina kava huʼa hogoteʼa yege mafaʼnemo maitegeʼa maeli uʼa henaga mafaʼnemo maiʼniye. Ani konaga anagaʼmo ani kava huʼa maiʼneʼa lusi kava huʼa hapau aiteʼa apakaiʼapi apakaiʼapimo alino agegeno alino agegeno huʼa maiʼnae. 34Yosefeʼa hiʼyalamuʼaletiʼmo neʼyaʼmo alino apamiʼnigeʼa neʼnayaʼmonanafa Menisemaniʼmo naya magokayagaʼa agufa kanaleʼmo magoʼe huno aeno apaka seno neʼyaʼmo hatino ateʼniye. Inagi apakaemo Yosefeʼeʼmo magokepi neʼyaʼmo nege aniʼmo nege nehuʼapaeʼmo apamogaga aiʼnae.
Currently Selected:
Aepa Gemae 43: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
