Aepa Gemae 6
6
Vayaʼmogimo hosu kavaʼmo huʼnaya kavafeʼmo huʼniya gemae
1Henagaʼamo ma mopafiʼmo asole ve aʼnemo afole aiteʼapaeʼmo asole a mafaʼnemo aliʼa apateʼnae. 2#Lo 7:3-4Ani afinaʼmo Goti ve mafaʼne anagaʼamogimo ani a mafaʼne anagaʼmo ma mopafi vayaʼai a mafaʼne anagaʼaifeʼmo alagepa apaulagamo apakeʼnaya a mafaʼne anagaʼmo maiʼnageʼa apaketeʼapaeʼmo alisageno aʼne anagaʼapimo maisayafeʼmo hapaʼye huʼniyaʼmofeʼmo aliʼnae. 3#Niy 9:30; Aiy 63:10Inagi Ala kava neʼmoʼa hunoʼaeʼmo, Nauneʼnameʼnimoʼmo apaipamo aliʼa afe lesayafeʼmo ayamufa ge huge hugetesigeʼa oʼafisayana magoʼe huno ayamufa gemo osuno afaʼa apatalegaiye. Atafa apaipamo aliʼnayaʼmofeʼmo nagaemo ma mopafi maisaya afinaʼapimo vani hataleti tuvetiʼa kafugamo apatesugeʼa maigae, huno huʼniye. 4#Nap 13:33Ani afinanagi henagaʼamo afole aiʼniya afinanagi huʼa Gotiʼa ve mafaʼne anagaʼmogimo ma mopafi a mafaʼneʼapiʼeʼmo magokepi lokaeʼa havaeteʼa alopa apakufaʼe vayaʼmo aliʼa apateʼnae. Apakaemo lokiya apayamufa vayaʼmo maiʼneʼa asole aeto aeto agufa kavakoʼmo huteʼa ala apaki vayaʼmo maiʼnae.
5 #
Aep 8:21; Sam 14:2-3 Ani afinaʼmo Ala kava neʼmoʼa ma mopafi ve aʼnemogi hosu kavaʼapimo ageyana alagi alopa hosu kavaʼmo haneʼnigeno ageʼniye. Muki vayaʼmogimo muki apaipa apakesamo neʼafiya yaʼapifiʼmo hosu kavaʼageʼmo muki afinaʼae afinaʼaeʼmo hanelino hanelino usiya agufa kava huʼnigeno ageʼniye. 6#Hat 32:14; Nap 23:19; Mal 3:6Ala kava neʼmoʼa vayaʼmo alo huʼna oʼapatesuva yafena alo huʼna apateʼnove, huno agesamo afiteno aipafatiʼmo agafu kiʼniye. 7Agesamo afinoʼaeʼmo alo huʼna apateʼnova vayaʼmo ma mopafatiʼmo aliʼna hano huʼna apatalegauve. Inagi nagaemo vayanagi yagagafagi afugi kalagi kokuʼnate namagi huʼna aliʼna hano huʼna apatalegauve. Alo huʼna oʼapateʼnovesinana kanale huʼniyesine. 8#Hat 33:12Huʼniyesinaʼmonanafa Noaʼa Ala kava neʼmo aulagaleʼmo fikumo ha maeno amiʼniya kavaʼmo ago agetenoʼaeʼmo aliʼniye.
9-10 #
Lu 1:6; Aep 5:24 Noa aginago vayaʼai apakimo haneʼniye. Agaemo loleʼe magoʼe ve mafaʼne anagaʼamo Semiʼagi Hamuʼagi Yafetiʼagi huʼa maiʼnae. Noaʼa fatago vekamo Goti aulagaleʼmo maiʼniyaʼmofeʼmo vaiʼmo oʼaliʼniye. Noaʼa Goti ao vekamo maiʼnigeʼana magokepi lokaeli uʼeʼa huʼana maiʼnaʼae. 11-12#Aep 8:21; Lo 3:23Maiʼniyaʼmonanafa muki vayaʼmo Goti aulagaleʼmo hosu vayaʼmo maiʼneʼa kamemo huge vayaʼmo hapaege kaveta huge kavaʼmokeʼmo ma mopafiʼmo havai teʼnigeno ageʼniye. 13#Iyi 7:2-3Gotiʼa Noafeʼmo ha painoʼaeʼmo, Nagaemo muki vayaʼmo aliʼna hano huʼna apatalegauve. Kamemo huge vayaʼmo hapaege kaveta huge nehaya kavaʼmokeʼmo ma mopafiʼmo havai teʼniyaʼmofeʼmo apakaeʼe ma mopaʼeʼmo aliʼna hano huʼna apatalegauve.
14Kagaemo alagepa lokiya yosamo alika mago sipimo alo huvo. Kagaemo ina kava huka aeka anagiteka sipimo yuʼilagaʼaʼe malagaʼaʼeʼmo kameletiʼmo falegane. 15Kagaemo ina kava huka ani sipimo alo huvo. Yatalaʼamo 130 mitagi alopaʼamo 22 mitagi anaga haisiyaʼalegamo 13 mitagi huka alo huvo.
16Hanaesanategamo kaleso yosamoʼmo uno haino ohapaisigeka aiseʼamo yasi kaʼmo ateteka hanae malo. Yuʼilagaʼamo loleʼe magoʼe huka aeka hanagiyo. Anagamo mago aeka hanagite folagapiʼmo mago aeka hanagite afepilagamo mago aeka hanagite hu malo. Magoke kipaʼmo folagatetiʼmo kasage malo. 17#Aep 7:4; 2 Pi 2:5Nagaemo mopamo aeno ati kaesiyafeʼmo alopa aniʼmo aliʼna afole aiʼna ategauve. Aliʼna afole aiʼna atesugeno muki afaʼa neʼmaiya yaʼmo aeno apati kaegaiye. Muki afaʼa neʼmaiya yaʼmo ma mopafiʼmo maiʼnaya yaʼmo faligae. 18#Aep 15:18; 17:2,7Faligayaʼmonanafa nagaemo kagaeʼeʼmo magokepi kotalakemo hu malegauve. Kagaegi akagi ve mafaʼne anagakagi mafaʼne anagakamogi aʼne anagaʼapigi hutapa sipifiʼmo uta haiyo. 19Kagaemo muki yagagafagi afugi kalagi huka veʼe aʼeʼmo lole lole huka apavalelika sipifiʼmo uka haika apatesanageʼa kagaeʼeʼmo ofaliʼa afaʼa maigae. 20Muki alu nama alu namamo apavalege muki alu afu alu afumo apavalege kalamo apavalege muki alu yagagafa alu yagagafamo apavalege hulikuka sipifiʼmo apatesanageʼa afaʼa maigae. 21#Aep 1:29Kagaemo muki alu neʼya alu neʼyaʼmo alika sipifiʼmo malo. Lapakaeʼe muki yagagafamogiʼeʼmo nesaya neʼyafeʼmo huve, huno ha paiʼniye. 22Noaʼmo Gotiʼa huvo, huʼniya gemo muki gemo alagi akame huʼniye.
Currently Selected:
Aepa Gemae 6: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
