Luki 11

Yesuʼa nunumuʼmo hisaya kavafeʼmo huʼniya gemae

(Mt 6:9-15; 7:7-11)

1 # Lu 5:33 Yesuʼa nunumuʼmo huno hano huteno maiʼnigenoʼaeʼmo mago vekamo geʼamo neʼafiya vekamoʼmo hunoʼaeʼmo, Ala kava nene, huno, Yoniʼa nunumuʼmo hisayafeʼmo geʼamo neʼafiya vayaʼmo alino apaya maleʼniya kava huka alika laya malo, huno ha paiʼnigenoʼaeʼmo, 2nunumuʼmo hisayafeʼmo ina gemo hutapa hiyo.

Afotimogae, hutapa, kokuʼnapi maiʼnanageno kagikamoʼmo alagepa huno kaote haneʼniyanagi aliʼa asaga hiyo. Vayaʼaiteʼmo yagaika apatesana kavaʼmo ma mopafiʼmo afole aino. Muki kokuʼnapi maiʼnaya vayaʼmogimo gekamo akame nehaya kava huʼa ma mopafiʼmo maiʼnaya vayaʼmogimo gekamo akame hiyo. 3Muki felugaʼae felugaʼaeʼmo hemenimo nesuna neʼyaʼmo lamiyo. 4Lagaetegamo hosu kavaʼmo nehaya vayaʼaifeʼmo hutaeʼmo, afaʼa ateyo, huta nehuna agufa gemo huka kagaetegamo hosu kavaʼmo nehisunagekaeʼmo lagaefeʼmo hukaeʼmo, afa ateyo, huka huvo. Lamalageka hisiya kavategamo lavalelikuka olateka hosu vekamo ayapatiʼmo alika hafaleka latalo,

hutapa nunumuʼmo hiyo.

5-6Yesuʼa apakaefeʼmo hunoʼaeʼmo, lapakaepatiʼmo mago vekamogamo haniʼilaga folaguʼmo uno ao vekaeʼmo hunoʼaeʼmo, Veʼnimo, huno, nao vekamo eno noʼnifiʼmo maiʼniyana neʼyaʼmo nesiya yaʼmo alagi ohaneʼnigi loleʼe magoʼe peleti mayamo anona huka nato, huka ha paisanagenoʼaeʼmo 7noʼafatiʼmo hunoʼaeʼmo, ago kita ki maleta mafaʼne anagaʼniʼe nagaiʼniʼeʼmo ago havaeʼnonaʼmofeʼmo he tiʼna neʼyaʼmo aliʼna okamiguvanagi afaʼa ateka uvo, huno kaha paisigekaeʼmo na agufa kavaʼmo hugane. 8#Lu 18:5Lapa nepauve, huno, kao vekamo maiʼniyaʼmofeʼmo okamiguve, huno nehisigekaeʼmo magoʼe magoʼe huka ge hukaeʼmo, afaʼa namiyo, huka ge nehisanagenoʼaeʼmo neʼyaʼmo kamigiye, huno hapa paiʼniye. 9Inagi nagaemo lapa paiʼnaeʼmo, afaʼa afi nekegenoʼao lapamigiyanagi. Kahauya hiyo agetapa aligayanagi. Kitaleʼmo hakalu hakalu nehigenoʼao kitamo yakino lapategaiyanagi. 10Ge huʼa afi nekaya vayaʼmogimo neʼaliye. Kahauya nehaya vayaʼmogi ageʼa neʼaliye. Kitaleʼmo hakalu hakalu nehaya vayaʼmo kitamo yakino neʼapate. 11Mafaʼnetapimogi huʼapaeʼmo, noyamemo alika namiyo, huʼa lapa paisagetapaeʼmo nagaloʼyavemo afaʼa alita apamigafiye. 12Inagi mafaʼnetapimogi huʼapaeʼmo, kokole amuʼmo alika namiyo, huʼa lapa paisagetapaeʼmo sokopiyonimo alita apamigafiye. 13Lapakaemo hosu vayaʼmo maiʼnayaʼmonanafa mafaʼnetapimo alagepa yaʼmo alita neʼapamiya agufa kavaʼmo huno kokuʼnapi afotapimofeʼmo kaote Kaunekameʼmo alika namiyo, huʼa ge huʼa afi gesaya vayaʼmo afaʼa magoʼe huno alino apamigiye, huno hapa paiʼniye.

Yesufeʼmo huʼapaeʼmo, Satani himamuʼaletiʼmo ani agufa aliʼyaʼmo neʼaliye, huʼa huteʼa huʼa faipa huʼa ateʼnaya gemae

(Mt 12:22-30; Mk 3:20-27)

14Yesuʼa agemo noʼaiya vekamo aipafatiʼmo mago hosu aune vekamo alino hafaitalegeno uʼnigeno ani vekamoʼmo agemo aiʼnigeʼa afiteʼapaeʼmo hapau aiʼnayaʼmonanafa 15#Mt 9:34; 10:25mago vayaʼmogimo huʼapaeʼmo, Miyelisimuli himamuʼaletiʼmo hosu apaune vayaʼmo alino hapa faino neʼapatale, huʼa huʼnageʼapaeʼmo 16#Mt 12:38mago vayaʼmogi huʼapaeʼmo, kokuʼnapi aune kavaʼmo huka alika lave liyo, huʼa ha paiʼnagenoʼaeʼmo 17apaipafiʼmo apakesamo afiʼnaya kavaʼapimo agetenoʼaeʼmo, magoke gamani vayaʼmogi yagaiʼa neʼapataya vayaʼmogimo apakaiʼapimo aliʼa fako huʼa apateteʼa kamemo hisayana ani gamanimo ago asagauno aigiye. Magoke afamo anagapatiʼmo apakaiʼapimo aliʼa fako huʼa apateʼnisayana atagu faeʼa uʼeʼa huʼa maisageno apaki ohanegaiye. 18Lapakaemo nagaefeʼmo hutapaeʼmo, Miyelisimuli himamuʼaletiʼmo hosu apaune vayaʼmo alino hapafaino neʼapatale, hutapa nehayaʼmonanafa Sataniʼa agaiʼa vayaʼmo hosu apaune vayaʼaitegamo kame huno apatesiyana haiya kava huʼa Satani nofi vayaʼmo lokiya vaiʼa maigae. 19Nagaemo Miyelisimuli himamuʼaletiʼmo hosu apaune vayaʼmo aliʼna hapafaiʼna neʼapatalesuvana haiya kava huʼa getapimo neʼafiya vayaʼmogi aliʼa hapafaiʼa neʼapatalae. Getapimo neʼafiya vayaʼmogimo huʼapaeʼmo, hosu gemo huʼnae, huʼa lapa paigae. 20#Hat 8:19Nagaemo Gotiʼa ati yagaina ayatetiʼmo hosu apaune vayaʼmo aliʼna hapafaiʼna neʼapatalesuvana Gotiʼa yagaino neʼapateya kavaʼmo ago eno lapaopaleʼmo afole aiʼniye. 21Mago lokiya vekamoʼmo atiʼaʼe naipeʼaʼeʼmo aliteno noʼaleʼmo yagaino maiʼnisiyana kagemi yaʼamo afaʼa hanegaiyaʼmonanafa 22#Kl 2:15mago noʼmo afoʼamo lokiyaʼamo ago aeno aga seʼniya vekamoʼmo eno noʼmo afoʼamo amagino aeno aga seteno muki yaʼaeʼmo alino amufa amiʼniya yaʼamo alige muki kagemi yaʼamo alige hulinuno ao vayaʼmo alino fako huno apamigiye. 23#Lu 9:50Nao vayaʼmo oʼmaiʼnisayana kame vayaʼnimo maiʼnae. Nagae sipisipimo aliʼa anupa huʼa noʼapataya vayaʼmogimo aliʼa atagu faeʼa neʼapatalae, huno hapa paiʼniye.

Hosu aune vekamo halate aino atagi neno eʼniya gemae

(Mt 12:43-45)

24Hosu aune vekamo mago vekamo aipafatiʼmo alino hafaitalegeno ataleno uʼniya hosu aune vekamoʼmo aniʼmo ohaneʼniya koteʼmo uteno maino falu hisiya yafeʼmo kahauya hulino uneno hugeteno oʼageno ataleʼna halate aiʼna atagi neʼna uʼna noʼnifiʼmo uʼna haiʼna maiguve, huno huʼniye. 25Huteno eno ageʼniyana ani nopiʼmo vagi vagi huno alino kanale hu maleʼnigeno afaʼa haneʼnigeno age maleteno 26#Yo 5:14aino atagineno uno seveniʼa hosu apaune vayaʼmogi magoʼe huʼa aeʼa aga seʼa hosu kavaʼmo nehaya hosu apaune vayaʼmo apavalelino eʼnigeʼapaeʼmo ani nopiʼmo uʼa haiʼa maiʼnae. Hosu aune vekamo aipafiʼmo maiʼniya vekamoʼmo hogoteno hosu kavaʼmo huno maiʼniyaʼmonanafa henagaʼamo magoʼe huno lusi hosu kavaʼmo huno maiʼniye, huno hapa paiʼniye. 27#Lu 1:28,42,48Mago a kanomo asole vayaʼmo maiʼnaya folagapiʼmo maiʼniya a kanomoʼmo alopa gefatiʼmo ge hunoʼaeʼmo, alino kateteno nuʼmo kamiʼniya afeʼmo Gotiʼa alino auleno ateʼniye, huno huʼnigeno 28#Lu 8:15,21Yesuʼa hunoʼaeʼmo, lama gemo nehanaʼmonanafa Goti geʼamo afiteʼa akame nehaya vayaʼmo alino auleno apateʼniye, huno ha paiʼniye.

Mago vayaʼmogi kaune kavaʼmo huka lave liyo, huʼa huʼnaya gemae

(Mt 12:38-42; Mk 8:12)

29 # Mt 16:4 Asole vayaʼmo eʼa kili paeʼa maiʼnagenoʼaeʼmo, hemeni afinaʼmo maiʼnaya vayaʼmo hosu vayane. Apakaemo huʼapaeʼmo, kaune kavaʼmo huka lave liyo, huʼa nehayaʼmonanafa huʼna apave oliguve. Naune kavaʼmo huʼna apave oliguvaʼmonanafa Yonaʼa Gotitegati gemo alinineno aeno hakalo huno hapa nepaiya vekamoʼmo mago aune kavaʼmo hugekana huno afole aiʼniya agufa kavaʼmo huʼna apave liguve. 30Yonaʼa Niniva taonifiʼmo maiʼnaya vayaʼmogi apaulagaleʼmo aune kavaʼmo hugekana huno afole aiʼniya kavaʼmo huno Vemo Mafaʼnemoʼmo hemeni afinaʼmo maiʼnaya vayaʼai apaulagaleʼmo aune kavaʼmo hugekana huno afole aigiye. 31#1 Kin 10:1-10Gotiʼa agoti huno apatesiya afinaʼmo Siʼma kotegamo maiʼnaya vayaʼaiteʼmo yagaino neʼapateya ala a kanomoʼmo he tinoʼaeʼmo hemeni afinaʼmo maiʼnaya vayaʼaifeʼmo hunoʼaeʼmo, hosu vayane, huno hapa paigiye. Ani a kanomoʼmo Solomoniʼa alagepa huno ageteno afiʼniya vekamo geʼamo afisiyafeʼmo afagi kotegatiʼmo eʼniyaʼmonanafa Solomoniʼmo ago aeno aga seʼniya vekamo manileʼmo maiʼniyana geʼamo alagepa huʼa noʼafiye. 32#Yna 3:5-10Gotiʼa agoti huno apatesiya afinaʼmo Niniva taonifiʼmo maiʼnaya vayaʼmogi he tiʼapaeʼmo hemeni afinaʼmo maiʼnaya vayaʼaifeʼmo huʼapaeʼmo, hosu vayane, huʼa hapa paigae. Yonaʼmo Goti gemo aeno hakalo huno hapa paiʼnigeʼapaeʼmo apaipamo aliʼa afe leʼnayaʼmonanafa Yonaʼmo ago aeno aga seʼniya vekamo manileʼmo maiʼniya vekamo geʼamo alagepa huʼa noʼafiye.

Apaipafi lamueʼmo huʼniya gemae

(Mt 5:15; 6:22-23)

33 # Mk 4:21; Lu 8:16 Vayaʼmogi lamufiʼmo kani aeʼa kaeteʼapaeʼmo hipakapiʼmo oʼmalege samofiʼmo maleteʼa avayamo aiʼa akani malege nosafa nopiʼmo eʼa hai esaya vayaʼmogimo alagepa huʼa ageʼa haleʼa maisayafeʼmo afole yateʼmo hiʼyalamutekeʼmo neʼmalae. 34Lapaulagamoʼmo aeno ha nelegenoʼaeʼmo lapaipafiʼmo lamugana huno aeno ha nele. Lapaulagamo alagepa huno hanesiyana muki lapaipafiʼmo aeno ha nele. Lapaulagamo alagepa huno nohanesiyana muki lapaipafiʼmo haniʼmo nehiye. 35Ehetapiye, huʼna, Naipafiʼmo aeno ha nelefi aeno ha nolefi hutapa lapakesamo afiyo. 36Lapaipafiʼmo aeno ha leʼnisiyaʼmoʼmo magokayaga lahapaopaleʼmo hani yaʼmo ohanesigeno muki lapakufafilagamo aeno ha lesigeno lamumoʼmo lapakufaleʼmo aeno ha neleya kava huno aeno ha legaiye, huno hapa paiʼniye.

Mono vayaʼmogi hosu kavaʼapieʼmo huʼniya gemae

(Mt 23:1-36; Mk 12:38-40)

37 # Lu 7:36; 14:1 Ani gemo huno hano hutegenoʼaeʼmo mago Falasi vekamoʼmo hunoʼaeʼmo, eka noʼnifiʼmo neʼyaʼmo no, huno ha paiʼnigeno eno noʼafiʼmo uno haino hiʼyalamuteʼmo fai maiʼniye. 38Yesuʼa neʼyaʼmo nesiyafeʼmo mono kavaʼmo akame huno ayaʼmo sese osuʼnigenoʼaeʼmo Falasi vekamoʼmo agetenoʼaeʼmo hau aiʼniye. 39#Mt 15:2Ala kava neʼmoʼa hunoʼaeʼmo, Falasi vayaʼmogitapamo kapumo agotofuʼalegaʼe yuvapamo agotofuʼalegaʼeʼmo sese nehayaʼmonanafa lapaipafiʼmo lapaʼye nehiya kavaʼe hosu kavatapiʼeʼmo havai teʼniye. 40Negi vayane, huʼna, Gotiʼa amega apakufamo alo huʼniya vekamoʼmo apakupiʼeʼmo alo osuʼnifiye. 41Lapakaemo agotofulega sese nehayaʼmonanafa aguʼafilaga haneʼniya yaʼaʼeʼmo alita kagemi yaʼapimo ohaneʼniya vayaʼmo apamigeno lapakaetefeʼmo muki yaʼmo alagepa huno haneno. 42Falasi vayaʼmogitapae, huʼna, vaehae, huʼna, lapakaetegamo kage kage hisaya kavaʼmo afole aigiye. Lapakaemo kifenagi atunagi hefigi hutapa alita fako huta ofalinimo neʼamiyana fatago kavaʼmo osuta Gotifeʼmo lapau lapayamopafiʼmo nolapaiye. Gotiʼa ofalinimo neʼamiya kavaʼmo kanale kavaʼmo haneʼniyanagi magoʼe kavaʼmo hutapa fatago kavaʼmo huteta Gotifeʼmo lapau lapayamopafiʼmo lapaino. 43Falasi vayaʼmogitapae, huʼna, ehetapiye, huʼna, lapakaetegamo kage kage hisaya kavaʼmo afole aigiye. Mono nopiʼmo hogote vayaʼmo faiʼa neʼmaiya siyateʼmo maisayafekeʼmo lapauʼniye. Maketi kumateʼmo ge lapamamaeteʼa aliʼa falu fala huʼa lapatesayafekeʼmo lapauʼniye. 44Keʼaepa gemo avoʼmo kaeta alita apaya neʼmalaya vayanagi Falasi vayanagi hutapa aeta ati nekaya vayanagi vaehae, lapakaetegamo kage kage hisaya kavaʼmo afole aigiye. Lapakaemo faliʼnageʼa kiʼa apateʼnaya vayaʼmogi keligana huta maiʼnae. Vayaʼmo keli avayaleʼmo uʼeʼa nehuʼapaeʼmo, apakufaʼamo haneʼniye, huʼa noʼagae, huno hapa paiʼniye. 45Mago keʼaepa gemo afiʼniya vekamoʼmo hunoʼaeʼmo, Tisao, huno, lagaeʼefeʼmo hosu vayaʼmo maiʼnae, huka nehane, huno ha paiʼnigenoʼaeʼmo, 46vaehae, huʼna, keʼaepa gemo afiʼnaya vayaʼaitegaʼeʼmo kage kage hisaya kavaʼmo afole aigiye. Lapakaemo vayaʼmo kana huʼniya aliʼyaʼmo neʼapamiyaʼmonanafa magoke ati yagaina lapayatetiʼmo aliʼyaʼmo noʼaliye. 47Vaehae, huʼna, Lapakaetegamo kage kage hisaya kavaʼmo afole aigiye. Lapakinago vayaʼmo Gotitegati gemo aliniʼeʼa aeʼa hakalo huʼa hapa nepaiya vayaʼmo hapaeʼnagetapaeʼmo kanoluʼapileʼmo konali alita apateʼnae. 48Hapaeʼnagetapa kanoluʼapileʼmo konali alita neʼapatayaʼmonanafa lapakaeʼe lapakinago vayaʼeʼmo magoke agufa lapakesamo neʼafiye. 49Ani kavafeʼmo Gotiʼa alagepa huno agesamo afiteno ageʼniya vekamoʼmo hunoʼaeʼmo, nagaemo geʼnimo aliniʼuʼa aeʼa hakalo huʼa hapa nepaiya vayaʼe apa vayaʼeʼmo aliʼna apatesugeʼa uʼa maiʼnisageʼapaeʼmo kamitimo apamagige apaini huʼa apatege hugae, huno huʼniye. 50Ma mopamo alo huʼniya afinatetiʼmo ma mopafi vayaʼmogimo Gotitegati gemo aliniʼeʼa aeʼa hakalo huʼa hapa nepaiya vayaʼmo kamitimo hapaete hapaete huʼa maiʼnae. Gotiʼa hemeni afinaʼmo maiʼnaya vayaʼmo ani hosu kavatefeʼmo agoti huno apategaiye. 51Hogoteʼa Evoʼmo haeteʼa magoʼe vayaʼmo hapaeme hapaeme eʼa henagaʼamo Sekalaiyasiʼa mono no kumateʼmo haeʼnae. He, lapa paiʼnaeʼmo, Gotiʼa hemeni afinaʼmo maiʼnaya vayaʼmo ani kavatefeʼmo agoti huno apategaiye. 52Keʼaepa gemo neʼafiya vayaʼmogitapae, huʼna, vaehae, lapakaetegamo kage kage hisaya kavaʼmo afole aigiye. Lapakaemo alagepa gemo afisayafeʼmo note kiʼmo ago alinituta maleʼnae. Uta ohaiʼnetapa uʼa haigefeʼmo nehaya vayaʼmo kaʼmo akanita apateʼnae, huno hapa paiʼniye. 53Hapa paiteno ataleno neʼvigeʼapaeʼmo keʼaepa gemo avoʼmo kaeʼa aliʼa apaya neʼmalaya vayaʼe Falasi vayaʼmogiʼeʼmo geʼapiletiʼmo kame huʼa ateteʼa muki kavafeʼmo loka huʼa ge huʼa afige afige huʼnae. 54#Lu 20:20Agoti huʼa atesayafeʼmo hosu gemo hisiyaʼaeʼmae, huʼa huteʼa aneʼaimo hanagigekana hu maleteʼa yagaiʼa maiteʼa afiʼa maiʼnae.

Currently Selected:

Luki 11: kyg2013

Highlight

Copy