Luki 2

Maliyaʼa Yesuʼmo alino ateʼniya gemae

(Mt 1:18-25)

1Ani afinaʼmo hogote vekamo yagaino neʼapateya kini vekamo agiʼamo Sisa Agasasiʼmo hunoʼaeʼmo, muki kotega maiʼnaya vayaʼai apakimo aliguve, huno hu maleʼniye. 2Ani afinaʼmo apakimo hogoteʼa aliʼnaya afinaʼmo Kiniyasiʼa Siliya kotega maiʼnaya vayaʼaiteʼmo yagaino apateʼniye. 3Muki vayaʼamo apakinago vayaʼai taonifiʼmo uʼa apakimo alisiyafeʼmo uʼnae. 4Yosefeʼa Nevini vayapati vekamo maiʼniyaʼmofeʼmo Nasalasa taonimo Galeliya kotegatiʼmo ataleno Yutiya kotegamo aginago vekamo Nevini taonifiʼmo Metelehamumo uʼniye. 5#Lu 1:27Lekana pai maleʼniya aʼmafaʼnemo Maliyaʼa aipaguʼeʼmo maiʼnigeʼanaeʼmo anakimo alisaʼafeʼmo uʼnaʼae. 6Ani koteʼmo maiʼneʼanaeʼmo Maliyaʼa mafaʼnemo alino atesiya afinaʼmo ago afole aiʼniye. 7#Mt 1:25Yege mafaʼneʼamo alino ateteno kenafiʼmo hayaeno ateteno pulumakamogi neʼyaʼmo neʼmalaya yuvapafiʼmo havaeno ateʼniye. Alu kotegatiʼmo nata neʼa eʼnaya vayaʼmo nehavaya nopiʼmo ago kili paeʼnageʼana pulumakamogi nopiʼmo havaesaʼafeʼmo maiʼneʼanaeʼmo alino ateʼniye.

Enisole vekamoʼa sipisipileʼmo neʼyagaiya vayaʼaifeʼmo hapa paiʼniya gemae

8Haniʼilagamo ani taonimo haopaleʼmo sipisipileʼmo neʼyagaiya vayaʼmo kahauleʼmo maiʼneʼa sipisipileʼmo yagaiʼa maiʼnae. 9Ala kava neʼmo enisole vekaʼamo afole aiʼnigeno Ala kava neʼmo ha le konali yaʼamoʼmo aeno ha leʼnigeʼapaeʼmo lusi kava huʼa apamoʼyamo aiʼnae. 10Enisole vekamoʼmo hapa painoʼaeʼmo, lapamoʼyamo oʼaita afiyo. Alagepa gemo muki vayaʼmogi afiteʼa lusi kava huʼa apamogaga aisaya gemo aliniʼna emiʼneʼnove. 11Ani afinaʼmo Nevini taonifiʼmo mago a kanomoʼmo apakufamo alino katino apatesiya mafaʼnemo alino ateʼniye. Ani mafaʼnemo Kalaisi vekamo Ala kava neʼmo maiʼniye. 12Lapakaemo agesaya agufa alagena kavaʼmo haneʼniyana kenafiʼmo hayaeno ateteno pulumakamogi neʼyaʼmo neʼmalaya yuvapafiʼmo havaeno ateʼnigeno maiʼniye. Uta agetetapaeʼmo ani mafaʼneeʼmo laha paiʼniye, hutapa hugae, huno hapa paiʼniye. 13Hapa paiʼnigeʼapaeʼmo malage huʼa agaeʼeʼmo asole enisole vayaʼmo afole aiteʼa Goti agiʼaleʼmo aliʼa asaga huʼa ateʼapaeʼmo, 14#Lu 19:38Gotiʼa aeno apakaseʼniya vekamo hogote vekamo agiʼaleʼmo alita asaga higetao. Gotiʼa amuse huno neʼapateya vayaʼai apaipamoʼmo falu hino, huʼa huteʼa apataleʼa kokuʼnapiʼmo uʼa haiʼnae.

Sipisipileʼmo neʼyagaiya vayaʼmogi uʼa Yesuʼmo ageʼnaya gemae

15Inagi sipisipileʼmo neʼyagaiya vayaʼmogi apakaiʼapimo huʼapaeʼmo, Metelehamu taonifiʼmo afole aiʼniya kavafeʼmo Ala kava neʼmoʼa laha paiʼniya kavaʼmo uta agesunafeʼmo vigetao, huʼa huteʼa 16#Lu 2:10-12malage huʼa uʼa apakayana Maliyaʼagi Yosefeʼagi pulumakamogi neʼyaʼmo neʼmalaya yuvapafiʼmo havaeno maiʼniya mafaʼnegi huʼa maiʼnageʼapaeʼmo apakeʼnae. 17Ageteʼapaeʼmo ava gemo afiʼnaya gemo hapa paiʼnageʼapaeʼmo 18muki vayaʼamogi afiteʼapaeʼmo lusi kava huʼa apakesa alaʼamo afiʼnae. 19#Lu 2:51Maliyaʼa ani muki huʼnaya geʼamo afino alino aipafiʼmo maleteno agesamo afino maiʼniye. 20Sipisipileʼmo neʼyagaiya vayaʼmo aiʼa atagi neʼa uʼapaeʼmo enisole vekamoʼmo hapa paiʼnigeʼa afiʼnaya geʼe ageʼnaya kavateʼefeʼmo Goti agiʼaleʼmo aliʼa asaga huge hao ke hege hume hume uʼnae.

Yesu agiʼamo ateʼnaya gemae

21 # Lu 1:31,59 Magoke salemo utegeʼa Yu vayaʼmogi nehaya agufa kavaʼmo huʼa Yesu agufamo lagauʼa ataleteʼapaeʼmo agiʼamo Yesuʼae huʼa ateʼnae. Maliyaʼmo aipaguʼeʼmo oʼmaiʼnigenoʼaeʼmo enisole vekamoʼmo ani agimo ateʼniye.

Yesuʼmo alopa mono notegamo avaleliʼana uʼnaʼa gemae

22 # Mon 12:1-8 Moseseʼa hunoʼaeʼmo, aʼnemogi mafaʼnemo aliʼa apateteʼapaeʼmo aeʼa kalo paeʼa apatesayafeʼmo ofalinimo alinitutapa mono huʼa neʼapataya vayaʼmo apamiyo, huno huʼniya gemo akame huʼnaya afinaʼmo afole aiʼnigeʼana Yosefeʼe Maliyaʼeʼmo avaleliʼana Yulusalemu taonifilagamo uʼnaʼae. Goti aulagaleʼmo avaleliʼuʼana atesaʼafeʼmo avaleliʼana uʼnaʼae. 23#Hat 13:2,12,15Ani kavatefeʼmo Goti keʼaepa gemoʼmo hunoʼaeʼmo, Yege mafaʼnetapimo alita apaote apateʼnetapa Gotiʼa amiyo, huno huʼniye. 24#Mon 12:8Ala kava neʼmo keʼaepa geʼamoʼmo magoʼe gemo hunoʼaeʼmo, Lole kaugoʼyave namalaʼmo saufa namalaʼmo anatafautapa namiyo, huno huʼniya gemo akame hisaʼafeʼmo uʼnaʼae.

25 # Aiy 40:1; 49:13 Mago vekamo Yulusalemu taonifiʼmo maiʼniya vekamo agiʼamo Simiyoniʼa fatago kavaʼmo huno Goti keʼaepa geʼamo akame huteno Isaleli vayaʼmo hapau vaisiya afinafeʼmo agava maiʼniye. Aote Aunemeʼamoʼmo agaeteʼmo eminenoʼaeʼmo, 26ofalika afaʼa maiʼneka Ala kava neʼmo Kalaisi vekamo agegane, huno ha paiʼniye. 27Aunemeʼamoʼmo alopa mono nopiʼmo avalelino uno haino ateʼnigeʼanaeʼmo Yesu itaʼafoʼalaʼmoganimo keʼaepa gemo akame hisaʼafeʼmo mafaʼneʼanimo Yesuʼmo alopa mono nopiʼmo avaleli uʼa haiʼana maiʼnaʼageno 28Simiyoniʼa eno Yesuʼa avaleno anu kiliʼneno Gotifeʼmo alino auleno atetenoʼaeʼmo,

29Ala kava nene, huno, Naha paiʼnana kavaʼmo hemenimo ago alika afole aika ateʼnanaʼmofeʼmo aliʼyakamo neʼaluva vekamoʼnaeʼmo kaipamoʼmo falu huʼnisigeka aliʼyakamo ataleka eno, huka naha paigane. 30-31#Aiy 52:10; Lu 3:6; Ta 2:11Muki nofi vayaʼai apaulagaleʼmo apakufamo alino katino apatesiya vekamo ago alika afole aika ateʼnanageʼnaeʼmo naulagafatiʼmo ageʼnovaʼmofeʼmo hemenimo afaʼa faliguve. 32#Aiy 42:6; 49:6; Aiy 52:10Agaemo ha le yakana huno maiʼneno mago alu nofi vayaʼaitegamo aeno ha lesigeʼapaeʼmo ageʼa aeto hugae. Ani kava huno Isaleli vayakamo ala apakiʼapimo apamigiye, huno huʼniye. 33Itaʼafoʼalaʼmoganimo ani gemo afiteʼanaeʼmo lusi kava huʼana hanau aiʼnaʼae. 34#Aiy 8:14; Mt 21:42; 1 Ko 1:23; 1 Pi 2:8Simiyoniʼa alino auleno apatetenoʼaeʼmo ani mafaʼnemo itaʼamoʼmo Maliyafeʼmo hunoʼaeʼmo, Afiyo, huno, mago vayaʼamogimo geʼamo oʼafiʼa ataleʼa asagauʼa aige mago vayaʼamogimo geʼamo afiteʼapaeʼmo he tiʼa maige hisayafeʼmo Gotiʼa lekana paino ateʼniye. Agaemo Gotitegatiʼmo alagena yakana huno alino apave lisigeʼapaeʼmo apaini huʼa atesagenoʼaeʼmo 35asole vayaʼai apaipa apakesafiʼmo haneʼniya kavaʼmo alino afole aino ategaiye. Naipemoʼmo kaipafiʼmo aesigeno kagafu kigiye, huno ha paiʼniye.

36Mago anekalo kanomoʼmo Gotitegati gemo alinineno aeno hakalo huno hapa nepaiya anekalomo agiʼamo Anaʼmo maiʼniye. Ana afoʼamo agiʼamo Fanuvelaʼmo Asa nofi vayapati vekamo maiʼniye. Ani a kanomo veleʼmo seveniʼa kafugamo maiʼnigeno anauʼamoʼmo ago faliʼniya afinatetiʼmo kogu a kanomo maime maime eno eiti foʼa kafugamo maiʼniye. 37#1 Ti 5:5Muki afinaʼmo alopa mono nopiʼmo maiʼnenoʼaeʼmo muki netepiʼe hanipiʼeʼmo Gotifeʼmo mono huge nunumuʼmo huge neʼyaʼmo mo sige huno maiʼniye. 38#Aiy 52:9Ani afinaʼmo Yesutegaʼe itaʼafoʼalaʼmoganitegaʼeʼmo eno Gotifeʼmo hao ke hetenoʼaeʼmo mafaʼneʼaeʼmo ava gemo hunoʼaeʼmo, Yulusalemu vayaʼai apakufamo alino katino apateteno hatu maeno apatesiyafeʼmo agava maiʼnaya vayaʼaifeʼmo hapa paiʼniye. 39#Mt 2:23Muki keʼaepa gemo kavaʼamo alagi akame huʼana huteʼanaeʼmo koʼanilegamo Galeliya kotega Nasalasa taonifiʼmo uʼnae. 40#Lu 1:80; 2:52Ani mafaʼnemo ko sino alopa hetenoʼaeʼmo lokiya vaino maiʼniye. Gotiʼa alagepa huno ha maeʼnigeno alagepa huno afiteno ageʼnigenoʼaeʼmo alagepa aipa agesamo afole aiʼniye.

Yesuʼa neya mafaʼnemoʼmo alopa mono nopiʼmo uno haino maiʼniya gemae

41 # Hat 12:24-27; Hat 23:14-17; Loa 16:1-8 Yesu itaʼafoʼalaʼmoganimo hopa Pasova afinaʼmo muki kafugaʼae kafugaʼaeʼmo Yulusalemu taonifiʼmo uʼana haiʼnaʼae. 42Yesuʼa tuolofuʼa kafugamo maiʼnigeʼa hopa afinaʼmo nehaya agufa kavaʼmo huʼa halate Yulusalemu taonifiʼmo uʼa haiʼnae. 43#Hat 12:18Hopa afinaʼmo hano hutegeno Yesuʼa ataleno oʼuno ani taonifiʼmo maiʼniyaʼmonanafa Yosefeʼe Yesu itaʼamoʼeʼmo huʼanaeʼmo, ani taonifiʼmo maiʼnegaiye, huʼana anakesamo oʼafiʼana ago ataleʼana uʼnaʼae. 44Laʼao vayaʼeʼmo magokepi lokaeʼa uʼnegae, huʼana anakesamo afiteʼana muki neteʼe uneʼeʼmo kategamo uteʼanaeʼmo aepa faiʼana anao vayaʼaifeʼmo ge huʼana apafi ge apafi ge huʼana kahauya hume hume uʼnaʼae. 45Oʼageʼana halate aiʼana atagi neʼana Yulusalemu taonifiʼmo uʼana kahauya huʼnaʼae. 46Loleʼe magoʼe afinaʼmo kahauya huʼnaʼana alagi oʼageʼana kahauya huʼana agaʼana Yesuʼa alopa mono nopiʼmo aliʼa apaya neʼmalaya vayaʼeʼmo fai maiʼneno huʼnaya gemo afige loka huno ge huno apafi ge huno maiʼnigeʼana ageʼnaʼae. 47Huʼniya gemo afiʼnaya vayaʼmogi, alagepa huno afiteno geʼapileʼmo alagepa huno aeno atagaina huno hapa nepaiye, huʼa huteʼa hapau aiʼnae. 48Itaʼafoʼalaʼmoganimo ageteʼanaeʼmo hanau aiteʼana itaʼamoʼmo hunoʼaeʼmo, mafaʼneʼnimogae, huno, na agufa kava higekaeʼmo laʼagaetegamo ani agufa kavaʼmo huʼnane. Afokamoʼe nagaeʼeʼmo laʼaipamoʼmo kana huʼnigetaʼa kagaefeʼmo kahauya nehuʼae, huno ha paiʼnigenoʼaeʼmo, 49#Yo 2:16Na kava higetanaeʼmo nagaefeʼmo kahauya nehaʼae. Afoʼnimo aliʼyaʼamo alisuva kavafeʼmo lanakesamo oʼafiʼnaʼafiye, huno hana paiʼniyaʼmonanafa 50ani gemo aepaʼamo alagepa huʼana oʼafiʼnaʼae. 51#Lu 2:19Inagi anakaeʼeʼmo magokepi lokaeʼa uʼa lamiʼa Nasalasa taonifiʼmo maiʼneʼapaeʼmo Yesuʼa muki afinaʼmo itaʼafoʼalaʼmogani geʼanimo akame huno maiʼniye. Itaʼamoʼmo muki ani kavaʼmo huʼniya kavafeʼmo agesamo afiteno aipafiʼmo alino maleʼniye. 52#1 Sam 2:26; Mai 3:4; Lu 1:80Yesuʼa ko sitenoʼaeʼmo magoʼe huno alagepa huno afiʼniye. Gotiʼe vayaʼamogiʼeʼmo magoʼe huʼa amuse huʼa ateʼnae.

Currently Selected:

Luki 2: kyg2013

Highlight

Copy