Luki 5

Mago vayaʼmogi aliʼyaʼapimo ataleʼeʼa Yesuʼa akame huʼa uʼnaya gemae

(Mt 4:18-22; Mk 1:16-20)

1 # Mt 13:1-2; Mk 3:9-10; 4:1 Yesuʼa mago afinaʼmo ani kotuʼmo agiʼamo Genesaleti ani kotuteʼmo he tino maiʼnigeʼapaeʼmo asole vayaʼmogimo Goti geʼamo afisayafeʼmo eʼa maleʼa apaliʼnae. 2Agaemo ageyana lole sipilaʼmo ani agiʼnaleʼmo haneʼnigeno ageʼniye. Noyame neʼaliya vayaʼmo sipifatiʼmo ataleʼa uʼa lamiʼa umeniʼapimo sese huʼnae. 3Yesuʼa Saimoni sipifiʼmo uno haino maiʼnenoʼaeʼmo, aiseʼamo aeka agoʼya failika ugapiye, huno ge huno afi geʼnigeno aeno agoʼya failino uʼniye. Yesuʼa sipifiʼmo fai maiʼnenoʼaeʼmo alino apaya maleʼniye.

4Hapa paino hano huteno Saimonifeʼmo hunoʼaeʼmo, ani folagapiʼmo uka umenimo alitapa anipiʼmo yaga au maleʼnetapa noyamemo aliyo, huno ha paiʼnigenoʼaeʼmo, 5#Yo 21:3-8Tisao, huno, muki haniʼilagamo umenimo maleʼnonana mago noyamemo oʼaliʼnonaʼmonanafa gekamo afiteʼna umenimo aliʼna anipiʼmo yaga auʼna malegauve, huno ha paiʼnigeʼapaeʼmo 6umenimo aliʼa anipiʼmo yaga au maleʼnagenoʼaeʼmo asole noyame anagaʼmo eʼa haiʼa havaiteʼnageno umeniʼapimo aino kapalu aesiya kavaʼmo huʼniye. 7Aino kapalu aesiya kavaʼmo huʼnigeʼapaeʼmo alu sipifi vayaʼmo apakaeʼeʼmo magokepi lokaeʼa aliʼyaʼmo neʼaliya vayaʼaifeʼmo apayaku aiʼa ge huʼnageʼa eʼnageʼapaeʼmo lole sipifiʼmo noyamemo aliʼa vayu huʼa maleʼnageʼana lole sipilaʼmo aeʼana lapanesaʼa kava huʼnaʼae. 8Saimoni Pitaʼa ani kavaʼmo ageteno Yesu aiyafiʼmo agoʼya faiʼnenoʼaeʼmo, Ala kava nene, huno, hosu vekamo maiʼnovanagi nataleka uvo, huno ha paiʼniye. 9Lusi kava huno hau aiʼniyaʼmofeʼmo ani gemo ha paiʼniye. Asole noyamemo aliʼnayaʼmofeʼmo Saimoniʼeʼmo magokepi lokaeʼa maiʼnaya vayaʼmogiʼeʼmo hapau aiʼnae. 10#Mt 13:47Yemisiʼe Yoniʼeʼmo Saimoniʼeʼmo magokepi lokaeʼa aliʼyaʼmo neʼaliʼa vekalaʼmoganiʼeʼmo ani kavaʼmo huʼana hanau aiʼnaʼae. Yesuʼa Saimonifeʼmo hunoʼaeʼmo, ani kavafeʼmo koli osuvo. Noyamemo neʼalina kava huka vayaʼmo apavalelika nagaetegamo egane, huno ha paiʼnigeʼapaeʼmo 11#Mt 19:27lole sipilaʼmo alini eʼa ani agiʼnaleʼmo avaʼyi huteʼapaeʼmo muki yaʼapimo ataleʼa akame huʼa uʼnae.

Yesuʼa lepolosi yaʼmo hauʼniya vekamo alino hageno ateʼniya gemae

(Mt 8:1-4; Mk 1:40-45)

12Yesuʼa mago taonifiʼmo maiʼnigenoʼaeʼmo mago vekamo lusi kava huno lepolosi yaʼmo hauʼniya vekamoʼmo eno Yesuʼmo agetenoʼaeʼmo augosalegatiʼmo agoʼya faiʼnenoʼaeʼmo, Ala kava nene, huno, kahao ke hovanagi, kahauʼnisiyana afaʼa alika nahageka nategane, huno ha paiʼnigeno 13ayaʼmo aeno hayo huno agufaleʼmo ayaʼmo maleʼnenoʼaeʼmo, nahauʼniyanagi kagufalafaʼmo alino hamaleno, huno ha nepaigenoʼaeʼmo lepolosi yaʼmo hauʼniya yaʼamo hageʼniye. 14#Mon 14:1-32Yesuʼa hunoʼaeʼmo, mago vekaeʼmo uka ha opaika mono huno neʼapateya vekalegageʼmo uka kagufamo alika aveligeno kageno alagepa hino. Alika apavelisanageʼa vayaʼmogi agesayafeʼmo Moseseʼa hiyo, huno huʼniya ofalinimo kagufalafaʼmo alino hamaleʼniya kavatefeʼmo ofalinimo amiyo, huno ha paiʼniye. 15Huno ha paiʼniyaʼmonanafa Yesufeʼmo ava gemo magoʼe magoʼe huno aino atagu faeno uneno huʼnigeʼapaeʼmo muki asole vayaʼmogimo ani gemo afiteʼapaeʼmo kaita hapauʼniya vayaʼmo alino hapageno apatesiyafeʼmo Yesutegamo eʼa aliʼa anupa huʼa maiʼnae. 16#Mk 1:35Maiʼnayaʼmonanafa muki afinaʼmo apataleno uno kaʼme kotegamo nunumuʼmo huge huge huno maiʼniye.

Yesuʼa kanage kanaga osuno neʼmaiya vekamo alino alagepa huno ateʼniya gemae

(Mt 9:1-8; Mk 2:1-12)

17Mago afinaʼmo Yesuʼa mago nopiʼmo uno haino alino apaya neʼmalegeʼapaeʼmo Falasi vayanagi keʼaepa gemo avoʼmo kaeʼa aliʼa apaya neʼmalaya vayanagi huʼa Galeliya kotegatiʼmo muki taoniʼafatiʼmo ege Yutiya kotegatiʼmo muki taoniʼafatiʼmo ege Yulusalemu taonifatiʼmo ege huʼa eʼa Yesu haopaleʼmo aliʼa anupa huʼa maiʼnae. Yesuʼa Ala kava neʼmo himamuʼamo aliʼnenoʼaeʼmo alino hapageno apateʼniye. 18Mago vayaʼmogimo kanage kanaga osuno neʼmaiya vekamo hiʼyopamo alini eʼa Yesu haopaleʼmo atesayafeʼmo aliniʼa eʼnayaʼmonanafa 19nopiʼmo ago kili paeʼnageʼa alini uʼa haisaya kaʼmo ohaneʼniye. Nokatoʼmuleʼmo alini uʼa haiʼa aliʼa akai maleʼneʼapaeʼmo hiʼyopa kayoteʼmo nofi aeteʼa alineʼa ataleʼnageno Yesuʼa maiʼniya folagapiʼmo emineʼniye. 20#Lu 7:48Apakeyana apakesamo afiʼa fatago huʼnageno apaketenoʼaeʼmo, Veʼnimo, huno, hosu kavakamo aliʼna ataleʼnove, huno ha paiʼnigeʼapaeʼmo 21#Lu 7:49; Aiy 43:25keʼaepa gemo avoʼmo kaeʼa aliʼa apaya neʼmalaya vayaʼmogiʼe Falasi vayaʼmogiʼeʼmo ani gemo afiteʼapaeʼmo, ani vekamo ina laʼae. Gotifeʼmo huno faipa huno neʼate. Gotikeʼmo vayaʼmogi hosu kavaʼapimo afaʼa alino atalegaiye, huʼa apaipafiʼmo apakesamo afiʼnae. 22Yesuʼa apaipafiʼmo apaketenoʼaeʼmo, na agufa kava higetapaeʼmo ani agufa lapakesamo neʼafiye. 23-24#Yo 5:8Haiya agufa gemo lokiya gemo ohaneʼniye. Hosu kavakamo aliʼna ataleʼnove, huʼna ha paiʼnova gemo lokiya gemo ohaneʼnifi, he tika uvo, huʼna ha paisuva gemo lokiya gemo ohaneʼniye, huno ge huno apafi genoʼaeʼmo, Vemo Mafaʼnemoʼa ma mopafiʼmo maiʼnenoʼaeʼmo vayaʼmogi hosu kavaʼapimo alino atalesiya himamuʼamo alino lapave ligiye, huno hapa paiʼniye. Inagi Yesuʼa kanage kanaga osuno neʼmaiya vekaeʼmo hunoʼaeʼmo, kaha nepauve, huno, he tika yakaikonakamo aliteka nokalegamo uvo, huno ha paiʼnigeno 25apaulagaleʼmo malage huno he tino yakaikonaʼamo aliteno noʼalega neʼunoʼaeʼmo Goti agiʼaleʼmo alino asaga hume hume uʼniye. 26Muki vayaʼamogimo ani kavaʼmo ageteʼapaeʼmo hapau aiteʼa Goti agiʼaleʼmo aliʼa asaga huʼa ateteʼapaeʼmo, hemenimo aeto agufa alagepa kavaʼmo ageʼnone, huʼa huʼnae.

Yesuʼa Livaifeʼmo, eka nakame huvo, huno ha paiʼniya gemae

(Mt 9:9-13; Mk 2:13-17)

27Huteno Yesuʼa taonifatiʼmo ataleno neʼunoʼaeʼmo ageyana mago vekamo takesi moni neʼaliya vekamo agiʼamo Livaiʼa takesi monimo neʼaliya nopiʼmo fai maiʼnigeno agetenoʼaeʼmo, eka nakame huvo, huno ha paiʼnigeno 28he tino muki yaʼamo ataleno eno akame huʼniye. 29Livaiʼa noʼafiʼmo Yesuʼmo lusi yagita huno ateʼnigeʼapaeʼmo hiʼyalamuteʼmo Yesuʼagi takesi moni neʼaliya vayanagi alu vayanagi huʼa anakaeʼeʼmo magokepi lokaeʼa fai maiʼneʼa neʼyaʼmo neʼnae. 30#Lu 15:1-2Falasi vayaʼe Falasi vayapati vayaʼmogimo keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo apaketeʼapaeʼmo geʼamo neʼafiya vayaʼaifeʼmo hagalu hagalu huʼa gemo huʼapaeʼmo, na kava higetapaeʼmo takesi moni neʼaliya vayaʼe hosu vayaʼeʼmo magokepi lokaeta maiʼnetapa neʼyaʼe aniʼeʼmo neʼnae, huʼa ge huʼa apafi geʼnagenoʼaeʼmo 31Yesuʼa geʼapileʼmo aeno atagaina hunoʼaeʼmo, lota vekamoʼmo afaʼa maiʼnaya vayaʼaitegamo uno aliʼyaʼmo noʼalifa kaita hapauʼniya vayaʼaitegageʼmo uno aliʼyaʼmo neʼaliye. 32Nagaemo alagepa vayaʼaifeʼmo ge hisuvafeʼmo emiʼnoʼmeʼnofa hosu vayaʼaifekeʼmo ge hisugeʼa eʼa apaipamo aliʼa afe lesayafeʼmo emiʼneʼnove, huno hapa paiʼniye.

Neʼyaʼmo oʼneʼa mo nesiya kavafeʼmo huʼniya gemae

(Mt 9:14-17; Mk 2:18-22)

33Apakaemo Yesufeʼmo huʼapaeʼmo, Yoni geʼamo neʼafiya vayaʼe Falasi vayaʼai geʼapimo neʼafiya vayaʼmogiʼeʼmo neʼyaʼmo oʼneʼa mo siʼneʼa nunumuʼmo hute hute huʼnayaʼmonanafa gekamo neʼafiya vayaʼmogimo neʼyaʼmo mo osiʼa muki afinaʼmo neʼnae, huʼa ha paiʼnagenoʼaeʼmo 34#Yo 3:29Yesuʼa hunoʼaeʼmo, aʼmo lagauliʼa neʼvaya afinaʼmo aʼmo alisiya vekamoʼmo vayaʼaʼeʼmo magokepi lokaeʼa maiʼneʼapaeʼmo neʼyaʼmo mo osiʼa afaʼa neʼnae. 35Henagaʼamo kame vayaʼamogi aʼmo alisiya vekamo vayaʼalegatiʼmo avaleliʼa visageʼapaeʼmo neʼyaʼmo oʼneʼa mo sigae. 36Yesuʼa magoʼe huno aeno kalafefa gemo huno hapa painoʼaeʼmo, atafa kukenamo apake neʼaigeʼapaeʼmo saufa kukenaletiʼmo lagauʼa atafa kukenaleʼmo maleʼneʼa nofakaniye. Atalagausiyaʼmoʼmo saufa kukenamo hosugiye. Saufa kukena atupaletiʼmo lagauʼa atafa kukenaleʼmo fakanisayana alu ya alu yaʼmo hanegaiye. 37Saufa nofi alagafati aniʼmo aliʼa atafa afu agufa keʼmo ago vaiʼniya kepiʼmo nolakiye. Aliʼa lakisayaʼmoʼmo saufa aniʼmo haneʼniyaʼmofeʼmo aeno apafu leteno afu agufa keʼmo aeno apalo atino aniʼmo mopafiʼmo asagauno aisigenoʼaeʼmo afu agufa keʼmo atalagaugiye. 38Saufa aniʼmo saufa afu agufa kepikeʼmo lakisayaʼmoʼmo aniʼe keʼeʼmo afaʼa hanegaiye. 39Vayaʼmogimo hogote nofi alagafati aniʼmo neteʼapaeʼmo, saufa nofi alagafati aniʼmo negaune, huʼa nosae. Hogote aniʼmo ago aeno agaseʼniye, huʼa nehayaʼmofeʼmae, huno hapa paiʼniye.

Currently Selected:

Luki 5: kyg2013

Highlight

Copy