Luk 17

Kandriyen ndra-in bokoro-ei budon handru

(Metiu 18:6-7; Metiu 18:21-22; Mak 9:42)

1Ya eme Jises tiye i toro lau tan anya: “Lakou ala, amekes lau taku ta kandriyen ndra-in ma karei kameh barasahan. Arile, oro lau ta amekes asahan kameh akohok sisi-in ndra-in labai ta aliy! 2Buku ari ndramak bwidi ari nadu nah kataku ki bolo kandriyen ndra-in, sebwe mwasin ta ndramak doh kasawei ari bek maha-an ki balen, ya kakahei iy katuh kili bolo ndras ki-in gwek ai. 3Eme ya mada ado kaleu tado.

“Ya, i buku none nadu tinem ari amekes kandriyen ndra-in badeh, ou tiye sahou boto-on ki tan. Ya, i buku none iy tubuni ndrinen badeh, ou mani ki-iu. 4Ya, i buku none iy amekes kandriyen ndra-in i tam san ma ndro taloh, udu bolo len ari. Ya, i buku none iy keme hamon san ndro taloh keme hawem katiye ou, iy ndratubuni ndrinen, badeh, ou mani kandriyen ndra-in nane iy amekes ewek tam.”

5Eme oro aposel tiye i ta Laban anya, “Ou mesekei budon handru taso ki tinan!”

6Eme iy anya, “Buku budon tado kasahan ki buku badu buwa kei mastet, badeh, idoh ado winiyan tiye i ta kei malberi dah, anya, ‘Ou sudi ou, ma kandrom keme loke, ya ou ala gwa ndras ma ateh ame loke!’ Idah kameh iy anuhun boho ado.

7“Ya, i buku none ado ari lohowan tado kapou ndren ta bilin, o, iy katondrok iri sipsip tado; kon abeyeh ya iy badeh, udu bilin eme lewan, ya ou winiyan tiye iy suwi ewek hawem ta aimon nyamon, deh bwe? 8Winiyan bwe! Idah kameh, ou tiye tan anya, ‘Ou mesekei nyamon tek ta beyeh suwi, ano ou bwese-ei keme bada sau ma ou abe-en jo kaimon nyamon, ma ka-un gwa bwena op. Ano ou baraimon barado hamon.’ 9Ano kameh, iy winiyan edeu wurah i ta lohowan tan, ta anuhun sahou tan, deh bwe? Winiyan bwe! 10Ya eme ado ale kamekes ki le buku aliy; i buku none ado kamesekei lahou mari iri tiye ado ta amekes, ano ado katiye anya, ‘Aso badeh, lohowan laleyah, aso ndramesekei lahou, arile aso an hamon le ta batanau.’ ”

Jises bwidiy oro lau ma ronoh sik lepra udu bada oro ano iu

11Ano Jises anya kedek kili Jerusalem eme ya iy andrei san ndrokowa kobek ta Samariya hawe Galili. 12-13Eme iy edek anya kili bolo kon ari badeh, oro lau lepra ma ronoh ndruni iy. Ya eme oro are ndra len badeh, aloh i ta Jises anya, “Jises, ndramak ta leheya, ou tikisi aso!”

14Eme Jises atou oro badeh, ma iy anya, “Ado kala kaleheya bada ado, kili tiri pris.” Eme ya oro adek ala, se nawin bwe ma bada oro ndramwenen ja.

15Eme iy ari badu bolo oro ma ronoh nane anyolom sik lepra udu badan badeh, ndra-au. Iy eme hamon atou Jises, bohon ndra loken le hawe sekesek, ma iy atudun Kindrei. 16Iy eme morahani iy udu kati Jises edeu wurah i tan. Ma iy ndramak nane doh badeh, badu Samariya.

17Jises anyolom i ndramak doh le badeh, ma iy lelen iy anya, “Jo anya kede-eh, ado ma ronoh badeh, ndramwenen. Ya oro ndro ari ndra heh bah? 18I buku sah handru iy ndramak badu leheleh le badeh, eme hamon edeu wurah? Ya oro lau badu Isra-el ndraheh bah?” 19Ano Jises tiye i tan, “Ou suri ou, ya ou au; budon tam handru le badeh, ndramesekei ou ndramwenen ja.”

Tondrok ta Kindrei eme

(Metiu 24:23-28; Metiu 24:37-41)

20Len ari, oro Parasi rayah ame ndremenya Jises, “Na saba len handru kameh tondrok ta Kindrei kasahan tiri mwan ma badih badu kon munyak?” Eme Jises tiye i toro anya, “Tondrok ta Kindrei eme kameh bala buku none kalem ado kameh atou bwe. 21Iri winiyan basehek anya, ‘Aha kanyolom, iy asah kada-ah,’ o ‘Iy asah kodo-oh.’ Aha kanuhun! Lahou Kindrei amekes kameh udu bolo ndrine aha.”

22Ano Jises tiye i toro lau tan anya, “Na len eme, ado kameh aseken labai ta atou ari len ta Nadu Ndramak Awas, arile ado kameh winiyan batou bwe. 23Ya, i buku none iri lau kanyowonya anya, ‘Asah kodo-oh,’ o, iri anya, ‘Asah idah!’ badeh, ado sarou sa-en hamon tiri. 24Len ta Nadu Ndramak Awas asahan kameh lau mari atou iy. Len tan badeh, i buku none kalik takamek udu kandrah bilisiu ili taku bilisiu. 25Arile, ma mwena ta aliy, jo kameh bwese maha-an, ma iri lau na bolo len dah kameh adeu kona iri eme tek.

26“Len ta Nadu Ndramak Awas kameh asahan, buku le iri lakou mene asahan na len ta Nowa. 27Iri lau amekes nyamon tinan, iri a-un gwa, iri mwan ma badih atasou ili eme, ili le isos ta len Nowa oro ala bolo ndron tan tinan. Eme kon atuh ma iri lau mari amak.

28“I le buku none Lot oro mene. Iri lau mari badeh, aimon nyamon, iri badeh, a-un gwa, iri badeh, adeu lakou tiri i ta sisih, iri badeh, atah baso i bilin hawe iri atah asiu. Eme iri amekes ili ili, 29winiya le Lot oro, ado Sodom ame len. Bek solpa anya i buku mada ur taku udu kandrah eme andri, ma sulumwi iri lau mari amak.

30“Ya eme Nadu Ndramak Awas kameh asahan na len tan amwenen i le buku aliy. 31Na len doh, are lau ereu bwele-e asiu loken sala hamon sala bolo asiu sakohok lakou tan ndri-iy. Ya are lau ereu bolo bilin iy sala hamon sala asiu tan ja ai, ndri-iy. 32Ado badeh, samani kundruh ta udu Lot! 33Are lau abudon labai ta kohan, iy kameh winiyan bandrei bwe handru en. Arile, are lau imek ta lahou tek, kohan handru kameh ta udu le buku doh. 34Jo katiye tado kamwenen, na ben doh kameh, uru la-uh kameh an sau rasou ya ari kameh iu, ya ari kameh udu api. 35-36Ya uru badih la-uh kameh alim badu wit areu se, ari kameh andrei iy iu, ya ari kameh udu api.”#(17:35-36) Iri lau ta tanan rayah anya sahou ari ja udu bolo tarou dah i buku doh, (36) Ma uru lau la-uh ado bilin, idah kameh, Laban kameh andrei ari iu, ya ari kameh udu api.

37Oro lau tan anuhun sahou doh badeh, ma oro ndremenya Jises anya, “Laban, idoh kameh asahan heh handru?”

Eme, Jises tiye i toro anya, “Kon ale oda ari lakou, o ndramak ereu aliy, idoh kamen adeh, iri sirih ta aimon lakou bolo-an le kameh atukum areu aliy.”

Currently Selected:

Luk 17: lidNTpo

Highlight

Copy