Juan 6

Sa Pagpakaen Ku Lalima Ha Libu Ha Mga Etaw

(Juan 6:1-15; Mateo 14:13-21; Marcos 6:30-44; Lucas 9:10-17)

1Su maiwas haena luminayun si Jesus duun hu Danaw ta Galilea ha tagngaranan daan ta Tiberiades. 2Tungkay madakel sa mga etaw ha namanlupug kandin ta naahà dan sa mga belenganen ha binuhat din tumenged ta naulian din sa nangadaluwan. 3Dayun duminuun si Jesus hu buntud daw pinuu duma hu mga tinun-an din. 4Madani en taena agsaulugen hu mga Judio sa Aldaw hu Paglabay.

5Su maghelaw-helaw si Jesus naahà din sa kaet-etawan ha tagdiyà ta kandan aman ininsaan din si Felipe, “Hindu kuy gid makatimù hu igpakaen taw tayana ha mga etaw?” 6Natun-an en hi Jesus ku inu sa buhaten din ba ininsaan din si Felipe ta agsulayen din haena.

7Ba tuminubag si Felipe, “Bisan pa pila ha gatus sa ipalit taw hu supas daw ilahan taw sidan hu tig-atiyù ba harì pa gayed sidan tukidan.”

8Minikagi daan sa sabuwa ha tinun-an hi Jesus ha si Andres sa suled hi Simon Pedro, 9“Amin malmalaki dini ha amin din supas ha lalima ha buuk daw daruwa daan ha buuk ha sedà, ba saini harì gayed tumukid ta madakel tungkay sa mga etaw.”

10Inikagiyan hi Jesus sa mga tinun-an din, “Ipapinuu nuy sa mga etaw.” Saena sagbeten ha bugtà aman alan sidan mininuu, lalima ha libu sa kadakelen hu mga maama. 11Dayun tinimù hi Jesus sa supas daw ampui haena. Su makapenga en mag-ampù impakaen din sa mga etaw sumalà hu agkaamin dan. Iling daan ku sedà.

12Su mangabuhì en sidan inikagiyan hi Jesus sa mga tinun-an din, “Amul-amula nuy sa nasamà ta daw harì makalkalan.” 13Aman pinangamul dan su nasamà taena ha lalima ha buuk ha supas, saena sampulù pa daw daruwa ha ambung.

14Su maahà hu mga etaw haena sa belenganen ha binuhat hi Jesus minikagi sidan, “Iyan en gayed hayan su tagsalapen taw ha Prupita ha igpadini ta kalibutan.” 15Natun-an hi Jesus ha agpegesen dan ngaay ha magharì en kandan, aman bà dà uminawà daw duun hu buntud ha sabubuwa dà.

Sa Paghipanaw Hi Jesus Duun Hu Danaw

(Juan 6:16-21; Mateo 14:22-33; Marcos 6:45-52)

16Su madani en agkadaleman duminiyà sa mga tinun-an hi Jesus ta danaw. 17Su masukilem en hurà pa gayed makalikù si Jesus diyà ta kandan, aman namanlulan sidan duun hu barutu ta aglayun sidan diyà ta Capernaum. 18Duun taena maseleg gayed sa kalamag daw adagi daan sa mga baled. 19Su diyà en sidan ta taliwarà taena ha danaw naahà dan si Jesus sa tagdiyà ta kandan ha bayà-bayà en taghipanaw ha tagletaw duun taena ha wahig, aman tungkay sidan nangahaldek. 20Ba inikagiyan sidan hi Jesus, “Harì kaw agkahaldek ta iyan a.” 21Dayun malipayen sidan ha impalulan dan si Jesus duun ku barutu daw sagunà sidan nakauma duun hu agpayanan-an dan.

22Su maisab en ha aldaw sa mga kaet-etawan diyà pa ta layun. Natun-an dan ha sabuwa dà sa barutu diyà ha piglulanan hu mga tinun-an hi Jesus daw hurà duun si Jesus ta su lumayun sa mga tinun-an iyan dà man sidan. 23Ubay hu lugar ha duun nakakaen sa mga etaw hu supas ha pig-ampuan hi Jesus nakauma duun sa mga barutu ha napuun diyà ta Tiberias. 24Su matun-an hu mga etaw ha hurà en diyà si Jesus daw sa mga tinun-an din namanlulan sidan taena ha barutu ta agpan-ahaen dan si Jesus diyà ta Capernaum.

Sa Kalan-enen Ha Pakaila Hu Kinabuhì

25Su maahà en hu mga etaw si Jesus diyà ta layun ininsaan dan, “Manunudlù, kan-u ka pa nakauma dini?”

26Tuminubag si Jesus, “Laus gayed sa ag-ikagiyen ku inyu ha sa tigpan-ahaa nuy kanak iyan dà ta nabuhì kaw hu supas ha nakaen nuy gabì, ba hurà nuy kasabut sa mga belenganen ha nabuhat ku. 27Harì nuy agsiguruwi sa kalan-enen ha sagunà dà agkadaet ba maniguru kaw ta daw matimù nuy sa kalan-enen ha makaila hu kinabuhì ha hurà din katapusan. Siak sa Batà hu Etaw iyan a inilahan hu Dios ha Amay ku hu gahem ha makaila taena inyu.”

28Dayun ininsaan hu mga etaw, “Inu man sa kinahanglan ha buhaten day ta daw matuman day sa agkabayaan hu Dios?”

29Tuminubag si Jesus, “Sa agkabayaan hu Dios iyan sa tumuu kaw kanak sa sinugù din.”

30Aman nanginginsà sa mga etaw, “Inu sa belenganen ha makapaahà nu kanay ta daw kay makatuu ikaw? 31Sa mga gin-apuan taw su duun pa sidan ku pinakabulung-bulung ha lugar mana dà sa tagkan-en dan, ta amin insulat ha lalang hu Dios ha tagyanaen, ‘Diyà napuun ta langit sa kalan-enen ha in-ila kandan hu Dios.’”

32Minikagi si Jesus, “Laus gayed sa ag-ikagiyen ku inyu ha kenà iyan si Moises mig-ila ku kalan-enen ha diyà napuun ta langit, ba sa Dios ha Amay ku iyan makaila inyu hu laus ha kalan-enen. 33Ta sa kalan-enen ha ig-ila hu Dios iyan sa agkapuun diyà ta langit ha iyan pakaila duun hu kaet-etawan hu kinabuhì ha hurà din katapusan.”

34Minikagi sidan ki Jesus, “Sigi kay dà ilahan taena ha pagkaen.”

35Ba tuminubag si Jesus, “Iyan ad kalan-enen ha pakaila hu kinabuhì ha hurà din katapusan. Saena ha dumini ta kanak harì en gayed mauhul daw saena ha tumuu kanak harì en gayed malauwan. 36Ba inikagi kud inyu ha bisan ku naahà nuy en sa mga belenganen ha binuhat ku ba harì kaw gayed agtuu. 37Sa alan ha mga etaw ha in-ila kanak hu Dios ha Amay ku agdini ta kanak, daw saena ha agdini ta kanak harì ku gayed agbugawen. 38Ta sa pagdini ku ta kalibutan kenà iyan sa pagbuhat hu kanak ha agkabayaan, ba iyan sa pagtuman taena ha pagbayà hu Dios ha Amay ku ha migsugù kanak. 39Daw sa agkabayaan hu Amay ku iyan sa hurà gayed bisan sabuwa ha malaag duun hu mga etaw ha in-ila din kanak ta agbanhawen ku dà sidan duun hu hudiyan ha aldaw. 40Sa agkabayaan hu Amay ku iyan sa alan ha nakakilala daw nakatuu kanak sa Batà din mailahan hu kinabuhì ha hurà din katapusan, aman agbanhawen ku sidan duun hu hudiyan ha aldaw.”

41Dayun migtamudmud sa mga etaw ku inikagi hi Jesus ha iyan kalan-enen ha napuun diyà ta langit. 42Minikagi sidan, “Kenà ba iyan haini si Jesus ha batà hi Jose? Daw agkakilala day dà daan sa amay daw sa inay din. Imbà tag-ikagiyà ha diyà napuun ta langit?”

43Natun-an haena hi Jesus aman inikagiyan din sidan, “Imbà kaw tagtamudmud? 44Hurà bisan sin-u ha makadini ta kanak ku harì uwiten hu Amay ku. Sa dumini ta kanak agbanhawen ku duun hu hudiyan ha aldaw. 45Amin insulat hu mga prupita ha tagyanaen, ‘Tudluan hu Dios sa alan ha kaet-etawan.’ Aman bisan sin-u sa magpaliliman hu Amay ku ha tinudluan din dumini gayed ta kanak. 46Hurà nakaahà hu Dios ha Amay ku ba iyan a dà ta diyà a napuun ta kandin. 47Laus gayed sa tag-ikagiyen ku ha sa etaw ha tumuu kanak amin din kinabuhì ha hurà din katapusan. 48Iyan a kalan-enen ha makaila hu kinabuhì. 49Duun hu pinakabulung-bulung ha lugar sa kalan-enen ha tagngaranan hu mana iyan pagkaen hu mga gin-apuan nuy, ba namamatay dà sidan. 50Ba sa kalan-enen ha diyà napuun ta langit bisan sin-u sa kumaen taena amin din gayed kinabuhì ha hurà din katapusan. 51Iyan a kalan-enen ha diyà napuun ta langit ha makaila hu kinabuhì. Sa kumaen taena amin din gayed kinabuhì ha hurà din katapusan. Sa kalan-enen ha ig-ila ku iyan en sa lawa ku ta daw sa kaet-etawan mahimu ha amin dan kinabuhì ha hurà din katapusan.”

52Dayun migsawalà sa mga etaw ha tagyanaen, “In-inuwen taini ha etaw sa pag-ila kanuy hu lawa din ta daw makaen taw?”

53Ba inikagiyan sidan hi Jesus, “Laus gayed sa tag-ikagiyen ku inyu ha siak sa Batà hu Etaw ku harì kaw kumaen hu lawa ku daw harì kaw uminum hu langesa ku hurà nuy kinabuhì. 54Ba bisan sin-u sa kumaen hu lawa ku daw uminum hu langesa ku amin din kinabuhì ha hurà din katapusan ta agbanhawen ku duun hu hudiyan ha aldaw, 55ta sa lawa daw sa langesa ku iyan gayed kalan-enen ha pakaila hu kinabuhì. 56Bisan sin-u sa kumaen hu lawa ku daw uminum hu langesa ku harì en makasuway kanak daw siak harì ad en sumuway kandin. 57Sa Amay ku ha migsugù kanak iyan tag-ila hu kinabuhì aman tumenged taena amin ku kinabuhì. Iling daan ha sa kumaen kanak mailahan hu kinabuhì ha hurà din katapusan. 58Sa kalan-enen ha diyà napuun ta langit kenà iling hu mana ha nakaen hu mga gin-apuan taw ta minatay dà sidan. Ba bisan sin-u sa kumaen hu laus ha kalan-enen amin din gayed kinabuhì ha hurà din katapusan.” 59Iyan haena intudlù hi Jesus duun hu simbahan hu mga Judio diyà ta Capernaum.

Sa Pagsuway Hu Mga Etaw Diyà Ki Jesus

60Su mapaliman haena hu mga sumusunud hi Jesus madakel kandan sa tag-ikagi, “Malegen taw gayed madawat sa intudlù din. Sin-u gid sa tumuu duun?”

61Ba natun-an hi Jesus ha sa mga duma ha sumusunud din tagtamudmud mahitenged hu tigtudlù din, aman inikagiyan din sidan, “Agtambagan nuy ba diay sa inikagi ku? 62Inu man sa henà-henà nuy ku siak sa Batà hu Etaw maahà nuy ha batunen ad payanaen diyà ta langit ha iyan napun-an ku? 63Iyan dà sa Balaan ha Ispiritu tag-ila hu kinabuhì ha hurà din katapusan ta harì gayed haena mahimu hu etaw dà. Sa mga lalang ha inikagi ku inyu duun alan napuun hu Balaan ha Ispiritu aman iyan pakaila hu kinabuhì ha hurà din katapusan. 64Ba amin pa duma inyu ha harì agtuu kanak.” Saena inikagi hi Jesus ta daan din en natun-an ku sin-u sa harì agtuu kandin daw ku sin-u daan sa maglimbung kandin. 65Duminayun si Jesus pag-ikagi, “Iyan haena hinengdan ha inikagiyan ku inyu ha hurà bisan sin-u ha makadini ta kanak ku harì uwiten hu Dios ha Amay ku.”

66Sugud taena madakel sa mga sumusunud din ha suminuway dà daw hurà en isab duma kandin.

67Ininsaan hi Jesus su sampulù daw daruwa ha tinun-an din, “Agkabayà kaw en ba daan agsuway kanak?”

68Ba tuminubag si Simon Pedro, “Ginuu, hurà en lain ha maelegan day ta iyan ka dà tagtudlù hu paagi duun hu kinabuhì ha hurà din katapusan. 69Iman agtuu kay ikaw ta natun-an day ha iyan ka su sinugù hu Dios.”

70Dayun tuminubag si Jesus, “Pinilì ku inyu sa sampulù daw daruwa ba sa sabuwa inyu sakup en hi Satanas.” 71Iyan tagsubayen din si Judas ha batà hi Simon Iscariote ta bisan ku sabuwa daan ha tinun-an ba iyan gayed maglimbung ki Jesus.

Currently Selected:

Juan 6: bkd

Highlight

Copy