Lucas 12

Sa Angayan Ha Mahaldekan Hu Etaw

(Lucas 12:1-7; Mateo 10:26-31)

1Su maamul-amul sa libu-libuwen ha mga etaw ha pakaggik-ayà en sidan uminikagi si Jesus duun hu mga tinun-an din, “Bantayi nuy ha harì kaw malimbungan hu mga Parisiyu ha tagpasibù-sibù. 2Sa alan ha inlilung iman makahiwal dà asem ku malugay daw sa harì iman tag-ikagiyen mapaliman dà asem ku malugay. 3Sa mga lalang ha iyan kaw dà duun tag-ikagi ipanunultul dà asem ku malugay duun hu mga etaw.

4“Mga suled ku, ikagiyen ku inyu ha harì nuy agkahaldeki sa iyan din dà agkapatay sa lawa nuy ba hurà din en duma pa ha agkabuhat inyu. 5Ba iyan nuy kahaldeki sa Dios ha makapatay hu lawa nuy daw makapaagbul pa inyu diyà ta Impirnu. 6Henhenaa nuy ha bisan sa mga atiyuay ha tagbis harì agkalipatan hu Dios. 7Aman harì kaw agkasamuk ta palanggà kaw pa dì hu mga tagbis, ta bisan sa buhuk nuy naiyap en hu Dios.

Sa Ag-angkenen Hi Jesus

(Lucas 12:8-12; Mateo 10:32-33; 12:32; 10:19-20)

8“Ikagiyen ku inyu ha bisan sin-u haena sa ag-angken kanak duun hu mga etaw siak sa Batà hu Etaw angkenen ku daan duun hu mga balinsuguen hu Dios. 9Ba sa tag-ikagi duun hu mga etaw ha harì a kandin agkakilala harì ku daan haena kilalahen duun hu mga balinsuguen hu Dios. 10Bisan sin-u haena sa magtameyes kanak siak sa Batà hu Etaw mabaluy pa ha pasayluwen, ba sa magtameyes hu Balaan ha Ispiritu harì gayed mapasaylu.

11“Ku uwiten kaw duun hu mga simbahan ta aghukuman kaw kandan daw ipaatubang kaw kandan duun hu mga agalen, harì kaw agkasamuk ku in-inuwen pagpangatarengan daw ku inu sa ipanubag nuy 12ta duun taena ha panahun sa Balaan ha Ispiritu iyan en magtudlù inyu.”

Sa Buang-buang Ha Sapian

13Amin sabuwa duun hu naamul-amul ha mga etaw ha minikagi, “Manunudlù, ikagiyi sa suled ku ha bahinan a kandin hu mga kabilin hu amay day.”

14Ba tinubag haena hi Jesus, “Hurà ku labet tayana ta kenà a iyan taghusay inyu.” 15Dayun inikagiyan din su mga etaw, “Bantayi nuy ha harì kaw maayat ta sa maayad ha pagtimà harì duun agkapuun hu madakel ha mga butang.”

16Daw inikagiyan sidan hi Jesus taini ha pananglitan ha tagyanaen, “Amin sapian ha etaw ha madakel tungkay sa nalegtay din. 17Aman mighenà-henaay haena, ‘Inu gid sa buhaten ku ta hurà kud en ag-ugsakan taini ha nalegtay ku?’

18“Dayun minikagi haena, ‘Ay, iyan diay haini buhaten ku. Kagasen ku sa mga bugawan ku daw magbuhat a hu adagi pa dì ku nauna ta ag-ugsakan ku taini ha nalegtay ku daw hu mga butang ku. 19Iman malipayen ad gayed ta saini ha mga butang ku tumanan en hu pila ha tuig aman humimlay ad iman pagtrabahu daw bà a dà paman magkaenà daw mag-inumà dayun buhaten ku sa alan ha ikalipay ku.’

20“Ba saena inikagiyan hu Dios, ‘Buang-buang ka gayed ta iman ku daleman matay kad en. Hurà nud mapulusan hu mga butang nu na bà dà paman haena panimua hu lain ha mga etaw.’

21“Iyan haena agkapayanan-an hu etaw ha bà din dà ag-amul-amula sa mga katigayunan din ta daw magsapian ba kenà haena sapian duun hu Dios.”

Sa Mga Kinahanglanen

(Lucas 12:22-31; Mateo 6:25-34)

22Inikagiyan hi Jesus sa mga sumusunud din, “Harì kaw masamuk ku inu sa agkan-en nuy daw sa agbistiyen nuy 23ta mahinengdanen pa sa kinabuhì nuy dì hu pagkaen daw mahinengdanen daan sa lawa nuy dì hu bisti. 24Henhenaa nuy sa mga tagbis. Harì sidan tagpamula daw hurà dan daan bugawan ba igpakaen sidan hu Dios. Kenà ba palanggà kaw pa dì hu mga tagbis? 25Bisan ku agkatungkayan nuy en agkanugunan sa kinabuhì ba saena harì nuy en gayed masumpayan. 26Ku harì nuy man ganì agkabaluy haena imbà kaw man tagkasamukà?

27“Henhenaa nuy sa mga bulak ku agkainu-inu sa pagtubù dan. Harì sidan tagpanahì hu pinaksuy dan. Ba ikagiyen ku inyu ha bisan si Harì Solomon su anay sa sapian hurà makagbisti hu iling kadagway taini ha mga bulak. 28Ku madagway sa kabuhata hu Dios hu mga sagbet ha laus dà agkangagangu daw bigsuli iyan kaw pa kan harì mailahan hu bisti. Imbà man kaatiyuay tungkay sa pagsalig nuy hu Dios? 29Aman harì kaw gayed masamuk ku inu sa agkan-en daw sa ag-inumen nuy 30ta iyan dà agkasamuk sa mga etaw ha hurà pa makakilala hu Dios. Sa Amay nuy natun-an din ha agkinahanglanen nuy gayed haena. 31Ipagharì sa Dios diyan ta inyu dayun iila din gayed inyu sa alan ha agkinahanglanen nuy.

Sa Mga Katigayunan

(Lucas 12:32-34; Mateo 6:19-21)

32“Sinyu sa sumusunud ku, bisan ku atiyuay kaw dà ba harì kaw agkasamuk ta igkabayà-bayà haini hu Dios ha pagharian kaw kandin. 33Ipamaligyà sa mga butang nuy daw sa halin taena ipan-ila duun hu mga makaluluuy ta daw amin nuy mga katigayunan diyà ta langit ha harì matakaw harì agkadaetan daw harì daan maketket. 34Ta ku hindu duun makaugsak sa katigayunan nuy duun en daan taena sa henà-henà nuy.

Sa Pagsalap Hu Ginuu

35-36“Magpangandam kaw iling hu mga suluguen ha tagsalap ha makaulì sa agalen dan ha duminuun hu kaamulan ta saena sidan tagsulù daw harì tagtiduga ta daw ku makauma en sa agalen dan sagunà dan dà haena mapuwaan. 37Malipayen gayed su mga suluguen ha tagbantay ku makauma sa agalen dan. Laus gayed sa ag-ikagiyen ku inyu ha su agalen iyan magtangel ku mga suluguen din. 38Malipayen gayed su mga suluguen ha tagsalap ku makauma sa agalen dan bisan ku luminam-ag sidan hu pagbantay. 39Ba henhenaa nuy haini ha ku agkatun-an pa ngaay hu tagibalay ku kan-u makauma sa takaw harì gayed haena tumiduga ta daw harì maelegan hu takaw. 40Aman kinahanglan gayed ha magpangandam kaw ta siak sa Batà hu Etaw makauma a dini hu panahun ha harì nuy tagsalapen.”

Sa Mga Suluguen

(Lucas 12:41-48; Mateo 24:45-51)

41Nanginginsà si Pedro, “Ginuu, iyan kay dà ba tag-ikagiyan nu hu pananglitan daw ku para ba haini hu alan?”

42Tuminubag si Jesus, “Sa suluguen ha kasaligan iyan ipagbayà hu agalen din hu pagpakaen taena ha mga duma din ha suluguen duun hu hustu ha panahun. 43Ku makaulì sa agalen din malipayen gayed haena sa suluguen ha migtuman hu alan ha insugù kandin. 44Laus gayed sa ag-ikagiyen ku inyu ha su agalen igsalig din sa alan ha mga butang din duun ku kasaligan ha suluguen. 45Ba ku madaet sa suluguen iyan dà henà-henà din sa, ‘Malugay pa ag-ulì su agalen ku,’ aman bà din dà paman agpamunali sa mga duma din ha mga suluguen sa mga maama daw sa mga bahi. Bà dà daan magkaenà daw magpasibelengà. 46Ku tigkan makauma su agalen din duun hu panahun ha harì din tagsalapen saena ha suluguen himatayan gayed ku agalen din daw ipaamul haena duun hu mga etaw ha harì agtuu hu Dios.

47“Saena ha suluguen ha natun-an din en sa igpabuhat kandin hu agalen ba hurà din buhata silutan gayed hu madakel ha bunal. 48Ba sa suluguen ha nakasalà ta hurà din haena katun-i atiyuay dà ha bunal sa silut din. Sa etaw ha madakel sa insalig kandin madakel daan sa tagsalapen diyà ta kandin.

Sa Kagubut

(Lucas 12:49-53; Mateo 10:34-36)

49“Duminini a iling hu hapuy ha makapasamuk hu mga etaw. Maayad ngaay ku saena ha hapuy tagkalegdeg en. 50Amin pa mga alantusen ha tagsalapen ku aman taglugul a iman taman ha matuman en haena. 51Harì nuy aghenhenaa ha sa pagdini ku ta kalibutan makaila hu maayad ha pagdapità, ta ikagiyen ku inyu ha saini makaila inyu hu kagubut. 52Sugud iman ku amin lalima ha etaw duun hu nangkapamilya saena mabahin ta sa tatulu makigsabà hu daruwa daw su daruwa sumukul daan hu tatulu. 53Sa amay makigsabà hu batà din ha maama daw sa batà din ha maama sumukul daan kandin. Sa inay makigsabà hu batà din ha bahi daw sa batà din ha bahi sumukul daan kandin. Iling hu ugang ha bahi magsabà sidan hu lagambay din.”

Sa Timaan Hu Panahun

(Lucas 12:54-56; Mateo 16:2-3)

54Inikagiyan hi Jesus sa kaet-etawan, “Ku agdaklep pakaikagi kaw dayun, ‘Ag-udan’ saena laus gayed. 55Ba ku hurà en bul-ug gabun ta langit pakaikagi kaw, ‘Aggulabung’ saena laus daan. 56Sinyu sa mga tagpasibù-sibù, natun-an nuy sa mga timaan hu panahun ba imbà nuy harì agkatun-i sa timaan hu agkaula-ula iman?

Sa Husayen

(Lucas 12:57-59; Mateo 5:25-26)

57“Imbà kaw harì pakatuen tagbuhat hu maayad? 58Ku isumbung kaw hu duma nuy sulaya nuy husaya ku harì kaw pa makauma duun hu taghusay, ta ku makauma kaw en duun itugyan kaw hu maghuhukum daw ipaprisu kaw gayed kandin. 59Ikagiyen ku inyu ha daw kaw en makaguwà diyà ta prisuhan ku mabayaran en sa alan ha mga salà nuy.”

Currently Selected:

Lucas 12: bkd

Highlight

Copy