Lucas 15

Sa Karniru Ha Nalaag

(Lucas 15:1-7; Mateo 18:12-14)

1Amin mga manunukut hu buhis daw mga masinupaken ha nangaamul-amul diyà ki Jesus hu pagpaliliman kandin. 2Ba sa mga Parisiyu daw sa mga manunudlù hu Kasuguan migtamudmud hu kagi dan, “Saini ha etawa nakigduma-duma hu mga makasasalà daw nakigsalu kandan.”

3Dayun inikagiyan sidan hi Jesus taini ha pananglitan ha tagyanaen, 4“Ku amin inyu amin din nanggatus ha mga karniru daw nalaag sa sabuwa duun harì din ba awaan su kasiyaman daw siyam duun hu panabtabà daw pan-ahaa su sabuwa ha nalaag? 5Ku matulen din en haena tungkay gayed malipay daw sapipiyen din haena. 6Ku makaulì amulen din sa mga amigu daw sa mga silingan din daw ikagiyi sidan, ‘Magmalipayen kuy iman ta nalaag sa karniru ku ba naahà ku dà.’ 7Ikagiyen ku inyu ha iling daan taena kaadagi sa kalipay diyà ta langit ku amin sabuwa ha makasasalà ha maghinulsul dì taena ha kasiyaman daw siyam ha mga tagpasibù-sibù ha matareng en daw taghenà-henà ha harì en tagkinahanglan ha maghinulsul.

Sa Salapì Ha Nalaag

8“Ku amin bahi ha amin din sampulù ha salapì daw kalaag sa sabuwa harì ba magtutud haena hu sulù daw silhigi sa balay din hu pagpan-ahà taena ha salapì din ha nalaag? 9Ku matulen din haena amulen din sa mga amigu daw sa mga silingan din daw ikagiyi sidan, ‘Magmalipayen kuy iman ta naahà kud su sabuwa ha salapì ku ha nalaag.’ 10Ikagiyen ku inyu ha adagi daan sa kalipay hu mga balinsuguen hu Dios tumenged hu sabuwa ha makasasalà ha maghinulsul.”

Sa Batà Ha Luminaag

11Si Jesus minikagi hu pananglitan ha tagyanaen, “Amin etaw ha amin din daruwa ha batà ha maama. 12Saena ha manghud huminangyù diyà ki Amay din, ‘Iila en iman kanak sa bahin ku duun hu mga butang nu.’ Aman binahin din sa mga butang din taena ha daruwa. 13Su pila en ha aldaw tinimù ku manghud sa alan ha bahin din daw pahiphipanaw duun hu madiyù ha banuwa dayun gastuwa sa salapì din duun hu maal en ha mga buhat. 14Su maamin en su salapì din nakauma sa adagi ha kauhul duun taena ha banuwa daw miglised gayed haena sa manghud. 15Dayun huminangyù hu trabahu duun hu sabuwa ha sakup taena ha lugar na sa impatrabahu kandin iyan sa pagpamahug hu babuy diyà ta unayan. 16Agkabayà ngaay haena ha makakaen hu bahug ku mga babuy ta hurà mig-ila kandin hu bisan inu ha agkakaen. 17Aman nahenhenaan din, ‘Sa mga suluguen hu amay ku harì pakaamin hu pagkaen dan ba siak agpatay ad en hu kauhul. 18Maayad pa ha umulì a diyà ki Amay daw ikagiyan ku, “Amay, nakasalà a gayed duun hu Dios daw diyan ta ikaw. 19Kenà ad en angayan ha isipen pa ha batà nu ba buhata ad ikaw ha sabuwa duun hu mga suluguen nu.”’ 20Aman uminawà haena diyà daw pauulì diyà ki Amay din.

“Su madiyù pa diyà ta balay dan natan-aw en hi Amay din. Saena nahid-uwan gayed hi Amay din aman minulalaguy ha suminal-aw ku batà din dayun kinepkepan din haena daw hadeki.

21“Ba su batà din minikagi, ‘Amay, nakasalà a gayed duun hu Dios daw diyan ta ikaw. Kenà ad en angayan ha isipen pa ha batà nu.’

22“Ba si Amay din nangumaw hu mga suluguen daw ikagiyi sidan, ‘Agpas kaw daw uwita dini sa madagway ha pinaksuy daw pinaksuyi haini, suupi nuy hu sising daw sapatusi daan. 23Iyawa nuy su impalambù ha nati hu baka ta taggastu a hu pagsaulug, 24ta saini ha batà ku iling hu minatay en ba iman nabanhaw dà daw nalaag en ba iman nakaulì dà.’ Aman migsaulug sidan.

25“Su tag-ulì en haena sa magulang ha batà din ha napuun diyà ta uma nakapaliman hu sunata hu tagsayaw su makaubay en diyà ta balay dan. 26Aman inumaw din sa sabuwa ha suluguen dan daw insai ku imbà agkabibu sidan. 27Tuminubag haena sa suluguen, ‘Nakaulì su manghud nu aman mig-iyaw si Amay nu hu malambù ha nati hu baka hu pagsaulug ta nabayà-bayà gayed tumenged ta sa suled nu nakaulì ha bubuhay pa daw hurà nahitabù kandin.’

28“Su mapaliman haena ku magulang ha batà tungkay gayed napauk daw hurà en seled. Aman inelegan hu amay din daw pagayuki ha sumeled en. 29Ba bà dà tuminubag ki Amay din, ‘Henhenaa nu ha nalugay en sa pagtrabahu ku dini ta ikaw daw tinuman ku gayed sa alan ha insugù nu. Ba hurà a gayed ikaw ilahi hu bisan nati dà ngaay hu kambing ta daw makagsaulug a duma hu mga amigu ku. 30Ba su batà nu ha bà dà miggastuwà hu salapì nu duun hu mga madaet ha bahi pag-ulì din iniyawan nu pa hu impalambù ha nati hu baka.’

31“Ba tuminubag si Amay din, ‘Sigi ka dà dini ta kanak daw sa alan ha mga butang ku ikaw daan. 32Angayan ha malipay kuy ta saini ha manghud nu iling hu minatay en ba iman nabanhaw dà daw nalaag en ba iman nakaulì dà.’”

Currently Selected:

Lucas 15: bkd

Highlight

Copy