Lucas 19

Sa Paghinulsul Hi Zaqueo

1Su taghipanaw si Jesus nakaagi diyà ta Jerico. 2Amin sapian diyà ha agalen hu mga manunukut hu buhis ha tagngaranan ki Zaqueo. 3Agkabayaan din gayed ag-ahaa ku agkainu-inu si Jesus ba harì din agkahimu ta madakel tungkay sa mga etaw daw mababà haena hu kandin. 4Aman minulalaguy diyà ta unahan daw pamanahik duun hu kayu ha sikamuru ta daw maahà din si Jesus ta duun taena ag-agi.

5Su makauma si Jesus diyà ta kandin huminangad haena daw ikagiyi, “Zaqueo, agpas ka lugnà ta agdiyà a iman ta balay nu.” 6Aman sagunà si Zaqueo luminugnà daw malipayen ha duminawat ki Jesus.

7Sa alan ha mga etaw ha nakaahà taena migtamudmud ha tagyanaen, “Imbà haini seled duun hu balay hu makasasalà?”

8Ba huminitindeg si Zaqueo daw uminikagi, “Ginuu, sa liwarà hu mga katigayunan ku ipan-ila ku iman duun hu mga makaluluuy, daw sa etaw ha nalimbungan ku su anay hu sabuwa ilikù ku haena diyà ta kandin ha haepat en.”

9Inikagiyan haena hi Jesus, “Iman ha aldaw sikaw daw sa pamilya nu maluwas en ta iyan kaw laus ha mga kaliwat hi Abraham. 10Ta siak sa Batà hu Etaw duminini a ta kalibutan hu pagpan-ahà taena ha nangalaag daw hu pagluwas kandan.”

Sa Tatulu Ha Sinaligan

(Lucas 19:11-27; Mateo 25:14-30)

11Su tagpaliliman pa sa mga etaw inikagiyan sidan hi Jesus taini ha pananglitan ta duun taena ubay en sidan diyà ta Jerusalem daw abi dan ha sagunà en magharì sa Dios. 12Minikagi si Jesus, “Amin harianen ha etaw ha duminuun hu madiyù ha banuwa ta daw mailahan diyà hu gahem hu pagkaharì. 13Su hurà pa haena hipanaw inamul-amul din sa sampulù ha sinaligan din daw ilahi hu tigsampulù ha salapì. Inikagiyan din sidan, ‘Ipatigayun nuy haini taman ha makaulì a.’

14“Ba amin mga sakup din ha agsabà kandin aman su humipanaw haena pinalupugan dan hu mga sinugù sa tag-ila kandin hu gahem hu pagkaharì ta daw maikagiyan ha harì dan haena agkabayaan sa etaw ku iyan magharì kandan.

15“Ba bisan pa taena su etaw nailahan gayed hu gahem hu pagkaharì dayun uminulì.

“Su makaulì en haena impaatubang din sa pigpan-ilahan din hu salapì ta daw masusi din ku pila en sa ganansiya.

16“Su sabuwa uminubay diyà ta kandin daw ikagi, ‘Su in-ila nu kanak ha sampulù ha salapì nakaganansiya hu nanggatus.’

17“Inikagiyan din haena, ‘Maayad gayed tungkay sa binuhat nu. Tumenged ta kasaligan ka hu atiyuay dà ha salapì buhaten ku ikaw ha agalen hu sampulù ha banuwa.’

18“Uminubay daan su ikaduwa ha kagi din, ‘Su in-ila nu kanak ha sampulù ha salapì nakaganansiya hu kalimahan.’

19“Inikagiyan taena ha harì, ‘Iyan ka daan agalen hu lalima ha banuwa.’

20“Dayun uminubay daan diyà ta kandin su sabuwa ha kagi din, ‘Taini dà su salapì nu ta bà ku dà binungkusi hu panyù daw iheles. 21Nahaldek a ikaw tumenged ta manlulupig ka ha etaw ta agtimuen nu sa kenà ikaw daw aglegtayen nu daan sa kenà ikaw ha insawed.’

22“Inikagiyan din haena, ‘Buang-buang ka gayed ha sinaligan. Iman sa lalang nu iyan maghukum ikaw hu silut ta natun-an nud man diay ha manlulupig a ha etaw ta agtimuen ku sa kenà kanak daw aglegtayen ku daan sa kenà kanak ha insawed. 23Imbà nu man hurà ibangku hayana sa salapì ku ta daw maisaban ku lumikù a?’

24“Dayun inikagiyan din haena sa tagtiyadeg diyà ta ubay din, ‘Timua nu hayana sa salapì diyan ta kandin daw iila duun taena ha nakatimù hu nanggatus.’

25“Ba uminikagi sidan, ‘Madakel en man sa kandin ha salapì.’

26“Tuminubag haena, ‘Ikagiyen ku inyu ha sa etaw ha amin en kandin mailahan hu tungkay pa gayed madakel, ba saena ha hurà din en hu kandin bisan su iyan-iyan din dà timuen pa gayed haena diyà ta kandin. 27Ba sa mga sakup ku ha migsabà kanak daw harì agkabayà ha iyan a magharì kandan uwita dini ta atubangan ku daw panhimatayi.’”

Sa Pagdiyà Hi Jesus Ta Jerusalem

(Lucas 19:28-40; Mateo 21:1-11; Marcos 11:1-11; Juan 12:12-19)

28Su makapenga si Jesus mag-ikagi duminayun hu paghipanaw payanaen ta Jerusalem. 29Su ubay en diyà ta Betpage daw ta Betania diyà ta Buntud ta Ulibu sinugù hi Jesus sa daruwa ha tinun-an din 30ha tagyanaen, “Umuna kaw en diyà tayà ha banuwa. Ku makauma kaw diyà maahà nuy sa intagkes ha nati hu asnu ha harì pa gayed agkalulanan. Hukada nuy daw tuyuka dini. 31Ku amin manginginsà inyu, ‘Imbà nuy hayana agtimua?’ ikagiya nuy, ‘Agkinahanglanen haini hu Ginuu.’”

32Dayun huminipanaw haena sa sinugù daw natuman gayed sa alan ha inikagi hi Jesus. 33Su taghukaden dan en sa hiket taena ha nati hu asnu nanginginsà su tag-iya, “Imbà nuy aghukada sa hiket tayan ha nati hu asnu?”

34Ba tuminubag sidan, “Agkinahanglanen haini hu Ginuu.”

35Tinuyuk dan su nati hu asnu diyà ki Jesus daw binalhenan dan haena hu mga bisti dan dayun impalulan dan si Jesus duun. 36Su tagdiyà en si Jesus ta Jerusalem binukladan hu mga etaw hu mga bisti dan sa dalan ha ag-agiyan hi Jesus.

37Su tagtubang en say Jesus diyà ta Buntud ta Ulibu sa mga etaw ha sumusunud din nangalipay, aman nangulahì sidan hu pagdayè hu Dios tumenged hu mga belenganen ha naahà dan ha binuhat hi Jesus hu kagi dan,

38“Panalanginan gayed sa Harì ha nakauma ha sinugù hu Dios. Malinawen iman sa pagdapità hu Dios daw hu mga etaw aman dayeen gayed sa Dios diyà ta langit.”

39Amin diyà duma ha mga Parisiyu ha minikagi diyà ki Jesus, “Manunudlù, baldenga hayan sa mga sumusunud nu.”

40Ba tinubag sidan hi Jesus, “Ikagiyen ku inyu ha ku harì mag-ikagi sa mga etaw iyan en haini sa mga batu magdayè kanak.”

Sa Kahid-u Hi Jesus Hu Mga Taga-Jerusalem

41Su matan-aw hi Jesus sa banuwa ta Jerusalem inagalaan din haena 42ha tagyanaen, “Maayad ngaay ku matun-an nuy sa paagi ha magmalinawen kaw ba iman nakalilung haena inyu. 43Makauma sa panahun ha libutan kaw hu mga kuntra nuy daw hurà en inyu makapulaguy. 44Panhimatayan kaw kandan daw sa mga batà nuy daw pandaeten dan sa alan ha mga balay nuy tumenged ta hurà nuy kakilala sa Ginuu ha migdini hu pagluwas inyu.”

Sa Pagseled Hi Jesus Ta Timplu

(Lucas 19:45-48; Mateo 21:12-17; Marcos 11:15-19; Juan 2:13-22)

45Sumineled si Jesus diyà ta Timplu daw pan-abuga sa mga tagbabaligyà diyà. 46Inikagiyan din sidan, “Nakasulat en sa lalang hu Dios ha tagyanaen, ‘Sa Timplu ku iyan alampuanan.’ Ba saini binuhat nuy ha kampu hu mga tulisan.”

47Si Jesus aldaw-aldaw migtudlù duun hu Timplu. Ba sa mga labaw ha sinaligan hu paghalad daw sa mga manunudlù hu Kasuguan daw sa duma ha mga agalen nan-ahà hu paagi ha mapatay dan si Jesus, 48ba harì dan pa haena agkahimu ta sa mga etaw agkabayà-bayà gayed tagpaliliman hu pagtudlù din.

Currently Selected:

Lucas 19: bkd

Highlight

Copy