Lucas 2

Sa Kabataa Ki Jesus

(Lucas 2:1-7; Mateo 1:18-25)

1Duun taena ha panahun ha iyan si Cesar Agusto Harì ta Roma migsugù haena ha listahen sa mga ngaran hu alan ha mga ginsakupan din. 2Iyan haini una ha pagpanlista daw iyan si Cirenio gubirnadur diyà ta Siria. 3Aman sa alan ha mga etaw duminuun hu banuwa hu mga gin-apuan dan hu pagpalista.

4Si Jose sa diyà napuun ta Nazareth ha sakup ta Galilea duminiyà daan ta Bethlehem ha sakup ta Judea ta sa Bethlehem iyan banuwa ha duun imbatà si David sa gin-apuan din. 5Dinuma din si Maria sa tag-asawahen din ha tagkabedes en. 6Su diyà en sidan ta Bethlehem iyan en daan haena panahun ha magbatà si Maria. 7Aman migbatà haena hu maama ha iyan kamagulangan ha batà din. Binungkusan din haena hu manggad daw iugsak duun hu balahugà hu mananap ta napunù en sa mga balay ha hulabungà.

Sa Magbalantay Hu Karniru Daw Sa Mga Balinsuguen Hu Dios

8Amin mga magbalantay hu mga karniru ha tagbantay su daleman duun hu panabtabà ha ubay diyà ta Bethlehem. 9Nakahiwal diyà ta kandan sa balinsuguen hu Dios daw nailawan sidan hu anlag hu Dios aman nangahaldekan gayed sidan. 10Ba inikagiyan sidan taena ha balinsuguen hu Dios, “Harì kaw agkangahaldek ta duminini a hu pagsangyaw inyu hu maayad ha tultulanen ha makapalipay hu kaet-etawan. 11Diyà iman ta Bethlehem sa banuwa hi David imbatà en sa Manluluwas hu kaet-etawan ha iyan si Cristo ha Ginuu. 12Sa timaan ha iyan en haini ta maahà nuy su batà ha binungkusan hu manggad daw in-ugsak duun hu balahugà hu mananap.”

13Tigkan daan nakahiwal sa madakel ha mga balinsuguen ha tagdayè hu Dios ha tagyanaen,

14“Dayeen gayed sa Dios diyà ta langit daw magmalinawen sa mga etaw ha pakapalipay hu Dios dini ta kalibutan.”

15Su lumikù en diyà ta langit sa mga balinsuguen su mga magbalantay hu mga karniru miglalang-lalang hu kagi dan, “Dumiyà kuy ta Bethlehem ta daw maahà taw haena sa impadayag kanuy hu Dios.”

16Aman uminagpas sidan hu paghipanaw daw naahà dan si Maria daw si Jose daw su batà ha in-ugsak duun hu balahugà. 17Su maahà dan haena inikagi dan dayun sa intultul kandan hu balinsuguen mahitenged taena ha batà. 18Nangabeleng sa mga etaw ha nakapaliman taena ha inikagi hu mga magbalantay hu karniru. 19Ba si Maria taghenhenaay gayed taena ha naul-ulahan. 20Naman-ulì su mga magbalantay hu karniru ha tagdayè hu Dios ta sa inikagi kandan hu balinsuguen natuman gayed.

Sa Pagsirkunsida Ki Jesus

21Su makauma sa ikawalu ha aldaw pigpasirkunsidahan su batà dayun pigngaranan haena hu Jesus ta iyan haena ngaran ha in-ila hu balinsuguen hu Dios su hurà pa kabedes si Maria.

Sa Paghalad Ki Jesus Duun Hu Dios

22Su mauma sa panahun ha si Jose daw si Maria tagtuman hu tulumanen hu paglimpyu sumalà hu Kasuguan hi Moises inuwit dan si Jesus diyà ta Jerusalem daw ihalad duun hu Dios, 23ta nakasulat en duun hu Kasuguan hu Dios ha tagyanaen, “Ku maama sa kamagulangan ha batà kinahanglan gayed ha ihalad duun hu Dios.” 24Amin daan inhalad hi Jose daw hi Maria ta nakasulat en duun hu Kasuguan hu Dios ha tagyanaen, “Kinahanglan ha amin daruwa ha limuken daw ku salapati ba sa ihalad.”

25Amin etaw diyà ta Jerusalem ha tagngaranan ki Simeon saena matareng daw masinimbahen daw tag-angatà hu paglibriya hu mga kaliwatan hi Israel. Inulinan haena hu Balaan ha Ispiritu 26aman impadayag kandin ha daw en haena patay ku maahà din en sa Misiyas ha sinugù hu Dios. 27Su uwiten hi Maria daw hi Jose si Jesus diyà ta Timplu hu pagtuman hu tulumanen dan didiyà en daan si Simeon ta impadiyà haena hu Balaan ha Ispiritu. 28Su maahà en hi Simeon su batà sinapnay din haena daw dayea sa Dios 29ha tagyanaen,

“Dios ha Magbabayà hu alan, tinuman nu gayed sa insaad nu kanak. Iman malinawen en sa henà-henà ku aman timuen ad ikaw, 30ta naahà kud en sa impadini nu ha Manluluwas 31ha pig-andam nu ta daw malibri sa alan ha kaet-etawan. 32Iyan haini makailaw hu henà-henà hu kenà mga Judio ta daw matulen dan sa kamatuuran, daw pinaagi kandin sikay sa mga kaliwatan hi Israel madayè daan hu kaet-etawan.”

33Si Jose daw si Maria nabeleng taena ha inikagi hi Simeon mahitenged ku batà dan. 34Dayun inampuan sidan hi Simeon daw ikagiyi si Maria, “Saini ha batà nu pinilì hu Dios daw iyan haini hinengdan ha sa kaliwatan hi Israel amin duun maluwas daw sa duma masilutan daan. Amin mga timaan ha saini sinugù hu Dios ba tameyesen hu madakel ha mga etaw 35ta pinaagi kandin madayag sa mga madaet ha henà-henà dan. Maglugul ka gayed mahitenged kandin ta saini kuntrahen hu kaet-etawan.”

36-37Amin daan bahi ha pakasaysay hu igpaikagi hu Dios ha tagngaranan ki Ana sa batà hi Panuel ha kaliwat hi Aser. Saena pitu dà ha tuig sa kaasawa din na nabalu en na iman laas en ta kawaluwan en daw haepat sa tuig din. Aldaw daw ku daleman diyà dà haena tagtimaay ta Timplu hu pagsimba daw amin daan panahun ha agsalang hu pagkaen ta daw harì maelangan sa pag-ampù din. 38Su diyà pa say Jose duminiyà si Ana ta kandan. Pigpasalamatan din sa Dios mahitenged taena ha batà dayun impadayag din duun hu mga etaw ha nakauma en sa makalibri hu mga kaliwatan hi Israel ha tagsalapen dan.

39Su matuman en hi Jose daw hi Maria sa alan sumalà hu Kasuguan hu Dios, uminulì sidan duun hu banuwa dan ta Nazareth ha sakup ta Galilea. 40Uminadagi daw mabis-ay si Jesus, matatau daan tungkay daw pigpanalanginan hu Dios.

Sa Pagpan-ahà Ki Jesus Hu Mga Laas Din

41Kada tuig agdiyà sa mga laas hi Jesus ta Jerusalem hu pagsaulug taena ha Aldaw hu Paglabay. 42Su sampulù en daw daruwa sa tuig hi Jesus alan sidan duminiyà ta Jerusalem sumalà hu naanadan dan. 43Su maiwas en sa pagsaulug naman-ulì su mga laas hi Jesus ba hurà dan katun-i ha si Jesus migpatabun diyà ta Jerusalem. 44Tumenged ta madakel sidan sa taghipanaw abi dan ha nakaduma en si Jesus kandan. Ba su nangkaaldaw en sa kahipanaw dan pinan-ahà dan si Jesus duun hu mga kadumahan daw mga amigu dan. 45Ba hurà dan gayed katulen aman luminikù sidan diyà ta Jerusalem hu pagpan-ahà kandin. 46Su ikatulu en ha aldaw human dan naahà si Jesus ha tagpinuuwà diyà ta Timplu duma hu mga manunudlù ta tagpalilimanà daw tagpanginginsaay kandan. 47Sa alan ha nakapaliman kandin nangabeleng gayed hu pagsabut hi Jesus daw hu pagpanubag din. 48Su maahà en haena hi Jose daw hi Maria nangabeleng gayed sidan. Aman inikagiyan hi Maria, “Imbà nu buhata haini dini ta kanay ta sikay ki Jose nasamukan gayed hu pagpan-ahaay ikaw?”

49Ba tuminubag si Jesus, “Imbà a inyu tagpan-ahaaya? Hurà nuy ba diay katun-i ha kinahanglan ha dini a gayed taini ha balay hu Amay ku?” 50Ba hurà dan kasabut sa kahulugan taena ha inikagi hi Jesus.

51Dayun duminuma si Jesus diyà ta Nazareth daw migmatinumanen gayed kandan, ba taghenhenaayen gayed haena hi Maria. 52Mig-iseg gayed sa katatau hi Jesus daw uminadagi daan ha nakapalipay hu Dios daw hu mga etaw.

Currently Selected:

Lucas 2: bkd

Highlight

Copy