Mateo 26

Sa Paglalang-lalang Hu Kadakepa Ki Jesus

(Mateo 26:1-5; Marcos 14:1-2; Lucas 22:1-2; Juan 11:45-53)

1Su makapenga en si Jesus magtudlù inikagiyan din sa mga tinun-an din, 2“Natun-an nuy ha makaduwa iman iyan en pagsaulug hu Aldaw hu Paglabay daw siak sa Batà hu Etaw itugyan a duun hu mga etaw ta daw makalansang a kandan duun hu krus.”

3Mig-amul-amul sa mga labaw ha sinaligan hu paghalad daw sa mga magulang duun hu balay hi Caifas sa tungkay labaw ha sinaligan hu paghalad 4daw miglalang-lalang sidan ku in-inuwen dan sa pagdakep ki Jesus ha harì matun-an hu mga etaw ta daw mapatay dan. 5Ba minikagi sidan, “Harì taw dakepen duun hu pagsaulug ta kan ku magubut sa mga etaw.”

Sa Paghudhud Hu Pahumut

(Mateo 26:6-13; Marcos 14:3-9; Juan 12:1-8)

6-7Su tagkaen si Jesus diyà ta Betania duun hu balay hi Simon ha sanglahen su anay amin bahi ha uminubay diyà ki Jesus. Saena ha bahi tag-uwit hu pahumut ha tungkay mahal ha intagù duun hu butilya ha alabastru dayun inhudhud din haena diyà ta ulu hi Jesus.

8Ba su maahà hu mga tinun-an din napauk gayed sidan ha tagyanaen, “Imbà din bà dà kalkali hayana sa pahumut? 9Maayad pa ngaay ku imbalegyà hayana hu tungkay mahal daw sa halin din in-ila duun hu mga makaluluuy.”

10Ba natun-an hi Jesus sa tagsubayen dan aman inikagiyan din sidan, “Imbà nuy agsamuka haini sa bahi? Sa binuhat din dini ta kanak madagway tungkay. 11Sa mga makaluluuy sigi dà diyan ta inyu ba siak harì ad en maglugay dini ta inyu. 12Binuhat din haini dini ta kanak hu pagpangandam hu kalebenga kanak. 13Laus gayed sa ag-ikagiyen ku inyu ha bisan hindu asem duun isangyaw sa Maayad ha Tultulanen dini ta tibuuk ha kalibutan sa binuhat taini ha bahi harì gayed malipatan daw itultul daan.”

Sa Paagi Hu Kadakepa Ki Jesus

(Mateo 26:14-16; Marcos 14:10-11; Lucas 22:3-6)

14Si Judas Iscariote sa sabuwa duun hu sampulù daw daruwa ha tinun-an duminuun hu mga labaw ha sinaligan hu paghalad 15daw nanginginsà, “Pila sa isuhul nuy kanak ku itugyan ku diyan ta inyu si Jesus?” Sagunà dan haena inilahan hu katluan ha salapì. 16Sugud taena nan-ahà si Judas hu paagi ha makatugyan din si Jesus diyà ta kandan.

Sa Pagsaulug Hi Jesus Duma Hu Mga Tinun-an Din

(Mateo 26:17-25; Marcos 14:12-21; Lucas 22:7-14, 21-23; Juan 13:21-30)

17Su mauma en sa panahun ha agsaulugen sa Pagkaen hu Supas ha Hurà Duun Igpatulin nanginginsà sa mga tinun-an diyà ki Jesus, “Hindu sa agkabayaan nu ha elegan day hu pagpangandam hu igpanihapun taw hu pagsaulug?”

18Tuminubag si Jesus, “Dumuun kaw hu sabuwa ha etaw diyà ta banuwa daw ikagiyi nuy, ‘Sa Manunudlù tag-ikagi ha ubay en sa natugun ha panahun ha matay aman agpanihapun hu pagsaulug duma hu mga tinun-an din diyà ta balay nu.’” 19Binuhat hu mga tinun-an sa insugù kandan hi Jesus dayun nangandam sidan hu pagkaen taena ha pagsaulug.

20Su daleman en mininuu si Jesus daw sa mga tinun-an din hu pagkaen. 21Su kamulu pa sidan tagkaen inikagiyan sidan hi Jesus, “Laus gayed sa ag-ikagiyen ku inyu ha sa sabuwa inyu iyan maglimbung kanak.”

22Nangaguul gayed su mga tinun-an din aman sa kada sabuwa kandan nanginginsà, “Ginuu, iyan a ba?”

23Tuminubag si Jesus, “Iyan sa sabuwa diyan ta inyu ha nakigsalu kanak. 24Siak sa Batà hu Etaw matay a gayed sumalà hu insulat ha lalang hu Dios mahitenged kanak. Ba kahid-u gayed hu etaw ha maglimbung kanak. Maayad pa ngaay ku hurà en haena ibatà.”

25Dayun minikagi si Judas sa miglimbung kandin, “Manunudlù, iyan a ba?”

Tuminubag si Jesus, “Sa inikagi nu na iyan en.”

Sa Panihapun Hu Ginuu

(Mateo 26:26-30; Marcos 14:22-26; Lucas 22:15-20; 1 Corinto 11:23-25)

26Su kamulu pa sidan tagkaen tuminimù si Jesus hu supas daw ampui. Dayun pinangebing din haena daw ipan-ila duun hu mga tinun-an din ha tagyanaen, “Timua nuy haini daw kan-a ta iyan en haini lawa ku.”

27Dayun tinimù din sa tasa daw ampui daan haena. In-ila din diyà ta kandan, kagi din, “Alan kaw inum duun 28ta iyan en haini langesa ku ha igpamalas hu mga salà hu kaet-etawan ha iyan timaan hu bag-u ha kasabutan hu Dios daw hu kaet-etawan. 29Ikagiyen ku inyu ha daw ad en asem isab ag-inum hu bag-u ha binu duma inyu ku magharì en sa Dios ha Amay ku.”

30Su makagkanta en sidan hu pagdayè hu Dios duminiyà sidan ta Buntud ta Ulibu.

Sa Pag-ikagi Hi Jesus Mahitenged Hu Paglimud Hi Pedro

(Mateo 26:31-35; Marcos 14:27-31; Lucas 22:31-34; Juan 13:36-38)

31Inikagiyan hi Jesus su mga tinun-an din, “Alan kaw sumuway kanak taini ha daleman ta sa insulat ha lalang hu Dios tagyanaen, ‘Aghimatayan ku sa magbalantay daw makagsusuwayà sa mga karniru.’ 32Ba ku mabanhaw ad umuna a inyu diyà ta Galilea.”

33Minikagi si Pedro, “Bisan ku sumuway ikaw sa duma ba harì a gayed hu kanak.”

34Ba inikagiyan hi Jesus, “Laus gayed sa ag-ikagiyen ku ikaw ha taini ha daleman sa harì pa managauk sa manuk katatulu kad en makaikagi ha harì a ikaw agkakilala.”

35Tuminubag si Pedro, “Bisan pa ku himatayan a duma ikaw ba harì ku gayed hayana ikagiyen.” Iyan daan haena inikagi hu alan ha mga tinun-an hi Jesus.

Sa Pag-ampù Hi Jesus Diyà Ta Getsemane

(Mateo 26:36-46; Marcos 14:32-42; Lucas 22:39-46)

36Si Jesus daw sa mga tinun-an din duminuun hu lugar ha tagngaranan ta Getsemane daw inikagiyan din sidan, “Dini kaw dà taini magpinuu ta agdayun a diyà ta unahan hu pag-ampù.” 37Dinuma din si Pedro daw sa daruwa ha batà hi Zebedeo. Suminakit gayed sa gahinawa din hu kalugul 38aman inikagiyan din sidan, “Miglabay gayed kasakit sa gahinawa ku ha bà su agkabugtù en. Dini kaw dà daw magbantay kaw duma kanak.”

39Su makadiyà en si Jesus ta unahan luminuhud daw dunghuy diyà ta bugtà ha mig-ampù ha tagyanaen, “Amay ku, ku mabaluy ngaay harì a ikaw ipaagi duun taini ha mga alantusen. Ba iyan sa ikaw ha pagbayà matuman kenà iyan sa kanak.”

40Dayun linikuan hi Jesus su tatulu ha tinun-an din ba naahà din ha tagtidugahà en sidan. Aman inikagiyan din si Pedro, “Imbà kaw harì pakagbantay bisan ngaay nangkauras dà? 41Magbantay kaw gayed daw mag-ampù ta daw harì kaw madaeg hu panulay. Agkabayà ngaay sa henà-henà nuy ba maluya kaw.”

42Luminikù dà paman si Jesus daw mig-ampù ha tagyanaen, “Amay ku, ku mabaluy ngaay harì a ikaw ipaagi duun taini ha mga alantusen. Ba iyan sa ikaw ha pagbayà matuman kenà iyan sa kanak.”

43Su likuan din dà su mga tinun-an din naahà din ha tagtidugahà gihapun ta harì gayed sidan pakaantus. 44Aman inawaan din sidan daw luminikù en paman hu ikatulu ha mig-ampù iling ku nauna.

45Dayun linikuan din dà paman sa mga tinun-an din daw ikagiyi sidan, “Tagtidugahà kaw pa ba diay? Ahaa nuy, iyan en haini panahun ha siak sa Batà hu Etaw itugyan ad en duun hu mga makasasalà ha etaw. 46Bangun kaw ta aghipanaw kuy en. Ahaa nuy, taini en sa etaw ha taglimbung kanak.”

Sa Kadakepa Ki Jesus

(Mateo 26:47-56; Marcos 14:43-50; Lucas 22:47-53; Juan 18:3-12)

47Su kamulu pa tag-ikagi si Jesus nakauma en sa sabuwa duun taena ha sampulù daw daruwa ha tinun-an ha iyan si Judas duma hu madakel ha mga etaw ha tag-uuwit hu mga ispada daw mga bunal ta sinugù sidan hu mga labaw ha sinaligan hu paghalad daw hu mga magulang. 48Amin timaan ha inikagi kandan hi Judas ha tagyanaen, “Sa hadekan ku iyan en haena aman dakepen nuy dayun.” 49Sagunà inubayan hi Judas si Jesus daw ikagiyi, “Manunudlù” dayun hinadekan din.

50Tuminubag si Jesus, “Agpasa en sa agbuhaten nu.”

Dayun si Jesus dinakep ku mga etaw. 51Ba sa sabuwa duun hu mga tinun-an hi Jesus duminagtù hu ispada din daw tigbasa sa suluguen hu tungkay labaw ha sinaligan hu paghalad aman nalapungan haena.

52Ba inikagiyan hi Jesus su tinun-an, “Isakeb hayana sa ispada nu ta sa tag-ibit hu ispada ispada daan sa igpatay din. 53Hurà nu ba katun-i ha ku magpabulig a hu Dios ha Amay ku sagunà din dà ipadini sa libu-libuwen ha mga balinsuguen din? 54Ba ku buhaten ku haena harì gayed matuman sa insulat ha lalang hu Dios.”

55Dayun inikagiyan hi Jesus su mga etaw, “Agalen a ba hu mga tulisan imbà kaw tag-uuwit hu mga ispada daw mga bunal hu pagdakep kanak? Aldaw-aldaw migpinuu a diyà ta Timplu daw nanudlù, imbà a hurà inyu dakepa diyà? 56Ba saena nahitabù ta daw matuman sa insulat hu mga prupita.” Dayun inawaan si Jesus hu mga tinun-an din ta nangakapulaguy sidan.

Sa Pagbistiga Ki Jesus Hu Mga Agalen Hu Mga Judio

(Mateo 26:57-68; Marcos 14:53-65; Lucas 22:54-55, 63-71; Juan 18:13-14, 19-24)

57Inuwit si Jesus ku mga etaw ha migdakep kandin diyà ta balay hi Caifas sa tungkay labaw ha sinaligan hu paghalad ta diyà en tag-amul-amul sa mga manunudlù hu Kasuguan daw sa mga magulang. 58Si Pedro taglupug daan kandan ba madiyù dà daw diyà dà nataman ta lama. Uminamul haena duun hu mga bantay ha tagpinuu diyà ta ag-ahaen din ku inu sa maul-ulahan hi Jesus.

59Sa mga labaw ha sinaligan hu paghalad daw sa alan ha duma dan ha mga labaw ha agalen hu mga Judio nan-ahà gayed hu mga bidù ha katarengan ta daw mahimatayan dan si Jesus. 60Ba hurà dan gayed agkaahà ha katarengan bisan ku madakel en sa nanistigus.

Su malugay-lugay amin daruwa ha 61minikagi, “Sayana ha etaw agkagasen din kun haini sa Timplu hu Dios ba duun hu tatulu ha aldaw agbalayen din dà.”

62Dayun huminitindeg su tungkay labaw ha sinaligan hu paghalad daw insai si Jesus, “Inu sa makatubag nu taini ha sumbung dan ikaw?” 63Ba si Jesus hurà en magtubag.

Minikagi dà paman su tungkay labaw ha sinaligan hu paghalad, “Duun hu atubangan hu Dios ha bubuhay ipanumpà nu daw ikagiyi kay ku iyan kad ba su Misiyas ha Batà hu Dios.”

64Tuminubag si Jesus, “Iyan ad en su inikagi nu. Ba ikagiyen ku inyu ha siak sa Batà hu Etaw maahà a asem inyu ha minuu a duun hu kawanan taena ha gamhanan ha Dios daw maahà a daan inyu ha makabulus diyà tayà ha gabunan.”

65Su mapaliman haena hu tungkay labaw ha sinaligan hu paghalad pigyahà din su pinaksuy din ta tungkay napauk ha tagyanaen, “Hurà en kinahanglan ha amin pa manistigus ta napaliman taw en sa lalang din ha pigpasipalahan din gayed sa Dios. 66Inu man sa inyu ha henà-henà?”

Tuminubag sa mga etaw, “Angayan hayan ha silutan hu kamatayen.”

67Dayun inileban dan sa weleng hi Jesus daw sinumbag dan. Sa duma miglaparu kandin 68daw minikagi, “Sikaw sa Misiyas, tagnai ku sin-u kanay sa miglaparu ikaw.”

Sa Paglimud Hi Pedro

(Mateo 26:69-75; Marcos 14:66-72; Lucas 22:56-62; Juan 18:15-18, 25-27)

69Su tagpinuu si Pedro diyà ta lama amin bahi ha suluguen ha uminubay diyà ta kandin daw ikagiyi, “Iyan ka man diay duma hi Jesus ha taga-Galilea.”

70Ba duun hu atubangan taena ha mga etaw miglimud si Pedro, “Harì ku agkatun-an ku inu sa tagsubayen nu.”

71Dayun guminuwà si Pedro payanaen diyà ta pultahan. Amin lain en paman ha bahi ha nakaahà kandin daw minikagi duun hu mga etaw diyà, “Iyan haini duma hi Jesus ha taga-Nazareth.”

72Ba si Pedro miglimud en paman daw nanumpà, kagi din, “Harì ku agkakilala ku sin-u hayana.”

73Su malugay-lugay inikagiyan si Pedro ku mga etaw ha tagtiyadeg diyà, “Duma ka gayed tayaa ta agkatun-an ta duun hu inikagiyan nu.”

74Nanumpà gayed si Pedro, kagi din, “Harì ku agkakilala ku sin-u hayana.”

Dayun tuminagauk sa manuk. 75Sagunà nahenhenaan hi Pedro sa inikagi hi Jesus kandin, “Ku harì pa managauk sa manuk katatulu kad en makaikagi ha harì a ikaw agkakilala.” Aman guminuwà si Pedro daw mag-agalaay.

Currently Selected:

Mateo 26: bkd

Highlight

Copy