Marcos 12

Sa Sanglitanan Mahitenged Hu Mga Tag-alima Hu Parasan

(Marcos 12:1-12; Mateo 21:33-46; Lucas 20:9-19)

1Minikagi si Jesus pinaagi hu mga sanglitanan ha tagyanaen, “Amin etaw ha amin din uma ha pinamulahan din hu paras. Linibut din haena hu alad daw migbangbang hu pangemesà hu mga bunga daw miglawig daan hu timaay taena ha mga tag-alima duun. Dayun pinaalimahan din haena daw pahiphipanaw duun hu madiyù ha banuwa. 2Su bungahan en su paras sinugù din sa sabuwa ha suluguen, duun ku mga sinaligan ha tag-alima hu parasan ta daw matimù taena sa kandin ha bahin. 3Ba su sinugù din bà dà dinakep ku mga sinaligan daw pagbunalai dayun impaulì ha hurà din uwiten. 4Aman sinugù dà paman sa lain ha suluguen ba bà dan dà daan binunali sa ulu taena daw pagagayhai. 5Dayun impalupug ku tag-iya ku uma sa ikatulu ha suluguen ba bà dan dà daan haena hinimatayi. Amin pa gayed madakel ha sinugù din, sa duma duun binunalan dan daw sa duma hinimatayan dan.

6“Sa nasamà ha agkasugù iyan dà su pinalanggà din ha batà. Aman sinugù din haena diyà ta nakahenà-henà, ‘Tahuran dan gayed haini tumenged ta batà ku.’

7“Ba su maahà haena ku mga sinaligan miglalang-lalang sidan, ‘Iyan en haini batà hu tag-iya. Himatayan taw ta daw maangken taw en haini sa parasan dan.’ 8Aman inuwit dan daw himatayi dayun inlambeg dan diyà ta guwà taena ha parasan.

9“Inu man sa buhaten taena ha tag-iya duun ku mga sinaligan din? Elegan din gayed sidan daw panhimatayi daan, dayun su parasan paalimahan din hu lain ha mga sinaligan. 10Hurà nuy ba kabasa sa lalang hu Dios ha tagyanaen,

‘Sa batu ha bà dà inlambeg ta abi hu mga tagbalay ha hurà din pulus iyan diay mahinengdanen ta iyan man pakapalig-en hu balay. 11Belenganen gayed haena ta iyan sa Dios migbuhat duun.’”

12Dayun nan-ahà sa mga agalen hu paagi hu pagdakep ki Jesus ta natun-an dan ha iyan en sidan tagsubayen ku sanglitanan. Ba nahaldek daan sidan hu kaet-etawan aman inawaan dan haena.

Sa Pagbayad Hu Buhis Diyà Ki Harì Cesar

(Marcos 12:13-17; Mateo 22:15-22; Lucas 20:20-26)

13Amin mga Parisiyu daw mga sakup hi Herodes ha sinugù diyà ki Jesus hu pagpanginginsà kandin ta daw amin maikagi hi Jesus ha ikasumbung dan kandin. 14Su makauma su mga sinugù inikagiyan dan si Jesus, “Manunudlù, natun-an day ha matareng ka gayed. Harì ka agkauwit hu mga henà-henà hu mga etaw ta hurà nu kandan igpalabi daw iyan nu dà tigtudlù sa kamatuuran mahitenged hu Dios. Aman ikagiyi kay ikaw ku igtugut ba hu Kasuguan taw ha magbayad kuy hu buhis diyà ki Cesar.”

15Ba natun-an hi Jesus ha bà dà sidan tagpasibù-sibù aman inikagiyan din sidan, “Imbà a inyu tagsulay-sulaya? Ipaahà kanak sa salapì ha igbayad nuy hu buhis.” 16Inuwit dan su salapì dayun ininsaan sidan hi Jesus, “Sin-u ha weleng daw ngaran sa nakaugsak duun taini ha salapì?”

Tuminubag sidan, “Iyan si Cesar sa Harì ta Roma.”

17Inikagiyan sidan hi Jesus, “Ku kandin diay haini kinahanglan ha iila nuy diyà ki Cesar sa buhis daw iila nuy daan duun hu Dios sa kandin ha bahin.”

Su mapaliman dan haena tungkay sidan nangabeleng.

Sa Katudluanan Mahitenged Hu Pagkabanhaw

(Marcos 12:18-27; Mateo 22:23-33; Lucas 20:27-40)

18Amin mga Saduceo ha duminiyà ki Jesus. Saini ha mga etawa harì agtuu ha mabanhaw sa etaw aman inikagiyan dan si Jesus, 19“Manunudlù, sa Kasuguan hi Moises tagyanaen, ‘Ku matay sa maama ba hurà pa sidan pamatà ki igbahi din kinahanglan ha sa suled taena ha maama asawahen din su nabalu ta daw ku magbatà sidan kaliwat pa haena ku suled din ha minatay.’ 20Su anay amin dini pitu ha migsusuled ha pulus maama. Sa kamagulangan kandan nangasawa ba hurà pa sidan pamatà na minatay en. 21-22Aman inasawa ku manghud din su nabalu. Ba saena ha maama hurà en daan sidan pamatà na minatay en daan hangtud ha su migsusuled alan nakaasawa ku bahi ba alan daan minatay. Dayun minatay daan su bahi. 23Ku mabanhaw asem sa namamatay sin-u man sa laus ha igmaama ku bahi sa pulus en man nakaasawa kandin su pitu ha migsusuled?”

24Ba inikagiyan sidan hi Jesus, “Maal en sa tag-ikagiyen nuy tumenged ta hurà nuy katun-i sa insulat ha lalang hu Dios daw sa pagkagamhanan din. 25Asem ku mabanhaw en sa mga namamatay agkailing sidan hu mga balinsuguen hu Dios diyà ta langit ha harì en agpangasawa. 26Mahitenged hu pagkabanhaw taena ha mga minatay hurà nuy ba diay kabasa sa insulat hi Moises ha inikagi kandin hu Dios duun taena ha tagkalegdeg ha sampinit ha tagyanaen, ‘Iyan a Dios ha tagsimbahen hi Abraham daw hi Isaac daw hi Jacob.’ 27Kenà haena Dios hu mga minatay ba Dios hu mga bubuhay, aman maal en gayed sa tag-ikagiyen nuy.”

Sa Tungkay Labaw Ha Sugù

(Marcos 12:28-34; Mateo 22:34-40; Lucas 10:25-28)

28Amin manunudlù hu Kasuguan ha nakapaliman ha tagsawalà si Jesus daw sa mga Saduceo. Su matun-an din ha maayad sa intubag hi Jesus diyà ta kandan nanginginsà daan haena, “Inu man sa labaw gayed duun hu alan ha Kasuguan?”

29Si Jesus tuminubag, “Sa labaw ha sugù iyan haini, ‘Sinyu sa mga kaliwatan hi Israel, magpaliliman kaw. Sabuwa dà gayed sa Magbabayà ha iyan Dios taw 30aman palanggaa nuy gayed sa Dios ha Magbabayà nuy.’ 31Sa ikaduwa iyan haini, ‘Palanggaa sa mga duma nuy iling hu pagpalanggà nuy hu kaugalingen nuy.’ Hurà en gayed labaw pa ha sugù dì taini.”

32Su manunudlù hu Kasuguan tuminubag, “Laus gayed sa inikagi nu ha sabuwa dà sa Magbabayà ha iyan Dios taw daw hurà en gayed lain. 33Sa pagpalanggà taw hu Dios daw sa pagpalanggà hu mga duma taw iling hu pagpalanggà hu kaugalingen taw labaw pa dì hu nasunug ha mananap ha inhalad daw hu duma pa.”

34Su mapaliman hi Jesus ha maayad gayed sa tubag din inikagiyan din haena, “Apit kad en tagharii hu Dios.” Sugud taena hurà en kandan uminamel hu pagpanginginsà kandin.

Sa Misiyas Ha Kaliwat Hi David

(Marcos 12:35-37; Mateo 22:41-46; Lucas 20:41-44)

35Su tagtudlù pa si Jesus duun ku Timplu, nanginginsà haena, “Imbà agkaikagi hu mga manunudlù hu Kasuguan ha su Misiyas iyan kaliwat hi David? 36Ta si David su ulinan hu Balaan ha Ispiritu nakaikagi ha tagyanaen,

‘Inikagiyan hu Dios sa Ginuu ku, “Dini ka pinuu ta kawanan ku hangtud ha madaeg ku sa mga kuntra nu.”’

37Ku inikagi haena hi David ha Ginuu din su Misiyas, imbà kabuhat din dà paman haena ha kaliwat?”

Sa madakel ha mga etaw malipayen gayed hu pagpaliliman kandin.

Sa Mga Tagpasibù-sibù Ha Mga Etaw

(Marcos 12:38-40; Mateo 23:1-36; Lucas 20:45-47)

38Migtudlù si Jesus ha tagyanaen, “Magbantay kaw taena ha mga manunudlù hu Kasuguan. Tagpaaluahà sidan pinaagi hu mga pinaksuy dan ha magayad daw agkalipay sidan ku tahuran hu mga etaw duun hu baligyaanan. 39Ku diyà sidan ta simbahan iyan dan agkabayaan sa madagway ha pinun-ayà, daw ku duun sidan hu taggastu agkabayaan dan daan ha iyan sidan una igpakaen. 40Aglupigan dan daan sa mga balu ha bahi daw ag-agawen dan sa mga katigayunan taena, dayun agtambunan dan sa madaet ha mga buhat dan pinaagi hu pag-ampù ha malugayad. Tumenged taini adagi gayed sa silut kandan.”

Sa Halad Hu Balu Ha Bahi

(Marcos 12:41-44; Lucas 21:1-4)

41Su tagpinuu si Jesus atbang taena ha talaguay hu halad ha salapì diyà ta Timplu pigbantayan din sa kaet-etawan ha mighalad duun. Amin madakel ha mga sapian ha mighalad hu madakel ha salapì. 42Ba amin daan naahà din ha balu ha bahi ha makaluluuy saena mighulug hu halad din ba daruwa dà ha sintabus.

43Inamul hi Jesus sa mga tinun-an din daw ikagiyi sidan, “Laus gayed sa ag-ikagiyen ku inyu ha sa in-ila taini ha balu labaw pa dì hu inhalad taena ha duma. 44Ta sa inhalad dan subra dà hu mga katigayunan dan, ba saini ha balu bisan ku tungkay makaluluuy ba in-ila din sa iyan-iyan dà ha salapì din.”

Currently Selected:

Marcos 12: bkd

Highlight

Copy